السبت، ٣٠ أغسطس ٢٠٠٨

بعد احداث ابو كبير .. نحاور اصغر معتقل فى السجون المصريه (خاص لسه عايش)

لسه عايش تحاور "اصغر معتقل فى السجون المصريه" بعد خروجه بساعات قليله كنا اول من ينفرد بالحوار
محمد سيد بندارى ذات الـ 12 عاما يحكى بعد احداث ابو كبير :

- شالونى من السرير وانا نايم وجرونى فى الشارع بالفانله الدخليه وسمعت امى بتصوت كله الا محمد
- وكيل النيابه بيسالنى ايه رايك فى النظام ؟ وانا مش عارف نظام ايه فا قالى اللى هو يعنى الحكومة .. قولتله الحكومة بايظه ومافيش نظام اصلا
- وكيل النيابه قعد يلف ويدور حواليا عشان يعرف منى مين اللى زقل طوب وانا احلفله انى كنتى بالعب كوره
- غرفة الاحداث كانت ضلمة اوى .. ورحت للعسكرى اقوله هات لمبه قالى روح يلا بكره نجيبلك كهربائى ..
- عيطت لما شوفت امى
- انا راجل فى تانيه اعدادى مش طفل زى ما انتوا قولتوا عليا فى مواقع النت والجرايد
- حسبنا الله ونعم الوكيل لكل واحد فى المركز


رفض ان يقال عليه طفل فى بداية الحديث معه وقال قولوا عليا بطل ... محمد السيد بندارى البطل الذى يملك من العمر 13 عاما والذى مكث فى غرفة مظلمه ذات شباك حديدى صغير داخل سجن ابو كبير قرابة الـ 28ساعه والذى قضى اغلبها نوم على البلاط او التحقيق فى النيابه او تجرع واحساس بالالم لانه يريد ابيه وامه معه ..
عندما ذهبت لمحمد توقعت انه سيبكى عندما ابدا فى الحديث معه ولكن معنوياته كانت مرتفعه جدا ومن الغريب انه كان يحدثنى بمبدا عادى لأنه توقع هذا الامر خاصة ان ابوه راجل " محترم والناس كلها بتحبه "
نحاور اصغر معتقل فى سجون مصر كلها الان واقرا معى ولا تستعجب ما يقال فانك اذا اردت تعرف سبب اعتقاله فا استعجب !!!

محمد .. انت فى سنه كام ؟
انا رايح تانيه اعدادى .. وراجل اهوه مش طفل زى ما بتقولوا عليا فى مواقع النت والجرايد
قولى بأه اعتقلوك ازاى ؟
جم قبل الفجر كده ولقيت واحد بيشلنى وبيقولى يلا.. شالونى وانا نايم ومش فايق وسمعت صوت لامى وهيا بتقول " مش ممكن يحصل ابنى لأ" لدرجة ان هما كسروا باب البيت كمان وانا مش سمعته وخلعوا باب الشقه بتاعتنا وباردوه مش سمعته كنت نايم بأه ... وبعد كده كملت نوم وهما شايلنى ومسكنى من الفانله زى الحراميه وقعدوا يجرونى فى الشارع لحد لما وصلنا للعربيات البوكس والميركوباصات اللى كانوا محاصرين الحته وركبت فى البوكس وانا مش فايق اصلا ودنيتنى نايم لحد لما وصلت المركز لقيت واحد بيقولى اسمك قولتله اسمى .. كنت لسه صاحى ساعتها بأه من النوم كده قولتله اسمى وبعدين قالى تاريخ ميلادك كام قولتله .. وبعدين فكونى من الكلابش الحديد ودخلونى غرفة الاحداث كانت ضلمة اوى ومافيهاش الا شباك صغير حديد وكان فيه واحد نايم كده فا صحى اول ما دخلت .. واول ما دخلت وقومت واتوضيت وقولتله يجى يتوضى معايا ونصلى الفجر مع بعض الراجل وافق وصليت الفجر معاه وكملت نومى على البلاط وكل شويه اصحى اساله انت صاحى يقولى اه وهو يسالنى انت صاحى اقوله اه كنا بنطمن بعض .. وعلى الظهر كده لقيت واحد بيقول محمد سيد فا المخبر قال انت محمد قولتله اه انا محمد .. رحت فى عربيه ترحيلات كده وشوفت بابا وقالى مش تخاف يا محمد ورحت النيابه و المحامين جابولى اكل وكلت وانا فى النيابه بايد واحده لأن الظابط مش راضى يفك الكلابش باقوله فكه يقولى انا جايلى اوامر .. وكلت بايد واحده ودخلت لوكيل النيابه تالت واحد والمخبر ودانى وكيل النيابه قاله هو ده محمد السيد قاله ياباشا ايوة قاله ده جاى فى ايه .. قاله ده معاهم بارضه ضحك وكيل النيابه ضحك باستخفاف لصغر سنى وفك الكلابش وقالى اقعد يا محمد ... وقعدت بدا باه يسالنى ويقولى
اسمك ايه ؟ .. جاوبته
كنت بتزقل طوب يا محمد على القوة اللى كانت موجوده ؟ لأ انا كنت بالعب كورة والله يا عمو .. وما شفتش قوه ولا بتاع انا سمعت من الناس
وفضل وكيل النيابه يزن ورا دماغى عشان اقوله مين اللى كان بيزقل وانا اصلا كنت بالعب كورة ومش شفت حد بيزقل ...
وسالنى وقالى ... ايه رايك فى النظام ؟
قولتله سعادتك النظام من ناحية ايه ( محمد لم يعرف معنى النظام اللى هو الحكومة واثارت هذه الجمله استغرابا عند محمد )
رد وكيل النيابه النظام اللى هو الحكومة يعنى ...
محمد قاله النظام بايظ ومافيش نظام والدليل على كده القرار بتاع العيش ده
ايه رايك يا محمد فى قانون المرور ؟
جاوبت : حلو عشان السواق يلتزم ..
سالنى ايه رايك فى سياسة التعليم فى البلد ؟
جاوبت : حلو .. اقوله وحش يعنى
قالى بتعرف تمضى ولا هتبصم قولتله امضى ...
وطلعت وفضلت قاعد فى النيابه لحد المغرب وروحت فى عربيه الترحيلات للمركز والاوضه الضلمة التانى ورحت للعسكرى قبل ما يحبسنى عايز لمبه راح جاب لمبه وطلعت اللمبه مسمار والدوايه قلاووظ .. ومش نفعت المهم زعقلى العسكرى وقالى نام يلا وبكره نجيبلك كهربائى ... ورحت نايم من الساعه عشره لحد تانى يوم الصبح وطلعت على الجمعه كده ...
عايز اقولك حاجة بس .. ان مامور المركز والعساكر كانوا متعاطفين معايا جدا وكانوا بيصبرونى لما بيلاقونى زعلان كانوا بيقولولى باذن الله تاخد براءه او اخلاء سبيل
محمد ... عيطت وانت جوا الحجز ؟
عيطت مرتين المرة الاولى وانا داخل فضلت اعيطت وقولت عايز بابا
والمرة التانيه لما شوفت امى وانا فى النيابه جريت عليها وخدتها بالحضن ومش كنت عايز اسيبها ...
اخبار محمود ايه اللى كان معاك ؟
محمود (بطل يملك من العمر 16 عاما ايضا محجوز ) كان صايم وهو اللى قالى مش تخاف بس هو جه بات معايا الليله الاخرانيه بس وربنا معاه الصراحه بعد لما اخد اربع ايام ... ده الدنيا هناك ضلمه اوى
بابا .. حسيت انه كان عايز يقولك حاجة فى اخر مره شوفته فيها ؟
بابا عارف انه سايب راجل فى البيت وانا دلوقتى شايل مسؤوليه امى واخواتى والبيت ..
ايها البطل .. الناس كانوا شايفينك ازاى بعد لما طلعت مجرم يعنى ولا ايه ؟
لأ الكل كان مستغرب والناس كانت تسالنى ايه اللى حصلك يا محمد فى ايه .. وكل لما واحد يقابلنى يقولى فى ايه خير .. لكن الكل هنا فى الشارع خدنى بالحضن وحبونى وحبيتهم اوى ..
تقول ايه لبابا وبابا فى المعتقل دلوقتى ؟
ربنا يصبرك – باذن الله تخرج – حسبنا الله ونعم الوكيل لكل واحد فى المركز

هناك ٨ تعليقات:

sun_of_freedom يقول...

النظام فى العظام وكل سنه وانت طيب على دى حكومة وسلملى على الكوسه والبلطجه وما خفي كان اعظم

دا لومجرم او حرامى فىالدول المتقدم بياخدوا فى عربيه لوحده قاعد معزّ مكرم
مش هنا معملش حاجه وبالمنظر دا
لا ويقولك نلتحق بركب الحضارة اصل بنهايه الحفرة
ويقولك المتهم برئ حتي تثبت ادانته



واى ظلمه وبشاعه وفظاعه
واين ضميركم

ليهم حق يعملوا كدا مع غزة غذا كانوا كدا مع اهل شعبهم


وهننتظر ايه من دا امن ومن دى حكومة دا المتوقع

فاكرين دا جبروت وقوة وعافيه فوق يا امن حكمك مش ىخر المطاف فى حكم ربانى


ولا تحسبن الله غافلا عما يعمل الظالمين


سنرددها دائاما فى كل ظلم يذوقه الشعب المصري من حكومتنا المصريه المبجله


شكوناكى غلي رب عادل
شكوناكى غلي رب عادل
شكوناكى غلي رب عادل

اى نظام تسألون عليه ياسفهاء الوططن يا م استمريتم فى فساده ما تركتم شئ إلا وفعلته

سنخاطبكم بضمير الوطن ولكنكم بعتونا ضمائركم لغبليس ما غن دخلتم في هذا السلك ولكن امتى تفيقون غلى الوعيد الذي ينتظركم بالآخرة


لا تعرفون النار بل نار جهنم اشد

فاجعلوها نصب أعينكم حتى تعرفون كلمة الحق


وإلي الله مرجعكم


نال الشعب منكم المر ونال الظلم ونال ما نال ولكل ظالم نهايه وستردون غلي عالم الغيب والشهادة فينبئكم بما كنتم تفعلون


انظروا غل يالقرون الاولى وغي قوم فرعون وهامود وثمود ونوح وهارون


وَيَوْمَ يَعَضُّ الظَّالِمُ عَلَى يَدَيْهِ يَقُولُ يَا لَيْتَنِي اتَّخَذْتُ مَعَ الرَّسُولِ سَبِيلاً * يَا وَيْلَتَى لَيْتَنِي لَمْ أَتَّخِذْ فُلاناً خَلِيلاً ﴾ [الفرقان:27 - 28] .


حقا انت بطل يا محمد ويشهد لك التاريخ ويخلد لك هذا العمل وتكون نبراس لكل ظالم خائن


قال تعالى: مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلًا

جعله الله في ميزان حسناتك وجعل منك من يحررها من فسادها

ويا خزى وعار على تلك الحكومة ولكن سحقا لكى

طلاب من أجل مصر يقول...

حسبنا الله ونعم الوكيل

على كل الظالمين

دى مش حكومه دى شوية حرميه بيسروق

وينهبوا فى البلد وعوزين يدمروا اى

حد بيقول الحق او يقول ضدهم حاجه

محمد الشوادفي يقول...

محمد انت سبب خراب البلد ، ولازم تعرف ان انت أكبر ارهابي في البلد ومتتخفاش في شكل واحد صغير .

محمد احنا كلبشناك عشان خوفنا لتطلع قنبلة من جيبك احنا مش شايفينها تفجر بيها المكان وده لأننا بنحافظ على أمن مصر .

محمد الكورة اللى كنت بتلعب بيها كان فيها متفجرات ، مش بس كده دي كان فيها أوراق تحمل أسرار عسكرية.

محمد احنا بنحافظ على مصر

بنت سيناء.. يقول...

انت بتعمل تحقيقات هايلة وبتكشف الحقيقة..الله معك

غير معرف يقول...

حسبنا الله ونعم الوكيل يقبضوا على قتلة العبارة الأول بدل مايقبضوا على راجل صغير.???????????

walaa rizk يقول...

استاذ عمرو

محمد راجل

ودا جزاء الرجال وابناء الرجال فى هذا البلد المصون

وقال بيتشدقوا بحقوق الطفل

حسبى الله ونعم الوكيل

والله ان الفجر لقريب

يمنى يقول...

ايه ده

انا عيني دمعت و انا مش مصدقة ان في راجل عنده 12 سنة بيقول الكلام ده

حسبي الله و نعم الوكيل

( و لا تحسبن الله غافلا عما يفعل الظالمون )

جزاكم الله خيرا على هذا الحوار الأكثر من راااااااااائع

محمد ناصر يقول...

انتهى الفساد والاختلاس وتزوير الانتخابات انتهت الفوضى وانتظمت طوابير العيش وحصل كل موظف على ما يكفل له حياه كريمة ..ولم يبقى الا محمد بنداري ...ربنا يعينك يا مصر..