الاثنين، 30 يوليو 2007

لسه عايش فى المؤتمر التأسيسى للمدون خانه ..

البدايه كانت دعوة وجدتها فى رساله على الايميل بتاعى ... فتحت الرساله وجدتها دعوة لمؤتمر تأسيسى للمدونة خانه ... ذهبت افكر قليلا هل لابد من ذاهبى ... هل ذهابى سوف يأثر على هذا المؤتمر شيئا ام لا .... وبعد يوم بالظبط من هذا الموقف ... وجدت اختنا العزيزه سارة بندارى صاحبه مدونة انا محظورة وقالتلى على الدعوه اللى وجهت ليها ... فاتثبت الموضوع فى دماغى اكتر وعقدت النيه على الذهاب للمؤتمر وذهبت فعلا وكان يوم السبت الماضى ... خرجت من بيتنا الساعه الثانيه ظهرا وذهبت للموقف وقعدت فى البيجو نص ساعه على ما العربيه حملت عبود .... حملت العربيه وطلعت وروحت عبود .... وركبت رمسيس ووصلت رمسيس وبعد رمسيس ركبت مترو من هناك للملك صالح وسألت فين سينما فاتن حمامه دى ... لحد ما وصلت للسينما هنا احترت سألت كتير اوى على ام المركز ... طب اللى مش عارف المركز يدلنى على شارع باهر زغلول كله كان بيقوللى امشى عالاطول .... مشيت عالاطول وبعد لما وصلت تقريبا للمكان سألت واحد قولتله هو ده الشارع .... قاللى لأ ارجع لأول الشارع تانى عند السينما واسال هناك فى محل الدمياطى للفول والطعميه ... وقوله فين شارع باهر زغلول هيقوللك ورا .... الحقيقة انا رجعت تااااانى المشوار اللى انا مشيته كله وهنا سالت واحد ميكانيكى قاللى يابن امشى تانى عالاطول قداااااام عند المدرسه ... انا بأه كنت هاموت ... ازاى الراجل قاللى هو هنا .... قولت حسبنا الله ونعم الوكيل فى الراجل اللى ادانى المقلب ... رجعت تانى ... ووصلت وكده لحد ما وصلت كانت الساعه سته ونص ... والمؤتمر معاده الساعه سته دخلت المركز وكما وصفه اصدقائى وحبايبى المدونين اللى جم انه مكان يعنى لا يعلمه امن الدولة ولا المدونين انفسهم .... شوفتوا باه .... المهم دخلت ولقيت الناس قاعده والاخوات قاعدين .... وسلمت على علاء الغزالى ... والمدونين وقعدت جمب علاء واحمد الجيزاوى .... وقولت عايزين نتعارف ... فا قولت ... عمرو سلامة ( لسه عايش ) .... كله قال وفى نفس واحد لسه عايش ... امال محمد عادل ميت يبقى ايه .... قولتلهم انا غير محمد عادل .... احمد الجيزاوى طلع وقال .... ليه لسه عايش ... اقوله لسه عايش ياخى .... يقوللى ليه .... قولتله عشان بلدى .... قاللى اسمك لس بيعطينا الامل والتفاؤل قولتله كتر خيرك .... بدانا فى التعارف .... وكده وكان معانا المدونين الاتيين : حين البأس - أنا باحبك يا مصر - ميت - كش ملك - بن ناصر - صاحب البوابة - لماذا نرحل - الحصاد - ممنوع - مش أنا - هاتكلم و هاقول - مش حاسكت - كلام و فش غليل - امام الجيل - المواطن المطحون - لسه عايش - عصفور المدينة - حزيـن- حنظلة - شوية أفكار
أيضاً
شقاوة شعب - أنا محظورة - باحبك يا مصر - أنا كده
وكمان بعض العاملين فى المركز العربى للدرسات وبعض الصحفيين .. بدانا الكلام وبدا المهندس علاء فى شرح الفكرة ... وبدا يشرح نقطه نقطه .... ويفهمنا اهداف التجمع اللى كانت
1 - متابعة أخبار المدونين و النداء بحريتهم في التعبير بطرق و أساليب مختلفة تنطلق من الموقع مع توصيف المعنى الأخلاقي لمفهوم حرية التعبير.
2 - عمل دليل للمدونين المنضمين للتجمع.
3 - التضامن مع حملات صديقة مماثلة لفكرة التجمع.
الاتفاق على ميثاق شرف يوافق عليه المنضم للتجمع قبل الانضمام و يكون شرطا لانضمامه
5- التأكيد على أن الاختلاف في الفكر هو ظاهرة صحية مثمرة
.6 - الدعوة لتجمعات تعارف و مؤتمرات للمدونين بشكل دوري
7 - التأكيد على الحفاظ على حقوق الملكية الفكرية و استخدام أساليب فعالة مثل التشهير
وايضا شرح ميثاق الشرف اللى من واجب كل مدون ان يتبعه فى حال انضمامه للمدون خانه ...
و أن يحتوي ميثاق الشرف على نقاط أخلاقية رئيسية منها:1
أن لا يستخدم المدون الالفاظ البذيئة و الفاحشة.2
– الا يكون المدون من الذين يسبون الأديان.3
– نبذ المثليين و الشواذ جنسيا و الذين يتحدثون عن الجنس بشكل فاحش.
------------------
وايضا طرحنا عده اقتراحات ولاقت اقبال عند علاء والمدونين زى الدعايه والدعم الفنى للموقع والتصويت السرى للاعضاء ونظام الاجتماع وشكل الموقع والابواب اللى اتفقنا منها بابا اسمه دليل المدونين ... اتفقنا ايضا على الهيكل التنظيمى للمدونة هيبقى عندنا لجنه التغطيات والتصميم والمشرفين
-----------
كانت هناك سلبيات اود ان اعرضها بين ايديكم
- مصطفى الحسينى ... كل شويه يعارض يابن الناس اسمع للاخر يقوم مقاطع علاء ... بس ديموقراطيه عشان ماحدش يقوللك اللى احنا عايزنه مشيناه ... كان فيه باردوه مقاطعه من اخ كده يعقد يقاطع ويقاطع علاء فى حاجت عبيطه ... يعنى كنا بنتكلم عن مسأله الشواذ تلاقيه طالع زى البتاع كده وقايل خلو بالكم الشاذين جنسيا دول بيعملوا حزب دلوقتى .... يعنى ايه ياعم عايزهم يجوا .... يااه كنت مخنوق منه بشكل ومرة يطلع يقوللك ويتكلم فى حكايه الناس اللى بتشتم وتسب الدين ده كان يطلع يقوللك طب لو انا شفت واحد سب الاسلام وهو مسيحى ومعانا فى المدونه خانه اشتمه بـه واشتم اللى خلفوه .... كان هبل لغايه هبل .... احنا متفقين اللى هيدخل معانا لا يشتم ولا يسب الدين ....
- السلبيه التانيه ان المكان مجهول ... دى سلبيه بحالها ...
- زى ما قال اخويا امام الجيل ان احان مش حطينا وقت زمنى لعمل المدونة ولا كده واجلو كل حاجة لعمل المدونة .... فا المفروض كان يحطوا سقف زمنى للانتهاء من الموقع واحنا مستنين اهوه مش عارف بقى نستنى سنه ولا اتنين
- ان فيه ناس مشيت بادرى اوى وناس جات متأخر ومش كان ينفع كده ...
------------
باردوه كان فيه ايجابيات وكتير كمان
- انى اتعرفت على شويه مدونين الحقيه كنت اتمنى انى اتعرف عليهم وحصللى الشرف وقابلتهم ...
- الشاى اللى انا شربته كان جميل اوى
هههههههههه ...شويه حاجات حلوة كده
-----------------
يلا بقى نطلع ونشوف الصور اللى انا صورتها ... بس تم حذف صور الاخوات من الصور لطلبهم ذللك ... نشوف الصور ... ونحيط علمكم ان الصور خاصه بمدونة لسه عايش نرجو ذكر المصدر






الأحد، 29 يوليو 2007

عاجل ..أحمد سعد خرج

وانا قاعد فى المؤتمر التأسيسى للمدون خانه انهارده فى القاهرة ... وبدون مقدمات كانت الساعه السابعه والنصف ... وجدنا الاخت اروى الطويل صاحبة مدونة انا كده تقول احمد سعد خرج فرحنا فرحه كبيرة ... وباركنا هذا .... وبعد دقائق لم تتعد الخمس وجدنا اتصالا اخرا للمهندس علاء الغزالى صاحب مدونة مش انا .... واللى بيكلمه احمد سعد .... مش صدقنا نفسنا .... احمد سعد بيقوله انا عازمك بكره على الغدا .... واكد لنا خبر الافراج وترويحه للبيت كمان ..... اذن نحيط علمكم ... ان احمد سعد خرج .... وتؤكد مدونة لسه عايش على ذلك ....
وايضا اتقدم انا عمرو سلامة .... بكل التهانى والتبريكات لأخونا الفاضل احمد سعد دومة وكفااااااااااااااااااارة يا عم احمد

الجمعة، 27 يوليو 2007

بوست خاص من الاسكندريه

افتقتدكم الفتره اللى فاتت كتير اوى ... بقالى اكتر من 3 اسابيع ويمكن اكتر لا حدثت المدونة ولا حتى رديت على تعليقات فيها ولا حتى رديت على الناس اللى كاتبالى كلام فى الشات ... على العموم ياريت كل الناس تعذرنى للظروف اللى مررت بيها ... الا وهى : ظهور النتيجه .. وسفرى للاسكندريه ... وسفرى للقاهره ومشغول مع والدى شويه ..... يعنى شويه حاجات تانيه كده ... ربنا يارب يجعله فى ميزان حسناته .... اللهم امين يارب العالمين .....
--------------------------------------
اتحدث اليكم اليوم يوم الخميس من الاسكندريه لثانى مرة على التوالى ازورها فى هذا الصيف ... ولكن المرة التى جئت اليها فى المرة الاولى كانت لأمر ما ستعرفونه قريبا ... والمرة الثانيه زى ما فى دماغكو ... كنت باصيف ... يومين وراجع بطلوا قر ..... وانا فى الاسكندريه هانقلكم من المكان اللى انا فيه حدثين ....
----------
الحدث الاول وتمنيت ان تكون الكاميرا الديجيتال معى ولكن للاسف كنت ساعتها نازلا للتمشيه قبل صلاه الظهر فكنت امشى من غير كاميرا فجاة وانا اسير فى طرقات هذا البلد الجميل ... وجدت ظابطين شرطه واربع عساكر يضربون بائع السمك فى وسط الشارع انهالوا عليه ضربا ... لدرجة ان الراجل قال خدوا السمك وسبونى اربى عيالى .. حرام عليكم ..... الحكايه بدات عندما وجدت ظابط الشرطه يقول لبائع السمك .. انت قاعد هنا ليه يلاااااااا ... انت مش عارف ان دى اشغالات طريق ... قاله ياباشا انا بأكل اولادى منها ياباشا ... انا اسف هاشيل السمك وامشى .... الظابط قاله ... لأ ياروح امك انت فاكر ايه دخول الحمام زى خروجه يابن الكلب ..... وادى للعساكر اشاره ... ضربوا الراجل على قفاه وراسه وقدام الناس كلها وفى وسط الشارع ... وخدوا السمك منه حطوه فى العربيه اللى معاهم ... وخدوا الفلوس اللى كانت مع الراجل اللى معاه كلها ... ومشيوا وهما بيقولولوا : عارف يابن الكلب لو شفناك هنا تانى هنعمل فيك ايه ... هتاكل علقه ما خدتهاش فى عمرك يابن الوسخه ..... وذهبوا وتركوا الراجل الذى ظللت اشفق عليه وما زلت اشفق عليه واخذت اطبطب على ظهره حتى يهدأ واخذوا الناس المارة يسبون ويشتمون فى المحافظ والحكومة والنظام .... وانتهى الموقف على ذللك ولمن لا يعلم .... الموقف حدث فى خالد بن الوليد من ناحيه محمد نجيب عند مؤمن للفراخ ... وحدث ايضا الساعه 12 الا خمسه ظهرا يوم الخميس 26\7\2007
...وحسبنا الله ونعم الوكيل على الظالمين .... لعنه الله على كل ظالم فاجر غير عادل ....
-----------------
الحدث التانى هو المؤتمر الذى حدث فى الاسكندريه يوم الخميس ايضا وبنفس التاريخ فى نادى المحامين بمناسبه احداث غزه .... حضر هذا المؤتمر حشد كبير جدا من اهالى الاسكندريه الكرام وتكلم فى هذا المؤتمر الدكتور ياسين عبد القادر الرجل القيادى اليسارى الفلسطينى ... وايضا اتصال من الدكتور الزهار والذى كشف فى هذا الاتصال عن اشياء خطيره ..... وايضا الدكتور حمدى حسن الرجل الذى اعجبنى كلمته جدا ..... والاستاذ صبحى صالح الرجل الذى سمى عباس بابن سلول ... وايضا تحدث المتحدث الرسمى باسم اتحاد القوى الوطنيه فى الاسكندريه (تقوا) وتحدث ايضا الطالب المعتز بالله الذى القى كلمة الطلبه .... وتحدث الاستاذ حسين ابراهيم المتحدث الرسمى باسم الكتله .... وتحدث ايضا الدكتور محمد حبيب النائب العام للمرشد العام .... وتخلل المؤتمر الاناشيد الحماسيه منها انشوده يا مصر يا عظيمه والذى غناه بعض الشباب السكندرى بمناسبه احتفال باعياد اسكندريه .... ايضا كانت هناك انشوده لحماس ....
شباب نوافيكم بالصور والحدث من ارض الواقع من المؤتمر كما هو ... ورصدناها بالصور والفيديو ... وهنزلكم الصور على المدونة اول ما ارجع الشرقيه ... لأنى انا مش معايا الــuspبتاع الكاميرا ...
انتظرونا يا شباب ..... صور المؤتمر ....
----------------
لمن لا يعلم انا رايح مؤتمر المدونين الذى اعلن عنه علاء فى مدونة مش انا .... فى المركز العربى للدراسات فى المنيل فى القاهرة .... يلا عشان تعملوا حسابى .... وسلامى اليكم من اسكندريه .... واواعى حد يزعل انى ما حدثتش المدونة الفترة اللى فاتت .... سلام عليكم

---------------------------------------

تحديث الساعه 11:55 .. يوم السبت بتاريخ 28\7\2007...

كنت اتصفح مدونتى ومدونات بعض الزملاء ومنها مدونة علاء .. وجدت فيها خبر اعتقال زميلنا المدون أحمد سعد دومة ... احمد سعد لم يعتقل من بيته ... بل اختطف من الشارع على يد اربع من الجال ذو البنيه والجسد واغمو عينيه (حسب قول مدونة حين البأس )واقتادوه إلى عربة شيفورليه بوكس نقل كحلى كانت تقف على ناصية الشارع الجانبى يعنى فى شارع 25 ، وكانت تقف بجوار هذه السيارة سيارة ميكروباص بيضاء ، أنزلوه من السيارة الشيفورليه إلى السيارة الميكروباص واقتادوه إلى جهة غير معلومة، وكانت الساعة حوالى العاشرة والنصف أوالساعة الحادية عشر من صباح الخميس 26/7 ا
وأفاد صديق أحمد سعد ، أنهم قالوا له مش قلنالك ماكلش دعوة بالحملة ده
يذكر ان احمد سعد دومة كان يعد لأكبر حملة تدوينيه فى تاريخيها التدوينى حمله المليون وجه ضد نظام مبارك
------------------------
ادعوا كل المدونات فى مشاركت المدونين فى وضع هذا الخبر عندهم .... بسرعه .... لأن الوقت لم يعد يحتمل كل هذه الالعتقالات بدايه من طلاب الاخوان المسلمين الى المدونين .... لم نعد نحتمل اعتقال مدونينا أكثر من ذلك ... اناشدكم يا مدونين يا مصرين ينشر هذا الخبر ووضعه فى مدوناتكم .... وسلامى اليكم