الاثنين، 21 يوليو، 2008

ازمة البنزين فى الشرقيه .. لسه عايش تصور ومحاوله لاعتقالى والدستور تتكلم

صورة من فيديو اليوتيوب اللى انا رافعه (هتلاقى الفيديوهات دى تحت )
العلامه الحمرا تحتوى فيها على مخبرين يحاولوا تفريق كل من حاول ان يكون بجوار البنزيمه علما بانها مليئه بالوقود
ولكن احتكار وتحكم فى الخلق بأه ..
من يومين بالظبط كنت اريد ان امول سيارتنا الملاكى (فولكس فاجن ) من امام احدى البنزيمات ولكنى وجدت الفاجعه اى فاجعه عدم وجود بنزين فى المحطه سالت لماذا قالولى من يومين باشا الوضع كده ... ذهبت الى محطه اخرى ووجدت امامها (اقسم بربى ) اكثر من 90 سيارة واقفه امامها ... وامام المحطه هذه بالذات وعندما سالت قالوا ان هذه المحطه هيا التى يتواجد فيها البنزين فقط (احتكار بالمعنى الاصح ) المهم جلست فى السيارة منتظر دورى وانا جالس وجدت قوة من الامن الى المنطقه وعندما نظرت من الشباك وجدت المخبرين نازلين شتيمه فى السواقين .. اطلع من هنا مافيش بنزيييين ... ويمشوا العربيات واللى مش يمشى يكلم الباشا اللى هو معاون المباحث محمد بندارى رئيس القوه القادمه من المركز لتفريق الواقفين امام المحطه ... وعندما هممت برفع كاميرتى التى تصاحبنى دائما فى كل مشاويرى وفى شنطتى واقوم بالتصوير وجدت حولى مجموعه من المخبرين محوطنى خير خير ... كلم الباشا .. قولت ماشى فين الباشا .. هناك اهوه ووجدتهم يمسكونى كالمجرم الذى يقتاد الى القسم لارتكابه الجريمه ووقفت امام الباشا سالنى انت مين قولتله عمرو انت بتعمل ايه كنت باصور بتصور ليه .. شايف انها ازمه والحكومة مش عارفه تعالجها وشايف ان تعامل الامن معاها بطريقه غير سليمه وباصورها .. معاك كارنيه صحافه .. لا مش معايا ... بطاقه معاك .. اتفضل .. قعد يمحص ويتفحص ويدور ويقلب ... ويهزر مع اللى جمبه شويه ونادى مخبر امن دوله وقاله عمرو بيصور .. شوفه المهم ان هذا المخبر الغبى الذى لا يعرف معنى للتطور قالى شيل الفيلم ووجدت معاون المباحث محمد بندارى يقوله اخرس يا اهبل المهم قالى المخبر اللى معايا افتح الكاميرا فتحت له الكاميرا وقالى ورينى الصور وريته الصور ... ووجدته ينتش الكاميرا ويقوم بمحاوله للتخبيط داخل برمجه الكاميرا محاولا محو كل الصور والفيديوهات ... المهم عشان مش يلخبط قولتله هات الكاميرا امسحهالك ادانى الكاميرا وانا بامسح الصور تاكد تماما ان الكاميرا خاليه وقال لمعاون المباحث تمام ياباشا ... قالى ياعمرو انت تعرف انا بايدى اعملك ايه دلوقتى اعملك محضر لأن انت مش معاك كارنيه صحافه ... وكمان بايدى ارميك فى امن الدوله وماحدش يعرف عنك حاجة فاهم ... قولتله بس اللى اعرفه ان انا هاوى تصوير وشايف شئ غلط وباصوره وانا مش ارتكبت اى جرم لمحاولة اعتقالى ... قالى هو كده قولتله لو سمحت انا راجل محترم زى ما حضرتك محترم والقانون بيتيح ليا اكلمك وجها لوجه وبكل احترام ولباقه ... سكت ولقانى كده فا كسفته .. وقالى يا استاذ عمرو دلوقتى تقدر تمشى قولتله انا عايز اصور الزحمه دى ... قالى ورينى الشنطه بتاعتك دى فيها فتش الشنطه ووجد فيها كتاب عشر خطوات للنجاح لابراهيم الفقى قام ضحك وقالى انا جايب 54% فى الثانويه العامه وعايز انجح اعمل ايه ... هههههه فاشل معلش يا رجاله ... المهم سبته يتريق مع اللى جمبه وقالى اتفضل لو سمحت امشى ... راسى والف سيف اصور اللى بيحصل ... مشيت وجيت مرة تانيه وصورت بكاميرا المحمول صور تكاد تكون ضعيف بعض الشئ ... لكن اهيه فيديوهات ممكن تنفع تشوفوها ...

ازمة البنزين فى الشرقيه 1




ازمة البنزين فى الشرقيه 2






وقد صورنا باقى المحطات ومعلق عليها اللوحه هذه ... علما بأن المحطه التى كان عليا ظباط الشرطه لتفريق اصحاب السيارات من امامها هى التى احتكرت البنزين فى البلد .. وكمان جاوبو شرطه يضربوا الناس عشان تعبى بنزين ... بلد مش بتعرف تحل مشاكل .. كل لما يكون فيه مشكله يتصلوا على حبيب العادلى حليلنا المشكله يا عادلى ... لماذا لم يحلوا مشكله شح البنزين فى البلد



انا هنا جئت لكى اعرض لكم مشكله الا وهيا شح البنزين فى الجمهوريه كلها واعطيت لكم كيف تتعامل الدوله مع المشاكل باستدعاء القوه وارهاب الناس واحتكار البنزين فى بنزينه معينه فى البلد كلها ...

واريد أن اسال رئيس الجمهوريه وليس وزير البترول ... انت تعطى لليهود الغاز .. ونحن لا نجد البنزين فى البلد .. لماذا يا سيادة الرئيس .. اناشدك ان تضعنا فى اولوياتك كما تضع المواطن الاسرائيلى فى اولوياتك ... اناشدك ان تراعى مصالح هذا الشعب بكل عقل وحكمه وليس بالامن والشرطه والبوليس ... اناشدك ان تتقى الله فينا ...

اعلم ان قسم شرطه ديرب نجم يتابع هذه المدونة واعلم ما سيعقبه بعد كتابة هذه التدوينه .. وانا انتظر ولكى اعلم معاون المباحث ومخبرى امن الدوله ان انا مش لوحدى جئت لكم اليوم بخبر فى جريده الدستور فى 21\7\2008 ينشر ما حدث لى بالتفصيل على يد هذا المعاون وايضا قصة مسح الصور ..

اضغط على الصور للتكبير


ومن اراد ان يطلع عليها على موقع جريدة الدستور فا اليكم الرابط .. اضغط هنا

هناك 10 تعليقات:

refinance يقول...

I like your blog.


refinance

مواطن زهقان يقول...

بجد ياعمرو انت جامد
تقاريرك كلها فعلا فى الجون زى مابيقولوا

ربنا يعينك يابطل على كشف كل فساد يارب

يمنى يقول...
أزال المؤلف هذا التعليق.
يمنى يقول...

مدونتك ... فعلا توحي بشخصية مغامرة و مخاطرة

جميل جدااا لباقتك في الحديث و الرد مع الظابط

بس برده حاول دايما انك مش تضر نفسك و يكون في حد معاك و انت بتعمل استخباراتك و محاولاتك الكشفية

و ربنا يكثر من امثالك

و فعلا مدونتك متميزة جدااا رغم صغر سنك الا انني لم ارى مدونة تشابهها تماما

دمت دائما متميزا و ناجحا ... و وفقك الله دائما لما فيه خير لك في الدنيا و الاخرة

Abd-Alrahman يقول...

حبيبي يا عمور
متتعبش نفسك لسة الي جاي اسود
يا حبيبي
علي فكرة كمان شوية هتلاقي ازمة كهربا ومية
وازمة في الاكل
لسة يا ابني

تعرف اصل ربنا مش بيفوت حاجة كدة بالساهل

ربنا قال
ومن اعرض عن ذكري فان له معيشة ضنكا
واكيد الي احنا فيه دة من حكومات فاسدة وازمات في كل اتجاه وجانب
وكل دة نتيجة بعد الشعوب عن ربنا واتجاهها في الاتجاهات الاخري

علي العموم
شكرا ع البوست بتاعك وعلي مجهودك حبيبي
علي فكرة انا مرارتي خلاص ع الاخر
اصلي لسة شاري عربية جديدة
ومش بتحط الا بنزين 90
شكلي مش هتهنا بيها

هههههههههههه
مستني زيارتك

دمت بخير

رحـــــال يقول...

بسم الله ..

السلام عليكم يابطل ..

هكذا عهدناك .. والساكت عن الحق شيطان اخرس..

اكمل ومعك الله يؤيدك ..

بوركت ..

بذرة امل يقول...

عارف يا عمرو انا كنت مستغربة ليه السواقين متعاصبين الايام دى اوى كدة

دلوقتى عرفت ايه السبب
ربنا يحميك ويحفظك
ويكفيك شر كل حد فاكر انه بيحافظ على امن البلد
ياريت تقرأ البوست بتاعى الجديد
حتى لا يطير الرجال خارج البلاد

جمعاوى روش طحن يقول...

الله ينور يا عمرو

بجد الله ينور

مخنوق منك يقول...

ياحلااااااوه


يالا

النفاق شيمه الابطال

والكذب شيمتك والخيانه طريقتك

استمر أخذك الله

غير معرف يقول...

Hmm it looks like your blog ate my first comment (it waѕ
ѕuper lοng) so I guess Ι'll just sum it up what I had written and say, I'm thoroughlу еnjoуing youг blog.
I too am an aѕpiгing blog bloggеr but ӏ'm still new to everything. Do you have any points for beginner blog writers? I'd genuinеly
appгeciate іt.

my ρagе - Www.2applyforcash.Com
Also visit my webpage ; Payday Loans