الخميس، 17 يوليو، 2008

لسه عايش تنشر بالصور .. فضائح محالج القطن بالشرقيه


تصريحات وزراء الزراعه والاستثمار والصناعه والتجاره تحسسك كده ان البلد لسه بخير وان البلد فيها الخير عامم وان الشعب ده ابن ستين فى سبعين مش حاسس بالنعمه ... هل هذا صحيح يا سيادة الوزراء ؟ ... لماذا تظنون ان هذا الشعب دائما مغفل وذالل نفسه ليكم ؟ .. لماذا يا سيادة رئيس الوزراء تشجعون القطاع الخاص التى هيا تختص وزراء حكوماتكم .. وتنسون القطاع العام الذى يختص اكثر من 90% من الشعب المصرى ؟ ... لماذا تسرقون اموال شعب ائتمنكم عليها وسيسألكم الله عنها يوم القيامه ؟ ...

بعد هذه البدايه الساخنه التى بدات بها حديثى لكم اعزائى الكرام ... وذلك لانى مشحون بشحنات غير عادي من الغضب عندما اعرض عليكم قصة هذا الموضوع الذى اعرف انكم مغيبون تمام المعرفه عنه ... قصة محلج الدلتا لحلج القطن فى الشرقيه .. وهو الوحيد الموجود فى الشرقيه والموجود على طريق ديرب نجم - السنبلاوين .. مساحة المصنع المخصصه له 10 افدنه بينما المساحه المبنى عليها المصنع موجوده فى عشره فى الميه من القطعه الكبيره المخصصه لهذا المحلج الضغم فى صورته لكن فى عمله لا يوجد اى شئ ... قد تسالون وماذا تستخدم باقى المساحه اجاوب حضراتكم انها من المفروض ان تستخدم فى تخزين البذور التى تفرز بعد حلجها من لقطن فى شول ... هتقولوا حلو اوى كده تمام .

لكن الغير تمام ان هذا الظاهر فقط ...

دخلت مصنع الدلتا لحلج القطن بالشرقيه بطريقه عاديه جدا (اعذرونى عن ذكر قصه الدخول او كيفية الدخول اخوانى ) ودخلت ايضا مبنى الاداره والذى وجدته مشققا بطريقه غير عاديه ده حتى الكراسى ياخى واكلها الفئران ... والحمامات لا ترقى ان تكون حماما اداميه ... مبنى هالك ويكاد ان يقع فوق رؤوس قاطنيه ان لم يرمم ... ولكن للاسف لا من مجيب ولا من مهتم اصلا ولا من واخد فى باله ولا حتى وزير الزراعه والصناعه فاكرين ان فيه مصنع ... هذا مبنى الادارة والمكون من طابقين ...

تفرجت على مساحه الارض الكبيره جدا وحلف بالله انها لم يوجد بها اى اشوله قطن او بذور الا خمسين شيكاره وقد قال لى عامل انها موضوع للمنظره ولكن الذى لا تعرفه انه لا يوجد اى منها مخصصه للعمل ولا موجود اصلا ...
وعندما سالته امال المصنع ده مفتوح ليه .. قالى يابيه البلد مش عادت زى الاول الخير فيها كتير زى زمان .. الاول كان 80% من الفلاحين زارعين قطن دلوقتى عشرين فى الميه زارعين قطن .. قولتله تفتكر ليه ؟ ... قاللى سياسه بلد وهما اللى بيامروا الفلاحين بكده ...
سالته بامانه اذكر لى انتوا قاعدين هنا بتعملوا ايه ... قالى بص يا استاذ اللى مش تعرفه ان الوزير بيحدد سعر معين يشترى بيه القطاع العام القطن من الفلاحين قولتله تمام .. قالى والقطاع الخاص ( اللى هو تبع الوزير بيحدد اعلى منه ) قولتله ما القطاع العام يرفع وينافسوا بعض قطاع خاص وعام ... بصلى بنظره شرانيه وقالى سياااااااااااااااااااااااااسه بلد .. عايزين البلد كلها تبقى قطاع خاص مش عايزين حاجة تخص الشعب تانى ... المهم الفلاح يقوم بايع القطن للقطاع الخاص وبكده يفضل القطاع العام يخسر يخسر يخسر ... سالته : طول السنه بتعملوا ايه ؟ جاوبنى باستفزاز احنا انشتغل شهرين من الـ 12 شهر فى السنه بس وبقية الشهور قاعدين بنشرب شاى او بص بنفك المكن ونركبه تانى على اننا بنصلحه واهوه المصنع شغال على كده ...
علمت من مصادر خاصه ان هناك مهندس تقدم بالاستفاده من هذه الاراضى الغير مستخدمه لعلها تفيد بقيه الشعب .. فكان الجواب بالرفض التام والنقل خارج الاراضى الشرقاويه ..
صورنا لكم الات عطلانه .. صورنا لكم فى ساعات العمل المخصصه الات لم تعمل ومهمله بطريقه غير عاديه ومصداه ... بذمتكم وبضميركم اناشدكم كيف تنهض مصر الذى يقولوا عليها .. بهذه الصورة السيئه لمصانع مصر المشهود لها دائما بجوده القطن والتصنيع ...
قد يقنعنى احد المسؤلين باننى خاطئ وان هناك ميزانيه محدده لهذا .. اذن لماذا مصانع بهذا الحجم .. اذن لماذا لم تشجعوا القطاع العام ...
عامل يقول لى فى وسط الكلام ويذكر (ريسك عايز كده يابنى .. ووزيرك عايز يشغل نفسه .. وانت ما باليد حيله )
صورنا لكم اماكن وقوف التريلات عندما تنزل القطن المراد حلجه وهيا خاليه تماما ويقف اماكنها عربيه بحمار وفاضيه كمان ...
صورنا وفعلنا وتكلمت انا ونشرت قضيه من المفروض انها قضه تخص الراى العام .. وتخص اموال هذا الشعب وتخصنى انا وتخص ابويا وتخص اخواتى وتخص كل فرد مننا يا محترمين ...
انقذوا مصانعكم يا اصحاب بلادكم الاصلين (الشعب ) بدلا من الحراميه ومسقعى الاراضى ورافضى النهضه لهذا البلد ...
افيقوا ايها الشعب .. فهذا مثال بسيط منى امامكم اقدمه لكم .. وانا لا اعرف هل سوف تتقبلون منى هذا المثال ام سترفضونه ؟؟؟

اترككم مع الصور أراضى شاسعه ... لا تستخدم موجود
هذه هيا المصانع .. او اللى اسمها مصانع


مصانع
المكان اللى شايفينه ده مكان بتيجى التريلات عليه المفروض وتنزل القطن المراد حلجة ولكن للاسف لا توجد تريلات ولا يوجد قطن اصلا

عربيه بحمار مكان .. موجود فى المكان المخصص لوقوف التريلا .. دى اخرتها العربيه ام حمار تنزل قطن


الات واقفه ... شايفين اثر الصدا .. على فكره الصورة مصورة فى الساعه الثانيه عشر ظهرا .. فى مواقيت العمل الرسميه
لا احد يسالنى كيف صورت ... ودخلت ازاى .. الات مصديه
نعم الاسلام هو الحل ... كتابه رايتها على جنبات حوائط المصنع .. توضح فيها ان العمال يؤيدون مرشح الاخوان بهذه البلده المقام بها المصنع ... الاخوان وصلوا المصانع والعمال ...
زى ما سيادتكم شايفين الات واقفه

مصديه ...
وبيقولك مصانعنا رمز تقدمنا ... شايفين يا جدعان من كتر الاستخدام
ادى الخمسين الشوال المنظره اللى بيضحكوا بيها على نفسهم قدام الناس عشان يقولوا فيه قطن
ولا عامل واقف على اله واحده ... قاعدين يشربوا شاى

الارااااااضى فاضيه خالص .. فاضيه من شكاير القطن والسبب ان ده مش موسم جمع القطن اصلا ؟ .. هههههههههه فيه عامل ساذج قالى الاجابه دى بس مش صدقته لحد لما لفيت ودورت وعرفت السبب ...

فهل ياتينا من السبب من عند الوزير الرمز

هناك 9 تعليقات:

نونو يقول...

السلام عليكم
يعني جت على دي ما فيه كتيييييييييير
ربنا يبارك فيك
تحياتي

bastokka طهقانة يقول...

مجهود ملحوظ
بس تفتكر في فايدة
؟!!!
اوروفوار

حسن حنفى يقول...

ابتسم انت في مصر

بذرة امل يقول...

ما شاء الله مجهود رائع
ياريت تبعت الصور دى لبرامج التوك شو زى العاشرة مساء والقاهرة اليوم
يمكن ؟؟؟؟؟؟؟؟ظ مين عارف

شرقاوي أون لاين يقول...

يتشرف موقع شرقاوى اون لاين بدعوة حضرتك لحضور ندوة بعنوان

آداب الخطوبة وفنون الاختيار

مع الدكتورة إيمان عزب الاستاذ بكلية الصيدلة

وذلك يوم الاثنين القادم في تمام الساعه 8.30 مساءا

http://sharkawyonline.net/vb/showthread.php?t=14166

لؤلؤة الجنة يقول...

جزاك الله خيرا
على هذا الموضوع الرائع
واتمنى مزيدا من النجاح لكى نرفع رايه اسلامنا ونعلو بالمجد اعلامنا

غير معرف يقول...

يعنى كدة كدة البلد بضيع جت على المصنع
وبعدان كل ما يحصل حاجة تقولوا الاخوان وبعدان ما هو فعلا الاسلام هو الحل

غير معرف يقول...

الانسان المفروض دلوقتى يفكر فى حل المشكلة مش ندخل الزراعة بالسياسة والدنيا خلطبيطة

Lamiss Ibrahim يقول...

nice
http://www.kuwait.prokr.net/category/anti-bugs/
http://www.kuwait.prokr.net/