حاضر .. سأتكلم يا سيدى عن التغيير أنت وغيرك تدفعوننى للكتابة عن التغيير .. تلحون فى ذلك .. وانا اذا كنت لم اكتب عن التغيير حتى الان .. فهذا لأن الكل كتب عن التغيير ولم يحدث أى تغيير ... فقررت ألا اكتب كنوع من التغيير .. ولكن .. لنكتب .. حاضر .. أنت تريدنى أن اذكر أسماء بعض المسؤلين الذين حان وقت تغييرهم شارحاً الاسباب التى تدعو الى ذلك بكل صراحه ووضوح .. وديموقراطيه (لاحظ اننى صرت اتشاؤم من الكلمة الاخيرة ) .
ولكن هل تسمح لى أن أبدا مقالى عن التغيير بمقدمة ... معلش باه ده حقى .. اه فالمقدمه هى ذلك الجزء من الموضوع الذى لا يهم القارئ بينما يهم الكاتب الى أقصى درجة وهى مقدمه منطقية ستستخلص منها النتيجة وستثبت فى الوقت نفسه أن هذه المقدمه ليس لها أى قيمه وهو شئ جديد فى المنطقة .. ولكنها براعة فى التأليف دون ادنى شك .. (فلسفه زايده عن اللزوم يا عمرو بيه انجز عشان الوينجز ) ولنبدا المقدمة بجمله تقليدية سيئه الصياغة لم أشأ أن أبدا بها المقال حتى لا يفر منى القارئ .. الجمله هى ...
( التغيير ضرورة حتميه)
عرفتم بأه لماذا لم أستهل مقالى بها .. ان الجمله رغن أنها لا تزيد على ثلاث كلمات انما ياخى .. ثقيله على النفس ... فاذا اتبعناها بجملة اثقل وهى .. (إن الضرورات تبيح المحظورات) أرجو أن تتحملها قليلاً لأن هذا ما سينقلنا الى المنطقه الحرجه من المقال .. حسناً .. أنت تريد أن تغير .. تغير ماذا ؟! هذا بأه حقنا احنا .. أرجوك .. لا تترك الموضوع وتمشى .. اصبر شويه ... ياعم انا صبرت طول عمرى ( الـ 19) .. مش عارف تصبر انت معايا .. خلاص هانت .. لقد وصلنا الى نصف الموضوع والحمدلله .. انتهينا من المقدمة .. سندخل اهوه فى الموضوع ...
رئيس الوزراء!! آه شايفك اهوه هتبدا تقرا وتهتم بالموضوع .. انت دايما كده ... عايز جنازه وتشبع فيها لطم .. ماذا كنت أقول .. أه رئيس الوزراء .. لماذا لا يتغير ؟! أن الصحف كلها تتصدرها المانشيتات التى تطالب بتغييره .. وليس هؤلاء من مبرر أو من حجة لهذا التغيير المنشود للدكتور نظيف المنظفها .. سوى أن الحالة الاقتصادية تعبانه .. والناس تشكوا من الغلاء .. وهذا الكلام الفاضى الذى يلقون به على كاهل الرجل .. وبرغم ان تاريخ شعبنا .. لو قرأناه لوجدنا أن شعبنا يشكوا ويتذمر .. منذ أن كان السيد رخمى رع هو رئيس الوزراء .. ولذا فانا اطالب بتغيير الصحف نفسها وغيير هؤلاء الكتاب الذين يطالبون بالتغيير .. وماذا نريد أيضا أن تغير .. وزير ايه ؟ .. الزراعه !! .. انت اتجننت ؟ بعد لما كلت الكانتلوب والخوخ والعنب الفيومى وبعد أن توافر الموز والخيار بهذه الصوره للشعب بتغيره لدرجة أنك لا تستطيع أن تفرق بينهما ... بعد كل هذا تطالب بتغييره؟! هتكلمنى بأه عن الهرمونات وحقن الفواكه وهذا الكلام اللى لا بيودى ولا بيجيب ... جوافايه !! بتعض فيها طلعت بايظه .. عايز تشيل وزير عشان جوافايه !! .. ومين تانى يا اخويا عايز تغيره .. قول .. اتكلم ملعون أبو الديموقراطيه اللى وجعت دماغنا بيها ... مين وزيرالثقافه !! نعم !! طب ده فى ايه ... ما علاقة مكوثه فتره طويله فى المنصب وبين التغيير ...
انت مثلا بقالك كابس على نفس المدام زوجتك 30 سنه فهل من حقها ان تطالب بتغييرك .. وبعدين الفتره الطويله المفروض يعنى أنها تخلق نوعا من الحمية والونس بين الناس .. غيره بلاش كلام فاضى ... عايز تغير مين تانى .. وزير الشباب ؟! ازاى يعنى .. اليس هذا الرجل امام اكبر مهمه ينتظرها الشعب كله ملف مصر فى كأس العالم 2010 من اللى بيجهزله ويشتغله ليل نهار .. ومين اللى بيتابع الدعايه وطبع التيشيرتات .. ليكمل الرجل مهمته بلاش تعطيل .. واذا لا قدر الله لم نوفق (وهذا ما حصل ) فى لاتأهل لكأس العالم 2010 .. هل نضحى بالرجل بعد أن اكتسب الخبره دى كلها فى الاعداد لكأس العالم .. ونعين وزيرا جديدا لا يعرف الالف من كوز الذرة .. الا نعطيه الفرصه للاعداد لكأس العالم 2020 ...
المشكله التى لا تدركها عزيزى المواطن .. إن كل وزير عنده مشروع ضخم لصالح هذا البلد .. والمشروعات لا تتم بين يوم وليلة .. وكل مشروع لا يعرف سره الا وزيره .. وعندنا فى العالم الثالث تموت المشروعات باستبعاد اصحابها .. فماذا تريدون ... عايزيييييييين الخراب للبلد دى ايها الشعب ... عايزين ايه قولوا ..
ها انا اتكلم بكل صراحه ووضوح .. وكشفنا كل الاوراق تريد تغيير من .. وزير ماذا ..؟! أسمع لقد ادركت الان فقط خبثك ايها الكواطن .. لم افهمك الا الان .. انت تريد تغييرى انا .. ولو مش لقيت موضوعى الاسبوع الجاى هنا فى المدونه فتاكد انك انت نجحت فقط فى تغييرى .. ولن تجد أحد بعد ذلك يجيبك عن سؤالك.. عن التغيير ؟ .. عارفين ليه ..
هناك ٧ تعليقات:
السلام عليكم ورحمة الله وبركاته
والله يا عمور هي الحكاية مش حكاية تغيير حكومة أو رئيس فقط
بل الموضوع أكبر من ذلك ها نستفاد اية لما نغير كل يوم حكومة فاشلة وتيجي حكومة أفشل منها وتحكم بنفس الطريقة بل أمر شوية علشان تثبت نسفها انها أفسد من اللي قبلها
اذا لم تكون الحكومة القادمة تحكم بكتاب الله وسنة رسوله فاعلم انه لا خير في تلك الحكومة مهما كان الشخص الذي يتولاها
ولن تأتي حكومة الاسلام الا برجوع الناس للاسلام وينبثق من داخل هذا الشعب الحكومة والرئيس الجديد
وحسبنا الله ونعم الوكيل في الظالمين ونسأل الله أن يهدي حكامنا وأن يردهم إلي دينه ردا جميلا وأن يحكموا بالاسلام
عمر
طبعا مش كل عايش ييبقى معناها انه حى
دى جمله اعتراضيه كده .
طيب انت ليه ماجيتش عند الناس الكبيره زى الداخليه ولا الحربيه ولا العدل . انت جاى على ناس حضورهم زى غيابهم ولا حد حاسس بيهم . ثم هو فيه وزير للشباب والرياضه عندنا.
موضوع التغيير كل الناس بتتكلم فيه لانه جاى جاى هو فيه حد بيعاند نواميس الكون يعنى اللى له اول لازم يكون له اخر حتى العمر بينتهى بعد الستين او السبعين او التمانين ولا انت ناوى ننتظر لحد التسعين .اهم حاجه فى التغيير انه يكون للاحسن مش العكس .
عادل نجم
على فكرة انا لما وصلت لنهاية الموضوع مفتكرتش السؤال اللي حضرتك طرحته .... و صراحة كسلت اقرا تاني عشان اشوف السؤال
بس على فكرة انت مفتري .... انت عايز تغير الناس اللي شايلة على كتفها حمل البلد
طب ازاي ... انت عاوز تغير الناس اللي مش بترضى على نفسها قرش حرام و بتفني نفسها في خدمة الشعب ... الوحش المتذمت اللي كل شوية مش عاجبه الناس دي اللي بيتوفر لهم كل انواع الراحة و الرخاء و مستوى المعيشة المتحسن
ده شعب مفتري بصحيح ... مش لاقين تاكلوا عيش .... ما تاكلوا جاتوه
-----------------------------------
الموضوه فعلا جميل يا استاذ عمرو .... بس بشويشلاني سمعت ان في مساكن ورا الشمس بتتعمل
ربنا يبارك في حضرتك .... ان شاء الله
اذخب انت وامثالك انا هاهنا قاعدون ..
دة لسان حال الحكومة طبعا ..
لكن نقول وتلك الايام نداولها بين الناس ..
اليس الصبح بقريب ..
هانت ..
هي فعلا هانت
ويارب ما تتغير الإسبوع الجي
ربنا معاك
بجد بوست رائع يا عمور
و مضمون رائع للمدونة ككل
انت يا بنى كنت تايه عنى لحد دلوقتى ازاى
عموما ليس العبرة بمن سبق إلى دخول مدونتك إنما العبرة بأى حاجة بقا
بجد يسعدنى ان أكون أحد أصدقائك بعد مشوار المترو الجامد اللى عملناه النهاردة
أخوك رامى حجاج
فعلا التغير والتجديد شيئ مهم
إرسال تعليق