الخميس، ١٧ يناير ٢٠٠٨

لماذا يمنعونا من القاء الدرس الثلاثاء ...


حسبنا الله ونعم الوكيل حسبنا الله ونعم الوكيل .. لو كنا فى كنيسه والله ما تعملوا كده ... هكذا قالوا ... وبهذه العبارات تعالت اصوات النساء فى وجه ظالم يسمى بظابط ومخبرين .. ماذا حدث ؟ ولماذا قالوا ... وايه الحكايه ...
وكما تعودتم من لسه عايش هيا بنا لكى نسمع الموضوع من اوله لأخره ؛

الموضوع يا اسيادنا ان الاخوان المسلمون متعودين من سنه 1995 انهم يعملوا حاجة اسمها درس الثلاثاء فى مسجد يسمى بابو العز .. هذا المسجد الذى كانت تقام فيه كل شعائر الاخوان فى رمضان وغير رمضان وعرف فى اوساط الناس بأنه مسجد الاخوان ... وكان من ضمن ما تعود عليه الناس فى مركز ديرب نجم محافظة الشرقيه لقاء الثلاثاء او درس الثلاثاء فى مسجد أبو العز ... وتعودنا ان يكون خطيبنا الشيخ حسان (احد قيادات الاخوان المسلمين وكان مرشح الاخوان فى 95 و2000) او احد الخطباء المتميزين ... وايضا تعودت النساء (الأخوات) أن يقام لهم درس الثلاثاء العصر فى نفس ذات الجامع ... وكان شئ عادى جدا بالنسبه للناس وبالنسبه للامن والكل عارف وكان التمام تمامين كمان ..

ولكن حدث ما تفاجأنا .. حدث ما لم يخطر على البال .. وهذا الحدث لم يحدث فى عهد المخبر القديم (سعد أبو المجد- مخبر امن الدوله السابق) ولكن ما إن زال هذا المخبر من اسبوع فقط حتى اتى ما هو ازبل منه ... الا وهو المخبر المسمى (احمد عابدين - مخبر امن الدوله الجديد) ها انا اذكر اسماء ولا خوف من اى احد ...
المهم هذا المخبر الجديد الذى منع دعوة الله .. وظن بأنه من غير الاخوان لن تسير دعوه الاسلام ولن تسير السفينه .. ظن أنه حينما يقضى على هذا الدرس لن يعرف الاخوان ان يتواصلوا مع الناس ... هذا المخبر الذى منع الناس من تدارس ايات كتاب الله واحاديث نبيه فى مساجد وبيوت الله ومناقشه ما يحدث فى العالم الاسلامى من احداث وقضايا ... مخبر لا يعرف أن الاسلام دين وان المسجد هو ملتقى المسلمين ... ولكن ما سيلقى مصيره كمصير المخبر السابق وهيكون ( اقول ولا بلاش يا عابدين ) صول على المطافى اياك يمسكوك انت كمان بقضيه رشوه زى سعد ابو المجد ... مش صح باردوه يا عابدين ...
المهم ؛
حينما اذن عصر الثلاثاء الماضى بتاريخ 17يناير 2008 وصلى الناس العصر جاءت النساء والاخوات لكى يستمعوا لدرس الثلاثاء الذين تعودوا ان يستمعوا له ولكن ما جاءت القوه الظالمه المتجبره تمنعهم ... حينما ذهبت النساء ودخلوا وقعدوا والاخت بدأت تخطب وتقول... حتى امر شيخ المسجد ( الجديد باردوه ما هما غيرو الشيخ القديم) عامل المسجد بأن يكنس المسجد لكى يقوم بعمل شوشره لهم فما كان من شغل المكنسه وبدا فى الكنيس ... وما ان زهق شيخ المسجد حتى اتى بعربيات الامن لكى يخرجوا هؤلاء (الرعاع فى نظره والخارجين عن القانون والارهابين ) من المسجد .. وجاء المخبر احمد عابدين اللى عامللى فيها الجندر ومعه ظباط وهو خارج المسجد وبأعلى صوته يصرخ فى الاخوات ويقول انتى يا ستى انتى انتى يا ماما ... تعالى هنا .. قامت الاخت اللى بتتكلم راحتله .. خير .. قالها مش عايزينكم هنا بره .. بره .. قام الشيخ وقال للناس اللى قاعدين جوه قوموا امشوا انتو مستنين ايه .. قوموا ... وراحت النساء تصرخ وفى صوت واحد حسبنا الله ونعم الوكيل .. حسبنا الله ونعم الوكيل ... وقالت أمى : احنا لو كنا فى كنيسه كنتم طلعتونا كده.. ربنا يوريكم يوم .. وقام هذا المخبر بالنظر الى الارض واحس بالذنب الشديد ... ولكن ما ان نام ضميره مره اخرى واخذ يصيح كالكلب بره بره .. ومشى الاخوات ولسان حالهم يقولون تطردون ناس جايين بيت ربنا ... المهم مشى الاخوات من هنا .. حتى جاء المغرب وجاء دور الاخوان فى القاء درس الثلاثاء ... وحضر ( وليس خطب ) قيادات الاخوان المسلمين بالمركز واتوا ليستعموا الدرس .. ويذكر انه فى القاء الدرس كانت سياراتان من الامن موجودتان امام المسجد وسيارة ملاكى تتبع الظابط رئيس المباحث محمد حلمى واقفه امام المسجد .. وخطب الخطبه والاول مرة ايضا شيخ المسجد المعين مخصوص لمنع انشطه الاخوان ... وتكلم عن سنن الوضوء .. وكلامهم الميت بينما المجازر فى غزه وبوش يزور العواصم العربيه .. بينما اعراض الامه تنتهك وهذا يتكلم عن السنن .. اين انت يا شيخ الاوقاف من هذا ؟ اين انت .... انا لا انكر دور السنه او كذا .. لكن ايه المهم الفرض ولا السنه مناصرة واغاثه من يموتوا والمحاصرين اما السنه ...

وبينما اراد الشيخ حسان ان يتكلم ولكن ما ان اذن العشاء والمعروف او السائد ان الاخوان بيطولوا شويه يعنى بيتكملوا خطبه بعد الاذان ولكن هذه المره صلوا فى سرعه حتى لم يقعدوا الوقت اللى هو بين الاذان والاقامه واخذوا الميكرفون ومش خلوا الشيخ حسان يتكلم .. يلا خير .. ونذكر ان الصوت هذه المره اخفضوه ... وليس ككل مرة ...

نذكر وننوه أن سيارات الامن ما زالت واقفه حتى هذه اللحظه وحتى كتابه هذا البوست امام المسجد سياراتين بوكس ... وفيهم مخبرين وبقالهم حتى الان اسبوع ... وانا قولت هيمشوا ومش هاكتب حاجة عن اللى حصل .. ولكنهم طولوا اوى فى الوقفه ومش هيصبروا على الوضع ده .. ويظهر ان هيبقى فيه تطورات فى الموضوع واتمنى من الله العزيز القدير أن لا يحدث اى شئ بين هؤلاء الاشاوس والاخوان .. اتمنى أن يتم الامر بهدؤ وسلام .. اتمنى من الله أن يهدى شيخ المسجد ( ولا داعى لذكر اسمه ) .. اللهم الهمه من العقل والصواب شيئا ... اللهم اصلح حال شيوخنا .. يارب العالمين ..

اما بالنسبه لمتابعتى للبوكسات اللى واقفه امام المسجد ومازالت ... فهم موجودين وسيتم تصويرهم والصور هيكونوا عندكم قريبا .. باذن الله ... وانا ما صورتهاش يوم الثلاثاء لأنى لم اكن ان اريد اعملها ضجة او او او .. ولاكن يبدوا ان الامر سيطول ... وها انا انشر ما يفعلونه ويرتكبونه من جرائم ضد الاسلام والاخوان المسلمين ... فالاسلام باقى بغيركم او من غيركم ايها الاشاوس ...

وحسبنا الله ونعم الوكيل واكرر كلام الاخوات لو كنا فى كنيسه كنت هتعملوا فينا كده .. ده انتوا بتحرسوا الكنيسه يوم ما يكون فيه اعياد ليهم .. مش معنى احنا مش معنى احنااااااااا
---
اذن الصور سيتم التقاطها وسابعث بها اليكم ...فانتظرونا

هناك ٨ تعليقات:

جمعاوى يقول...

الباشا الكبيير

أول تعليق الحمد لله

بأحجز مكان و راجع تانى

محمد بن جمال الياسرجى يقول...

حسبنا الله ونعم الوكيل ، فالأمر ليس أمر فردى فنفس الموضوع يوجد عندنا فى فاقوس حيث يحاول الامن ان يمنع عاطفة الثلاثاء بمسجد الامام بفاقوس مرة بخطباء الاوقاف ومرة بالقوات فحسبنا الله ونعم الوكيل

عمرو سلامة يقول...

هههههههه ماشى يا جمعاوى يا اخويا ...
احجز مكان .. لكن عايز تعليقك على الموضوع .. مش تنسى ها ومستنيك

عمرو سلامة يقول...

يا ولاد الــ .. مش عارف دول ازاى يمنعوا دعوة ربنا فى المساجد ليه وعشان مين ..
ربنا معاكم يا اهل فاقوس ... وحسبنا الله ونعم الوكيل
وجزاكم الله كل خير يا اخ محمد على ردك

mohammed alsha3r يقول...

هو فى ايه

ناقص نصلى بالبطاقه

او نصلى فى مسجد اه

ومسجد لأ

لسه عايش

مينفعش اللى بيحصل

لم يابنى مدونين الزعازيع واعمل اعتصام قدام الجامع

وانا جاى لكم فى السكه

غير معرف يقول...

بجد
بوست ممتاز
اخى عمرو اعانك الله
عاوزين كاميرا عمرو تتجول فى ديرب وتصور مهازل الخبز وسرقة الدقيق والزبالة فى الشوارع ومشاكل الناس
وربنا يوفقك ويحميك من كل سوء

عمرو سلامة يقول...

الحقيقه يا شاعر يا اخويا المدونين زعازيع فى ديرب على رايك كلهم بالظبط الربط تلاته مايزدوش كمان ...
وعلى رايك ناقص الواحد يدخل بالبطاقه ... انا مش عارف والله بيعلملوا فينا كده ليه .. مش عارف بيمنعونا الصلاه فى المساجد ليه .. ليه ليه ...
وتعالى ياعم نعمل اعتصام انا وانت مستنيك ..
وجزاكم الله كل خير على تعليقك

عمرو سلامة يقول...

بجد بجد يا اخونا غير معروف ردك ادانى دفعه للامام بطريقه غير عاديه ...
وباذن الله ستتجول الكاميرا وهنفضحهم قدام الناس والراى العام باذن الله .. عايزين نخلى مصرنا جنه .. عايزين نخلى بلدنا احسن .. وده مش هيجى الا لما نفضحهم ونفضح النظام الفاسد عشان يتصلح ويتطور للاحسن ... وجزاكم الله كل خير يافندم على تعليقك الجميل