السبت، ١٣ ديسمبر ٢٠٠٨

الحريه .. لشباب تنظيم البلالين

تحديث : ترحيل المعتقلين الخمسه الى سجن وادى النطرون ليلة الاحد 14\12\2008 ..
وفى خبر اوردنا منذ قليل انه تم مهاجمة محل الملابس الخاص بوالد المعتقلين سيف الاسلام عبداللطيف وابراهيم عبداللطيف الموجود بمساكن مبارك فى مركز ديرب نجم وعن سؤال الظابط المكلف بالمهمه عن سبب الهجوم قال : اننا مباحث التموين نكشف عن الملابس المستورده .. واخذ يعبث بالمكان حتى صادر كمية ليست بالصغيره من البناطيل الجينز وكان معهم ظابط امن دوله .. وقال : عشان انتى ست طيبه مش هناخد حاجات كتير (كان كلامه موجه الى والدة المعتقلين الذى كانت متواجده بالمحل ) .. ويبدوا ان عملية الاعتقال لم تكفهم فا ارادوا ان يجففوا المنابع التى يمول بها اباهم ابناءه لكى يكفوا عن لعب الاطفال ويلعبوا بالبلالين .. وفى هذه الحاله ارادوا ان يقضوا على اى مصدر مشبوه يمول هذا التنظيم الخطير جدا جدا جدا ..
---

لأنهم ارادوا اسعاد غيرهم .. لأنهم ارادوا ان يشاركوا غيرهم بفرحة وبهجة العيد .. لانهم ارادوا الخير للاطفال .. لان بالبلالين والبونبونى والسودانى (وهو سبب اعتقالهم ) ان يشاركوا الجميع بفرحة العيد .. اذن فانهم يستحقون الاعتقال .. يستحقون ايه ده واجب انهم يعتقلوا ..
ثلاثه فى طب وواحد فى تربية لغه عربيه والاخر موظف فى الادارة الزراعيه .. كلهم من شباب هذا الوطن لم يسرقوا لم يحاولوا الاختلاس لم يفكروا فى شرب الحشيش والبانجو وشربه عند الشجر عند المستوصف كده يا محمد يا حلمى .. دائما المسجد هو سبيلهم عندما يسمعون الاذان .. دائما القران فى ايديهم .. محبوبون من الجميع من الشارع من البلد كلها .. اراهن ان مافيش حد شاف اسلام ولا ابراهيم ولا سيف ولا احمد ولا محمد وحبهم ..
لماذا اعتقلوهم اذن ؟ لأنهم وزعوا بلالين .. لانهم وزعوا شوية سودانى .. لانهم وزعوا شوية كرامله .. وزعوا كابات .. هدايا على الاطفال .. هل هذه الهدايا سوف تقلب نظام الحكم فيما بعد .. هل ستؤثر على كرسى الحكم فى المستقبل .. هل ستزحزحه من مكانه شويه .. لماذا اذن اعتقلوهم .. ما هيا درجة الخطورة التى تعود على الدوله من هؤلاء الشباب الذين لا يد لهم ولا حيله سوا توزيع شوية بلالين على الاطفال وهما رايحين يصلوا العيد .. ما هيا درجة الخطورة التى خلت محمد حلمى بيه (رئيس المباحث المركز ) ينزل بنفسه من البوكس ويجرى اقسم بالله انه جرى زى المخبرين جرى ورا ابراهيم عبداللطيف يمسكه.. وكانه وجد الفريسه ولا المخبر الذى عندما امسك بجوال البلالين احس براحه غير عاديه وكانه مسك متفجرات اسلحه وثائق خطيره تؤثر على امن البلد .. هل هؤلاء يبيعون ويشترون البانجو فى ديرب البلد ؟ وتتركهم انت بمعرفتك يا محمد بيه حلمى .. هل هؤلاء ابتاعوا مرة من المرات من عند صيدليه نشات التى تبيع حبوب الصراصير والتى تتركها تبيع بمعرفتك وبمعرفة مخبرييك ؟؟؟ ...
رسالة الى كل معتقل من شباب التنظيم
- الدكتور اسلام نبيل (طب بيطرى الزقازيق ) .. غدا الفرج قريب .. بكرة تطلع وتلبس الدبل اللى كنت هتلبسها تانى يوم العيد بكرة تطلع ونحتفل بفرحتك .. فاكر يا دكتور لما كنت كلمتنا عن الثبات جوا المعتقل .. فاكر لما قولتلنا ان الثبات عمره ما يجى الا اذا كان بينك وبين ربنا طريق .. لو كنت بتقول الاذكار الصبح والمساء وبتصلى الفجر والظهر والعصر والمغرب والعشاء والوتر .. فاكر ييا دكتور لما قولتلى لو انت مضايق من حاجه روح لربنا كلمه واشتكيله .. الكلام ده كان قريب كان قبل ما تعتقل بيومين اه والله ..
على فكرة يا دكتور العربية تحت امرك .. شد حيلك يلا عشان نزفك احنا مش كنا متفقين على كده ولا ايه ؟؟ يلا يا اجدع دكتور
-الدكتور سيف عبداللطيف (طب بشرى ازهر اسيوط) .. قابلتك يوم الوقفه باليل .. كنا متفقين ان احنا نروح اسوان والاقصر مع بعض فى نص السنه .. وزعلت منى عشان مش قولتلك على الوقفه اللى كانت رايحه غزه وانت كنت عايز تروح .. ووعدتك انى اقولك على كل حاجه بعد كده .. صح ولا لأ .. فاكر يا دكتور لما روحنا سوا اسكندريه ولفيناها .. فاكر يا دكتور لما فصلوك من المدينة الجامعيه عشان انت من الاخوان وكنا بنهزر مع بعض ساعتها قولتلى انا واد خطيير على الامن العام .. اصلهم مسكونى باعمل متفجرات فى الشقه هههههه .. دكتور شد حيلك واطلع عشان نروح اسوان واقصر فى نص السنه على فكره انا مستنييك مش رايح الا لما تيجى معايا
- الدكتور ابراهيم عبداللطيف (طب بشرى ازهر دمياط ) .. على فكره احنا عشرة سفر مع بعض لفينا كتييير اوى .. فاكر يا دكتور لما بتتصل بيا على البيت وكانت امى تقولك سيب الواد عشان يذاكر .. تقوم انت تيجى من وراها وتقولى ياعم مامتك بتقول كذا وكذا .. وانت مش بتذاكر ليه ههههه .. فاكر الطعميه اللى كنا هنشتريها ليلة الوقفه عشان نتسحر مع بعض ولقينا المحلات قفلت .. فااااكر حاجات كتير اوى .. والله ما فاكر ايه ولا ايه .. فاكر العزومه اللى كنت عزمنا اياها على اللحمة اللى كنا بنتفق عليها تالت يوم العيد لما كنا فى العربيه فاكر هههه .. ربنا يفك اسرك يا دكتور والله واحشنى اوى .. ليك وحشه خاصه عندى
- الاستاذ احمد عادل ( متجوز من شهر ومتوظف من اسبوع ) .. لم يتهنى بالوظيفه ولا حتى بالجوازه اخر مره شوفتك كانت يوم ما حضرت فرحك وشلناك شيل من على الارض هههه فاكر انا اليوم ده ولما رفعنا المصاحف سوا واتصورنا جمب بعض .. فاكر انت لما كنت باجيلك المكتبه وتقولى انت مزعل الناس منك ليه اقولك بأه واحكيلك الهم .. ربنا يزيل عنك الهم يا استاااذى الحقيقه انت كنت وما زلت نعم الاستاذ .. على فكره عبدالبارى اخوك موصينى عليك توصيه خاصه عشان صورتك ادينى نشرتها اهوه .. علله البعد يفرجوا عنك ..
- محمد حماده (يملك من العمر 19 عاما - تربية لغه عربيه ) .. تصدق يا محمد ان انا كنت اول مره اعرف ان انت من بلدنا .. واول مره اعرف ان انت عمك الاستاذ الفاضل نشأت .. محمد كن صلبا جامدا .. خد الكف وقولهم هافضل اوزع بلالين .. الكف التانى هافضل اصلى وكده يعنى هههه ... على فكره يا محمد انت واحشنى اوى اوى ماكنتش اعرف ياعم درجة خطورتك للدرجة انت طلعت عفريت من تحت تبن وانا مش حاسس .. فاكر لما كنا بنتكلم فى الاذاعه .. فاكر حاجات مش ينفع نقولها هنا ابقى اقولك بعدين ... على فكره والدك صامد بس خليك انت راجل يا رااااااااجل ..
----
بعد اخلاء النيابه سبيلهم ..
امن الدوله ارادت ان تعطهم درسا لن ينسوه .. فخرجوا من مركز ديرب نجم الى مكان يعلمه الله
وحتى الان ما زال امرهم مجهول الهويه ..
نسال الله ان يكونوا على خير
----
صور وهما فى النيابه .. كتبوا على جنيه
"ذكرى اجمل صحبة .. عيد الاضحى 8\12\2008 .. اسلام - محمد - سيف - احمد - ابراهيم"



هناك ٤ تعليقات:

بذرة امل يقول...

فك الله كربهم واعادهم إلى اهلهم سالمين
مدونتك بتناقش قضايا واحداث مهمة جدا
استمر

وليد يقول...

الصسلام عليكم تقبل الله منهم اوقاتهم ونسال الله ان يجعلها فى ميزان حسناتهم واخى لاتظن السجن قهرا رب سجن قاد نصرا

وحي القلم يقول...

فك الله كرب المستضعفين
ومكن الؤمنين
اللهم آميييييييييين

رابطة هويتي اسلامية يقول...

السلام عليكم ورحمة الله وبركاته


جزآكم الله خيرا علي تفاعلك للدعوة إلي الله وتفاعلكم مع الميثاق الجديد وذلك من حرصكم وغيرتكم علي رابطتكم التي تدعم دعوتكم ورسالتكم في الحياة ومن هذا المنطلق بدأنا بإذن الله خطوة جديدة في العمل الفعال وأولي هذه الخطوات وهي الانتخابات وقد تم بالفعل معرفة بعضنا بعضا ودراسة كلا منا للأخر ومن هنا نتمنى من الجميع أن يكون إيجابيا وموضوعيا في اختيار من يراه نافعا وفعالا ومناسبا لكل منصب .
ونتمني فور علمك بهذه الرسالة أن تذهب الي حجرة الجلسات وتدلي بصوتك طبقا للتعليمات الموجودة هناك نتمني سرعة الاستجابة للدعوة لأن الانتخابات سارية حتي الساعة 8 مساء يوم السبت الموافق 20/12/2008.
نتمني منك كما عهدناك الايجابية والسرعة في الاستجابة .
رابطة هويتي اسلامية
رائدة الصحوة الالكترونية
في عالم التدوين
دون بجد