السبت، 6 سبتمبر، 2008

جمال بيه ... فى بلدى



اتى السيد جمال مبارك بصفته ابن البطة البيضاء ورئيس امانه السياسات بالحزب الواطى ... وبس
اتى فين بأه ... اتى الى مركز ديرب نجم هو ووزراء ابوه اللى هما وزير التمنية المحليه ووزير الصحه ووزير التضامن .. اتوا الى الوحده المحليه "العصايد" عشان يضحكوا على نفسهم اه والله يضحكوا على نفسهم ويضحكوا على الشعب وعلى اهل البلد ... اتوا عشان يفتحوا الوحده الصحيه المفتوحه قبل كده تلات مرات من قبل تلات وزراء ومحافظ ... اتوا عشان افتكروا ان هما عملوا حاجة فى برنامج الانتخابى للريس مبارك ... اتوا بربطة معلم بعد ان رصفوا الطريق وشالوا المطبات اه والله بعد لما كنت رايح بلدنا بلاقى خمس مطبات قبل ما اوصل البلد دلوقتى ولا مطب وايه سفلتوا الطريق من اول وجديد وركبوا اعمده نوور جديده فى البلد .. ودهنوا الشجر ودهنوا المدرسه اللى قعدت 15 سنه هتقع دهنوها ... وجابوا عربيتين اسعاف فى الوحده الصحيه بعد لما مش كانت موجوده على اساس انها مجهزه ... زودوا حصة الدقيق فى قرية شوبك اكراش وهيا احدى قرى الوحدة المحليه المسماه بالعصايد .. وكان فيها فرن واحد بدل 8 شكاير خلوهم عشرين شيكاره ... والسماد بتاع الفلاح بامانه هيصوا الفلاح بعد لما كان بيروح يشترى السماد من السوق السودا اصبح موجود وبكثرة فى الادارة الزراعيه فى البلد ... وزعوا على كل بيت غنى او فقير شنط رمضان مهداه من الحزب اللى حاكم البلد بقاله 30 سنه ...
كان المحافظ بينزل مرتين المركز يطمن على احوال الرصف والتشجير واعمده الانارة ودهان المنشات بالبلده ... ياخى واقسم بالله مرتين فى اليوم وكل لما ينزل يقول لرئيس مجلس المدينه الوضع مش ينفع ... نزلوا يلموا الزباله من الشارع ... عشان ابن البطه البيضا جاى ...
زهقونا فى عيشتنا يوم ما نزل سيادة ابن الريس البلد قفلوها منعوا الجميع من الدخول او الخروج ... بدا يوم نزول سيادة الرئيس ... برش الشوارع بالمياه .. ووضع الحواجز المروريه ولبس رجال المرور البدله اللى على الحبل ... وبداوا يشوفوا شغلهم ويسحبوا الرخص ويدوا المخالفات ...
نزل بطيارة هليكوبتر فى استاد الشرقيه ...وجاء فى موكب واصطف سيارات تقدر بحوالى 25 سيارة ... وكان البلد ملك ابوه .. باى حق ياتى فى هليكوبتر وباى حق ياتى فى سيارات وحراسات وامن ووو ...
انا لا عرف مسؤول فى مصر اسمه جمال مبارك ...
باى حق اتى ليفتتح المشروع هل اعطاه ابوه توكيلا بالنيابه عنه ليفتتح المشروع ... اهل يوجد فى الدستور نص يقول انه مسموح لعائلة الرئيس ان تستخدم سلطاته فى اى مكان ذهبت ...
اذن من اين لابن الرئيس بطائرة هليوكبتر وحراسات خاصه وووو ...
طيب مادام ان ابن الرئيس واقع فرض علينا خلونى اكلم ابن الريس باعتباره الريس ..
سيادة الرئيس جمال مبارك .. اتعرف ان منافقيك كثر ... اتعرف ان اللى كانوا قاعدين حواليك واخدين خمسين جنيه كل نفر .. اتعرف انهم جايين فى ميكروباصات مخصوصه ... اتعرف ان اسئلتهم متمليه ومحفوظه ... اتعرف ان هناك ميكروباصات اتت من الغربيه مخصوص لتصفق لك ولحاشيتك ... لماذا لم تدخل صحفي المعارضه الى داخل القعده اللى كنت قاعد فيها ... وادخلت صحف الجرائد الرسميه فقط ...
يا ترى انت عارف ده كله ولا لأ ... عارف ان كلامك مجرد كلام وضحك على الدقون ..
عارف ان الامن فضى بيوت الناس بجوار الساحه اللى كنت قاعد فيها وذلك لدواعى امنيه ... تعرف ان الامن منع اى سيارات تدخل البلد طول ما سيادتك موجود فيها ... عاااااااااااارف يا جمااال ولا لأ
وانت يا محافظ الشرقيه انسيت انه فى يوم تنصيبك محافظا للشرقيه سالك الرئيس مبارك انت محافظ ايه يا عبدالمجيد قولتله اللى انت تؤمر بيه ياريس .. هههه
سيادة الرئيس جمال مبارك .. كل الذين يقابلوك يقابلوك بكل ابتسامه وود واحترام وعندما يديرون وجوههم يشتمونك باقظع الالفاظ وذلك لانهم منافقين مش بيحبوك بجد يا جمال لا انت ولا ابوك ..

وعلى فكره اللى طلع وحضنك ده ... اللى كان لابس جلابيه فلاحى سودا ده هو ومراته كل واحد فيهم يا سيادة الرئيس جمال .. واخد ميتين جنيه ...

والست اللى كانت بتحلب اللبن وحواليها عيالها دى .. انا نفسى اعرف النصبه دى عاموهالك ازاى يا انكل جمال ... يعنى انت مافكرتش ان فيه حد ممكن يحلب بهيمه فى وسط المساكن ... على فكره دى نصبلهالك عشان مش تدخل جوا البلد ويقولوا انك راعى الفقراء وبتاع الستات اللى بتحلب لبن .. الست دى واخده 200 جنيه يا اونكل ..

انشر لكم بعض مانشيتات الصحف القوميه الذى حضر رؤساء تحريرها ..

لكى تحكموا على انفسكم ... من اللى كداب ومنافق

صور تبين لكم كدب ونفاق هؤلاء
المحلات مغلقه ... لمرور ابن البطه البيضا من امامها
الرصف ترش
المحلات مغلقه
شايفين .. المدرسه لسه مدهونه ..
دداهنين الحيطان ... وعلوا السور شويه عشان يدارو العشش
لسه بيركبوا الاعمده
شوفوا .. مداريين العشش ازاى عشان جمال بيه مش يشوفها ... نحيط علمكم ان الصورة كانت موجوده بالدستور
مغطيين العشش
يركبون اعمده الاناره قبل وصول جمال بيه بساعه
العامل بيوصل الاسلاك
انطلاق الناس الى شوارع العصايد بعد الحظر الامنى ... شايفين الصوان الازرق اللى هناااااك ده ... هو ده فيه جمال
المدرسه كان فيها مؤتمر صحفى منغلق على رؤساء التحرير الصحف القوميه ... شوفوا الحضور كان قليل ازاى قدام المدرسه
نحيط علمكم ان هذه المدرسه اصلا ابتدائى ... ولكنهم دهنوها وشالوا اليافطه وحولوها ثانوى صناعى
جمال طاهر .. اخرس لا يتكلم ... مش كان من ضمن الناس المتظبطته اللى هيقدموا طلبات لجمال ... فا قام رافع طلبه قدام الكاميرا وقال انا عايز ابنى ومش عارف
----
جريدة البديل :

فرض حظر التجول وغلق المحال وإخلاء منازل خلال زيارة جمال مبارك قرية العصايد في الشرقية
06/09/2008
مواطن يفاجئ أمين السياسات: المستشفي اللي سيادتك افتتحتها مبنية من 1984 والمدرسة الثانوي كانت أصلا مدرسة ابتدائي دهنوها وغيروا اليافطة
أجهزة الأمن حظر التجول علي قرية العصايد التابعة لمركز ديرب نجم في محافظة الشرقية مساء أمس الأول، خلال افتتاح جمال مبارك، أمين سياسات الحزب الوطني، مشروع تطوير الوحدة المحلية هناك.
وأجبرت الأجهزة مواطني القرية علي إغلاق محالهم لإتمام الزيارة التي تأجلت مرتين لدواع أمنية.
وقال الأهالي: "إن أجهزة الأمن تسلمت القرية منذ أسبوعين، وأخلت خلالها المنازل المجاورة لمكان تواجد نجل الرئيس، في منطقة المدرسة الثانوية الأزهرية". وسأل الأهالي: ماذا لو جاء الرئيس مبارك نفسه؟!".
وفي يوم الزيارة فرضت أجهزة الأمن حظر التجول علي الأهالي وحذرتهم من مغادرة منازلهم "بحجة عدم إثارة الفوضي". وافتتح جمال مبارك مستشفي الأسرة في قرية شوبك إكراش، بتكلفة تبلغ مليوني جنيه بعد تبرع الأهالي بالأرض المخصصة له، بالإضافة إلي افتتاح المركز الاجتماعي في إكراش ومحطة المياه بالعصايد ومستشفي العصايد ومدرسة ثانوي.
وما أن التقي أهالي قرية إكراش جمال مبارك حتي قال له أحمد سليمان: "المستشفي اللي افتتحتها سيادتك مبنية في سنة 1984، وسبق افتتاحها في 1989 والمدرسة الثانوي أصلها مدرسة ابتدائي دهنوها وغيروا اليافطة"
----
اخوان اون لاين .. اتصلوا بيا وكان التقرير الاتى منى لصحفى اخوان اون لاين احمد عبدالفتاح:
وسط إجراءاتٍ أمنيةٍ مشددة لم تشهدها محافظة الشرقية من قبل، هبطت في تمام الثانية من ظهر اليوم بإستاد الزقازيق طائرة عمودية (هليكوبتر) تقل جمال مبارك أمين لجنة السياسات بالحزب الوطني الديمقراطي، الذي توجَّه فور هبوط الطائرة إلى قرية شوبك كراش بمركز ديرب نجم وسط موكبٍ من السيارات شمل أكثر من 25 سيارةً؛ وذلك لافتتاح الوحدة الصحية بالقرية.
ومنذ ساعات الصباح الأولى فرضت أجهزة الأمن بالمحافظة حظر تجول بكل الطرق التي كان من المقرر أن يمر بها الموكب، وتم إغلاق كافة المحلات المحاذية للطريق، أما على جانبي الطريق فاصطف المئات من الموظفين الذين أحضرهم الحزب الوطني بسيارات أجرة من محافظة الغربية ومدينة الزقازيق مقابل 50 جنيهًا للفرد من أجل تقديم التحية ورفع لافتات التحية لنجل الرئيس.
أهالي ديرب نجم من جهتهم أكدوا دهشتهم من الإجراءات التي صاحبت زيارة جمال مبارك، والتي بدأت منذ أكثر من أسبوعين وأشرف عليها محافظ الشرقية بنفسه، حتى وصل الأمر بالمحافظ إلى زيارة مركز ديرب نجم مرتين يوميًّا للتأكد من التجهيزات للزيارة، والتي تمثَّلت في رصف جميع شوارع المركز وتنظيفها ودهان الأشجار ووضع أعمدة إنارة جديدة.
أحد سكان قرية شوبك كراش قال : "الغريب في الأمر أن الوحدة المحلية التي افتتحها جمال مبارك تم افتتاحها مرتين قبل ذلك؛ مرة عن طريق المحافظ ومرة عن طريق وزير الري، لكن هذه المرة الأمر اختلف وتم شراء سيارتي إسعاف للوحدة بالرغم من أن مستشفى المركز لا يوجد به سيارة إسعاف واحدة".
أحد الفلاحين قال لنا: "كل شيء تغيَّر بسبب زيارة نجل الرئيس؛ فالشوارع تم رصفها ورشها، والمخبز الوحيد بالقرية تمت زيادة حصته من الدقيق من ثمانية أجولة في اليوم إلى عشرين جوالاً، وتم توزيع شنطة رمضان على كل بيوت القرية، ولأول مرة تم توفير الأسمدة بالأسعار القانونية في الإدارة الزراعية في القرية، فإن كان الأمر كذلك فنحن نطالب جمال مبارك بزيارة القرية كل يوم".
----
لدينا فيديوهات .. لدخول ميكروباصات من محافظه الغربيه الى قريه العصايد معبئه بالناس .. ولدينا صور للانحباس المرور بسبب زيادة ابن الريس ..ولكننا نكتفى بذلك وننشر الفيديوهات وقت اخر ...
وكانت هذه تغطيتنا لزيارة ابن الريس نتنمنى ان نكون قد وضحنا لكم جزءا من الحقيقه المغيبه عنكم ...

هناك 7 تعليقات:

sun_of_freedom يقول...

يا سلااااام

ايه الحلاوة دى


اول تعليق أخييييييييييييييرا اول تعليق


لازم اخدت راحتى فى التعليق


فكرك هو مش عارف ان كل دا تظبيطات
دا تلاقيه هو بذات نفسيته كدا الى اعت الناس دى تعمل كال دا علشان الشكل العام بس

ويمثلوا زى ما عمل فى المصنع الى افتتحوا قبل كدا

وروج العمال بمرتب وجاب ناس تانيه من حواشيه


يا ظلمة
ولا تحسبنا الله غافلا عما يعمل الظالمون


تعبتونا خلاص كفايااااااااااا
مزهتقش تمثيب ونصب واختلال


طب مش مكسوف وهو عارف ان ا حنا عارفين ان كل دا تمثيل في تمثيل


اه صحيح هيكسف ليه مفيش دم اصلا


بس معلش اعذروا برده يا عمرو الراجل لسه سنه اولى اشراف على الدوله

سيبوا يتعلم ويدرب

دستور ايه بس


خلاصث انسي

اصله استأجر الحكم لاسرته


يااااااااااااااااا اكيد هيموت يطق م الفرحه وهو ماشي يتمخطر فيها كدا


سيبه يعمل من نفسه مين عارف عمره لامتى وبعدين لسه ابن ابوه وفرحة ابوه

خالي ابوه يفرح بيه

مش عارفه انت متحامى عليه اوى كدا ليه

مش شايفه طول على الفاضي ماشاء الله بيثمنه


علشان يمسك الحكم بعده ويعمر هو كمان


بلاش سيرة الامن دى دول على جنب تانى



اقول ايه بس ياربي


حسبى الله ونعم الوكيل

ستردون الى عالم الغيب والشهادة
فالى الله مرجعكم

ودا دايما الى بننتظروا منك فى جديدك


استمر يا بطل

fahd يقول...

جمال مبارك ..رئيس قبل تولي الرئاسة ..وشكرا يا عمور على التحقيق ارائع ده....

محمد الشوادفي يقول...

جزاكم الله خيرا على الموضوع الجامد ده ، بس انا أعارضك في طريقة العرض ، مينفعش أستخدم ألفاظ زي ابن البطة أو ابن امه ، أو الكلام ده كله

-------
تحياتي

عاشــــــ النقاب ـقــــة"نونو" يقول...

اللهم انا نسالك العفو والعافية
اللهم لا نسالك رد القضاء ولكن نسالك اللطف فيه
يا ارحم الراحمين
ابتلاء وربنا يجازينا بقى عليه
بارك الله فيك
ورمضان كريم

ايمان @@ بنت الحرية يقول...

والله مش عارفة اقول ايه
حسبنا الله ونعم الوكيل
وطبعا اكيد هو عارف بكل دة وهو الممثل الاول فى المسرحيةدى كلها (البطل كمان)
بس حضرتك يا استاذنا زعلان ليه انه نزل من غير اى صفة ؟؟
مش لازم يتعلم قبل ما يمسك ومعلش تلاقى بباه كان مشغول شوية ومعرفش ينزل معاه.. تتعوض ان شاء الله المرة الجاية ياخد معاه باباه وماماته كمان..عادى يعنى اعتبرها فسحة لابن الريس..الله دة ابن الريس برضة لازم يتفسح كويس ولا ايه ؟؟؟
وبعدين لو مزعلك اوى انه بيتفسح كدة من غير ما يكون ليه سلطة ...كلها سنتين ولا شهور ويبقى ليه سلطات ويبقى له مطبخ لوحده كمان(طبعا فاهم)

شمس الحرية قالت لك كمل يا بطل
وانا كمان بقولها لك كمل بس برضة خد بالك وحرص وان شاء الله العيش والحلاوة علينا
ربنا يوفقك فى كشف الحقائق المخفية عن اعين الشعب المسكين

اسلام اسلام يقول...

الشكر كل الشكر للحكومه على الدعم الذى لايعرفه معظم المتفلسفين بالافاظ وليس عندهم قدره حتى على اداره بيتهم او محل بقاله صغير هل تعل ان اسطوانه الغاز الى انت نتشتريها ب5جنيه هى تكلف الحكومه 50جنيه غير دعم الدقيق الزيت واشياء اخرى

ميدو يقول...

للاسف النظام رجع تاني