(حمايه) من شرب السجاير .. وفوز لصحتك

عمرو خالد ده رجال عسل ... اه والله

هى دى الجملة التى سمعتها اذنى من احد البقالين ( نعم من احد البقالين ) الموجودين عندنا فى الشارع قالهالى وانا رديت عليه وقولته اه والله عسل عشان خلاك تبطل السجاير ... قام قاللى اسكت ياعمرو انا كنت فين وبقيت فين يلعن ابو السجاير اللى ضيعت فلوسى وصحتى ... هكذا قال لى وبصيت له وابتسمت ابتسامه رفعت من روحه المعنويه ..وتوكلت على الله ..

وفى ذات اليوم .. ليلا كنت اسير فى احد الشوارع وانا ماشى كان على جمبى سيبر فا بابص كده لفت نظرى بانر كبير لحملة حمايه فا استغربت ايه اللى جاب البانر ده لبلد زى بلدنا .. الحاجات دى موجوده فى القاهره اه فى الزقازيق حتى على الاقل ماشى فى المحافظات لكن تيجى المراكز ... هذه كانت الصدمة بالنسبه لى ... فا دخلت السيبر كده وسالت صاحب السيبر انت جايب البانر منين ... قام قاللى من الزقازيق ... فا دخلت معاه فى حوار قاللى انت مستغرب مش صح .. قولتله اه مستغرب وهاستغرب .. قاللى تعرف انا كنت باموت من الزفت اللى كنت باشربه وقعد يقولى انا كنت باشرب كيميا ( اول مرة اسمع عنها ) وباشم ووصلت للبانجو والحشيش وشربت حاجات كتير اوى .. ومش كنت عارف ابطلهم ... وبعدين قولت( هو بيقول يعنى) لأ لازم اقف لازم اعمل حاجة .. فا قالى انابدات اجدد فى السيبر اهوه واشتغل شويه واسيبنى لكن تعرف يا اخ ( بيكلمنى ده كله ومش يعرف اسمى بس هو زى ما تقول ارتاحلى ) انا باضعف وزى ما تقول شيطان ابن كلب ( على وصفه ) بارجع تانى انا حاولت اسيب العيال اصحابى بس بارجع تانى ... جربت طرق كتير جدا ولكن بارجع تانى ... وقالى فى الاخر مش تقول لحد الله يكرمك قاللى انت اكيد تعرف اخويا ( نعتذر عن كتابة اسمه لأنه هو من متابعى هذه المدونة ومن محبيها بشده ) قولتله اه اعرفه ومش هاقوله حاضر .. قاللى تعرف انا لدرجة انى بادور على حاجة تخلينى ابعد عن المخدرات والقرف ده انا جبت البانر اللى انت شايفه ده من الزقازيق قولتله منين قاللى اقولك بس مش تزعل قولتله قول قاللى انا قطعته من الحيطه .. لأنى كان نفسى الناس تحمى نفسها ومش تقع فى اللى انا وقعت فيه ده .. قولتله انت سمعت البرنامج بتاع عمرو خالد ده .. قالى لأ ... قولتله طب اتصلت بالرقم الموجود على البوستر قالى لأ ... فا عالاطول قمت مطلع موبايلى واتصلت بالرقم الموجود على البوستر لعلنى اجد علاج له ( وقولت يتحرق الرصيد اللى كنت لسه شاحنه ) واتصلت لعلى اجد للشاب الذى يبلغ من العمر 22 عاما علاجا ..ورد عليا احدهم وقولتله حملة حمايه قاللى ايوة يا فندم قولتله عندنا مريض وكده قاللى واحد ولا كام قولتله واحد قاللى حضرتك ولا واحد صاحبك قولتله صاحبى قاللى طب اكلمه ممكن ... كلمه وكان فى منتهى الادب معاه لدرجة ان الشاب المريض اللى كان معايا اول ما مسك التليفون بلهفه قاله ايوة ياباشا وفى نهايه المكالمه قاله انا تحت امرك يافندم لو هتعاجلونى وربنا يباركلكم .. واملا الشاب موبايله وكمان اداه عنوان المقر اللى هيجيله عليه اللى هو فى الجيزه ... واخد الشاب العنوان وقاله انا جايلك باذن الله بالرغم من بعد المسافه من الشرقيه للجيزه اصر انه يروح ... المهم خلص المكالمه وشكرنى شكر الجزيل على مساعدته قولتله فى موقع لصناع الحياه فى الشرقيه ادخل عليه قاللى انا دخلت وباعتلهم ياعم ومش بااعتولى اى حاجة ... قولتله خلاص ياباشا بس انت روح للراجل على العنوان قاللى باذن الله هاروح ... سلمت عليه بحراره وودعته على امل اللقاء معه فى يوم ما بعد العلاج باذن الله ... الكلام ده كان يوم السبت ( 15\3\2005) .. يعنى لسه قريب ومشيت وانا زعلان عارفين ليه .. لأن اخوانا فى صناع الحياه هنا مش عاملين مقر للحمله هنا فى الشرقيه وكل واحد عايز يتعالج يروح الجيزه ... ارجو من اخوانا القائمين على صناع الحياه فى الشرقيه بعمل مقر خاص للحمله فى الشرقيه وتدريب الناس على كيفية العلاج وايجاد كوادر واطباء لأن فى ناس كتير تعبانه اوى ... وانا من هذه المدونة الغلبانه اتقدم لعمرو خالد بجزيل الشكر للفكرة الفذه دى واللى هيتعالج وبيتعالج على ايديها الكثير من الناس باذن الله ... وربنا يباركلك يا استاذ عمرو ...

ومن هذه المدونه نعلن اننا بصدد التفاعل مع هذه الحملة ... ومعا نحمى انفسنا من المخدرات .. من التدخين .. من فلوسنا اللى بتروح هدر ... من تعب اولاد ... من الناس اللى حوالينا .... معا نفوق ونصحى ونبطل البانجو والحشيش والسجاير .. معا لتغير حياتنا ..

--

موقع الاستاذ عمرو خالد والمشرف على الحمله

موقع حماية

موقع صناع الحياة بالشرقيه والمشرف على حملة حمايه بالشرقيه