غش فى الازهر .. وتسريب للاسئلهبعد نشرنا لموضوع الغش ... وايضا كان بالصور وفضحنا ما يجرى فى المعهد الازهرى بديرب نجم من تسريب للاسئله ودخول الاجابات وغيرها من وسائل قذره لا ترتق بأن تكون فى معهد ازهرى وصرح من صروح الاسلام والمسلمين ....
وايضا لموضوع الهرج والمرج الذى ساد لجان الثانويه العامه بالتربيه والتعليم من خروج لعلب السجائر وانتقالهم من مقاعدهم والغش الجماعى الذى حدث .. فى وجود المراقبين ونشرنا لذلك صورا تدل على ذلك .. وكانت ان المفاجاه ان ملتقط هذه الصور اخرج الموبايل فى وسط اللجنه وصورها ... مما يدل على مخالفه صريحه لقوانين الامتحانات والتشديد على عدم وجود اى موبايل داخل اللجنه .
حذفنا الموضوع ... لماذا ؟
ياتى حذفنا للموضوع بناء على ما جرى خلف الكواليس ... مما كان قد يترتب على الموضوع من فصل سنتين لكل من شارك فى عمليه الغش خارج اللجان ... وايضا من تصحبح الورق فى لجان خاصه داخل غرف التصحيح بالازهر الشريف ... وكان المستهدف الذى اود ان اوصل اليه رسالتى للناس قد وصل فعلا ...
ومن هنا اتقدم بخالص التمنى من الغشاشين عدم الغش حتى لا يكونوا منعدمى الضمير و مزورين للحقائق خانعين فاشلين فى حياتهم ...
واتقدم ايضا لزملائى الاعزاء اللى زعلتهم بخالص التحيه .. وعشان العشم يا زيييييييكو حذفت الموضوع ...
نأتى لتداعيات موضوع الغش
حدث ان هناك نفرا من القوم ويدعى احمد او محمد عبدالباسط .. هكذا قال لى اسمه فى مكالمه هتافيه حدثت بينى وبينه فى الساعه التاسعه مساءا يوم الاربعاء بتاريخ 18\6\2008 بانه اتصل بيا وقالى انا باهنيك على موضوع الغش قولتله الله يبارك فيك .. قالى انت مين بأه عشان تكتب عن الموضوع ده قولتله انا اللى بتتصل بيه لا مؤاخذه ... قالى انا ولى امر طالب وابنى فى الصور قولتله يافندم ابنك مش فى الصور ... قولتله قاصدك تقول ان ابنك غشاش وخايف عليه لا يسقط .. ما الغشاشين كتير ... قالى انت مين يلا عشان تعمل كده انا هاموتك قولتله استخبالى تحت السلم ... قالى انا عايز اقابلك قولتله ورايا الديوان مش فاضى ... قالى مش تنرفزنى قولتله انت اللى مضايق نفسك عشان ابنك مش هيعرف يغش ... قالى انا عايز اقابلك قولتله ماشى .. قولتله كمان عشر دقايق واكون مستنيك فى المكان الفلانى .. قالى تمام .. جه المكان الفلانى ورن عليا قولتله مش فاضى اجيلك .. قالى انا جبت صورتك وهاربيك وهادبحك ومستخبيلك فى الدرا .. وكلام كده وسبته يهرتل .. وقفلت السكه اتصل تانى مش رديت اتصل تالت فتحت عليه وقفلت .. حرم يتصل تانى ...
اعتقد ان هو من متابعى المدونة ده الا ما كانش عرفنى ... ومن هذا الموضوع باوجه له رساله واقوله المكالمه متسجله يا سيد عبدالباسط ... وبايدى دلوقتى اروح اقدم بلاغ فى المركز بتهديد وشروع فى القتل وسب وقذف وبلاغات مش تنتهى منها لا اول ولا اخر ... فا خاف على نفسك لأن انت اللى فى موقف ضعيف مش انا ... وممكن اخد عليك تعهد قدام رئيس المباحث ولا تقدر تمس شعره منى ...
وانا شلت الموضوع اهوه وغش انت وابنك براحتك ... يا غشاشين
2 - من تداعيات الموضوع ... اقبلت الصحفيه ايمان عبدالسلام صحفيه بالدستور برساله الى عبر الايميل تخبرنى فيها انها عايزه الموضوع ... وخدته بالصور وهنا احيط علمكم ان الموضوع ممكن يوصل الصحافه فى اى وقت ... وسلامى الى كل من يظن انى بخاف او باتهدد
3 - كان هناك زملاء اعزاء من ظننتهم انهم سوف يكونوا لهذا الموضوع بالمرصاد بل وجدته يتحايل ويقول اخويا جوا واللى عبدالحميد جوه .. واللى بتاع جوه وعشان خاطرى والعيال هيسقطوا ... بس رسالتى وصلت ليهم وعرفتهم على الحقيقه
4 - ان امين الشرطه الجالس على البوابه ولم نلحظه فى الصور ... التزم الحضور من ثانى يوم نشرت فيه هذا الموضوع حتى انه قال لبعض الشباب المشارك فى حل الاجابات المسربه "امشوا من هنا يا خونه"
5- الموضوع له اثر كبير جدا داخل المركز ... واصبح كل من هب ودب يتكلم عن الغش بالطرق القذرة والمتحايله من تسريب للاسئله فى معهد الازهر بنين ... وعرفت ان المسؤلين متابعين المدونة وبدورى اشكرهم على ردودهم الايجابيه لمثل هذا الموضوع
-----
كلمه اخيره ... باوجهها لكل اللى قالى ان انسحبت .. لأ ده كان كارت ارهاب ومش عندى مانع ابدا انشر اى فيديو من عندى ولكم منى كل احترام وتقدير لكل زوارى الاعزاء...
هناك ١٩ تعليقًا:
شئ مقزز
الغشاشين عندما يكبرون يعملون بمهن الطب والهندسة والتعليم والافتاء والصناعة والادارة
سبب آخر لكوننا متخلفين
انت دايما كده يا عمور فاضحهم
بس والله حاجه تزعل انا في مدرسه ثانوي ممكن ما اجيبش درجه كويسه باجتهادي
لكن ممكن واحد من اللي غشوا انا افضل نه يجيب درجه احسن مع انه فاشل ويخش كليه احسن مني
انا حاسس ان حقي بيتاخذ مني
حسبنا الله ونعم الوكيل
ومشكور يا عمور علي موضوعك
على فكرة الورق اللى قدامهم ده مش ورق الاجابة على فكرة على ما ارى وذلك لان الورق فى الصورة الثانية بتاعت الواد اللى قاعد على التخته والسيجارة فى ايده باين انه ورق متنى يعنى ورق مراجعة والواد اللى بيكتب على الحيطة انا شايف انه بيبرشم حاجه على لحيطة مش بيكتب للذكرى لان الورق اللى قدامه مش ورق اجاية
معلش انا اسف انا شايف كده لو انت شايف غير كده عادى منزعلش من بعض
ولكلا منا رايه
بصراحه الرجاله عامله شغل زي العسل
فيها إيه لما يكون داخل معاه الإمتحان ؟؟؟؟؟؟؟؟؟
أكيد هيكون داخل أكتر إطمئنان ؟؟؟؟
بس يالا ربنا مع الضعيف وكل واحد مش بيقدر يدفع عشان ياخد الإمتحان قبل معاده
جزاكم الله خيرا
اه يا بلد هيصه
؟؟؟؟؟
للدكتور ايهاب ابراهيم .. فعلا ده سبب اخر لكوننا متخلفين .. اشكرك على تعليق سيادتك والذى زادنى شرفا وزاد المدونة نورا ...
عفوا يا مورا ياعم انا مش فاضحهم والله هما اللى بيضعوا انفسهم فى موقع الفضيحه .. وهما اللى بيخلوا نفسهم فى المكان ده .. وبس
حسبنا الله ونعم الوكيل
ربنا يوفقك فى امتحاناتك
ههههههه
حضرتك نظرك ايه ثاقب ... طب مش بصيت على ورقه زميله ليه الواد اللى لابس تى شيرت اسمر ... على العموم ده رايك لكن انا باجزم ان الحاجات دى حصلت فى لجنه فى وسط اللجنه مش لا مؤاخذه قبل اللجنه ... وانا صادقق فيما اقول ..
ولكل منا رايه ..
وتشكر على طرح رايك يا نجمنا يللى مش من الاخوان ... ههههه
جزانا واياكم يا مهندسنا ... ههههه
شغل عال العال على رايك ..
شكرا على الزياره الاولى دى .. ونتمنى انك تشرفنا عالاطول وربنا يكرمك
هيصه بس ياعم احمد .. ده كوسه ووكسه ونكبه وكل حاجة ..
ربنا معانا فى اللى جاى .. وياخد اللى كان ومازال السبب فى الهيصه دى ..
جزاكم الله كل خير على تعليقك
استرها يارب
اولا:انا وبقرا الموضوع جالى خبر انه لو اسأت لحد من الكبار هيتعمل لك قضية سب وهيتصادر جهازك"مجرد تحزير .
ثانياً:الموضوع بقى حاليا مسألة ضمير وطبعا القلة القليل من لديها..وبعدين كل واحد شايف اللى فوقه بينهب ويغش ويعمل اى حاجة عشان يوصل معقولة مش هيعمل زيه ..مش مهم النار ولا مهم العقاب ولا اخرته هتبقى ايه ولا اى حاجة المهم انه يوصل ويدخل كلية مش ليه ولا بمجهوده ودة طبعا من فوائد الغش
ثالثاً:انا عايزة اشوف الفيديو والصور ان شاء الله قريب صح ؟
المشكله ان ده العادى
تعال بص عندى مثلا ف المعهد المحترم
الحكايه اقرب لسوق او قهوه
ومعنى كده ان فى ناس كتير بتتظلم
الناس بقيت تقول انا ليه اذاكر مع انى اقدر اججيب تقديرات من غير مجهود
وده اللى رجعنا لوراء
السلام عليكم
الموضوع للاسف مش غريب ابدا
ولا هو في هذا المكان وبس
الغش صار منتشر في كل الوطن العربي
وفي كل دار علم مهما كانت
وعلشان نكون وقعيين في معاهد ومركز علم
مانعه الغش ..وفي مرقبين عندهم ضمير
وفي رقابه احياناً
والمشكله مش مشكلة مؤسسات ولكن افراد
العيب مش في المعهد ولا المدرسه
ولا حتى في المرقبين المتساهلين
المشكله في العائله (أب وأم)
لو في تربيه سليمه وفي قيم مزروعه
صدقني ماكان هذا حال مراكز العلم ولا هذا حال الامة
اذكر في مدرستي الغش كان عيني عينك
وفي بنت ذكيه جدا والامتحان كان صعب جدا
سمحوا للكل يغش والمدرسه اترجتها تغش
ولكن البنت رفضت , فالكل ثار عليها
طلبه واوليا امور و و و .. مش اعجاب
ولكن انتقاد (تخيل)
صحيح في غيرها ماغش ولكنها كانت رمز
لانها كانت عبقريه بشكل مش طبيعي
ولمن سالتها ليه رفضتي قالت ..
(أبي علمني ان الغش حرام فماللنجاح
قيمه ان كنت بخسر علاقتي مع الله"
المفروض نبطل نعلق كل شى على عيوب
الموؤسسات والحكومه .. ايوه فسادهم كثير
ولكن احنا كافراد ايضا مسؤلين
ولا تنسى انه الاسرة اساس المجتمع
وان صلح الافراد صلح المجتمع ولو بعد قرن
هذا ولك خالص تقديري
لا تعليق
بجد
لا تعليق علي كلامك
وعلى كلامهم
وعلي وضعنا فى بلدنا
السلام عليكم ورحمة الله وبركاته
الصراحه شئ صدمنى صدمة العمر
إن الازهر يحصل فيه كدا
دى مهزله وكارثه
كارثه بخصوص التعليم ذالي بيقولوا فيه نطوروا ونلتحق بركب الحضارة وعاملين فرح الكاادر ومنح وافشخنات
وهو فى الحطيط اساسا وفي آخر القاع
من غش
والكارثه الكبرى انه الازهر
حسبنا الله ونعم الوكيل
هو دا التعليم الى هترتقوا بيه بمستوى الدولة يا مسؤلين
طب ليه
ما تعلموهم صح الاول وتفرحوا بابنائكم
لكن تعلموا الغش ويدخل كليه وتقول ان دولتك فيها الاطباء والمهندسين والمعلمين لكن اساسا
هيقدموا شغلهم ازاى هيكون بردوا بالغش
والكذب
فالصدق والصراحه نهايته الجنه
اما هذا الطريق
جهنم خالدين فيها
يا ازهرى بتعمل ايه ناسي انت فى ايه
فين اسلامك وتعليمك الازهرى هتروح بيه فين من ربنا
خايفين من الى هيحصلك وتحقيق
يعنى التحقيق دا هو نهايه المطاف
نسيتم وتناسيتم محاكمات ربانيه وحساب الملكين
ماذا تقولون ؟؟؟ظ امام الله
ماذا سوف تفعلون ؟؟؟؟؟؟؟؟
واأسفاااااااااااااااااه
ولكن اتقوا اله فى انفسكم واموالكم واولادكم ومالكم
قال الله تعالى : ( ويل للمطففيفن ........ ) تتكلم الايه عن الغش في الميزان ولكن سواء فى الميزان او فى التعليم فالالساس واحد
وكان حديث واضح تحفظونه ولا تعملون به
( من غشنا فليس منا )
يعنى ليس من امة محمد مطرود منها ومن رحمة اللهلمن تتبع .... لمن تخشي ....
حاسبوا أنفسكم قبل أن تحاسبوا
اعانك الله تعالى على نشر الباطل
وارجع الله للامه عقولها
ايه ده يا عمرو
انت دايما كده بتجيب المستخبى
انت دايما فاضحهم كده
ربنا يستر عليك وعلينا
بقولك ايه يا عمرو
خلى بالك من نفسك شويه
ربنا يسترها معاك
مامتك محتاجاك
هو شكله صايع قديم ..
بس مش بيقولوا دلوقتى الصياعة أدب ..هههه
قد قتل هذا الرجل ابنه دون ان يدري ، كان الله فى عونه ..
كن حذرا ياعمور ..
أخـــوك
حبيبى قلبى الغالى
تاج الشباب والبنات من النجم القادم فى انتظارك
يلا بسرعة مستنى الاجابات ولا هتغشهم هم كمان ههههههههههههههه
حذفت البوست اللى مزعلك على فكرة
إرسال تعليق