الأربعاء، ٥ سبتمبر ٢٠٠٧

رسالة الى أبى الحبيب : حسنى مبارك

بابا محمد حسنى مبارك
أبي الحبيب حسني مبارك مقدمه لسيادتكم برعم نشأ فى عهدكم وتربى فى كنفكم وشرب من بحر علمكم وحكمتكم التى أذهلت العدو قبل الصديق تسمح لى أقول لك يابابا ؟ بابا أنا تعبان قوى ....لأ مش سنانى دى ودانى !!!...أيوه ودانى....أصلى سمعت كتير قوى عن حاجات حلوة حتحصل لنا وما حصلش منها حاجة ...حقول لك شوية حاجات منها واخواتى هنا يمكن يحبوا يزودوا عليها شوية حاجات تانية جايز أكون نسيتها ... بابا مش عايزك تزعل منى علشان فتحت لك قلبى
(1)
بابا...مصر فى السياسة والإقتصاد وحتى فى الرياضة بقت فى الحضيض .. بقينا زبالة يابابا صدقنى
(2)
الدول اللى كانت محدش بيسمع عنها خالص بقت أحسن مننا بكتير قوى يعنى دول زى الهند ...الفلبين ...حتى تايلاند عندهم إيدز وبرده بيشتغلوا وبيصدروا كمان .... إنت نمت يابابا .....لسه صاحى... طيب أكمل
(3)
بتشوف قناة الجزيرة والعربية ودبى يابابا....شوف همه وصلوا وبقوا إيه واحنا بقينا إيه....الإعلام بتاعنا بقه زبالة بصراحة ...تفتكر ده من إيه... تفتكر ده من النفاق اللى انس الفقى معيشك فيه يا بابا ولا ايه .... يا بابا اصحى وفوق بأه
(4)
المصريين اللى عايشين بره محدش بيسأل فيهم خالص يابابا....تصور لو حد منهم مات ...السفارة ما بترضاش تبعت جثته إلا لو الناس لمت من بعضها ودفعت المعلوم......ده غير إن سفاراتنا بتعاملهم بطريقة أخر جليطة وقلة حيا بصراحة... مش مصدقنى .... طب اقوللك اخر حاجة ... اللى حصل فى الكويت والمصريين اللى اتعذبوا .... طب سيبك من ده الناس اللى فى ليبيا ... الصراحة يا بابا شكلنا بأه وحش خالص .... اعمل حاجة
(5)
إحنا مابنزرعش قمح ليه يابابا ؟؟؟....أنا عارف إنك بتحب الكنتلوب علشان طعمه أحلى.. مش مهم
(6)
بابا...بيقولوا إن إسرائيل ممكن ترجع تحتلّنا تانى علشان المعاهدة اللى عموا أنور مضى عليها دى.....مينفعش تلغيها يابابا وندخّل جيش مصرى فى سينا
(7)
هوه ليه عمو عمرو خالد وأنكل يوسف القرضاوى ملهمش برامج على التليفزيون المصرى يابابا؟؟؟.. ليه كل البرامج بتطلع فيها روبى ونانسى ودينا؟؟؟....طب عمو طنطاوى ما بيزعلش لما بيشوف الحاجات دى يابابا
(8)
فيه إشاعة بتقول إن عدد الجراد اللى هاجم مصر 70 مليون جرادة يعنى نفس عدد شعب مصر وإن عمو كمال الشاذلى هوه اللى بعتهم علشان يقولوا نعم يامبارك .... صحيح إنهم كتبوا لك مبايعة على ورق الشجر يابابا
(9)
بابا.. وزير الزراعة الجديد ده باين عليه فقر وقدمه نحس.. اوعى تفرط فيه يابابا لأنه بقى أملنا الوحيد
(10)
بابا ... ليه اعتقلت عمو خيرت الشاطر يابابا وحطيتوا لتانى مرة فى محكمه عسكريه .... هو عمل ايه ... عشان بيقول الاسلام هو الحل .. ولا عشان يا بابا وحش وارهابى .... عايز اعرف الحقيقه يا بابا .... هما صحيح الجماعه اياهم ... محظورين من المجتمع .... طب ازاى يا حبيب قلبى يا بابا وهما عندهم 88 مقعد فى مجلس الشعب .... بابا انت لخبطلى دماغى ... فهمنى عشان خاطرى ... فهمنى عشان انا مش بقيت فاهم ....
(11)
انت عارف يا بابا عمو حبيب العادلى ده ... قلب اسود .... شوفت يا بابا عمل ايه .... موت طفل عنده 12 سنه فى قسم البوليس .... شوفت .... عذبوه يا بابا لحد لما مات .... هو عمل ايه يا بابا .... يا بابا عمو حبيب العادلى ده راجل قلبه قاسى اوى .... هات واحد قلبه طيب عشان خاطرى يا بابايا
(12)
بابا...إنت صحيح ناوي تجدد تاني ؟؟؟
باباااااااا......سيب شعرررررري ياباباااا.......مين الناس دول ياباباااااااااهمّا واخدنى ورايحين على فين يابابااااااااا ؟؟

هناك ٨ تعليقات:

جمعاوى يقول...

إمشىى يالا من غير غلبة

خلاص منكم لله مليتتوا البلد

بابا مين يا ........... حذفت للرقابة

هما اكيد كانوا بيقولوا لك كده

بس معلش يابنى

هو حد بيختار أبوه


و بعدين أنت لك عندى دعوة حلوة

و اهو غحنا داخليين على رمضان

لو حسنى مبارك أبوك

و سوزان مبارك أمك


إدعى يدخل عليك رمضان و إنت يتيم




تحياتى لك يا عمرو

يا صحفى الاخوان

" و اللى مش عاجبه ..يقف قدام المرايه و يشوف حلمة ودنه "

غير معرف يقول...

طيب اذا هو بابا سكت وسمعك لآخر أسئلتك وبعدين أخدوك يبقى أب ديمقراطي بما تركك تفضفض عن اللي في نفسك ونسأل كل اللي خطر ببالك

وهم كمان لو أخدوك من شعرك وانت على قيد الحياة برضه لسة في نسبة من الحرية في التعبير موجودة

عمرو سلامة يقول...

هههههههههههههههههههههههههههههههههههههههههههههه حبيبى يا جمعاوى ..... انا عارف حد بيختار ابوه ... أنس الفقى هو اللى قاللى فى التفزيون بتاعه ان ده بابا ودى ماما ... قولت خده على قد عقله وقولهم كده ... وانا بانفذ اهوه .... هههههههههه ..... اللهم يتمنى قبل دخول رمضان من بابا وماما سوزى ....
ههههههههههههههههه
....
تشكر يا جمعاوى على تعليقك ... اللى فطسنى من الضحك ..... تسلملى يا جمعاوى بك ... با مروش المروشين انت

عمرو سلامة يقول...

عندك ما زال هناك نسبه من الحريه فى البلد ما دمت اعتقلت ولم تمت .... نظريه حلوة يا بهاء يا اخويا ... ههههههه
اما والله انتو عليكوا حاجات ....
تشكر يا بهاااء على تعليقك ... واتمنى منك تكرار الزيارة يا حبيب قلبى ....

مواطن زهقان يقول...

يااه
ايه الاب الديمقراطى دا
فعلا ياعمرو اب
يستاهل الفخر
هع هع هع 3هع

المهز يامرو وبد يعنى انت
كتبت الاسئلة دى بطريقة جميلة جدا
تسلم ياجامد

غير معرف يقول...

مادام هو ابوك
يبقي
ينعل ابوك
صح؟؟؟

alqassam يقول...

معلش ياعمرو انتا مفروض مقولتش بابا لان الكلمة دة خسارة فيه قولوا ياعمو لان خلاص قلبوا قفل متنفعش معاه الحنيه وتعال هنا انتا فى حاجات كتير نسيت تقولها لبابا مصر مليانه بلاوى ومشاكل وهموم يعنى لو قعدت من هنا للصبح تقولوا مش هتخلص ربنا ياخدوا

mohammed alsha3r يقول...

السلام عليكم
عرض طيب
وكويس
بس ياعم عمرو أبوك دا صدرة كبير
سابك تقول اللى انت عاوزة
دا لو أبوك اللى انت من لحمه ودمه كان أخدك علقتين على الماشى
تسلم يدك