الاثنين، ٢٠ أغسطس ٢٠٠٧

لا لبنى السجان


ظلم فى كل مكان .. صمت ساد الاوطان ... حمحم فى دمنا البركان .. قولوا لا لبنى السجان .. لا لبنى السجان .. لا لبنى السجان ( العادلى وامثاله ) ...
هذه الكلمات التى جائت فى اذنى عندما كنت أقرا خبر اعتقال الاخوان فى الشرقيه والاسكندريه الساعه الثامنه صباحا ... لم اكن اصدق الخبرعندها ... ولكن صدقته عندما وجدت النشيد يقول ... صمت ساد الاوطان ... صمت ساد هذا الوطن ... كله خايف ... كله مرعوب ... كله خايف يقول لأ ... فعلا صدقت حينها اعتقال الشرفاء فى الشرقيه والاسكندريه ... صدقت أن الشرفاء واحرار هذا البلد مكانهم ليس هنا ... بل مكانهم فى السجون طالما هذا الشعب صامت وساكت وقائل نحن عبادك يا حسنى مبارك .... هذا هو الحاصل ... وهذا ما يحدث الان ... عندما يعتقل رجل شريف مثل الدكتور عصام العريان ولم يتحرك احد من هذا الشعب فماذا تقول ؟؟ ... اقول حينها انه من حق هذا الحزب الحاكم أن يتمادى فيما يفعله تجاه هذا الشعب الصامت ... من حقه ان يورث بابا حسنى البلد لأبنه البابا القادم جمال مبارك ... اليس من حقه ؟؟ ... عندما لم يتحدث أحد من هذا الشعب الثورى طول عمره عايز ايه تانى ؟؟؟ ...
-------------
قيادى من الشرقيه والاسكندريه وقبلهم 18 وعصام العريان على رأسهم 18
مش هاقول جديد ... والله ما انا قايل جديد .. هى حسبنا الله ونعم الوكيل اللى دايما باقولها لما اسمع اى خبر وحش فى مصر ...
قريتوا الخبر طبعا على وكالات الانباء والفضائيات والجرايد ومواقع المعارضه والاخوان ... وحفظتوا الخبر خلاص ... لكن ما الجديد ... الجديد ان لسه عايش هيتابع خبر اعتقال اخوان الشرقيه ... لأن المدونة شرقاويه ... اذن فسيتم متابعه اوضاع معتقلى الشرقيه على مدونتها باذن الله فتابعونا ...
بمناسبه معتقلين اسكندريه ننشر لكم بعض صور مداهمات المنازل لمعتقلى الاسكندريه ..






---------------

ما الهدف من اعتقال 18 من الاخوان و18 قبلهم وعصام العريان على راسهم ؟
وانا قاعد فكرت كده مع نفسى ولقيت ان فيه خمس اهداف من وراء الاعتقالات اللى تمت واللى هاتم لسه (الله أعلم ) ... وكمان المحاكمة العسكريه اللى بتتعمل دلوقتى لشرفاء هذا الوطن :
الهدف الاول : هو محاوله من الحزب الوطنى لأسكات صوت الاخوان وتعطيل اعلان برنامج الحزب الذى تعده الاخوان لنشره ... لأنه لو نشر الان هيعمل بلبله فى الشارع فى حين ان جمال مبارك داخل انتخابات الرئاسه .... فا طبعا المواطن هيختار برنامج الاخوان ... فا هما عايزين يعطلوا مشروع حزب الاخوان بأى شكل ... ولكن قائدنا ودكتورنا وحبيبنا الدكتور حبيب قال على اسلام اون لاين انه لو تم اعتقال الجماعه كلها ووضعوها فى السجون سنعلن الحزب مهما حصل لنا ومهما فعلوا بنا ...سنعلن البرنامج سنعلن البرنامج ...
الهدف الثانى : تأتى هذه الاعتقالات فى الوقت الذى دعا او اقترح فيه البرلمان البريطانى للتحاور مع الاخوان ... فا الاعتقالات دى بتدى انطباع او بيقول للمجتمع الاوروبى لا تتعاملوا مع الاخوان ... لأنهم ارهابيين ....
الهدف الثالث : فى مخيلتهم أن الاخوان ممكن يعملوا حاجة فى انتخابات الرئاسه القادمه او كده .... فا بيحاولوا يكتموا صوتهم ويسكتوهم وفاكرين انهم بيحاولوا يكتفوها بالاعتقالات دى ... او يحاولوا يسيطروا عليها
الهدف الرابع وده الاهم : الضغط على حماس فى فلسطين .. بعدما فشلت مصر فى التعامل معهم ... وايضا فشلت اسرائيل عسكريا فى التعامل معهم .... فاكرين ان ده هيقدر ياثر على اخوننا فى حماس ولكن ده عمره ما هيحصل ...
الهدف الخامس : تخويف الناس من الاخوان ... وعلى راى المثل اضرب المربوط يخاف السايب ... فا هو عايز يوجه رساله للشعب ان اللى هيتعامل مع الاخوان هيحصله كده ... هيتخطف ويتعذب ويموت ... فاحذرووووا ايها الشعب المصرى المحترم ...
----------------


عشان ما اطولش عليكم ... اعذرونى ... هاكتب خطه التوريث القادمه والتى تخيلتها ... وأظن دى هى اللى هتمشى
خطة التوريث الان تتم على قدم وساق ... كده حلو الكلام ... ازاى بأه .... دلوقتى فيه انتخابات للحزب الوطنى وهتخلص يوم 10 سبتمبر ... ماشى كده ... وبعدين هيجوا باه لانتخابات رئاسه الحزب ... ويترشح مين للرئاسه جمال مبارك ... وقدامه كومبارس طبعا ... مين اللى هيكسب جمال .... كده بأه بابا حسنى مش هيبقى له لازمة فى منصبه ... عارفين ليه ... لأن القانون قال ان اللى يبقى رئيس .. لازم يبقى رئيس حزب .... فا قانونا حسنى مبارك مش هيبقى رئيس حزب .... فا هيتنحى حسنى مبارك عن رئاسه الحزب ... وستتم انتخابات رئاسه الجمهوريه .... وهيترشح جمال .. وهيكسبها جمال .. وهياخدها جمال ... والتوريث قادم ... وجمال جاى جاى ..
هذا تصور من تخيلى انا للتوريث فى مصر .... وليس معلومات او مصادر ... ولكن على ما اظن ان هذا ما سوف يحدث ....
--------


طولت عليكم ها .. كنت عايز اتكلم على المحاكمة العسكريه عشان مش انساهم ...
المحاكمه اتأجلت وده اللى كان متوقع ... لكن ايه اللى حصل بالظبط فى المحاكمه ... اللى حصل يا سيدى ..
المحاكمة بدات وكل شئ تمام ... الشاطر واخوانه فى القفص وهيئه الدفاع موجوده والاهالى قاعده وبتسمع اللى بيحصل .. ايه اللى حصل ؟ ...
طبعا عشان المحاكمة دى تتم لازم يكون هناك شهود على قضيه غسل الاموال صح ولا ايه ؟... والا ازاى بأه تبقى تهمه ... لازم شهود .... فا كان مين الشاهد يا عمنا ... الرائد عاطف الحسينى ... الرائد عاطف ده دخل القاعه وهو مش عايز يدخل اصلا لأنه كداب وشاهد زور ... هيخش يقول ايه ... ده حتى الظباط بتوع الامن جابوه من بره ( هذا ما قالته اخوان اون لاين فى كواليس الجلسه)
المهم دخل سى الرائد ...وكان داخل ومعاه اجنده كده وورق موووت ... ودخل قعد يقرا !!! ... ههههههه ... اه والله قعد يقرا ... طب ازاى كان قاعد بيقرأ ... وهو اصلا شاهد ...يعنى المفروض القاضى يساله وكده ... والمحامين كمان يسالوه .. يعنى ده المفروض الشاهد انه يتعامل معاه كده ... مش صح ولا ايه ... صح يا عمرو .... مش يعنى يدخل يقرأ من ورق عمو عاطف مجهزه ... المهم ... هيئه الدفاع وقفت وقالت نعترض على الاسلوب ده .... والقاضى رفض انه يتعامل بالاسلوب اللى عايزاه هيئه الدفاع ... ماشى ياعم القاضى ... ولا تزعل يا قاضينا ... ولا تزعل يا منصف العدل بين الناس .... هنمشى كلامك ... وسيبه يقرا ... والاخوان وهيئه الدفاع سامعينله ... وكان يعنى الرائد عمال يهرتل .... عارفين بيقول ايه ... بيقول ..احياء جماعه محظورة ... اقامه دولة اسلاميه (اصلها باقيت تهمه ) وازاحة النظام القائم ... اه هى دى التهم .... ملاحظ ان مافيهاش غسل اموال ولا بتاع ... لكن دى التهم قولنا ماشى ... مشيها تهم .... نيجى للقاضى اللى سأل الشاهد سؤالين لا غير .. يعنى عشان يبان انه راجل ديموقراطى ... سأل قال ايه ... السؤال الاول بيقول : متى بدأت فى القيام بتحرياتك عن المتهمين ؟ قال الشاهد عاطف الحسينى : 6 أو سبع شهور من القاء القبض عليهم ... قولنا ماشى ...سؤال عبيط ... لكن عديها ...
السؤال التانى : هل قمت بهذه التحريات بمفردك ؟ عارفين الحسينى رد قال ايه ... قال .. ببجاحه منقطعه النظير .. آه ... ههههههه.. طب ازاى آه والاخوان الـ 32 دول كلهم من محافظات تانيه وبعيده ... انت لوحدك مشيت وراهم خطوة بخطوه وتابعتهم يا معلم فى 6 شهور ... ده انت ظابط سوبر مان بأه .... ههههههه زى ما قال عليك الاهالى (انا ما جبتش حاجة من عندى ) هههههه .... ظابط يابنى مشى ورا كل متهم وعرف انه بيغسل اموال ... ولف وراهم فى المحافظات كمان .... شايفين ... ادى رجالتنا اللى بيسهروا على امن بلدنا ولا مافيش ... ونعم الرجاله ....
عشان يعنى القاضى بأه انه يبان ديموقراطى أكتر واكتر ... قال للدفاع .... اسألوه يا دفاع سؤال ولا بتاع .... وهو سؤال يا محامى انت وهو ما تزودش .... قالوله ماشى يا قاضينا يا محترم يا اللى كلك طيبه وكرم ... وسأل واحد من المحامين وهيئه الدفاع سؤال واحد مافيش غيره والسؤال ده كان السبب فى تأجيل القضيه .. السؤال هو : حددلى مصادر التمويل الخارجى التى وردت للمتهمين ؟ .... سؤال صعب ... مش صح .... هههههه ... اتربك عمنا عاطف . خلاه واقف زى البتاع .... لكن لحقهم بالاجابه ... عارفين الاجابه كانت ايه ... هههههه ... كانت تضحك اوى ... الاجابه كانت .. تنظيم سري.. تحركاته محلّ متابعة من الأجهزة الرسمية المعنية.. تنظيم ينشط ويكمن.. عبارة عن خلايا عنقودية.. مصادرنا الموثوق بها في الخارج . .... اجابه تتضحك مش صح ..... هههه ... ياعم بيقوللك حددلى المصادر اللى كانوا بيغسوا فيها الفلوس ... فا قامت هيئه الدفاع قالوا بصوت واحد ...هاتلنا اجابه محدده وهادفه ... فقال عمو عاطف : ان فيه معلومات مؤكده تأتى من الخارج للانفاق على انشطة الجماعه الدعويه عن طريق يوسف ندا ومن خلال مبعوث خاص من يوسف ندا ، وان المبعوث ده اجتمع اجتماع تنظيميا مع المهندس خيرت الشاطر ... وقع بلسانه .. قام المهندس خيرت انتفض فجأه وقاله ...طب اسم المبعوث ايه يا عاطف ؟ عاطف الحسينى رد عليه وقاله اسمه زكريا محرز ... هههههههههههههههههههه ...شايفين اسمه زكريا محرز ... هههههه ....ده ظابط ايه عرف اسم المبعوث كمان ... قشطه عليك يا حسينى ... المهندس شاطر بأه هنا قام وقال للقاضى ..سجل الاسم ده يا سيادة القاضى ...خاصة انى عمرى ماسمعت عن الاسم ده قبل كده ... حتى الاسم لم يرد فى التحريات او المحاضر.... يابنى الحسينى ده بتاع مفاجات ...
- عمو خيرت الشاطر الراجل المحترم قال بما ان الاسم ده غريب ومجهول ولم يذكر فى محاضر الشرطة من قبل فا الشاهد ده مش عارف حاجة ... وهنا ارتبك عاطف الحسينى واحمر وجهه وكاد أن يدخل الحمام ولكن لحقه القاضى وقال تم تأجيل المحاكمه الى بعد غد يوم الثلاثاء القادم .. وده اللى عاطف الحسينى كان عايزه .. وهنا بأه بدا الاهالى يعترضوا والمحامين وكده والمعتقلين نفسهم ... بسبب المشقه اللى بيلاقوها عشان يروحوا المحاكمه .... وهما بيجوا من محافظات مصر المختلفه .... وعندما قاموا القضاه واقفين للخروج ... هب الاهالى كا النيران ... يقولون فى صوت واحد .. حسبنا الله ونعم الوكيل ... حسبنا الله على الظالمين ...
انتهت المحامكمة ... وفيه شويه صور ... عايزينكم تشوفوها ..




















مستنين يا شباب ردودكم وتعليقاتكم على المواضيع التى ذكرت فى التدوينه دى ...

هناك ٩ تعليقات:

مواطن زهقان يقول...

حسبى الله وعم الوكيل
مكان الشرفاء السجن والخاينين برده
احنا بلد اصلا ماشى بالمقلوب
يعنى لما واحد زى عصام العريان يخش المعتقل
ليه ازاى
وعشان ايه
دا كله عشان عاوز الناس تتبع دينها ونحكم بالشريعة الاسلامية
ايه البلد اللى كلها مقلوب فى مقلوب

شكرا ياعمرو على العرض الجميل دا للموضوع

نـــــــور يقول...

الاخ الفاضل عمرو سلامة

تخيل انا كتبت رد وضيفته ولا ادري اين ذهب؟!

المهم حضرتك طرقت اكثر المواضيع سخونة في تدوينتك تلك

انا لما سمعت عن خبر اعتقال الدكتور عصام العريان وال15 اخ الآخرين بجد صدمت لأنه ماكنش في شيء على الساحة يبرر الاعتقال دا
وكمان من الاخوة المعتقلين اربعة من عندنا من اسيوط منهم الدكتور محمود حسين ... بجد حسبنا الله ونعمممممممم الوكيل

لما بقوا عرفت خبر اعتقال ال18 اخ من اسكندرية والشرقية اتخنقت اكتر منهم لييييييييييييييييييه كدا .. علشان دول ناس شرفا ونظيفة ... لاحول ولاقوة الا بالله

موضوع بقى التفتيش دا .. انا شوفته ع الطبيعة بأم عيني لأن احدى اخواتي الحبيبات والدها من المعتقلين .. روحتلها البيت وشوفت المناظر دي .. قمة الاهانة .. ولا ايه

وهما بيفتشوا ..بيفتح دولاب فالاخت قالتله دي ملابس خاصة ومافيش حاجة هنا ممكن تكونوا بتدروا عليها

راح قالها انا ممشيها بالادب معاكي لحددلوقتي .. بس بعد كدا ممكن ارميكم كلكم برده واعمل اللي انا عايزه!!!

حسبي الله ونعمممممم الوكيل

وطبعا فيلم التوريث دا بقى خلاص اي عيل في اولى ابتدائي حافظه عن ظهر قلب!! من رايي يروحوا يلعبوا غيره !

وآخر حاجة ربنا يفرج عن اخواننا المعتقلين جميعا وعن المعتقلين في المحاكمات العسكرية .... يااااااااااااااااارب

معلش انا طولت أوووووي

بس بجد كان نفسي اقول اللي في قلبي

يا قلبي ياكتاكت يا ما انت شايل ومعبي وبتكب وسااااكت
بس مش هسسسسسسسسسسسسسكت والله

جزاكم الله خيرا

عمرو سلامة يقول...

نرد كده بالدور على كل واحد ...
اخونا مواطن زهقان .. انا والله ما عارف زهقان من ايه ... يارب يكون زهقك كده مش عالاطول ... نجاوب عليك ...
--------
شكرا جزيلا على تعليقك ايها الحبيب الغالى ... لكن انا مش هارد عليك لما سألت ليه عشان ايه عصام العريان .. لأن الناس كلها عارفه ليه ... عشان هو من الاخوان المسلمين ... قال يعنى الاخوانالمسلمين دول عملوا جريمه يا خى ... شوفت الضلال اللى احنا فيه ...

عمرو سلامة يقول...

اختنا المحترمة نور .. بجد بجد ردك عاجبنى اوى ...
---
لكن انا مش عارف اقول ... الجملة المعتادة حسبنا الله ونعم الوكيل ..
---
الاخت بتقول للظابط ملابس خاصه يا فندم .. شوف رد عليها الظابط وبكل قوة وبكل جرأه ... هارميكم بره كلكم ... عنده حق ... ياباشا معاه قانون الطوارئ وبيعملوله دلوقتى حاجة اسمها قانون الارهاب ... ربنا عمره ما هيسيب حقنا ... هيعوضنا عن ده كله ... هنفضل نقول كلمه الحق مهما حصلنا ... هنفضحهم لأخر ساعه فى عمرنا ... هنفضل نقولهم حسبنا الله ونعم الوكيل ...
---
وجزاكم الله كل خير يا اخت نور على ردك اللى بصراحة اثر فيا اوى اوى

جمعاوى يقول...

رابع مة اكتب التعليق و يحصل حاجة ف الصفحة

ربنا يستر

أول ما قيت التدوينة

قلت كلمة واحدة

صحفى ..صحفى يعنى مش هزار

الله ينور عليك يا عمرو

عمرو سلامة يقول...

اول ما شفتك يا جمعاوى ... فرحت اوى ... قولت فى نفسى شرفت يا يا جمعاوى ...
----
ياعم لا صحفى ولا بتاع ... مش عارف كل واحد يشوفنى ماسك الكاميرا والام بى ثرى يخاف منى ... الواد هيسجلى الواد هيعملى ... الواد اشتغل صحفى ... مش عارف انا ايه الحكايه دى ...
---
الاخوان عندنا مسكونى رئيس اللجنه الاعلاميه من كتر ما حبى للصحافه ... ياعم انت قريت فيها يا عم هيثم ... ربنا يهديك يارب ...
----
وشرفت يا جمعاوى ... شرفت يا حبيب قلبى

نـــــــور يقول...

الأخ الفاضل عمرو .. ربنا يكرم حضرتك ..الوست كله هوا اللي ماشاء الله جميل جدا وعرضه متميز..

ومعلش اسمحلي اضيف تعليق تاني

النهاردة كنت مع الاخوات ، واختنا اللي والدها معتقل بتتكلم والله العظيم خلتنا كلنا نعيط وكلامها بجد هزني جدا من جوه

بتتكلم بكمية ثبات عجيبة جدا
عارفين الواحد لما بيسمع عن المعتقلين بيحاول يتخيل نفسه وبيقول انه هيعمل وهيعمل وهيكون ثابت وكدا

لكن لما بيتحط في الموقف بيكون فعلا محتاج ثبات قوي جدا ...

الاخت دي بتقولي انها نفسها تقلق على والدها بس مش قادرة!! قالت ان ربنا سبحانه وتعالى منزل عليهم سكون وطمأنينة ... بتقولي حتى لما والدهم كلمهم على التليفون .. كان صوته في قمة الاطمئنان .. دا حتى قالها النهاردة يوم ميلادك وكل سنة وانتي طيبة :D

بجد ربنا يثبتهم ويخرجهم على خير ، يعني سبحان الله قالت خاطرة جميلة جدا بتقول ان ذروة سنام الاسلام الجهاد في سبيل الله
فيعني بنتمنى من الله انهم يكونوا في المنزلة دي أو حتى قريب منها

وفي الاخر يعني دي منح مش محن ووسام على الصدر .. ربنا يجعله في ميزان الحسنات

وبجد معلش طولت بس المدونة دي فتحت نفسي على الكلام مش عارفة ليه؟!
:)

وانا على فكرة رئيسة اللجنة الاعلامية برده .. من حبي في الصحافة والإنترنت :D

جزاك الله خيرا

عمرو سلامة يقول...

الحقيقه يا اختنا المحترمه نووور ... انا من كتر اعجابى بالقصه وانبهارى بها .. مش عارف اقول ايه .. بنت وشوفوا متمسكة ازاى .. ثابته ازاى ... ما اتهزتش ... ما بككيتش ... بلعكس ... قالت جمله عجبتنى اوى .. نفسى اقلق على بابا ومش قادرة ... شايفين يا امن الدولة ... شايف يا عادلى ... يا رئيس الارهاب كله ... شايف ... مش هتهزنا شعره مهما عملت فينا مهما سويت مهما قتلت وموت ... دعوتنا هى هدفنا ... ايمامنا فى قلوبنا مش هتقدر تنتزعه ... عايز ايه اكتر من كده ... البنا ...تعرفى يا اخت نور .. انا بكيت فى نفسى ... قولت ليه ياربى بيحصلنا ده كله ... بتختبرنا ياربى ولا ايه ... عايز تشوفنا احنا ثابتين ومش هنتهز من اول خابطة ولا ايه ؟ ... احنا ياربى ثابتين ...مش هنلين ...مش هنقع ... لدعوتك هنفضل ماشين ... ولمنهج الاسلام هنفضل سائرين ...
من كتر بكائى .اسمحولى ان اقول كفايه كده .. لأنى باعيط وانا باكتب التدوينه دى ... عنيا دمعت ...مش قدرت اصبر .. يلا ربنا يعوضنا ويستبدلنا بما هو خير ... ويثبتنا ويجعله فى ميزان حساناتنا ... يارب امين .....
اختنا المحترمه تسمحيلى ان انشر القصه دى فى التدوينه القادمة ... يعنى لعل الناس تتأثر بيها بعد اذن حضرتك يا فندم .. لو تسمحيلى يعنى ...
-----
انا فرحت لما قولتى ان حضرتك رئيسه اللجنه الاعلاميه ... حسيت دلوقتى ان انا مش فى خندق لوحدى ... لأ بالعكس فيه مدونين معانا شغالين فى المجال ده ... نستفيد بالخبرات لعلنا نصل بهذه اللجنه الى القمه وتكون مؤثرة فى حياه الجماعه فى المنطقه اللى احنا فيها ...
--
تانى مرة اشكر رد حضرتك ..

نـــــــور يقول...

ربنا يبارك في حضرتك ويجعل كلماتك وتدويناتك في ميزان حسناتك

وطبعا حضرتك تتفضل القصة ..مافيش مشكلة ان شاء الله

-----
ويارب فعلا موضوع اللجنة الإعلامية يجي بفايدة ويستمر لأنه حاسة الى الان ان الوضع مش مشجع اوي

-------
وأخيرا الله المستعان على ما يصفون