الاثنين، ٧ مايو ٢٠٠٧

نقضى لما جاء فى العربيه نت ... وموافقتى على رابطة للاخوان

صورة للتقرير كما جاء فى موقع العربية نت
الفتره الاخيرة نشر موقع العربيه نت تحقيق صحفى عن ظاهرة المدونين او بلوجرز الاخوان ... هابدا انقض التحقيق وبعدين ابدا اتكلم فى راى الشخصى عن الرابطة واهدافها وعملها وغيره ...
--------
جاء فى التقرير الذى بثه موقع العربيه نت مغالاطات ومخالفات كثيرة جدا حتى ان اخويا محمود سعيد صاحب مدونة ابن اخ سمى التحقيق تقرير امنى ضد مدونى الاخوان ... شوفوا بأه قد ايه وصلت التسميه ... يظهر ان الموضوع خطير تعالوا نتكلم عن التحقيق كده واحده واحده.... الراجل اللى اسمه السيد زايد ده اللى عامل التحقيق .. بيقول فيه ان مدونين الاخوان بيعملوا حملة كبيرة اوى اوى اوى اوى علشان يعملوا رابطة لمدونى الاخوان المسلمين ... ايه الخرف ده يا سيد بيه ... مين اللى قالك ان فيه حملة وحاجات هبلة من اللى انت بتتخيلها دى ما كانت الحملة دى وصلتلى حتى ولا شوفتها ...باعتبارى مدون من الاخوان زى ما انت بتقول كده ... يا سيد يا حبيبى اتاكد والنبى من المعلومات دى .. ده ماكانش اخويا صاحب مدونة الغريب اقترح حاجة زى دى ... قمت انت عملتها حملة مره واحده ... ياااااااااااه اد اكده ... ناتى للفقره الثانيه من الموضع حين قال الاخ سيد زايد ان الامن وجه عده ضربات لمدونى الاخوان والذين يوصفون بالجناح الاعلامى ....ههههههههههههههههههههه وعليا النعمة انت ضحكتنى ياعم سيد ... جناح اعلامى ايه يابن الناس الطيبين دى ماكنتش شوية مدونات بنعرض فيها ارائنا وافكارنا .... وتقوللى جناح اعلامى للجماعة ... وبعدين االجماعة عندها جناح اعلامى ضخم .. ايه اللى هيخليها تروح لمدونات الاخوان اللى على النت واللى بيعرضوا فيها رايهم وكده ... ويروحوا يقولوهم عايزنكم معانا فى الجناح الاعلامى ... ههههههههههههه .... من غير ما الاخوان يعرفوا مين اللى صاحب المدونة دى ولا كده ... ولا تكونش فاكر ان الاخوان مديين اوامر لشباب الاخوان انهم يعملوا فيها مدونات من غصب عنهم ... امرك غريب يا مستر سيد ... ياعم الحاج ابقى اتحقق من اللى انت بتكتبه الاول مش تكتبلى كلام من دماغك وتهلس ... نيجى للنقطة تانيه من الموضوع يا شباب .. حين استضاف اخونا سيد المدون الاخوانى الفاضل ابراهيم الشرقاوى صاحب مدونة بتنفس بصعوبة ... انا ماعنديش مانع فى اى كلمه من اللى قالها اخونا ابراهيم .. وكله كلام مظبوط ... وكله كلام فى السليم ... ولا كلام اختنا الصحافيه ايمان عبد المنعم وبعد كده انتقل لنقطه مهمه ... اوى والنقطة دى هى التى اضطرت اخويا محمود سعيد صاحب مدونة ابن اخ انه يسمى التحقيق ده تقرير امنى ... الا وهى نقطه نشر بعض المدونات حين جاء فى التقرير :
جدير بالذكر إن أهم المدونات الإخوانية النشطة هي مدونة "أنا إخوان" لعبد المنعم محمود، والقصاص للجميع لمحمد القصاص المعتقلين، وبتنفس بصعوبة لإبراهيم الشرقاوي، و"إنسي" المتحدثة بصوت المعتقلين، ومش هنبطل لإبراهيم الهضيبي، وخربشة غريب، وطلاب الأزهر، ويلا طلبة، والكواكبي، ومش معاهم لمحمد عبد العاطي ..الخ.
-----------
انتهى نقضى للتقرير عند هذا الحد ... وابدا الان اتحدث عن حكايه الرابطة وكده .. علشان ماحدش يجى يقوللى اقترح او غيره بخصوص الرابط ه دى ....
انا غير موافق على الرابطة فى انها مش تكون حجر على المدونين فيما ينشرعلى مدوناتهم .. يعنى مش تيجى تشترك فى الرابطة يقوللك لابد ان تنشر كذا وكذا ولا تشتم ولا تنيل .... فهمتم قصدى ايه
اكون بأه موافق على الرابطة امتى ... لما تكون مهتمة بشؤن مدونى الاخوان وايدينا فى ايد بعض يعنى مثلا لو حبينا نعمل حملة نكون العنصر الفعال فى الدونات المصريه والعربيه والكل يبدا ينشر بانر للحملة والكل يكلم عنها ويشرح وجهه نظره عن الحملة المعموله ... ولو حد اعتقل مننا نبقى كلنا جاهزيين للرد من خلال مدوناتنا وكيانا الفعال على الانترنت ... اتمنى تكونوا فهمتونى ... اما بالنسبة لاقتراحاتى للرابطة هاقولها بعدين لما نيجى ساعه التنفيذ ....

هناك ٧ تعليقات:

محمود سعيد يقول...

إيه يا أستاذ عمرو الكلام الوحش ده

لأ كده عيب قوى قوى قوى


كلامك ملهوش أى لازمة
وأزاى تقول :
- ايه الخرف ده يا سيد بيه
- سيد يا حبيبى اتاكد والنبى من المعلومات دى
- وعليا النعمة انت ضحكتنى ياعم سيد
- ياعم الحاج ابقى اتحقق من اللى انت بتكتبه الاول مش تكتبلى كلام من دماغك وتهلس



وغيره وغيره

كده عيب جداً وقلة أدب ومخالفة شرعية ومعصية

ده لو قلنا أنك أكبر منه (مش هاقول لك أصغر) ، مينفعش أبداً تتناول تحقيق صحفى سواء أصاب كاتبه أم أخطأ بمثل هذا الشكل

وكمان الموضوع ده خلاص خلص
ومفيش داعى نفتحه تانى
موضوع وخلص

أنصحك تمسح الموضوع :-)

AbdElRaHmaN Ayyash يقول...

:)
أهلا يا أخ عمرو
كلامك مضمونه رائع
بص يا سيدي
انا و الله فرحان ان حد ادى رأيه في مدونة الاخوان بالطريقة دي
الرابطة فكرتك قريبة جدا من فكرتي ان لم تكن هي هي
تحياتي
مدونتك رائعة
سلام

عاشقة الرحمن...سميه العريان يقول...

هو المضمون كويس اوى

بس انا مع الاستاذ محمود اننا منردش الخطا بخطا

ومدونه حضرتك بصفه عامه متميزه وتستحق المتابعه

اسلام رفاعى يقول...

أ/عمرو بعد اذنك أنا عملت رابط لمدونتك على مدونتى فى (أطالعهم).ز

عمرو سلامة يقول...

ربنا يبارك فيك يا اخ اسلام ... وشكرا ليك على الرابط وان شاء الله احطلك رابط ليك فى المدونة عندى يا حبيبى ...
----
الى الاخت عاشقة الرحمن .. ان شاء المواضيع الجايه مش يبقى فيها غلط او كده ... لكن اللى خلانى اعمل كده هو ان ازاى يجيب سيرة الاخوان بكلام ليس له اساس من الصحة وده اللى نرفزنى عليه واضايقت منه جدا يا فندم ...
--------------
الى الاخ عبد الرحمن اكرمه الله ..
مادام فكرتنا زى بعض ايه رايك لو انا وانت نبدا نشتغل على اساس هذه الفكرة .. ونبدا ندعم الفكرة ونعمل الرابطه يا فندم ... ياريت تكلمنى على الميل يا اخ عبد الرحمن
amr_4online@yahoo.com
------------
اخويا محمود اعذرنى لأنى كنت متضايق نفسيا مما يحدث من اكاذيب وادعاءات اعذرنى ان كنت اخطأت ... واعدك انى مش ارد الخطا بخطا بس انا باتعصب جدا لما الاقى حد بيشتم على الاخوان ... يلا خير ..
وجزا الله كل خير لكل من طالع المدونة

AbdElRaHmaN Ayyash يقول...

تمام أخ عمرو
انا ضفتك :)
من اول ما شفت الايميل اصلا ضفتك
على ايميل الهوت ميل
تحياتي ياسيدي
وجزاكم الله خيرا

غير معرف يقول...

السلام عليكم ورحمة الله وبركاته
اولا احب اعلق علي الموضوع انه كويس جدا جدا بس المشكله يااستاذ عمرو هو خروجك عن بعض اداب التدوين بس مافيش داعي ان الاخ محمود سعيد يرد الغلط بالغلط في تعلقه ويقول قلة ادب وووو.....
اين منطلق تناصحو واين منطلق المؤمن مراة اخيه واين منطلق ادعو الي سبيل ربك بالحكمة والموعظة الحسنه
اسف علي مداخلتي المؤذيه قليلا ولكني قلت من باب الاخوة والمحبه في الله يجب ان ابصم نصيحه
اكرر اعتذاري اذا اخطات فانما الخطا مني ومن الشيطان والتوفيق من الرحمن وجزاكم الله خيرا وبالتوفيق واسال الله السداد