الخميس، ٣ مايو ٢٠٠٧

من مستشفى دار الفؤاد ... مراسلكم عمرو سلامة

واجهة المستشفى ..تصوير عمرو سلامة
نظيف (رئيس الحكومة ) مودى ابنه مستشفى بيدفعله فيها فى الليلة 2000 جنيه علشان ابنه عنده شوية برد

فاكرين يوم ما انا قولتلكم انى رايح المستشفى علشان ازور بابا .. وفاكرين يوم ما انا قولتلكم انى عايز ايميل اى حد من جريدة الدستور عشان ابعتله الخبر ده .. اكيد لو متابعين هتفتكروا ... المهم... غلبت علشان وصل لأى حد من الدستور ... انا هاضطر انشر التحقيق- او ما تسمونه - للى انا عملته فى المستشفى .. ياريت تابعوا معايا وتقروا التحقيق باهتمام مش هقولكم مبالغ فيه ....
مستشفى دار الفؤاد اكيد سمعتوا عنها ... فى سته اكتوبر المستشفى دى ... كنت رايح هناك ازور والدى علشان اطمن عليه وكده وانا راكب الميكروباص من المؤسسه ورايح هناك سته اكتوبر لقيت يافطة بتقول ... مستشفى دار الفؤاد المستشفى الحاصله على شهادة الجودة والرعاية الطبيه على مستوى مصر وقارة افريقيا كلها ... لاحظوا معايا افريقيا ...المستشفى دى بتاعه وزير الصحة الحالى الدكتور حاتم الجبلى ... دخلت المستشفى وطلعت الدور التانى غرفة 2109 المهم وانا هناك كانت معايا والدتى قالتلى اصبر ياعمرو هادخل انا بالكارت وانت تدخل بعدى اصل هناك بالكارت واكتر من واحد ما ينفعش يدخل للمريض ..
صاله الاستقبال اللى كنت قاعد فيها .. تصوير عمرو سلامة
ماما دخلت وانا قعدت بره فى صاله الريسبشن فى الاستقبال اتأمل الوضع ... مستشفى على مستوى راقى صحيح مستشفى فيها امكانيات
عاليه جدا جدا جدا ...وغاليه كمان .. وبيتعمل فيها اكبر العمليات .. المهم ماما طلعت ودخلت لبابا اطمنت عليه وطلعت تانى وقولت لماما ادخلى لبابا وانا هاروح اصلى العصر فى الجامع واشوفلى حاجة اكلها واجى .. المهم صليت العصر فى جامع فخم فى المستشفى ... وبعد لما صليت قولت اقعد فى الجو المنعش شوية بره فى الحديقة بتاعه المستشفى .. وانا قاعد اقلب فى الموبيل بتعى .. واجيب فيه يمين وشمال ... والهوا يشرح القلب ... لقيت واحد من اللى شغالين فى المستشفى قاعد جمبى وبيدخن .... قاللى معلش يا استتاذ هاقعد الساعة دى جمبك ... قولتله ولا يهمك يا فندم اتفضل عادى .. قولت فى نفسى ليه يا واد يا عمرو ما اتعرفش معاه واضرب معاه صحوبيه ... المهم ... سالته اسمك ايه قاللى (س .م) وشغال هنا قاللى اه قولتله وقدرت تطلع من المستشفى ازاى ... قللى ما هو فى ساعة راحة كل ست ساعات ... المهم قعدت ارغى معاه شوية وكده وقلتله انت معاك ايه قاللى معايا بكالوريوس تجارة ... استغربت ازاى يا اخويا بكالوريس تجارة ايه اللى جايبك هنا ... فى المستشفى قاللى مش لاقى شغل .. مش لاقى .. قولتله طب وانت مرتاح هنا .. (انا كنت معتقد انه مرتاح واخر انتكه وتلاقيه كمان بيقبض الف جنيه ولا حاجة ) سالته انت بتقبض كام .. عارفين قاللى كام 400 جنيه .. قعدت اجيبها لبره واجيبها لجوه ازاى 400 جنيه فى مستشفى بتاخد فى الليله 2000 جنيه ... مستشفى بتاخد شئ وشويات ... قاللى انت عارف يا استاذ عمرو احنا هنا متعذبين اخر تعذيب كل شوية شتيمة وتهزيق فينا ... واقل غلطه تجيبنا بره المستشفى دى .. ده احنا بنتهزق فى اليوم يجى عشرتاشر مرة ... وشتايم بالالفاظ النابيه .. وبنقبض 400 جنيه فى وقت احنا بنخدم فيه المريض بخدمة عاليه ومتميزه .. (ودى الصراحة اناا معاه فيها ) المهم .. وجرجرته فى الكلام وسألته فى مسؤل من المسؤلين بيجوا هنا .. قاللى اخرهم كان من اسبوعين فاتلهفت على السؤال يا ترى مين .. انتو عارفين قاللى مين .. قاللى ابن رئيس الوزرا ابن نظيف .. قولتله خير كان عنده ايه الواد ده .. انتوا عارفين قاللى ايه .. ولله ما هتصدقوا ... قاللى شوية برد ... قاللى كان عنده شوية برد انفلونز يعنى ... قولتله انت ايه اللى عرفك قاللى ما انا اللى كنت الممرض بتاعه ... قولتله وحد جه زاره ... قاللى ايوة جمال مبارك جه وسوزان مبارك جت .. وكمان وزير التعليم جه ... ووزير الصحه جه وزاره كمان .. قولت فى نفسى يا ولاد انا لما يكون عندى حبه برد ابويا بيجيبلى مجموعة برد من الصيدليه بنص جنيه والله ... والله بنص جنيه ... وبابقى عال العال ... وزير التعليم يزوره مخصوص ليه ... هو الراجل ده فاضى اوى كده .... مش وراه وزاره فيها سبعه مليون طالب ... مش راجل مسؤل .... ايه اللى جرى يا ناس ابن نظيف قاعد فى مستشفى اليوم فيه بـ 2000 جنيه ... عشان عنده شوية برد امال بأه الناس ياعينى اللى تعبانه ومش لاقيه تغسل كلى فين من فلوس الدولة ... الناس اللى بتموت ومش لاقيه حد ييعالجها فينك يا نظيف منه حسبنا الله ونعم الوكيل ... انا مش باعاتبك علشان انت بتعالج ابنك لألألأ .. انا باعاتبك على التبذير والفلوس اللى بتنصرف وانت مش عارف ان فيه ناس تانيه اولى بيها والله اولى بيها ... المهم وانا قاعد بافكر كده ... وفى وسط الاسئلة المحيطة بيا .. لقيت الراجل بيقوللى اوعى تكون صحفى يا استاذ وانا مش واخد بالى ... قولتله ماتخافش يا اخويا .. قام من جمبى ومشى ... لقيت بتاع الامن بتاع المستشفى روحتله ... ضربت معاه صحوبيه اسمك ايه ... قاللى كذا كذا ... ومن الغربيه على فكرة .... المهم سلمت عليه وقولتله حضرتك شغال ايه ... قاللى زى ما انت شايف < امن> المستشفى وساعات بادخل جوه عند مكتب مرات الوزير الصحة (المستشفى بتاعه وزير الصحه ) ... قولتله حضرتك معاك ايه ... ليسانس اداب انجليزى ... وايه اللى جابك هنا ( كان هذا هو ردى الطبيعى عندما جاوبنى ) قاللى رزقى هو اللى رمانى هنا ... بقالك كام سنه هنا قاللى سنه واحده وبتقبض كام قاللى 450 ... قولتله بالله عليك 450 جنيه قاللى والله 450 جيه ... قولتله ربنا معاك .. قولتله هو ابن نظيف كان هنا من اسبوعين قاللى اه يا عم وكان عنده شوية برد وقعد عليهم عشر ايام ... قولتله وبتلقائية مين للى قاللك انه كان عنده برد ... قاللى احنا بنشتغل عسس هنا .. الخبر بيوصل لكله ... قاللى يابن الناس دول ناس فوووووووووووق خالص لما يجى ويدفع لأبنه هنا شئ وشويات وانا مش لاقى اودى ابنى الحضانه ... يبقى انت عايز ايه اكتر من كده .... قولتله ربنا يعينك ويرزقك من حيث لا تحتسب .... سالته لما نظيف جه الموكب بتاعه كان عامل ازاى .. قاللى يا سيدى كان نظيف سايق العربية ... وابنه قاعد جمبه وموتسيكلات وراه وقدامه .. وعربيته نوعهاا بى ام دبليو اللى هى الحوت دى .... قولتله كمان ... قاللى اه ... قاللى ده رئيس الحكومة عايزه يركب ايه يعنى .... قاللى انا كان كتفى فى كتفه ... كنت عايز اقوله يابيه انا شغال هنا من سنه وباقبض 450 جنيه ومعايا ليسانس اداب انجليزى مش عندك شغلانه .... الحقيقة الراجل كان بيتكلم معايا بصعوبه بالغه كان ناوى يعيط ... حاولت اهدى الموضوع .. قولتله فى حد من المسؤلين جه هنا تانى قاللى اه قولتله مين ... قاللى حسنى مبارك بس كان متكتم على الخبر ده .. ومن سنتين كده ... قولتله مين اللى قاللك قاللى الواد اللى كان شغال معايا هنا ومشى .... قولتله هى مرات الوزير هنا ... قاللى اه جوه ماسكة قسم الممرضات والعاملين بالمستشفى .. وهى لا دكتورة ولاحاجة ولو عايز تتدخلها عادى ادخلها ... بتستقيل اى حد .... انا كنت عايز امشى والوقت دخل على المغرب وانا محتاج امشى اشوف بابا تانى قبل ما امشى ... سلمت عليه وخدت نمرة موبايله .. ومشيت روحت لبابا سلمت ومشيت .. وانا راجع بافكر ناس عايش عيشه عاملة ازاى ... وسايبه الشعب بتاعها ياكل من التراب ... سايبه الغنى ياكل فى الفقير ... ونهبوا الدولة .. وخدوا فلوسنا ... حسبنا الله ونعم الوكيل فيك يا نظيف انت وحكومتك ... يارب نشوف فيك يوم ... سلام عليكم ... ياريت لو الموضوع ده اتنقل يتيكتب اسم المدونة ....

هناك ٨ تعليقات:

محمود سعيد يقول...

أول حاجة لازم أقولها التصوير جمييييل

أما الموضوع فبلاش تعمله حاجة كبيرة
مباقولش أنه حاجة صغيرة
يعنى الإنسان لازم يستقل عمله أيا كان يعنى

يعنى واللى أنت عملته ده يجى إيه حنب أى حاجة تانية
متزعلش منى أنا بس بافكرك
ممكن واحد يقولك ده دردشة موظفين
ولو أنه حقائق ومؤلمة كمان

عمرو سلامة يقول...

شكرا جزيلا على ردك يا اخ محمود ... ما تصدقش انا اد ايه بافرح لما الاقى ردك فى مدونى .. اعزك الله ..
عندك حق فى اللى انت بتقوله كله .. وهو فعلا حقائق ومؤلمة كمان .. يلا ربنا يخليلنا البلد دى ... ويعدى المرحلة الجايه على خير يا دكتور

غير معرف يقول...

انا لله وانا اليه راجعون اي نعمـ علي راي الاخ محمود سعيد ان في وقفات اهم من كدا
بس يابني ريح دمناغك امال لو دخلت جو البلد هتلاقي انيل من كدا روح مصر وشوف الاوض المتر في متر والناس عايشة فيها وحالها مستخبي هانقول ايه في بلد عايش في ظلم وعايش علي هبلا في هيل لكن ربنا يهدي مش هانقول ينتقم عسي ان يخرج الله من بين اصلابهمـ من يحمي الامه من العذاب

غير معرف يقول...

السلام عليكم
أخي الحبيب
أولا أشكرك علي اهتمامك الجيد بالاحداث وعرضك الرائع وأكيد دة لان انت قلبك حزين علي بلدك ودينك ودة شئ جميل ربن يوفقك وصدقني ان شاء الله لازم الضلم هيزول

غير معرف يقول...

انااحمد كنت شغال فى دار الفواد عموما فى التعقيم
من ساعة ممشيت من المستشفى وانا متابع اخبارهلحاجة تهمنى شخصية نخش فى الموضوع انت قلت عيوب دار الخراب سورى الفواد
كما تعودت لسان الاستف فى المستشفىانت وضحت بعض السلبيات يا عمرو ومش هنكر ان ده اخر السلبيات لا فىها سلبيات كتتتتتتتير بس نشهد بالحق يها ايجابيات كتتتتتتير
1-التعليم "دار الفوادبتديك تعليم على مستوى عالى جدا"
برده انت فى خلال سنة وبمجهودك ممكن توصل
لبوزيشن حلو جدا
شكرا
احمد انا بتكلم بصراحة علشان سبت المستشفى يعلم الله لو كنت لسه فى المستشفى لحد دلوقتى وقلت الكلمتين دووول كنت زمانك ياعمرو بتقرا الفاتحة على
شكرا لصراحتك ياعمرو ولمك لموضوع كان نفسى اتكلم فى من زمان

غير معرف يقول...

المهم ان بها خدمات غلي مستوي امال لو حكيت لك اللي حصل من دكتور في مستشفي الشيخ زايد التخصصي وازاي استدرج الوالد لهذه المستشفي وماذا فعل بدم بارد
hopitallbar.tumblr.com
ربنا يزيح عن مصر الفسده والمتربحين بلا ضمير

غير معرف يقول...

المهم ان بها خدمات غلي مستوي امال لو حكيت لك اللي حصل من دكتور في مستشفي الشيخ زايد التخصصي وازاي استدرج الوالد لهذه المستشفي وماذا فعل بدم بارد
hopitallbar.tumblr.com
ربنا يزيح عن مصر الفسده والمتربحين بلا ضمير

غير معرف يقول...

hospitallbar.tumblr.com