عمرو سلامة .. يهنئ سيادة الرئيس مبارك بعيد ميلاده المجيد

بمناسبة عيد ميلادكم السعيد ومع بدايه عام جديد من عمركم المديد - اللى مش باينه اخر - ،يسعدنى ويشرفنى أن ابعث الى جنبات سيادتكم خالص تهنئتى القلبيه مقرونة بأصدق الامنيات .......

سيادة الرئيس المجاهد الممجد - الفرعون - لقد وهبتم كل حياتكم فى الكفاح والنضال - اه لو ترتاح وتريحنا -من أجل مصر وشعب مصر - بأمارة ايه - ، اخذين فى الاعتبار مصلحة محدودى الدخل والبعد الاجتماعى وتوفير ضمانات المستقبل للشباب والاجيال القادمة .....

سيادة الرئيس الفاضل المحترم ، ندعوا الله الكريم سبحانه وتعالى أن يمتعكم بموفور الصحة والسعادة - اكتر من كده سعادة ياريس - وأن يديم عليكم محبة الملايين - ما هو باين - من أبناء مصر الذين يتطلعون الى غد افضل ومستقبل مشرق ومشرف - اللى انا شايفه مظلم - تحت قيادتكم - انت وابنك يعنى - الحكيمة وسياستكم الرشيدة ؛

----------------

يذكر أن الرئيس محمد حسنى مبارك عيد ميلاده يوم اربعة مايو .. وانا بأه بدرت وباعتله التهنئة بدرى اعذرنى يا مبارك ... بالنسبة لتهنئة جمال مبارك بمناسبة انه اجوز هابعتله بوست انما ايه تمام وعليا النعمة ... اصبروا البوست الجاى عن جواز جمال مبارك اشهر عزاب مصر

ملف كامل .. المحاكمة العسكرية لمعتقلى الاخوان المسلمين

بسم الله الرحمن الرحيم .... بقالى يومين ماكتبتش ... ايوة يا عمرو كنت فين يا حبيبى ما كتبتش ليه ... الحقيقة كنت مايت خلاص .... حاجات حصلت فى اليومين دول ان شاء الله اقلكم عليها بس بعد لما اخلص الملف ... بعد لما تشوفوه ... ماشى ... خلاص موافقين ... ايه بأه حكابه المحكمة العسكرية والاخوان المحالين للمحكمة العسكرية دى .... حكاية كبيرة يا اخويا \يا اختى ... حكايه ناس شرفاء بيحبوا بلدهم اوى اوى اوى بيحبوا اسلامهم جدا جدا ... حسنى مبارك الظالم مش عايزهم فى البلد ... مش عايز حد اخوان يقف قدامه ... ظالم بأه ... المهم حسنى مبارك نهب فلوس الناس المحترمة دى وقفل شركاتهم .... وفيهم العلماء وفيهم الدكاترة المحترمين ... فيهم اللى نفعوا البلد دى كتير ....وفيهم وفيهم ...الناس المعتقله اقسملكم بالله انها ما عملتش حاجة غير انها بتحب بلدها ... والله بتحبها كتير .... المهم مش هنطول ... لو عايزين تقروا وتشوفوا مين هما المعتقلين المحالين للمحكمة العسكرية ... تقدروا تتدخلوا على مدونة اسمها انسى شوفها واعرف تاريخ المحاكم العسكرية والناس دى تهمتها ايه .... المهم المهم والاهم ... ان الـ40 المحالين للمحاكم العسكرية دول خدوا افراج من ثلاث قضاة بحالهم من محكمة مدنيه وحسنى مبارك مخه مقفول والا يحولهم محكمة عسكرية .... ربنا ياخدك يا حسنى .... كان فيه محكمة عسكرية يوم الخميس اللى فات ..26 ابريل يعنى ... ودى تغطية الجلسة واللى حصل فيها ... على فكرة تم منع اى حد يصور فيها ... وسحبوا كاميرات الموبيل بتاعه الناس وحاجات تانيه خليكوا معانا واقروا القصص والحكايات اللى حصلت فى المحكمة دى ....

---------------------

حوار قصير مع الاستاذ عبد المنعم عبد المقصود ( محامى المحالين للمحكمة العسكرية)

حوار مع الأستاذ عبد المنعم عبد المقصود لماذا قاطعتم الجلسة ؟

هيئة الدفاع قررت مقاطعة الجلسة احتجاجاً علي الإجراءات السرية وعدم الشفافية التي يتم اتخاذها منذ ولادة هذه الدعوة في شهر ديسمبر الماضي وبالتالي كان لابد لهيئة الدفاع من اتخاذ موقف حيال هذه الإجراءات

ما تعليقك علي قرار المحكمة ؟

المقصود كان الخروج من مأزق الإفراج عن المهندس خيرت والعشرة الآخرين واستحداث تخريجة قانونية لهم حتي يتم وضعهم رهن الحبس فكان لابد من استعجال قرار الإتهام لإيجاد مبرر للحبس وبعد ذلك تعد النيابة العسكرية أمر الإتهام .والذي بدا واضحاً أن النيابة العسكرية لم تجري أي تحقيقات ولم تبدي أي اتجاه لإصدار قرار إحالة

ما رأيكم في الإنتهاكات المستمرة للقوانين من قبل الحكومة ؟

أكدنا أكثر من مرة أنه يجب علي النظام أن ينصاع إلي القضاء وقرارته ، ولكن يبدو أن هذا هو دأب الأجهزة المعنية بتنفيذ هذه الأحكام القضائية أتمني أن تتغير هذه السياسة إلا أن المؤشرات لا تشير إلي هذا .

-------------------------

كان الأمر أكبر مما تخيلت بكثير ، استيقظت في الصباح لأقابل صديقي الذي وعدته بالذهاب معه لحضور جلسة المحكمة العسكرية التي سيحاكم والده أمامها اليوم ووصلت بالسيارة الي منطقة الهايكستب العسكرية لنقف أكثر من ساعة انتظارا لتعليمات أمن المنطقة العسكرية
كان المشهد مؤثرا للغاية وقد افترشت زوجات المعتقلين الأرض ومعهم الابناء وتوافد العشرات من أقاليم مصر من أهالي المعتقلين لحضور المحاكمة ، هذه سيدة عجوز جاءت من الاسكندرية لتري ولدها ، وهذه زوجة تحمل أربعة أطفال جاءت بهم من قرية صغيرة من قري المنصورة جاءت تهرول خوفا من فوات الوقت بعد تنقلها في عدد كبير من وسائل النقل الي أن وصلت لهذه المنطقة النائية
وهذا طفل صغير يجري ويلعب ويضحك وهو لا يدري ما الذي سيحدث لأبيه وهل سيراه بعد ذلك أم لا ، كان هناك شيء مشترك يربط بين كل هؤلاء وهو البسمة الحزينة التي لا تفارق العيون رغم كل ما يلاقون وفجأة ظهر رجل يرتدي نظارة سوداء جمع الرجال حوله وطلب البطاقات الشخصية لمن يريد الدخول من الأهالي، ونبه علي الاعلاميين بالانصراف لأنه لا تصوير ولا صحافة رغم أن الجلسة مفروض أنها علنية
وسلمناه البطاقات وبعد ذلك طلب منا الصعود لسيارة مخصصة لنقلنا الي المحكمة مع التنبيه علينا بترك أجهزة التليفون أو أي كاميرات أو أي ألات حادة ( أه والله ) وعلي المخالف أن يتحمل نتيجة مخالفته عند التفتيش الذاتي وما أدراك ما التفتيش الذاتي ، ركبنا الميني باص اللي جابوه وجلسنا فيه حوالي ساعة أخري الي أن أكرمنا الله وجاء هذا الرجل ثانية ليأمر السائقين أن ينطلقوا بنا مع منع السيدات من الدخول
المهم تحركت القافلة لنصل الي بوابة أولي يتم عندها انزال جميع الركاب من الميني باص ووقفنا طابورا للتفتيش وكذلك تم تفتيش الميني الباص رغم انه بتاعهم وهما اللي جابوه ! واحد واحد يدخل للتفتيش ، الناس كانت بتطول جدا في التفتيش ولم أعرف السبب الا عندما دخلت وجاء دوري . اقلع جاكت البدلة ، ايه بصراحة بدأت أقلق ، طلع أي حاجة في جيبك ولو كانت ورقة صغيرة ، حاضر .. بعد كدا مرت يد الضابط علي كل مكان في جسمي ( وما حدش فعلا يفهمني غلط ) كل حتة كل حتة ، جيت علي نفسي وقلت يلا مش مهم
المهم أدخل المحكمة وأعطوني ورقة برقم وبعد نهاية التفتيش ركبنا مرة أخري لتسير بنا السيارة حوالي ربع ساعة داخل الصحراء لنصل أخيرا الي المحكمة العسكرية العليا كما تشير اللافتة المرفوعة فوق المبني المهيب ، استقبلنا الجنود بكامل سلاحهم وكأننا أسري يهود فروا من خيبر ، بعد ذلك كان التفتيش الثاني لكل واحد فينا ووصل الي خلع كاب شاب صغير وفحص شعره فربما توجد به مواد حارقة أو متفجرات ! والله ما بهزر هذا ماحدث أمام عيني
المهم دخلنا أخيرا وسمحوا لنا بأداء صلاة الظهر فاطمأننت قليلا أننا مازلنا في مصر وليس جوانتامو ، كان حظي أنني في الدفعة الأولي التي دخلت وبعد حوالي نصف ساعة أدخلونا الي قاعة المحكمة التي تعلوا واجهتها أية ( واذا حكمتم بين الناس أن تحكموا بالعدل ) . التفت علي يساري لأري مشهدا بشعا صدم كل أحاسيسي الانسانية ، انه القفص الحديدي الرهيب متعدد الطبقات السميكة التي تري من خلالها بصعوبة ، قفص علي شكل مستطيل طويل مقسم الي أكثر من ثمانية أجزاء كل جزء لا يتجاوز عرضه أكثر من سبعين سم وطوله لا يجاوز أكثر من 120 سم وبه كراسي تشغل أكبر حيز به حيث يصبح الوقوف أكثر راحة من الجلوس وفي كل قمع من هذه الاقماع يقف ثلاثة أفراد أو أربعة ولك أن تتخيل هذا المشهد الذي ذكرني بحجرة العزل الحديدية التي توجد بكلية الطب البيطري قسم الكلاب التي يجري عليها التجارب العلمية والتشريح للطلاب
انه والله ربما يكون أوسع من هذا القفص الجهنمي الذي يهدف الي أقصي اذلال للانسان وامتهان كرامته واحساسه البشري بأدميته ، عندها لم أتمالك دموعي وأنا أري في هذا القفص المهين علماء عظام يفخر بهم العالم كله كالدكتور خالد عودة عالم الجيولوجيا الشهير الذي رفع اسم مصر عاليا والدكتور محمد بليغ أستاذ جراحة العيون الذي أعاد الله أبصار الألاف علي يديه في مختلف أنحاء العالم والدكتور عصام حشيش استاذ ورئيس قسم الاتصالات بجامعة القاهرة وزميل دراسة رئيس وزراء مصر احمد نظيف ، لم أتمالك نفسي وأنا أري فخر رجال أعمال مصر حسن مالك الذي جلب لمصر بمشاريعه مئات الملايين وكذلك أسد مصر ورمز صمودها خيرت الشاطر المناضل الشريف بقامته الطويلة وطلعته المهيبة والدكتور فريد جلبط أستاذ القانون الدولي وحقوق الانسان والدكتور محمد بشر استاذ الهندسة وأمين عام نقابة المهندسين المصرية ، لم أتمالك نفسي وأنا أري هذه الوجوه المضيئة وغيرهم من خيرة أبناء مصر الشرفاء وهم يقفون هذه الوقفة التي ستعترض عليها جمعيات الرفق بالحيوان ولن ترتضيها للحيوانات !!!
أخذت أتأمل وأصافح وجوه من أعرف من هؤلاء الكرام وأنا أذوب خجلا أن أنظر اليهم وهم في هذا الموقف ولا أستطيع فعل شيء لهم ، أيقظني من شجوني صوت الحاجب العسكري يعلن دخول القضاة وانتظرت دخول القضاة بملابسهم المعهودة ولكن استعادت ذاكرتي فورا اخر لقطات من فيلم عمر المختار وهو يحاكم امام الضباط الايطاليين بملابسهم العسكرية وتذكرت أنني أيضا في محاكمة عسكرية وليس محاكمة مدنية طبيعية للمدنيين من البشر ، ودخل الضباط بالملابس العسكرية وكذلك ممثل النيابة العسكرية وبدأت الجلسة بالنداء علي أسماء المتهمين وضحكت بصوت عال وأنا أسمع القاضي العسكري ينادي علي أسماء بعض المتهمين مثل يوسف ندا وهمت غالب ممن لم يدخلوا مصر من عشرات السنين ويتم توصيف حالتهم من النيابة بالهاربين
تخيلوا يوسف ندا الذي يعرفه العالم كله وحتي بوش شخصيا ذكر اسمه صراحة في خطاب له ، يوصف بأنه هارب ( وكل واحد يقول اللي هو عاوزه هو الكلام بفلوس ) ، النيابة تقول أنه تم اعلان المتهمين بموعد المحاكمة والمتهمون يكذبون ذلك ويستنكرون معرفتهم بموعد المحاكمة قبلها بساعات فقط وبالصدفة ! ولذلك جاءوا من غير محامين يدافعون عنهم ورغم صدور قرار محكمة الجنايات مرتين ببرءاتهم جميعا ووجوب الافراج الفوري عنهم بدون أي ضمانات أو كفالة الا أن وزارة الداخلية نحت أحكام القضاء جانبا وأعادت اعتقالهم مرة أخري
النيابة تتلو عريضة الاتهام وتسمع تهم غريبة تضحك منها وكأنك في فيلم بايخ لدرجة صعبة ( تعطيل الدستور – نشر الفكر بين المواطنين – الانضمام لجماعة محظورة – محظورة وتمثل خمس مجلس الشعب واختارها المصريون ، ابقوا حاكموا اللي انتخبهم كمان - غسيل الاموال – إدارة أنشطة بقصد تمويل الجماعة - وبص اللي جاية بقي دي جامدة أوي وهي حيازة ذخيرة بدون ترخيص ومين اللي منهم متهم بيها الدكتور خالد عودة ولاموأخذة صوتي ياللي مانتش غرمانة )
المهم تفاجيء وأنت قاعد بحاجات غريبة خلت منظر المحكمة صعب أوي أمام نفسها وأمام الحضور ، أول مفاجأة أن النيابة العسكرية التي حولت المتهمين للمحكمة لم تري أي واحد منهم ولا مرة، أو استجوبته أوحققت معاه ( والله كدا بالضبط ) وصعب علي جدا ممثل النيابة وهو يطرق رأسه خجلا عندما طلب منه المهندس محمود المرسي وهو أحد المحالين للمحكمة أن يقسم الأن أنه رأه قبل ذلك فامتنع ممثل النيابة العسكرية ولاذ بالصمت
المفاجأة الثانية أن أكثر من ثلث المحالين للمحكمة نادت عليهم المحكمة وكذلك النيابة بأسماء خاطئة تماما مثلا الاسم الرباعي تلاقي اسمين فيه غلط مما استفز مشاعر الدكتور فريد جلبط أستاذ القانون وجعله يخاطب المحكمة قائلا ( في قضايا المخدرات والجنايات اذا كان هناك خطأ في اسم او حروف فقط من اسم المتهم يحصل المتهم علي براءة، والخطأ في الاسماء يؤكد أن النيابة العسكرية لم تكلف خاطرها وتصحح أخطاء تحريات أمن الدولة الملفقة والتي صنعت علي عجل مما يؤكد النية المبيتة في الظلم والتلفيق ) واستمرت المهزلة عندما ظهرت المفاجأة الثالثة عندما سأل المهندس مدحت الحداد ممثل النيابة العسكرية قائلا ( كم هو المبلغ الذي قمت أنا بغسله ؟ أتحداك أن تخرج ورقة واحدة تتحدث عن قيمة هذا المبلغ! ) وعندما طلب القاضي من ممثل النيابة الرد لم يجيب وأطرق رأسه خجلا كالعادة وقال للقاضي لا توجد بملف القضية أوراق بهذا الشأن ومع ذلك تهمة غسيل الاموال موجهة للجميع
مما جعل الاستاذ فتحي بغدادي يقول للقاضي في كلمته ( زمان كنا بنشوف مسرحية شاهد ماشفش حاجة ودلوقتي بنشوف مسرحية النيابة ماسمعتش حاجة ومع ذلك تطالب بتوقع العقوبة علينا طاعة لأوامر النظام الفاسد ) وبعد هذا الفاصل من الكوميديا السوداء تستمع الي كوكتيل غريب من الحكايات يرويه المعتقلون للمحكمة التي أحست بالحرج وهي تسمع ما يقولون
عندما جاء دور العالم الكبير الدكتور خالد عودة في الكلام أطل علينا بشعره الابيض ووجهه المنير الذي تكسوه علامات الألم وعرف المحكمة بنفسه قائلا : انا خالد عبد القادر عودة ابن الشهيد عبد القادر عودة أعمل أستاذا للجيوولوجيا بالجامعة ، عضو بالجمعية الجيولوجية المصرية ، والجمعية الجيولوجية الأفريقية ، والجمعية المصرية للحفريات ، والجمعية الدولية للإستراتجرافيا ، وعضو الفريق الدولي للجنة الدولية لإستراتجرافيا الباليوجين ، ورئيس الفريق الجيولوجي المصري في المشروعات العلمية الدولية المشتركة على جنوب مصر، والباحث الرئيسي المصري للفريق الدولي المشكل لحماية آثار وجه قبلي ... مثلت مصر رسميا في الوفد المشكل من جامعات اوروبا وأمريكا لحماية أثار مصر بوادي الملوك بالأقصر وأرأس الفريق الجيولوجي العالمي الذي يضم علماء من كافة العالم لاقامة محمية جيولوجية بمصر بدلا من اسرائيل التي حاولت الحصول علي هذا الشرف وفازت به مصر كرمني وزير البحث العلمي ورئيس الوزراء وجامعة أسيوط ومؤسسة الميكروباليونتلجي بالمتحف الامريكي ونشرت كتبا لي وقد اكتشفت عدة اكتشافات علمية بمصر منها رواسب البليوسين البحرية و ... استمر الرجل في ذكر انجازاته وأعماله لمصر مما أصاب هيئة المحكمة نفسها بالانبهار أن يقف عالم كهذا في هذا المكان ، وخاطب المحكمة قائلا : ...تم اختطافي وانا أقوم بالبحث العلمي في منطقة جنوب الأقصرو بعد كل هذا يتم اتهامي بحيازة ذخيرة غير مرخصة وهي للعلم كانت بسلاح مرخص يحمله حراس المصنع الذي أنا شريك فيه ولست حتي مالكه وكذلك يتم اتهامي بالانضمام لجماعة محظورة بعد 63 سنة من حياتي وكذلك غسيل الاموال بعد أن وجدوا في خزانتي 900 جنيه وهل هذا مبلغ ينفع به الغسيل ؟؟؟ انني أطالب النيابة والدولة بالاعتذار لي فورا عن الاذي التي ألحقته بي وبقيمة العلم والعلماء في هذا البلد وتشويه سمعة مصر أمام دول وعلماء العالم .... !! كلمات متدفقة انطلقت من لسان العالم الجليل واختنقت الدموع في عينيه وقال حسبنا الله ونعم الوكيل ..
خيم الصمت علي الجميع وعندما نادت المحكمة علي الدكتور فريد جلبط رأيناه يقوم بثبات وشموخ ويقول أنا فريد أحمد جلبط أستاذ القانون الدولي وحقوق الانسان وأنا رجل قانون أدرس القانون لطلاب مصر منذ أكثر من عشرين سنة وهاأنا أقف اليوم متهما بتهم كلها باطلة وملفقة لا تخفي علي أحد وفند أستاذ القانون كل التهم الموجهة اليه والي زملائه ووجه كلامه لهيئة المحكمة العسكرية قائلا : أربأ بالمؤسسة العسكرية أن تشارك في هذه الجريمة ، لا تحملوا قاذورات النظام وأوزاره أنتم أشرف من ذلك بكثير .. أنتم أشرف من ذلك بكثير ...
رنت هذه الكلمات بأذني وظللت تتردد داخلي الي أن نادي القاضي العسكري علي المحاسب جمال شعبان فقام قائلا : سيادة القاضي انا مواطن مصري تخرجت من كلية التجارة بالاسكندرية وعملت محاسبا وعندي من الاولاد أربعة بمراحل التعليم المختلفة ولما ضاق الحال بي في الاسكندرية أتيت لأعمل بالقاهرة لأستطيع أن أنفق علي أولادي والا سيكون الخيار الثاني أن يخرج أولادي من التعليم لعدم وجود المصاريف اللازمة ولأنني لم أكن أقدر علي مصاريف ايجار شقة بالقاهرة فقد كنت أنام بمقر الشركة التي يمتلكها المهندس خيرت الشاطر وأعمل أنا بها لأوفر شيئا من أجل أولادي الذين لا أراهم الا يوم الجمعة بالاسكندرية وعندما داهمت قوات الأمن مقر الشركة وجدوني نائما بها فاتصل الضابط بقيادته ودار الحوار التالي : ألو يا باشا في واحد شغال في الشركة لقيناه نايم هناك "أجيبه يا باشا .. ؟ أوامرك يا باشا هجيبه .... وتم اتهامي بغسيل الأموال وضمي للقضية .. طيب أزاي أنا بغسل أموال ومش عارف أجيب شقة تلمني أنا وعيالي وبنام في مكتب الشركة علي الأرض !!
يا تري يا مصر كام واحد فيكي زي جمال شعبان عايز يعيش شريف ويكفي ولاده ويكمل لهم تعليمهم وبس مش أكتر من كدا .نسيت أقول ان بعد انقضاء أكثر من نصف المحاكمة سمح الأمن بدخول زوجات المعتقلين بعد الحاح القاضي العسكري علي الأمن أكثر من خمس مرات خلال ساعتين كاملتين .. بعد أن دخلت الزوجات بالاولاد أسرع طفل صغيرذو ثلاث سنوات يبحث عند القفص عن أبيه
وعندما وجده كان الدور علي أبيه( محمد مهنا) الشاب ذو الثلاثون عاما أن يتحدث للمحكمة فصرخ قائلا : يا سيادة القاضي انا هنا ليه انا اخدت براءة من محكمة الجنايات مرتين المفروض يبقي هنا الحرامية والفاسدين اللي ضيعوا البلد مش احنا يا سيادة القاضي انا ابني قدامك اهو بيسألني : انت هنا ليه يا بابا ؟ رد عليه يا سيادة القاضي قوله انا هنا ليه ، أنا أبويا مات والداخلية رفضت اني احضر جنازته او اخد عزاه ومراتي ولدت ابني التالت وانا مش معاها .. ليه يا سيادة القاضي انا هنا عشان عايز أصلح البلد دي أنا هنا عشان احنا بنقول للحرامي يا حرامي وللفاسد يا فاسد وللظالم يا ظالم .. ياسيادة القاضي الجاسوس العطار كان بيرفع ايده بعلامة النصر عشان عارف ان اليهود هيقدروا يطلعوه زي ما طلعوا اللي زيه قبل كدا ، وانا هارفع ايدي بعلامة النصر عشان عارف ان لكل ظالم نهاية والظلم مش هيطول .. ياسيادة القاضي" لو بقيت بعد هذا اليوم في السجن ساعة واحدة سأدعو بحرقة المظلوم علي كل من ظلمني " ..............................
أيها المظلوم كم ارتجف قلبي وانا اراك تداعب طفلك من خلف سلك القفص السميك وكم اهتزت مشاعري وانا اراه يشير اليك بكفه الصغير وينادي والدته ماما ماما بابا اهو..... هيروح معانا عذرا يا محمد فالنظام الظالم يرفض أن تعود لابنك ويصر علي حرمانك منه .. عذرا يا محمد فأنت تدفع ثمن التغيير والاصلاح لهذا البلد الذي تنتمي اليه وتعشقه بكل ما فيك مشاعر وعواطف.. كانت هذه الكلمات التي قالتها دموعي وهي تنهمر وتغمر قلبي بمشاعر سخط وحنق وبغض وكراهية لهذا النظام الذي يقتل بداخلنا كل معني جميل ..
بين الحين والحين ينهض العملاق خيرت الشاطر ليرسل رسائل واضحة وجريئة للجميع تلهب حماس جميع رفاقه ...
يا سيادة القاضي الحكومة فشلت في حبسنا بالقضاء المدني الذي برأنا ويريد منكم و أنتم المؤسسة العسكرية أن تتلوثوا معهم كما تلوثوا بدماء المصريين وبحبس ألاف الشرفاء في البلدونحن نربأ بكم عن ذلك ..
ويجلس قليلا فتثيره ثانية تلفيقات النيابة العسكرية التي اعتمدت علي تحريات ومحاضر أمن الدولة الملفقة ولم تسمع لأي متهم ويبلغ انفعاله الذرورة عندما يعلن القاضي أن النيابة العسكرية قد حررت محضر ضبط واحضار له ورفاقه مما يجعل وجودهم الان داخل القفص قانوني فينتفض قائلا : يا سيادة القاضي أرني صورة أمر الضبط والاحضار اللي اتعملت دلوقتي واحنا واقفين ويحار القاضي ويطلب منه الهدوء قائلا : يا أستاذ خيرت خلينا نسمع بقية الناس ، يرد عليه بحدة ياسيادة القاضي القضية سياسية بيننا وبين الحزب الوطني لتمرير ملفات معينة واحنا نبرأ با لمؤسسة العسكرية أن تكون خصم بيننا وبين النظام ، احنا مدنيين ومالناش علاقة بالمحكمة العسكرية ولا يجوز أن نمثل أمامها مع احترامنا الكامل للمؤسسة العسكرية وثقتنا في رجال الجيش اللي مهمتهم حفظ البلاد من أعدائها مش من أبناءها المخلصين.......
عندك حق يا خيرت ياشاطر هل فعلا ممكن الشعب في يوم يكره رجال الجيش والقوات المسلحة زي ما بيكره رجال الشرطة وما بيحبش حتي جيرتهم ، دا فعلا اللي فكرت فيه وانا بتخيل كم المحاكم العسكرية اللي الشعب هيتعرض لها بعد التعديلات الدستورية واقرار قانون القضاء العسكري وسلقه في مجلس سروروعز ومفيد ، يا خرابي دا الواحد لازم ياخد باله أوي بعد كداأحسن يلبس محاكمة عسكرية بمخالفة مرور طول ماهو من حق الرئيس أن يحول من يشاء هو ورجالته ومخبروه الي القضاء العسكري وربنا يسترها معانا ومعاكم !!
كلمات المظلومين تتوالي وتنزل علي القلوب لتمزقها من مرارة الظلم وسفالة التلفيق والتزويروالافتراء علي خلق الله ويزداد حرج المحكمة التي تحاول أن تنهي الجلسة
ويأتي الدور علي المتهم الأخير في القضية المحاسب مصطفي سالم الذي كان مسك الختام وفجر مفاجأت من العيار الثقيل ، سيادة القاضي أنا مواطن مصري بشتغل محاسب قانوني يعني بجيب وادخل للدولة فلوس من الضرايب ، انا خدمت في الجيش وشلت المخلاة ووزارة الدفاع قالت عني اني قدوة حسنة ووزارة الثقافة المصرية كمان كرمتني وانا كل أهلي دخلوا الجيش ومنهم اللي خد نجمة سيناء ومنهم اللي استشهد في 73 علشان يحرر مصر وبعد كل دا ألاقي نفسي هنا كأني مجرم أو فاسد والمجرمين الحقيقين كلنا شايفينهم برة بيسرقوا البلد ويغرقوا المصريين ويسمموهم بالأكل الملوث والمسرطن
ياسيادة القاضي : زوار الفجر اللي كنا فاكرينهم انتهوا خلاص ، رجعوا تاني وفي سنة 2002 هجموا علي بيتي وخطفوني تحت تهديد السلاح وفضلت معتقل اكتر من أربع شهوروقبل ما اخرج ضابط أمن الدولة عاطف الحسيني اللي عامل ملف القضية دي اللي احنا فيها الان ، قال لي :( ورحمة أمي لدخلك محكمة عسكرية) أقسم بالله أقسم بالله أقسم بالله قالها لي عاطف الحسيني وفعلا في أول محكمة عسكرية ضمني فيها تفتكر ليه يا سيادة القاضي قالي هدخلك محكمة عسكرية ليه مقليش هحاكمك وبس ؟ ليه يا سيادة القاضي قالي محكمة عسكرية ؟ ليه سلطة ضابط أمن الدولة توصل للدرجة دي؟ يا سيادة القاضي هل أصبحت أمن الدولة فوق الجيش الي بنحترمه كلنا
يا سيادة القاضي لو في أمر ضبط واحضار لنا لو سمحت قولي الأن رقمه وتاريخه ، أنا مصمم اني اعرف رقمه وتاريخه لو كان موجود فعلا !! ينظر القاضي العسكري في ورقة صغيرة أمامه ويقول تاريخه 26 /4/2007 !!!!!! يصر قائلا اديني رقمه ؟ القاضي في حيرة : ملهوش رقم !! وتضج القاعة ويقوم الشاطر ليهتف باطل مفيش أمر ضبط واحضار من غير رقم وتحديد مكان ودا يشكك في نية النيابة العسكرية تجاهنا ويخليها متواطئة مع وزارة الداخلية في الاستخفاف بالقانون ...
ويقوم أستاذ الطب الدكتور أمير بسام ليخاطب القاضي قائلا : ماعندناش حاجة نخاف عليها ولو بقينا عمرنا كله في السجون مش هنسيب البلد دي البلد دي بلدنا وبلد ولادنا ويهتف معه الجميع البلد بلدنا بلد المصريين مش هنسيبها ومش هنلين... وبعد أن طلب الجميع اخلاء سبيلهم حالا لانتفاء أي تهمة وعدم وجود أي دليل علي أي شيء يقرر القاضي تأجيل القضية الي الثالث من يونيو تضج المحكمة بهتاف واحد بدا لي أن مصر كلها تردده في نفس اللحظة :
( حسبنا الله ونعم الوكيل )

--------------------------------

بعد لما قريت الشهادة ... عايز ايه اكتر من كده ... حسبنا الله ونعم الوكيل فيك يا حسنى مبارك

دعاء الحكام العرب فى 2007

فتحت الايميل بتاعى اللى على الياهو لقيت رسالة اوف لاين بتقول .. دعاء الحكام العرب فى سنه 2007 ...قولت خير اللهم اجعلوا خير يا ترى بيدعوا بان الشعب ربنا يهديه ويرضى عنهم ولا ايه ... نص الدعاء

دعاء الحكام العرب في 2007 اللهم ثبتنا على كراسينا! وبارك لنا فيها! واجعلها الوارث منا! واجعل ثأرنا على شعبنا! وانصرنا على من عارضنا! ولا تجعل مصيبتنا في حُكمنا! ولا تجعل راحة الشعب أكبر همنا ولا مبلغ عِلمنا! ولا الانقلاب العسكري مصيرنا! واجعل القصر الرئاسي هو دارنا ومستقرنا! ؛ اللهم إنا نسألك فترة ممتدة! وهجمة مُرتدة! والصبر على المعارضة! والنصر على الشعب! ونسألك الحُسن لكن لا نسألك الخاتمة أبداً! اللهم ارزقنا معونة لا نسر

اوعى تتنازلى يا حماس عن ارض فلسطين

قشطة ... الحرب هتولع بين غزه واليهود ...
دى جمله سمعتها من صاحبى انهارده قلتله خير يا عمر فى ايه ... قاللى اليهود اولاد الكلب اخترقوا الهدنه بقتل تسع فلسطينين فى الضفه ... قولت يا ولاد ستين كلب ... جيت على النت ...دخلت على شبكة فلسطين للحوار لقيت الدنيا والعه بنار واول خبر عينه وقعت عليه فى الشبكة كتائب القسام تعلن ضرب المغتصبات الصهيونية بقذائف الهاون وصواريخ القسام انا كنت هاموت من الفرحة .. عمال اقول فى نفسى يارب حماس تدمرهم يا رب القسام تزلزلهم ... يارب اليهود يغوروا ويمشوا من ارض العرب والمسلمين ... انا مش هارضى اتنازل على ربع شبر من ارضى وارض اجدادى وارض الانبياء فلسطين ... دمريهم يا كتائب القسام ... دميريهم ....
- حكومة حماس حذرت اليهود يا يهود شاليط عندنا ... هنموته يا كلاب ... خلوا بالكوا انتو كده بتخترقوا الاتفاقات والهدنه ... باردوه اليهود ما عبروش وقتلوا الفلسطينين احنا اما عرفناكم اما موتناكم وبهدلناكم زى ما رملتونا وقتلتونا ... ما نبقاش احنا جند الله ... زلزليهم يا كتائب القسااااااااااااااااااام ....
------------------------------------

بعد لما خلصت كتابه وتعليق على الاوضاع الفلسطينه حبيت اجيبلكم كده خبر يلم الموضوع كله على السريع ... وبعد بحث لقيتلكم خبر على عشرينات حلو بعنوان حماس : لاتهدئة بعد اليوم وكمان اخويا وحبيبى صاحب مدونة الميت كاتب مقاله جميله اوى عن الموضوع ده بعنوان سنقاتل رغم الجبناء ......

-----------------------------------

فى حاجة فى الاخر عايز اقولهالكم .. الا وهى دور مصر فى الحاجة دى طبعا مصر كلها مشغوله بالحدث التاريخى الهام والفارق فى حياة كل المصريين والاهلاوية ماتش الاهلى وبرشلونة ... فا طبعا الناس مش مهتمة بالموضوع لكن فى حاجة غريبه اوى حصلت المسؤلين اهتموا بس بطريقه غريبه شوية انت عارف ازاى ... المسؤلين بالسفارة الاسرائيليه ... بعتوا للمسؤلين المصريين بانهم يحضروا حفل فى السفارة اليهوديه بمناسبة اقامة دولة اليهود على ارض فلسطين ... والغريب ان الكلب المصرى السفير أحمد إسماعيل- مدير إدارة إسرائيل بوزارة الخارجية المصرية-قال إنه بموجب العلاقات الطبيعية يقيم ممثلو الدول حفلات بمناسبات مختلفة ومنها العيد الوطني لكل دولة، ولا يوجد ما يمنع قيام ممثل أي دولة بتوجيه الدعوة لمن يشاء، كما لا يوجد إلزام لأي من كان بحضور تلك الحفلات والمناسبات، مؤكدًا أن هناك مساحةً من الحرية ويجب وضع الأمور في نصابها وعدم تحميل الأمور أكثر مما تحتمل. عايز اكتر من كده ايه ذل ... عايز اكتر من كده ايه يا مصرى قوم وفوق بلدك بتناصر اليهود ... بس طبعا الاخوان مش سابوهم فى حالهم ..قدموا استجواب فى البرلمان وبهدلوا الدنيا ... اقرا التقرير من موقع اخوان اون لاين بعنوان احتجاج على دعوة مسئولين مصريين للاحتفال بعيد تأسيس الكيان الصهيوني ... يلا سلام يا شباب

وجيت من القاهرة ...

وجيت من القاهرة ..... الساعة 11 باليل .... وجبت معايا حته خبر صحفى يقلب الصحفيين كلهم ... ان شاء الله انشره فى جورنال الدستور لو اعرف اوصلهم ... لو حد عنده ايميل استاذ الصحافة الكبير ابراهيم عيسى ياريت يكتبه .... يلا عايزين منى حاجة .. سلام ... البوست الجاى هيكون مولع نار على فكرة

الحرية لحبيب المدونين .. منعم

الحريه لمنعم ... الحرية للمدون الاخوانى ...

مش لقيت حاجة خالص غير اقدر اقوللكم .. ياريت توقعوا على البيان ده اللى بيطلب الافراج عن زميلنا المدون اخونا عبد المنعم ... يارب ثبته يارب ... وانصر الحق على الظلم ... واهلك الطاغى المستبد حسنى مبارك ...
ياريت تضغط على الصورة

------------------------------------

نسيت اقوللكم قبل ما اقفل البوست ده ... انا مسافر انهارده القاهرة علشان اشوف والدى فى المستشفى لأحسن هما حجزوه هناك ... يارب اشفيه يارب ... يلا سلام

قريبا على مدونة لسه عايش

بمناسبة انتخابات الشورى ... ننشر قصه مصطفى السعيد (وزير الاقتصاد السابق ) عندما ذهب للمرشد العام للاخوان المسلمين فى مكتبه ايام انتخابات مجلس الشعب الماضيه
--------------------------------------
فى حوار قد يثير ضجه كبرى على الانترنت وغيره .... نفتح الملف مره اخرى .... حوار على نار هادئة مع رئيس الاتحاد الحر فى جامعة الازهر والمسؤل عن طلاب الاخوان فى الجامعة وصاحب فكرة العرض الرياضى والذى بسببه يحاكم الاخوان عسكريا ... انه الطالب الدكتور صهيب شوكت الملط ... قريبا على مدونتى
--------------------------------------

إتحاد حرامية مصر

أثناء عودة (سعد زغلول)من المنفى فى أعقاب ثورة 1919 أصدر (أتحاد حرامية مصر) هذا البيان قالوا فيه(نحن طائفة الحرامية واللصوص والمتسولين قررنا منع السرقة والتسول لمدة ثلاث أيام حتى يتمكن الشعب من الإحتفال بالزعيم دون مضايقات منا) وبالفعل لم تسجل ولا حادثة نشل أو سرقة فى هذه الثلاث أيام

والان انظر إلى حرامية مصر لا أقول لك النشالين الغلابة الذين يسرقون المحافظ وغيرها وإنما من يسرقون مصر كلها حرامية كبار تجدهم رجال أعمال وسياسيين ووزراء وأعضاء كبار جداً فى الحزب الحاكم الأمر والناهى الوحيد فى مصر هؤلاء سرقوا منا كل شئ سرقوا المال والكرامة سرقوا الوطن والمكانة وسرقوا مصر داخلياً وخارجياً مادياً ومعنوياً

السرقة المادية كلنا يعرفها ويراها من بيع للشركات بأرخص الأسعار والأثمان وتسريح العمال العاملون بها أو على الأقل خفض أجورهم ونسمع كل يوم عن سرقة البنوك والهرب بالأموال للخارج

والسرقة المعنوية هى الأخطر فهم سرقونا فى خارج مصر وفى كرامة المصرى خارج بلاده وطريقة تعامل الناس فى الخارج معه فهم بطريقة تعاملهم معنا(أقصد حرامية البلد) فى مصر والاهانة للشعب جعل أى مصرى خارج بلده يعامل كالعبد ولا كلمة له وليس له حق الاعتراض وكأن لسان حال الناس فى الخارج يقولون للمصرى (بلدك بتهزئك وتديك على قفاك وعوزنا أحنا الغُرب عنك ان نعاملك معاملة حسنة لما بلدك تحترمك نبقى نحترمك)وانظر إلى معاناة المصريين خارج مصر وأنت تعرف

أما السرقة المعنوية الداخلية فهى أن المصرى الان لا يشعر بإنتماء لبلده ولا يشعر فيها بكرامتة فهو فى ظل غلاء الأجور يتحرك زى الطاحونة من أجل إيجاد وظيفة تانية وتالتة(إن وجد أصلاً)علشان يقدر يعيش هو وعيلته وبالتالي يضغط على كرامته ويديها بالجزمة علشان يحافظ على شغله وخوفاً من الطرد من العمل(وذلك عندما يهينه رئيسه فى العمل فهو يسكت ولا يتكلم حتو ولو كان معه الحق )وكذلك النساء تتحمل المضايقات والمعاكسات والتحرشات فى الأتوبيسات والقطارات أثناء الذهاب للعمل علشان تساعد الراجل فى مصروف البيت وعلشان يوفروا فلوس التعليم والاكل والشرب والعلاج(هذه المرأة لا تستطيع أن تركب تاكسى لأنه لو حدث ذلك سوف تتخرب ميزانية الشهر).

ولذلك ابتعد الناس عن الأهتمام بأحوال البلد والسياسة جرياً وراء لقمة العيش النغنسة بالذل والمهانة وتجريح الشعور وهذا ما يريده الحرامية لنا

وقبل ان انهى مقالى اعطيك هذه الأرقام وهى منقولة من بحث للدكتور (أحمد ثابت )أُستاذ العلوم السياسية بجامعة القاهرة وعنوان البحث (نخبة رجال الاعمال فى مصر)0 منذ عام 2002 وحتى بداية عام2007*

خصخصت الحكومة 189 شركة من أصل 314 شركة وبيعت 54 شركة وطنية ناجحة وصفيت32 شركة وبيعت 38 شركة أخري(كله للحرامية أياهم)وهناك اتجاه لتسوية الخلاف مع 14 من المتهمين بسرقة أموال البنوك المحكوم عليهم بالسجن لمدد مختلفة مقابل التسوية هو الأفراج عنهم

مجموع ما حصل عليه المستثمرون من رجال الاعمال 176 مليار جنيه مصرى تم استثمار خُمس هذا المقدار فى مصر

والباقى هرب للخارج لإستثماره خارج مصرحصل 37من كبار لرجال الاعمال على 25مليار جنيه قروضاً بدون ضمانات أبرزهم*

أحمد عزمليار,250 مليون, 782 ألف

رامى لكح مليار ,448مليون ,

944 ألف مجموعة حاتم الهوارى مليار ,460 مليون , 781 ألف

منير غبور وأولاده337مليون ,

611 ألف ولا عزاء للفقراء والله حرامية زمان كانوا محترمين أقوى

ادعوله يا شباب ...

الحمد لله بعد لما نجحت العمليه اللى عملوها لبابا وهى عمليه استئصال الطحال من الجسم ... والحمد لله نجحت وبعد اسبوع من الرقاد فى السرير ذهب ابى اليوم لاعادة كشف ... فا ارجوكم ممكن لو سمحت تدعوله .... ربنا يكرمكم يارب

الشباب المصري قنبلة موقوتة !!

شباب مصر
طلقة طائشة *
أطرف خبر قرأته منذ فترة برغم ما فيه من مرارة !! وهو في حاجة للتعليق ؛ ولعله يتماشي في أحد جوانبه مع الإدراج السابق والخاص بـ ( خراب البيوت !! ) وقد نشره موقع قناة العربية وعنه نقلته العديد من المواقع الإلكترونية وكان عنوانه هو :
(( طبع كميات كبيرة ونشرها في الشوارع والحافلات
القبض على طالب مصري وزع منشورا يطلب فيه عروسا مع شقة ))

وفي تفصيلات الخبر قالوا أنه شاب من صعيد مصر !! يبلغ من العمر 24 عاما ويعيش بمفرده حيث يقيم بشقة طلابية في العاصمة المصرية، ويدرس في السنة الثالثة في كلية التربية بجامعة الأزهر، غير أنه لم يعد قادرا بحسب كلامه على حياة العزوبية فراودته فكرة أن يكتب منشورا يطلب فيه عروسا !! ولا مشكلة عنده في كونها أرملة أو مطلقة أو بنت بنوت !! المهم أن تكون مالكة لشقة !! يستطيع إتمام طقوس الزواج في رحابها !!

فما الذي اضطر هذا الشاب إلي هذا الفعل الطريف الذي ينم عن كبت نفسي وضعف إرادة في مواجهة ما يحدث حوله من انفلات أخلاقي بالمجتمع !! ولعله وهو الطالب بكلية التربية بجامعة الأزهر قرأ آخر الإحصاءات عن حالة المجتمع المصري والتي منها تقرير بحثي أعدته الباحثة عزة كريم الخبيرة بالمركز القومي للدراسات الاجتماعية وذكرت فيه أن ثمة ارتفاعًا ملحوظًا في نِسَب الطلاق و العنوسة والزواج العرفي وطلب الخلع في عام 2006 عما سبقتها ؛ حيث تشير الإحصائيات الرسمية إلى انخفاض نسبة الزواج في مصر بدرجة كبيرة، وطبقًا للمعلومات الأولية فقد بلغت عقود الزواج عام 2006 حوالي 63 ألف عقْد، بينما وصَلت حالات الطلاق إلى 78 ألف حالة!! ؛ هذا بالإضافة إلى أن 35% من الفتيات تعدَّين سنّ الـ35 سنة !!! وما زِلْنَ بدون زواج !! و20% منهن يتزوَّجن بين 35 و40 سنة !!! منهن 55% حاصلات على الماجستير والدكتوراه !!! و25% خرِّيجات جامعات !!! و15% مؤهّلات متوسطة !! و10% لم يكملْن التعليم !!!.
ويجدر بالذكر أن الدراسة قدرت عدد العوانس من الشباب والفتيات بـ 9 مليون شاب وفتاة !!

هذا بعض ما استحضره هذا الشاب قبل أن يقدم علي فعلته الطريفة !! ولعله نظر قبلها إلي الفضائيات وما تقدمه من دعوة للرذائل والفاحشة فأحب الشاب أن يدخل البيوت من أبوابها !! ولكن يد الشرطة كانت أسرع من أحلامه !!

مصر علي أبواب انفجار :
وهو ما يقول به العقلاء وأصحاب العلم والتخصص !! إن الشخصية المصرية قد تم تخريبها اقتصاديا وسياسيا واجتماعيا !! مما خلف مسخا سماه العالم كذبا ( الإنسان المصري !! ) .إننا وصلنا إلي حال لا يرضاه الأسوياء !! وقد أصبح العجز والفقر هو عنوان مرحلتنا !!وإن جمع النبي صلي الله عليه وسلم ( الكفر والفقر !! ) واستعاذ منهما جميعا !!
فإن عجز الرجال سيكون قرين الانفجار والثأر !!

قبل تعديل الدستور .. وبعد تعديل الدستور

ياريت تتفرج وتقوللى رايك

الفيديو نقلا عن مدونة حبيبى ميدو مجدى

مساء الخير ... يا اصحاب الكويز والتطبيع... مساء النور يا مبارك

تسقط تسقط إسرائيل ويسقط معها كل عميل
جاسوس أخر ... لم نقيق بعد من الجاسوس السابق (محمد العطار ) منذ ثلاثه أشهر حتي نفاجيء .... بجاسوس أخر .... طيب ... فين معاهده السلام ؟؟ أين خيار السلام وخيار الصوب ؟؟!! أين التطبيع ... أين أتفاقيه الكويز .....؟؟ أين السفارات المفتوحه ....؟؟ أين أتفاقيات الحب في شرم الشيخ .....؟؟؟!! يا ساده .... الله عز وجل هو الذي خلقهم وهو الذي يعرف طبائعهم .... الله ....وضح لنا في قرآنه أنهم أشد الناس عداوه لنا ........ خلو عندكم دم ..... أو شويه دم .... وأزعلوا شويه منظر كده زي موضوع الأسري اللي مطرمخيين عليه في صحفكم النجسه الآن .... أبسط شيء طرد السفير ... ده جاسوس مش عسكري مرور ؟؟؟ ..علشان تبقى تروح يا حسنى وتسلم علي ايهود اولمرت اهو بيخزوقك وانت مش حاسس بيبوسك ومن تحت بيبعتلك جواسيس وتقوللى سلام ... !!!

لمعرفة حكاية الجاسوس الاخير والذى تم القبض عليه اقرا الخبر بتفاصيله من موقع جبهه انقاذ مصر
مصر تكشف عن شبكة تجسس صهيونية خطيرة علي مفاعل انشاص النووي .. الشبكة تم تجنيد اهم عناصرها في السعودية وقام موساد بتدريبه وتزويده باحدث تقنيات التجسس

يلا حرية ... اختارلك رئيس

السلام عليكم الموضوع ده فى دماغى من فترة ومش عارف انساه ,اقول بقى وربنا يستر نفترض فرضا جدلا ان حصل انتخابات رئاسية فى مصر قريب.... طبعا مش هتحصل والسيد الرئيس محمد حسنى مبارك (حفظه الله)موجود فى سدة الحكم... يعنى نفترض مثلا ان بعد الشر بعد الشر الرئيس تركنا لحظة العسر وحرمنا الله من حكمه.. وصعد بسلام لجنات النعيم ثوابا على النعيم اللى عيش المصريين فيها و برضه فرضا جدلا مش هيحصل ابدا الراجل اتخنق من البلد الزبالة ده والشعب العبيط اللى مش مقدر انجازاته العظيمة ومش عارف يصدق انه لسة صغير نونو وبيحبو نحو الديموقراطية بقاله 26 سنة ياااااه ده طلعت بعيدة اوى , مش نشد حيلنا شوية يا رجالة المهم الراجل جت له لحظة تجلى وقال انا قرفت من البلد ده 26 سنة مستحمل قرفهم وجهلهم ورفضهم لحبايبى فى اسرائيل وياريت عاجب انا خلاص زهقت من المعارضة والاخوان و اصحاب المدونات دول كمان خلاص انا هاسيبهم بقى واشوف هيعملوا ايه بعدى المهم بقى لو ده حصل تفتكروا مين هيمسك بعده؟؟؟؟؟؟؟ جيمى ولا حد تانى وتتمنوا مين اللى يتولى الرئاسة بعده؟؟؟؟؟؟؟؟ يعنى عمروموسى او عصام العريان او يمكن جيمى او اى حد تانى مين هو...... وتفتكروا مين هيرشح نفسه ؟؟؟؟؟؟ الصباحى مثلا ولا ايمن نور ولا مهدى عاكف ولا مين وتفتكروا هيجى اليوم اللى نقول عليه نفس الكلام اللى قلناه على مبارك؟؟؟؟؟؟
-------------
مستنى ردودكم

تذكرة اتوبيس...

العمارة بتنهار ...

ومفيش قرار تنكيس ....

والمنجا فى التلاجة ...

والصبر فى قراطيس ...

وربنا ما يحوجنا ....

للدم اللى فى الكيس .....

صحيح مترو الانفاق .....

وصل رمسيس ....

لكن لسه حقنا مكتوب .....

على ضهر تذكرة اتوبيس ....

هى التذكرة فيييييييين.....

يابنى انت وهوووووووووو

فى افتتاحية المدونة

لسه عايش والله

اهلا بيكو يا شباب فى مدونتى ... لسه عايش ... لسه بنظبط فى المدونة اصبرو علينا يومين كده ممكن