الاثنين، ١٠ نوفمبر ٢٠٠٨

لماذا شطبتم اسمى من ورقة التصويت ؟؟؟

اثناء تفكيرى فى هذا الموضوع .. كيف اشطب ولى الحق فى الدخول !!!
لأول مرة فى تاريخ الجامعات الخاصه .. يشطب اسم من اسماء المرشحين من ورقة التصويت (او ورقة الترشيح) .. نعم هذه اول مرة فى تاريخ الجامعات الخاصة التى اظهرت نوعا من الديموقراطيه فى انتخابات الاتحاد وتكوين الاسر ووو .. ولكن ظنى باء بالفشل بعد ان جربت بنفسى هذه الكذبه التى صدقتها الا وهى توافر الحريه فى اى منشأه خاصه ...
ولكن بات الامن يتدخل فى كل شئ حتى فى انتخابات الجامعات الخاصه ... وابسط مثال على ما اقوله ما حدث اليوم (الاثنين ) لى فى جامعة سيناء كلية الاعلام عندما دخلت انتخابات الاتحاد وبنية سليمه خالصه لوجه الله ... فى اللجنة الثقافيه .. وبدات انشئ القوائم المخصصه واللى هانزل فيها .. وبدا العمل وبدا توزيع الورق بعد ان اخذ موافقه من العميد (الى هنا والكل تمام ) وحتى جاء يوم ظهور قوائم المرشحين وكنت فيها وحمدت الله ان كل شئ يسير على ما يرام .. ولكن ماحدث يوم الانتخابات هو ما على لا يرام ... جئت يوم الانتخابات ووزعت ورق الدعايه الخاص بى وكل شئ تمام .. ولكن حدث اللى مش تمام دخل الطلاب للتصويت فى اللجان فلم يجدوا اسمى مدرج فى قوائم المرشحين ذهلت .. كيف ولماذا ؟ .. ولما انا بالذات وووو ... ولم اعرف السبب خرجت دفه اخرى من الطلاب مره اخرى وكرروا نفس استعجابهم بالامر لم نجد اسمك يا عمرو ... وسالنا الدكتور المشرف على اللجنه قالنا شلناه ... لماذا لم اعرف السبب .. حتى ان فيه بعض الطلاب من كتر حرصهم على انتخابى قالوا يمكن اللى عمل الورقه دى نسى اسم عمرو ولا حاجة قام جاى وكتب اسمى وعلم عليه ... اصبحت كالمجنون وانا فى ذاكرتى معتقد اننا فى جامعه خاصه والحريه متوفره فيها وليست كالجامعه الحكوميه ... تقلب مزاجى واصبحت ازعق فى الدكاتره بعضهم يتعاطف معى ويستغرب الموقف والاخر يبعتنى لرعاية الشباب .. وذهبت لرعاية الشباب لماذا شطبتم اسمى .. لم اجده فى ورقة التصويت ... يجيب على انت اترشحت ايوه شوف الاستماره شاف الاستماره ولقانى نزلت ... قالى اسمك نزل فى قوائم المرشحين قولتله ايوة نزل اطلع شوف هتلاقيه متعلق .. قالى صادق قعد يلملم فى الورق اللى امامه ولم يعطينى اجابه شافيه وكانه عرف حاجة (عدى عليا بعد الانتخابات انا مش فاضى دلوقتى بكره تلاقينى ويكلم غيرى ويعدل النضاره ويتوه ويمشى ) ولم اجد اجابه شافيه من اساتذتى الكرام حتى ان بعضهم شك انى حذفت لظروف امنيه ... فقام بعض الدكاتره بارسالى للواء مدير امن الجامعه الذى اخذ يحدثنى بطريقه الابن الخاطئ ماتكلمش حد يابنى فى الموضوع انت منين تعرف كذا وكذا .. عندك انشطه كتير مش ضرورى دى ليه دى ؟ ... اصبح يحدثنى ايضا بمنطق التوهان .. لم افهم ما يدور حولى الانتخابات شغاله الناس بتنتخب الوضع مش مظبوط اصبح العرق يجرى فى جسدى والقميص يطلع من البنطلون من كتر ما كنت باجرى ... ودانى اللواء لنائب رئيس الجامعه ذهبت له وكلى امل فى ان اجد الحل تكلمت معه بكل احترام وتبادل معى هذا الاحترام باحترام متبادل ... وبدا يمتص غضبى الغير عادى ..ويقولى يابنى ما عندك الانشطه كتير لازم المناصب .. قولتله قسما عظما انى ما ابتغى منصبا انى ابتغى ان اكون خادما لدى الطلاب عندى افكار جديده فى اللجنه دى عايز الطلبه يستفادوا منها .. رد عليا مبتسما انت ولد محترم وخلوق وشاطر ونشاطاتك متميزه .. قولى يا عمرو انت رايك ايه فى الجامعه .. الجامعه يا دكتور حلوة جدا وبتطلع المواهب المدفونه من الطلاب زائد ان الجامعه بتتميز بدكاتره مش موجودين فى الجامعات التانيه ودى حاجة متميزه للجامعه .. قالى وايه رايك فى النشاطات قولتله بتطلع مواهب الطلاب المدفونه .. قالى ما تشارك فى غيرها ضرورى دى جاوبته : ابويا قالى وانت صغير خليك ايجابى وتشارك فى اللى يهم الناس ويفيدهم وبتهيالى ان الجامعه بترسخ المفهوم ده جوه الطلبه قالى صح يا عمرو .. بص يا عمرو انا هادرس الموضوع قولتله كام يوم كده يافندم هتدرسه قالى تلات ايام قولتله معاك اسبوع وهاعدى على حضرتك نشوف توصلنا لايه ... لان الموضوع ده كبير .. قالى ماشى ياعمرو انت ولد شجاع وطيب ووو .. قولتله عندى طلب عند حضرتك باعتبارك والدى قالى اتفضل : قولتله يا دكتور ايه علاقة الانتخابات باللواء قالى مافيش علاقه قولتله امال ليه الدكتور المشرف على الانتخابات بعتنى للواء وقالى كلمه ايه السبب .. قالى كلنا اسره واحده فى الجامعه وكلنا ايه وكلنا ايه ... وغادرت مكتبه على امل ان اقابل سيادة الدكتور نائب رئيس الجامعه بعد اسبوع بدون اجابه شافيه للموضوع ..
واصبحت انا مذهول مما يحدث هل هذا هو نتاج ترشيحى احرم امام الطلبه من دخول الانتخابات لماذا ولمصلحه من ؟
لماذا اخذلتمونى امام الطلبه التى كانت تعطينى الثقه حبا فى .. لماذا اهززتم هذه الثقه منهم لى .. لماذا احسستموهم يا ادارة الجامعة انى مخالف للقانون وانى وانى .. كل هذا من اجل انتمائى .. من اجل مدونتى .. من اجل التعبير عن الحريه .. من اجل مشاركتى الاجابيه الفعاله ..
لماذا شطبتم اسمى ومعى اناس مرشحين اتفصلوا اسبوع .. قبل كده وانا لا ليا سوابق ولا حتى انذارات ولا ولا .. كلى نشاط مع الدكاتره فى المحاضرات انتم اردتم بذلك ان تحبطوا نفوس الطلاب بهذا الجهاز الامنى العقيم الذى اصبح يسيطر على مصر وعلى الجامعه .. اردتم تثبطوا النفوس ولا تعلوا الهمم وتنهضوا بهذا البلد .. اردتم واردتم ومازال فى ارادتكم الكثير ... متى تقولوا لهذا الجهاز لا تتدخل فى جامعتنا نحن جامعه حره .. متى ؟
انسيتم يا اداره الجامعه ويا استاذ رعاية الشباب ان طالب قام وسال الدكتور محمود شريف قبل ان يقال السنه الماضيه وقال له لو حد من التيار الاسلامى دخل او من احزاب المعارضه ما رد فعلكم ؟.. رد عليه الدكتور محمود شريف رئيس الجامعه السابق وقاله بصوت عالى الديموقراطيه عندى شئ مقدس واللى يقرب منها هاقطعه باسنانى ... نسيتم هذه الجمل ام تاخذوها على انها شعارات براقه تحمل الدعايه للجامعه من اجل المال فقط ...
اعرف ان شباب كليه اعلام يتابع المدونة وان دكاترة مادة صخافه تتابع المدونة .. واعرف ان هذه المقاله ستكون فى يد الامن لمده لا تقل عن اليوم اتمنى ان تنظروا فى هذا الموضوع على انه غلطه فى الجامعه نرجوا عدم تكرارها ...
اسمى فى قوائم المرشحين ...المعلق امام الطلبه
استمارة الترشيح .. لم اجد فيها اسمى عجيبه

هناك ١١ تعليقًا:

غير معرف يقول...

حسبنا الله ونعم الوكيل يريدون ليطفئوا نور الله بافواههم والله متم نوره ولو كره الكافرون اصبر واحتسب اخى

أحمد سعيد بسيوني يقول...

هذا الموقف أكد لنا ان الجامعات الخاصة خدعة كبرى ، ولا تفرق في شيء عن الجامعات الحكومية

AmmarBi يقول...

عمرو حبيبي
لا تسكت عن حقك
وتأكد أنك ان ربحت المعركة فستكون رسالة ايجابية بأن الجامعات الخاصة ما زالت بعيدة عن أعين الأمن
تأكد من أن الجامعة تحرص جداً على سمعتها -كجامعة خاصة- وأن الموضوع أكبر منها

وفقك الله

رابطة هويتي اسلامية يقول...

السلام عليكم ورحمة الله وبركاته

نتشرف أن ندعوكم إلي زيارة رابطتنا " هويتي إسلامية ".

رابطتنا جسر من التواصل بين المدونين أصحاب الفكرة

رابطتنا رفض لما يبعدنا عن هويتنا الإسلامية

نحن أصحاب الفكرة انتم أصحاب الانجاز

كونوا معنا للرقي و النهوض

الدعوة خاصة ليست عامة لنا شروط فيمن ندعوهم أنت واحدا منهم

غير معرف يقول...

زكريا - اسكندرية
بص يا عمور انا اتفصلت سنة كاملة
واتشطبت من الاتحاد لانى طالب غير حسن السير والسلوك ههههههههه يا ابنى عادى لانى انتمى للاخوان المسلمين بص يا حبيبى لازم تكون صامد اوعى تتاثر خلى العود قوى وخليك اكبر من الازمات والموضوع كله لله واوى تفتكر ان ربنا هيسيب الناس دى لا ياحبيبى عين الله لا تنام الصبر جميل

غير معرف يقول...

و لا تحسبن الله غافلا عما يفعل الظالمون

أفحسبتم أنا خلقناكم عبثا و أنكم إلينا لا ترجعون

((..همـ قلب واحد يجمعنا ـسات..)) يقول...

.

.

المدون الفاضل : :
..نتمني لك مزيدا من التقدم والنجاح
وان تكون مدونتك معبرة عن صوتك في كل مكـــــان
.. .. .. ... ..
سعيا منا بأن نجعل للفتيات المدونات صوتاً أكثر قوة وانتشارا
وتأثيراً وبان نرتقي بفكرنا وثقافتنا وعلمنا وخلقنا

كان اقدامنا علي تأسيس رابطة واحده تضم جميع الفتيات المدونات
لتكون همســات هي من تجمعنا في قلب واحد

فندعوك للمشاركة معنا بأفكارك ومقترحاتك ....
كونك معاصراً لثقافة التدوين وناظرا الي ما تحتاج اليه
الفتاه المدونة .. .. .. لترتقي اكثر فأكثر

شاركونا .... لأنكم جزء منا . . . .

همــ قلب واحد يجمعنا ــسات


تحياتنا :::
(( فريق العمل بهمسات ))

آلاء محى يقول...

ولا تحسبن الله غافلا عما يفعل الظالمون

مش فارقة خاصة من حكومة كلها كوسة

غير معرف يقول...

أخي الفاضل والله لو كنت مكانك لطلبت اللجوء السياسي
ليس هروبا بل فقط من أجل إكمال دراستي وهي الأهم وكذالك من أجل رد الصاع صاعين لأبناء الكلب أعداء الإنسانية وخدام الصهاينة
وأعتقد أن هذه المرحلة من حياتك هي المرحلة التي ستبني بها إنشاء الله مجدك وستكون المنطلق لك نحو القمة
قمة أناس نحبهم ونقدر قيمتهم ونرفعهم على أكتافنا إلى أعلى مراتب المجد القادم إن شاء الله

اصحى يا نايم يقول...

ربنا جعلك سبب لفضح الجامعات الخاصة البعيدة عن الرصد الاعلامى .. اذن هى فرصة جيدة لوضعها فى بؤرة الاهتمام


ربنا يتقبل

غير معرف يقول...

يا اخي الفاضل الموضوع حدث معي بالظبط ولكن في كلية الصيدلة وذلك في اختيار اعضاء اللجان لجمعية الصيدلة للتبادل الطلابي الدولي.
ممكن تتفرج شوية علي كليب بسيط عن الموضوع علي اليوتيوب:
http://www.youtube.com/watch?v=rOf2IA0AS7c