الأربعاء، ٧ نوفمبر ٢٠٠٧

على هامش مؤتمر الحزن الوطنى


من اسبوعين تلاته لقينا الجرايد المنافقه ( الاهرام والجمهوريه والاخبار ) تعلن عن مؤتمر للحزب الوطنى الديموقراطى لمناقشه قضايا المجتمع المصرى وكيفيه النهوض بمصر ومناقشه المشروخ النووى والعداله الاجتماعيه والخزعبلات الجديدة اللى سمعناها دى .... ووجدنا ان قناة المحور تغطى المؤتمر طيلة الثلاثه ايام ... ووجدنا القناة الاولى والتانيه تحتكر اعلان الحزب الديموقراطى ... لأ وعملت ربورتجات لشعار بلدنا بتتقدم بينا ... انا الحقيقه مش فاهم الشعار ده ( والله ما فاهمه ) طب ازاى هيا بتتقدم بينا مش احنا المفروض اللى نقدمها ونطورها بايدينا ... طب البلد هتتقدم ازاى وهما كاتمين على نفسنا ولا راضى يتزحزح ولا حتى يوسع ... طب هتتقدم ازاى والواحد مرتبه 250 جنيه ... هتتقدم ازاى والفساد والرشاوى والنفاق الذى ملأ البلد ... هتتقدم ازاى يا ريس الحزب وقائد المسيرة وقائد البلد وحامى حما البلاد ونص الشعب المصرى تحت خط الفقر والتعليم باظ والجامعه بتزوروا انتخاباتها وووووو ... كتير اوى يا ريس ... انا ارى ان الشعار يتغير الى كيف نأخر بلدنا أكثرمن ذلك ؟ ... اه كيف ... ده احنا بنسابق العالم فى التأخر ... اه والله .. ياعم طب بالله عليك انت شايف أى خطوة ايجابيه بتحصل فى البلد ؟ .... ويطلع بابا حسنى يقول .. نحن أكثر قوة ههههههه .... قوة اه ... طب باماره ايه ياريس ... ادينى اماره واحده ياريس ان بلدنا بتتقدم بينا ... ياريس خليك واقعى ... بلاش الشعارات والنفاق الزيادة ... ياريس بلاش العداله الاجتماعيه بلاش الكادر ... بلاش وبلاش .... بس ادينا حقنا وامنحنا حريه وراعى شغلك بأه وراعى ضميرك فى حكمك ... راعى شرع ربنا ... راعى دموع الاطفال اللى ابائهم اعتقلوا بدون ذنب او جريره .... راعى حق ربنا فى الناس اللى مش لاقيه تاكل .... مش عارف اقولك ايه .... ياريس يا حبيب الشعب المصرى .... فعلا مصر تتقدم بينا طالما ان حضرتك قائد المسيرة ( نسيت ذلك .. اعذرنى )
-----

ندخل فى موضوع تانى وباردوه مش هنبعد عن المؤتمر بتاع الحزب الوطنى .... وسنتكلم فيه عن النفاق ... نعم صور من صور النفاق شاهدتها فى المؤتمر ... ولكن ما هى الصورة ... صورة للنائب المحترم عضو مجلس الشعب وامين عام الحزب الوطنى لأعضاء مجلس الشعب من الحزب الوطنى وأيضا رئيس لجنة الزراعه بالمجلس الموقر .. انه عبد الرحيم الغول ... نعم الغول كما ينادونه ... ولكن ماذا فعل الغول .... الغول تمادى فى وصله من النفاق لم اكن اتخيلها ولم يتخيلها اى احد اصلا ...
- طالعتنا صور التلفزيون المصرى مشاهد من اناس يقبلون يد الرئيس محمد حسنى مبارك على هامش مؤتمر الحزب ... انا لم اعلق على هذا المشهد ... لأن هذا المشهد متوقع أصلا .... ولكن اللى شدنى ان المصور وهو يصور صور النائب عبد الرحيم الغول وهو يحاول استرضاء مبارك الابن ... وتظهر فى الصورة أن الغول كان بيطلب من جمال طلب مهم ... والغول بيتحايل عليه عشان ينفذه .... هذا المشهد رجعنى الى الوراء وجعلنى استرجع صورة لهذا الغول وهو يحمل قصاصه من الورق يحمل فيها طلبا ويحاول تقديما لمبارك الاب اثناء تولى السادات الرئاسه ... لن يكون لى تعليق ... غير قول الله تعالى ( ان المنافقين كانوا من الدرك الاسفل من النار )... تذكر يا احمد يا عز هذه الايه تذكروا يا أعضاء الحزب الوطنى ويا من قبلتم يد الرئيس او ابنه ... تذكروا هذه الايه لعلها قد تؤثر فيكم او قد تحرك سكونكم شيئا ..... ( عجب والله ... طب انا مش عارف ايه اللى ودا الغول ده لجمال يعنى هو جمال ده اللى هيقدر يحل طلبه ... امال الرئيس فين مثلا ... مش ده قائد المركب ... هو جمال ده له اى سلطه فى البلد مثلا عشان الغول يروحله ... حاجة غريبه والله ) ... أيضا نوجه رساله الى صحيفة روزاليوسف عندما عملت من الحبه قبه ... وعندما قبل أحد اعضاء مجلس الشعب عن الاخوان المسلمين يد المرشد ... انظر يا رئيس الصحيفه المتشددة للرئيس وشليلته ... انتم ايضا تقبلون يد الرئيس بل تذهبون الى ابنه وتحاولن استرضاؤه ماذا تقول فى هذا الموضوع ... ننتظر ردك يا رئيس تحرير روز اليوسف ... وياريت تقولى باه ... انهى قبله من دول هتودى النار وانهى واحده هتودى الجنة .. اه ما انت توضحلى ... ؟؟؟؟
----
صور على مؤتمر الحزب وحصلنا عليها من وكالة رويتروز وFBA وبعض وكالات الانباء ..

واضغطوا على الصورة للتكبير..


نحن أكثر قوة ( هذا التعبير نقلا عن صحيفة روزا اليوسف يوم الاربعاء7 نوفمبر 2007)
حشد المنافقين يصقف وبقوة

ليه لأ يا زكريا ... ياعم احنا لو عملنا كده هنأمن مستقبلك انت وجمال ...
باقولك لأ يا زكريا ... اصبر بس يا جمال ... ايوة يا عز نحن نرفض تقسيم العراق ولكن أيضا نرفض ان نكون متشددين ولا نعامل امريكا ..
نرفض احتلال حماس لغزة .. ونوافق على احتلالها من قبل اليهود
سنحارب الفقراء فى كل مكان ... وسنعتقل كل محظور على أرض هذا الوطن لتأمين مستقبله

نعم للعداله الاجتماعيه بين رجال الاعمال ( هكذا قال مبارك الابن )

هناك ١٢ تعليقًا:

عصفور اسكندرية يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه


اخر بوست عندي
المواطن المطحون: نسمات

ابو صهيب ( الجمعاوي الاصيل)سابقاً يقول...

ياجامد
ايه البوست الجامد ده
وايه الحلاوة دي
وحشتنا ياعمنا والله
ان شاء الله تكون بخير

جمعاوى يقول...

مؤتمر الحزن الوطنى


يييييييى



قصدى مؤتمر الحزب الوثنى



ييى كمان مرة

أقصد مؤتمر الحزب الوتنى

" مش غلطة مطبعية "


عمرو و حياة أبوك


علشان خاطرى

أبوس دماغك




بلاش قلبت بطن

حزب ايه اللى إنت جاى تقول عليه

عمرو سلامة يقول...

مش عارف بتضحك على ايه يا عصفور يا اسكندرانى ..... ههههه
فهمنى بتضحك على ايه

عمرو سلامة يقول...

ياعم مافيش اجمد منك ربنا يخليك يارب ... والله وانت اكتر ... وبافتكرك كل يوم والله ... والحمد لله انا بخير .. وجزاكم الله كل خير على التعليق ياعم

عمرو سلامة يقول...

هههههههههههه
معلش بأه ... اصله موجود على الساحه ويجب الا نتجاهله ... ههههههههه... وبعدين ده الحزب الحاكم ذو النفوذ والايدى الطويله ... يبقى لازم نتكلم باردوه ولا ايه ...هههه
وجزاكم الهل كل خير يا عم جمعاوى الروش

Unknown يقول...

أدعوك للمشاركة في الحملة ضد جريدة المصري اليوم

زوروا مدونة مظلومين للتعرف على الحملة وأسبابها وأهدافها

كن إيجابيًا وشارك وقل
لا للكذب والتلفيق

مالك مصطفى

ابو صهيب ( الجمعاوي الاصيل)سابقاً يقول...

باشا
بعد اتصالك امبارح
قررت اني لازم احط موضوع جديد وبعد تفكير عميق وتحديد دقيق للموضوع قررت ان اكتب عن انجازات السيد نظيف
تعالى وشوف

غير معرف يقول...

اضحك ولا ااجل الضحك
خش هنا يلا ياعمرو

اسلام رفاعى يقول...

رائعة ياعمرو
وحشتنا والله جدا جدا

غير معرف يقول...

هههههههههههههههههه

ربنا ياخدهم يا شيخ

غير معرف يقول...

جزاكم الله خيرا
حسبنا الله ونعم الوكيل في الظالمين
اللهم فك اسر اخواننا المعتقلين