السبت، 30 يونيو، 2007

الرجل والفكرة


بمناسبه الاجازه يعنى ... وبمناسبه البتنجان وبمناسبه الكوسه وبمناسبه وقت الفراغ اللى عمال املاه ......قلت ادعبس فى الكتب بتاعه مكتبه بابا .... لقيت كتاب جميل اوى اوى اوى ... اسمه .... حسن البنا الرجل والفكرة ..... الكتاب ده بصراحة كتاب حلو اوى ...المؤلف بتاعه اسمه محمد عبد الله السمان ..... الكتاب كله ملخص حياة الراجل اللى اسمه حسن البنا ... وازاى عاش للفكرة بتاعته اللى اسمها اخوان مسلمين ..... الصراحة انا لسه باقرا فى نصه لكن النص الاولانى وانا باقرأه ...لقيت شويه سطور عجبتنى اوى اوى .... حبيت اجيبهالكم ..... السطور دى ملخصه معنى الرجل والفكرة ...... السطور بتقول :
(( ...كان الناس يرون حسن البنا غريبا فى محيط الناس ... بل وفى محيط الزعماء ... بطابعه وطبيعته ... فقد صنع تاريخاً .... وحول مجرى الطريق ... فلما مات .... كان غريباً للغايه فى موته .... فلم يصل عليه فى المسجد غير والده .... ولم يمشى خلف نعشه أحد من هؤلاء الاتباع الذين كانوا يملأون الدنيا ... لسبب بسيط .... هو أنهم كانوا فى هذا الوقت يملأون السجون .
واذا كان الامام الشهيد حسن البنا قد مات ... قان فكره لن يموت .... وتأثيره باق وممتد .... يتمثل فى أجيال صنعها على مائدة الاسلام بأسلوب العصر ... ويتمثل هذا المد العالمى للحركة الاسلاميه ؛ التى وضع - رحمه الله - بذورها الاولى ... وحسن البنا بعد كل هذا ... هو مجدد الاسلام فى القرن العشرين ...))) هى دى السطور اللى عجبتنى .... والصراحة السطور دى لخصت الكتاب كله .... والكاتب بدأ يبنى افكارة على السطور يعنى يشرح حته حته ..... الكتاااب جميل اوى .... انا ادعوا لكل اللى عايز يعرف مين هو حسن البنا وايه هى فكرته يقرا الكتاب ده ......
--------------------------

امبارح بأه وصلنى خبر ان الاستاذ محمود الوحيد ( مرشح الاخوان المسلمين لمجلس الشعب 2005 عن دائرة ديرب نجم والذى حصل على 33 الف صوت من اهل دائرته وسقطوه اولاد .... ) والمهندس محمد فياض (المرشح الاحتياطى للاستاذ محمود فى الانتخابات الماضيه والقيادى الاخوانى المعروف فى المركز بأكمله ) خدوا افراج وروحوا بيتهم بعد اعتقال دام أكثر من خمس شهور .... وسبب اعتقالهم معروف للكل طبعا ...... اخوان مسلمين ........ وفيه سبب تانى الا وهو ... خوفا من ترشحهم لانتخابات الشورى ..... لكن زى ما انتوا عارفين مافيش حد اترشح اصلا فى دائرة ديرب نجم ..... وجه دورى انى اقول للاستاذ محمود الوحيد حبيب الكل والملايين والمهندس محمد فياااااااااض مبرووووووووووك الافراج والبراءه جعلهم الله فى ميزان حسناتكم يارب العالمين و نقول لهم أن الإصلاح يستحق أكثر و نحن شباب الدعوة نرى فيكم التضحية و الثبات و الثقة فى نصر الله عز و جل و يبقى الإسلام هو الحل ...... والخبر كما جاء على شرقيه اون لاين
--------------------
معلش بأه استحملونى يا شباب وحشتونى ..... عايز اكمل كمان واقول حاجات كتييييييير فى نفسى ...... على العموم لو زهقانين وعايزنى اخلص انا ماعنديش مانع ..... وفى حبه اناشيد بأه بمناسبه فلسطين كده جبتهالكم .... وعايزكم تسمعوهاا ممكن ..... يلا ياعم قضيها فرفشه وضحك وبلاش غم وهم ......وقشطه عليكى يا مصر .....
الاغنيه الاولى .... بتتكلم عن دحلان .... عاملينله أغنيه اسمها بحبك يا حمار يا دحلان .... الاغنيه عجبتنى اوى
اسمعوها ...

-----------
الاغنيه التانيه .... باردوه بتتكلم على دحلان ...وبتقوله ... روح سلم على سيدك بوش ....يلا بينا نسمع الاغنيه
----------------
الحقيقه انا كنت عايز اكمل كمان اناشيد ...لكن للاسف جاللى اتصال تليفونى ولازم امشى ....
جايلكم انتظرونى

هناك 14 تعليقًا:

جمعاوى روش طحن يقول...

عمرو باشا سلامة

كويس إن انا أول تعليق وبعدين إنت

منور المدونة يا معلم

و بعدين إنت موبايللك غير متاح على طول يا عم المهم


أما عن التدوينة

فتحياتى

وراجع لك بتعليق أجمد

saad alshater يقول...

اهم انك الحمد لله لسه عايش
مدونتك جميله
www.ibn-elshater.blogspot.com

انســـــان يقول...

ممممممممممممممـ ـتاز اما عن فكرة الشخصيه (حسن البنا) فلا انكار بانها غريبه في عالم النسيان والتدوينه جيده مؤثرة اسال الله لك التوفيق والسداد

عمرو المصري يقول...

هو معلش انا مش هاعلق ع التدوينة عشان هي اصلا مش محتاجة تعليق

بس كان ليا سؤال
هو مش انت من المشاركين في مدونة فلسطين جرح القلب

ليه محدش فيكم بيرد علي رسايلي وتعليقاتي

ياراجل دا انا عمال اشحت منكم رد سواء في مدوناتكم او حتي في ارض الحرب اللي مش عارف مش بتدخلوها ليه

لو كنتوا خايفين من الاسم ياعم غمي عينك وادخل وصدقني مش هتلاقي متفجرات في طريقك هتلاقي الغام بس

ارجو الرد في اقرب فرصة
عشان انا خلاص


اوعي تزعل ياعمرو
انا بهزر معاك

سلامي
من
ارض الحرب

عمرو سلامة يقول...

جمعاوى اخويا ...
شكرا على اتصالك يا عم جمعاوى .... ومستنين الاتفاقات .... اللى انت قولت هتابعنى بيها .... وانا ماشوفتش منك حاجة لسه ...
------------
منتظر تعليقك الاجمد ... وشكرا ليك على اتصالك وشكرا ليك كمان على تعليقك .... سلام يا روووووووووش

عمرو سلامة يقول...

الاستاذ الفاضل سعد الشاطر ...
سعدت جدا جدا بتعليقك عندى يا فندم .... رغم ان حضرتك علقت عشان تعمل دعايه لمدونتك ..... لكن الحمد لله ان المدونة دى وصلتلك .... وقدرت تعلق فيها ....شكرا جزيلا على تعليقك وان شاء الله تشوف تعليق ليا عندك باذن الله .. تانى مرة اشكر حضرتك على تعليقك

عمرو سلامة يقول...

الى انسان اللى اول مرة اشةف تعليقه عندى .... واكتشفت انه واحد صاحبى وحبيبى اوى ...... شكرا جزيلا على تعليقك حبيبى ... وزى ما انا اتفقت معاك مش هاحط مدونتك عندى الا لما تستقر عليها .... اوكيشن
-------------
زيارة اسعدتنى والله ي اياسر اتمنى تكرارها حبيب القلب

اسلام رفاعى يقول...

تدوينة رائعة ومؤثرة

عمرو سلامة يقول...

لأخويا عمرو المصرى اللى باعزه كتيييييييييير اوى :
اقوللك فى البدايه جزاك الله كل خير على ردك اللى فرحنى كتير وحسسنى ان فيه ناس بتهتم بالمدونة ....
انا اعتذر كتير عن عدم ردى لك فى المدونة .... لأنى والله الايام اللى فاتت ما كنت فاضى .... انا اسف جدا جدا جدا جدا حبيبى ... اعذرنى بالله عليك ما كنت فاضى ارد عندك خالص ...لكن اوعدك الايام الجايه هتلاقينى زائر دائم عندك
وبالنسبه لجرح القلب ... هابعتلك لينك فى المدونة بتاعتك تشترك فيها ...ماشى ....يلا حبيبى سلام عليكم ....

عمرو سلامة يقول...

اسلام انا زعلان منك ياعم ... انا افتكرت انك هتبقى اول واحد رديت عندى ... انا لقيتك اخر واحد ينفع كده ...ز على العموم شكرا جزيلا عل ردك

عمرو المصري يقول...

انت يابني انت
ياريت الكام اغنية اللي انت حاططهم عندك دول في البوست تحطلهم لنكات تحميل مباشر او تقول جايبهم منين

ماهو مش معقول يعني كل ماحب اسمعهم افضل فاتح مدونتك يعني

انت يرضيك ده

ده غير انهم اساسا مش شغالين


سلامي
من
ارض الحرب

عمرو سلامة يقول...

ماشى ياعم عمرو ... بالراحه عليا شويه .. هاعمل اللى انت عايزه حاضر .... بس دول شغالين بجد .... وانا شغلتهم كذا مرة .... تلاقيك بس مش عارف تشغلهم ...

علاء يقول...

ده موضوع التجمع ياريت أعرف رأيك

المدوّن خانة

ابوجلال المصرى يقول...

السلام عليكم
حياك الله اخي وباركت على ما قدمت فى مدونتك وادعوا الله لك بالتوفيق ...
كما ادعوا كل المدونون من الاخوان وغير الاخوان الى الترابط والتواصل الدائم شكرا لك
اخوك ابوجلال المصرى
مغترب بالامارات
عضو جماعة شعراء العين بالامارات