حقوق الانسان توزع بيان التضامن معى .. وسبب شطبى التدوين

عندما كتبت فى مدونتى اننى مظلوم .. وان حقى مهضوم وان شطبى من الانتخابات هو معنى حقيقى لتكريس الظلم والكبت لدى الطالب لم اكن اتخيل ذلك التضامن الواسع من بعض مواقع وشبكات حقوق الانسان التى تبث على الانترنت .. وايضا لم اكن اتخيل رد الفعل بين الطلاب .. ما بين متعاطف معى فى هذا الظلم وما بين مصدوم مما حدث .

والحقيقه انى لست اول او اخر طالب يشطب بالانتخابات فالشطب شئ عادى فى الجامعات الحكوميه .. ولكن الاولى من نوعها ان يحدث شطب فى جامعه خاصه كتبت فى مجلتها التى تصدرها كلية الاعلام (ألتى انا ادرس بها) يجب ان تكون ايجابى وان ترشح نفسك او ان تدلى بصوتك .. وصدقنا هذه الجمل ولكنى وجدتها الكذبه الكبيره عندما وجدت نفسى امام شطب حقيقى وكذب متعمد وتدخل امنى سافر لا يعرف معنى للديموقراطيه ادعاها فى صحفه ولا معنى لحرية راى اخذ يشدقنا بها طوال خمس وعشرون سنه ماضيه ..

وقد صرح لى احد الاساتذه الكرام .. ان سبب شطبى هو التدوين .. ومعنى انك تدون يعنى تتكلم بحريه وبكل جراه وهذا خاطئ ومن المفترض ان يكتبوا على لوحة الشروط لدخول الانتخابات ان لا تتمتع بأى صفه من صفات الحريه نعم ان لا تتكلم كثيرا وان تكون مطيع وخائفا وجبانا ... (حاجة تغيظ وتضايق)

----

انا اود ان اتقدم بالشكر للاستاذ جمال عيد مدير الشبكه العربيه لحقوق الانسان (اكبر شبكه لحقوق الانسان فى العالم العربى ) لتضامنه معى واستنكاره لما حدث واعتبر ان التدوين ليس بجريمه كى يمنع من الترشيح وتسال هل التدوين تنظيم جديد من يستخدمه يمنع من المشاركه السياسيه داخل الجامعات ؟؟ .. ولماذا لا ترفض ادارات الجامعات هذا التدخل البوليسى فى شئون الجامعات ؟؟؟

اليكم نص البيان كما نشر على شبكة الانترنت اضغط هنا

صورة لما نشر على مواقع الانترنت

---

ايضا نشر موقع اخوان ويب باللغه الانجليزيه خبر التدخل الامنى للجامعات الخاصه ..

اضغط هنا لتقرا الخبر على اخوان ويب

صوره من الخبر

----

طلاب جامعة الزقازيق .. يتضامنون معى .. اقرا خبر الشطب على شرقاوى اون لاين موقع طلاب جامعة الزقازيق

----

هذا واود ان احيط علم كل قارئ لهذا الموضوع انى احب الجامعه واكن كل الاحترام لعمدائها ودكاترتها وادارتها .. ولا يوجد هناك بينى وبين احد دكاترتها تار احاول انى اخده .. ابدا... انا كل الذى بينى وبين الجامعه كل حب وود واحترام .. واعاتبها فقط على السياسات التى تتخذها مع الطلاب فقط ليس ذلك ولا اكثر ..

لماذا شطبتم اسمى من ورقة التصويت ؟؟؟

اثناء تفكيرى فى هذا الموضوع .. كيف اشطب ولى الحق فى الدخول !!!

لأول مرة فى تاريخ الجامعات الخاصه .. يشطب اسم من اسماء المرشحين من ورقة التصويت (او ورقة الترشيح) .. نعم هذه اول مرة فى تاريخ الجامعات الخاصة التى اظهرت نوعا من الديموقراطيه فى انتخابات الاتحاد وتكوين الاسر ووو .. ولكن ظنى باء بالفشل بعد ان جربت بنفسى هذه الكذبه التى صدقتها الا وهى توافر الحريه فى اى منشأه خاصه ...

ولكن بات الامن يتدخل فى كل شئ حتى فى انتخابات الجامعات الخاصه ... وابسط مثال على ما اقوله ما حدث اليوم (الاثنين ) لى فى جامعة سيناء كلية الاعلام عندما دخلت انتخابات الاتحاد وبنية سليمه خالصه لوجه الله ... فى اللجنة الثقافيه .. وبدات انشئ القوائم المخصصه واللى هانزل فيها .. وبدا العمل وبدا توزيع الورق بعد ان اخذ موافقه من العميد (الى هنا والكل تمام ) وحتى جاء يوم ظهور قوائم المرشحين وكنت فيها وحمدت الله ان كل شئ يسير على ما يرام .. ولكن ماحدث يوم الانتخابات هو ما على لا يرام ... جئت يوم الانتخابات ووزعت ورق الدعايه الخاص بى وكل شئ تمام .. ولكن حدث اللى مش تمام دخل الطلاب للتصويت فى اللجان فلم يجدوا اسمى مدرج فى قوائم المرشحين ذهلت .. كيف ولماذا ؟ .. ولما انا بالذات وووو ... ولم اعرف السبب خرجت دفه اخرى من الطلاب مره اخرى وكرروا نفس استعجابهم بالامر لم نجد اسمك يا عمرو ... وسالنا الدكتور المشرف على اللجنه قالنا شلناه ... لماذا لم اعرف السبب .. حتى ان فيه بعض الطلاب من كتر حرصهم على انتخابى قالوا يمكن اللى عمل الورقه دى نسى اسم عمرو ولا حاجة قام جاى وكتب اسمى وعلم عليه ... اصبحت كالمجنون وانا فى ذاكرتى معتقد اننا فى جامعه خاصه والحريه متوفره فيها وليست كالجامعه الحكوميه ... تقلب مزاجى واصبحت ازعق فى الدكاتره بعضهم يتعاطف معى ويستغرب الموقف والاخر يبعتنى لرعاية الشباب .. وذهبت لرعاية الشباب لماذا شطبتم اسمى .. لم اجده فى ورقة التصويت ... يجيب على انت اترشحت ايوه شوف الاستماره شاف الاستماره ولقانى نزلت ... قالى اسمك نزل فى قوائم المرشحين قولتله ايوة نزل اطلع شوف هتلاقيه متعلق .. قالى صادق قعد يلملم فى الورق اللى امامه ولم يعطينى اجابه شافيه وكانه عرف حاجة (عدى عليا بعد الانتخابات انا مش فاضى دلوقتى بكره تلاقينى ويكلم غيرى ويعدل النضاره ويتوه ويمشى ) ولم اجد اجابه شافيه من اساتذتى الكرام حتى ان بعضهم شك انى حذفت لظروف امنيه ... فقام بعض الدكاتره بارسالى للواء مدير امن الجامعه الذى اخذ يحدثنى بطريقه الابن الخاطئ ماتكلمش حد يابنى فى الموضوع انت منين تعرف كذا وكذا .. عندك انشطه كتير مش ضرورى دى ليه دى ؟ ... اصبح يحدثنى ايضا بمنطق التوهان .. لم افهم ما يدور حولى الانتخابات شغاله الناس بتنتخب الوضع مش مظبوط اصبح العرق يجرى فى جسدى والقميص يطلع من البنطلون من كتر ما كنت باجرى ... ودانى اللواء لنائب رئيس الجامعه ذهبت له وكلى امل فى ان اجد الحل تكلمت معه بكل احترام وتبادل معى هذا الاحترام باحترام متبادل ... وبدا يمتص غضبى الغير عادى ..ويقولى يابنى ما عندك الانشطه كتير لازم المناصب .. قولتله قسما عظما انى ما ابتغى منصبا انى ابتغى ان اكون خادما لدى الطلاب عندى افكار جديده فى اللجنه دى عايز الطلبه يستفادوا منها .. رد عليا مبتسما انت ولد محترم وخلوق وشاطر ونشاطاتك متميزه .. قولى يا عمرو انت رايك ايه فى الجامعه .. الجامعه يا دكتور حلوة جدا وبتطلع المواهب المدفونه من الطلاب زائد ان الجامعه بتتميز بدكاتره مش موجودين فى الجامعات التانيه ودى حاجة متميزه للجامعه .. قالى وايه رايك فى النشاطات قولتله بتطلع مواهب الطلاب المدفونه .. قالى ما تشارك فى غيرها ضرورى دى جاوبته : ابويا قالى وانت صغير خليك ايجابى وتشارك فى اللى يهم الناس ويفيدهم وبتهيالى ان الجامعه بترسخ المفهوم ده جوه الطلبه قالى صح يا عمرو .. بص يا عمرو انا هادرس الموضوع قولتله كام يوم كده يافندم هتدرسه قالى تلات ايام قولتله معاك اسبوع وهاعدى على حضرتك نشوف توصلنا لايه ... لان الموضوع ده كبير .. قالى ماشى ياعمرو انت ولد شجاع وطيب ووو .. قولتله عندى طلب عند حضرتك باعتبارك والدى قالى اتفضل : قولتله يا دكتور ايه علاقة الانتخابات باللواء قالى مافيش علاقه قولتله امال ليه الدكتور المشرف على الانتخابات بعتنى للواء وقالى كلمه ايه السبب .. قالى كلنا اسره واحده فى الجامعه وكلنا ايه وكلنا ايه ... وغادرت مكتبه على امل ان اقابل سيادة الدكتور نائب رئيس الجامعه بعد اسبوع بدون اجابه شافيه للموضوع ..

واصبحت انا مذهول مما يحدث هل هذا هو نتاج ترشيحى احرم امام الطلبه من دخول الانتخابات لماذا ولمصلحه من ؟

لماذا اخذلتمونى امام الطلبه التى كانت تعطينى الثقه حبا فى .. لماذا اهززتم هذه الثقه منهم لى .. لماذا احسستموهم يا ادارة الجامعة انى مخالف للقانون وانى وانى .. كل هذا من اجل انتمائى .. من اجل مدونتى .. من اجل التعبير عن الحريه .. من اجل مشاركتى الاجابيه الفعاله ..

لماذا شطبتم اسمى ومعى اناس مرشحين اتفصلوا اسبوع .. قبل كده وانا لا ليا سوابق ولا حتى انذارات ولا ولا .. كلى نشاط مع الدكاتره فى المحاضرات انتم اردتم بذلك ان تحبطوا نفوس الطلاب بهذا الجهاز الامنى العقيم الذى اصبح يسيطر على مصر وعلى الجامعه .. اردتم تثبطوا النفوس ولا تعلوا الهمم وتنهضوا بهذا البلد .. اردتم واردتم ومازال فى ارادتكم الكثير ... متى تقولوا لهذا الجهاز لا تتدخل فى جامعتنا نحن جامعه حره .. متى ؟

انسيتم يا اداره الجامعه ويا استاذ رعاية الشباب ان طالب قام وسال الدكتور محمود شريف قبل ان يقال السنه الماضيه وقال له لو حد من التيار الاسلامى دخل او من احزاب المعارضه ما رد فعلكم ؟.. رد عليه الدكتور محمود شريف رئيس الجامعه السابق وقاله بصوت عالى الديموقراطيه عندى شئ مقدس واللى يقرب منها هاقطعه باسنانى ... نسيتم هذه الجمل ام تاخذوها على انها شعارات براقه تحمل الدعايه للجامعه من اجل المال فقط ...

اعرف ان شباب كليه اعلام يتابع المدونة وان دكاترة مادة صخافه تتابع المدونة .. واعرف ان هذه المقاله ستكون فى يد الامن لمده لا تقل عن اليوم اتمنى ان تنظروا فى هذا الموضوع على انه غلطه فى الجامعه نرجوا عدم تكرارها ...

اسمى فى قوائم المرشحين ...المعلق امام الطلبه
استمارة الترشيح .. لم اجد فيها اسمى عجيبه

فى ذمة الله يا جدى العزيز

جدى اللى على اليمين (رحمه الله ) ووالدى اللى على اليسار (امد الله واطال فى عمره)

ازيك يابنى عامل ايه ؟؟؟

انت فين ياعمرو ماحدش شافك من زمان ليه .. انا والله يا جدى سافرت للجامعه وحالى ما يعلم بيه الا رب العباد وانت عارف الاعلام وسنينه بأه .. طب خلى بالك من نفسك عشان خاطرى وابعد عن اولاد الحرام ومش تبقى واد ثورجى زى ابوك لما كان زيك كده وهو صغير ...ضحكه خفيفه منى .. يواصل جدى الحديث قائلا :خلى بالك من ابوك واجتهد فى دراستك .. ومش تسنكح كتير وتلف كتير حاكم انا عارفك ما تحبش القعده فى البيت .. حاضر ياجدو .. واخذ جدوا يقبلنى من جبهتى .. وانا استعجب اول مرة يعملها يعنى عالاطول انا اللى بابوس ايدك يا جدو ..

كان هذا الحوار الاخير بينى وبين جدى (او المقابله الاخيره ) وكان لدى احساس غير عادى ان هناك مكروه سوف يحدث له بعد مقابلتى له واعربت بهذا الاحساس لابن عمتى اللى قالى تفائل بالخير .. وسافرت الى جامعتى .. وبعد يوم واحد من مغادرتى .. سمعت الخبر المشئووم بوفاته ... لم اكن اصدق وفاته خالص الراجل مش كان عيان .. وصحته حلوة .. ولكن القدر بأه .

عالاطول وبدون تفكير نزلت بلدنا ؛

وهرولت الى حيث يرقد جدى فى غرفته مغطى بملااه حاولت الكشف عن وجهه ولم اتخيل ما رايت .. اقسم بالله اقسم بالله انى وجدت نورا خارج من وجهه .. نووور والله نوور .. قبلته واخذت اتذكر ماكان جدى يفعله فى حياته الدنياويه (الحياة الزائله) كان حافظ للقران الكريم .. كان عالاطول بيصلى الفجر .. كان راجل طيب عمره ما ظلم حد .. حفظه للقران هو اللى خلا نور وشه ابيض وهو ميت .. هو ده السبب ..

فى هذا اليوم لم انم طوال ليليتن من كثرة المعزيين.. وكان على راس المعزين نائب رئيس الكتب الادارى بالشرقيه الحاج عبدالعزيز عبدالقادر الذى اتى لتعزيه الوالد فى الفقيد ... واتى وفد الاخوان المسلمين من جميع قرى المركز ..

ايضا لن انسى ان اشكر كل المعزين الذين اتوا ليعزونى من القاهره وعلى راسهم احمد سعد دومة (رئيس حركة غاضبون)

واتقدم الى الله بكل صدق واخلاص ان يغفر له ويغفر لنا ويرحمه فى قبره ويوسع عليه قبره وينور له ظلمته ويدخله الجنه من اوسع ابوابه ..

ربنا يرحمك يا جدو؛

الجيش قال الزمالك هنوريكم ...

زمالك .. اهلى .. جيش .. ترسانه .. مقاولون ...

اسماء فرق مصريه اسمع عنها وانا صغير جدا من زملائى الذين كانوا يفضلون مشاهدة الكره المصريه باحداثها وعند ماتش الزمالك والاهلى اجد المراهنون يتراهنون على الفوز .. وانا كنت اشاهدهم واتعجب مما يفعلون ومن العصبيه التى كانت تتملكهم بشده .. لا اعرف لماذا يتعصبون هكذا تجاه الفرق ... وفى هذا اليوم اجد المقاهى ممتلئة بالناس واستغرب هل الجلوس امام التلفاز لمشاهدة مباراه كره قدم وتشجيع فريق من الفرق ستجلب عليه المال ؟ ... هل ستزيده تقوى وايمان ؟ .. ام ستزيده هبلا وعصبيه ...

ليس هذا موضوعنا .. بل الموضوع سيتكلم عن الزمالك والجيش .. ليس لأنى زملكاويا ولا جيشيا ايضا انى مسلم اوحد الله واؤمن به وبرسله ..

ملحوظه : لا ليا فى الكوره ولا عمرى شجعت الا مصر وهيا وبتلعب فى افريقيا ولا حتى اعرف اسماء اللعيبه ..

ناتى لموضوعنا الاساسى ...

سمعنا عن مباراه للزمالك وطلائع الجيش اقيمت فى الاستاد الحربى منذ اسبوع على ما اعتقد ... وسمعنا كمان ان الجيش جاب واحد فى الزمالك وكان الجون ده جه (ظلم يعنى ) وكمان سمعنا ان مشجعى الزمالك نزلوا وكسروا وبهدلوا فى الاستاد الحربى وسمعنا ان الجيش نزل كتايب من الجيش لمقاومة هذه المشاغابات .. وسمعنا ايضا عن اعتقالات تمت فى وسط المشجعين وتم تحويلهم لمحكمة عسكريه ...

حلو اوى ... لحد هنا وسمعنا كل ده

انا بأه جبت لكم انهارده شهادة من احد المعتقلين داخل السكن الحربى بعد ان اخذ البراءه وخرج .. اترك له الميكرفون ليحكى عما حدث له بداخل السجن الحربى وهو اصلا اتمسك ازاى ... على فكره وائل عباس (صاحب مدونه الوعى المصرى ) تطرق الى الموضوع عن طريق نشر فيديو عن الاعتقالات العشوائيه للمشجعين وكيف تمت .. وانا انشر كيف سجنوا هؤلاء داخل السجن الحربى وكيف عاملهم الجيش ... حتى الجيش اللى بيحميكى يا مصر باه بيضرب فى الشعب ..

آدم احد الذين اعتقلوا فى احداث شغب الزمالك وطلائع الجيش بعد ان اخذ البراءه

اول حاجه الحمد لله اننا خرجنا من المعتقل بالسلامه مينفعش اقول سجن لأنه فعلاً كان معتقل هحكى ليكم الحكايه من اولها لاخرها وليكم انتم الحكم فيها بعيداً عن انكم زملكاويه احكمو ع الى حصل كا بشر بعد ظلم الحكم الظالم لينا فى الماتش هاجت الجماهير وكسرت فى المدرجات وحدفت بالطوب واثارت شغب كتير اوى
نزلت من المدرجات " جرى " عشان اتلاشه ان يصيبنى مكروه لقدر الله وفعلاً نجحت انى اخرج من المدرجات ومشيت لحد قبل الباب الرئيسى بحوالى 15 متر لاقيت الدنيا اسودت فى وشى جيش بيضرب في الجمهور وكلاب بوليسيه بتجرى وراهم قولت بردو اتلاشه ان يصيبنى مكروه وخدت جنب بعيد عن الضرب
وفجأءه وبدون اى مبرر هاجمنى 3 عساكر ومعاهم 3 كلاب بوليسيه ورمونى ع الارض والكلاب فوق دماغى لدرجة ان فى واحد فيهم خنقنى بايده لحد مغمى عليا فوقونى " بالضرب "
وكل الى كنت شايفه قدامى امى وابويا واخواتى ومراتى وكل ما اترجاهم انهم يسبونى يزيدو فيا ضرب لحد مستسلمت للامر الواقع المؤلم فى نفس الوقت
وقفونى فى جنب وحطو فى ايدى " الحديد " ووقف قدامى حوالى 10 من عساكر الجيش + رتب من الجيش وبصراحه وقتها كنت فى حاله انهيار تام قبضو ع 10 وجبوهم جنبى وحطو فى ايديهم الحديد ونمنا ع الارض زى " آلكلآب " ويدوسو ع رؤسنا برجليهم
وخدونا جوه الكليه ورمونا فى الارض وحدث الاتى " شتيمه وضرب واهانه من كل نوع " الموقف المؤلم الى حصل وفعلاً اثر فيا ووقتها بس عرفت ان بلدنا دى هيا بلد الظلم والطغيان مسئول كبير فى الكليه الحربيه وقف قدامنا وضرب كل واحد فينا بالرجول ووالاقلام ع وجوهنا ونده لـ 3 عساكر وقولهم روحو دلوقتى اعمله تقارير طبيه انكم مصابين بـ 21 يوم علاج رد العساكر وقالو " احنا مفينيش حاجه تستاهل الـ 21 يوم علاج رد عليهم بشتيمه وقولهم اعملو زى مقولت "
ووجه الينا الفاظ مشينه بالام والاب وقال " مش هتخرجو منها ياولاد كذا وكذا وابقو خلو النادى ابن كذا ينفعكو " ياجماهير كلآب بتشجعو نادى ابن وابن وابن وامر ان عربيه تيجى تاخدنا تودينا الوحده العكسريه " سجن 28 " من افظع سجون الجيش قعدنا لحد الصبح داخل الاستراحه واحنا متجنزرين وفى حاله انهيار تام جه علينا النهار خدونا تحت فى قلب السجن اهانه وشتيمه وضرب بيتنا فى الحجز لحد بليل وبعد كدا اصدرو بامر بنقلنا الى " المعتقل .. الى هو السجن الحربى " دخلنا السجن الحربى قلعونا الهدوم وفضلنا بالسلبات فقط حوالى ساعتين من الزمن فى عز البرد وبعد كدا دخلونا السجن حلقو لينا شعرنا وخلونا مسحنا الحمامات وارض السجن ولبسونا " لبس المساجين عباره عن شىء كريه لا يتحمله " كـلب "
الاكل الى كان بينزل لينا عباره عن " فول بقالو اكتر من عده ايام بدون ملح او اى شىء + عيش مليان رمل ولا يطاق وبقينا ناكل غصب عننا " وكل شويه عسكرى يجى يضرب فينا ويخلينا نشتم ع " الزمالك " غصب عننا يتشتم الزمالك يتنضرب بآلجزمه وتتهان وبقينا نتنقل كل يوم ما بين السجن الحربى وسجن الـ 28 ونطلع للنيابه وننزل من النيابه وننضرب وننهان
لحد منزلت القضيه المحكمه ووقتها حسينا ان ممكن يكون فى امل وكلنا اكثر من 4 محامين لينا وبعد مرافعه دامت اكتر من ساعه ونص " جه القاضى بكل طيبه وحنيه اجل الجلسه للغد لحين سماع شهاده العسكرى المصاب قولنا يافرج الله يمكن نخرج نزلنا تانى يوم المحكمه فى قلب " القفص " وجه العسكرى ولم يتعرف ع احد فينا وخرج القاضى بره القاعه ورجع بالبرائه
" اغرب وقعه حدثت ان كل التقارير الطبيه الى كانت مقدمه ضددنا مزوره " ابتسم القاضى وتعجب واصدر الحكم باطلاق سراح 9 من الابرياء
الواقعه التانيه المؤلمه هيا المحترم " علاء مقلد " احد اهالينا اتصل بيه وقال ليه انجد اولادنا قاله طب اقفل واتصل بيا بعد شويه اتصلو عليه تاني " قالهم وانا هعمل ليهم ايه " وكل ميتصلو ميردش عليهم
شكراً رجال الزمالك المخلصين الى وقفو جنبنا فى عز محنتنا شكراً لاعيبه الزمالك الى كنا منتظرينهم يجو ولو حتى دقائق يقعدو معانا عشان نحس ان فى حد جنبنا لكن للاسف " طلعو اوفياء " لكن فى النهايه كان لينا رب كريم اظهر الحق
" رساله لكل زملكاوى من شخص عاش فى اهانه طوال اسبوع ياريت وعشان خاطر الديقه الى كنت فيها تحافظو ع نفسكم تخلو بالكم من نفسكم ومتحاولوش تكونو مكانى فى يوم من الايام

----

ملحوظه : نحن ننشر الحقيقه على لسان روايها وليس لنا اى صله بالاحداث لا من بعيد ولا قريب .. وانا اعلنها اهوه لو لم اكن جيشيا لوددت ان اكون جيشيا من الصبح انا اقدم الولاء التام لطلائع الجيش ههههه ...

انا لازملكاوى ولا اهلاوى ولا ليا فى الكوره اصلا عشان ماحدش يجى يقولى انت منحاز ووووو انا عمرو سلامه .. سلامو عليكم

"جر شكل " قاموا " اعتقلوه" ومواصلة اعتقال المدونين

تحديث :

هجمة امنيه شرسه على المدونين ...

لم تكتف اجهزه الامن باعتقال المدون محمد خيرى المدون الفيومى اخوانى الهويه صاحب مدونة جر شكل بل صاحب هذه الحمله فجر اليوم بمداهمة بيت حسام يحى صاحب مدونه صوت الحريه فى المنصورة ولم يجدوه حيث اخذ حذره ولم يكون فى البيت ... وفى نفس الليله قاموا بمداهمة بيت محمد عادل صاحب مدونة ميت فى المنصوره ايضا وذهبوا الى بيته القديم ولم يجدوه واصروا على ان يعتقلوه ذهبوا الى بيته الجديد ولم يجدوا اى اسطوانات او اشياء الكترونيه بل اخذوا كتب ذات صلة بالاسلام (حاجة غريبه يا جدع ) هذا فيما يواصل المدونين بياتهم خارج البيوت ...وسلملى على الحريه يا اجدع امن دوله

----

صورة لمحمد ..من تصويرى فى قافله العاشر من رمضان لفك الحصار عن غزه

نعم انه جر شكل .. لا تستغربوا كثيرا من الاسم فهو غاوى جر شكل دائما حتى انى كنت اداعبه كثيرا " يابتاع المشاكل "

انه محمد خيرى مدون ومن المدونين القليل ... صاحب مدونة جر شكل التى فعلا اثارت شكلا كثيرا فى الايام الماضيه .. محمد خيرى احد اقطاب التدوين الاخوانى المعارض القوى الذى قال باعلى صوت فى مدونته " انا اكره مبارك واحض على كراهيته " .. بحثت عنه الاجهزه الامنية فى الفترات الماضيه لمشاركته فى قافلة 6 اكتوبر التى خرجت لتساند غزه فى محنتها وتفتح المعبر لعل هذه القافله تكون النوور فى وجه ظلم مستبد لا يعرف رحمه ولا عدل ولا مساواه ...

محمد خيرى كنت معه فى قافلة العاشر من رمضان اتى من الفيوم خصيصا لمشاركتنا فى القافله تعرفت عليه من على قرب واحسست فيه بنبض الشباب الحماسى الذى يحب فلسطين ويريد ان يستشهد فيها باى شكل من الاشكال وكتب فى مدونته " أنتمى إلى الإخوان المسلمين .. أكره اليهود .. أمنية حياتى أنى أحارب فى فلسطين .. رزقنا الله وإياكم كرامة الإستشهاد فى سبيله " كانت الحماسه الشديده تملا قلبة لدرجة ان وجهه احمر احمرار شديد لعدم قدرته للوصول الى غزه عندما منعتنا الاجهزه الامنيه فى الاسماعليه كان سيبكى ... هذا هو محمد خيرى يحب فلسطين ونوى الاستشهاد فيها ويعشق الحريه ويحب الاخوان ويحب الاسلام ويعشق الدين والعمل من اجل الدعوه ...

محمد كتب فى تدوينته الاخيره قبل ان يعتقل "صبيحة يوم الاربعاء21\10\2008" "قم أخبر احبابك حالا ان القدس تريد رجالا من دمها ترسم شلالا تتقدم كى تصنع جسرا" ...

محمد المدون اولا والاخوان ثانيا والحبيب ثالثا ... نتضامن معه فى محنته واشد من عضده وساعده واوصل له رساله من مدونتى اقول له فيها " العروسه جاهزه يا محمد .. بس شد انت حيلك واطلعلنا بسرعه ..ربنا معاك "

امن الدوله ذلك الجهاز المصاب بلعنه الاخوان المسلمين وكان الاخوان هم البعبع الذى يراودهم اينما كانوا ... وكان كلمة الحريه هيا جريمة ارتكبتها فى حق الدوله والامن والمواطن ...

لماذا لم يتحرك ذلك الجهاز الفاشل الذى يدعى حماية الوطن والامن عندما اصاب رجال الداخليه المواطن حمادة عبداللطيف بشلل رباعى وعذبوه داخل اقسام الشرطه بدون ذنب او جريره ..

لماذا لم يتحرك ذلك الجهاز فى الحفاظ على هيبة الوطن وهيبة المواطنين فى باقى دول العالم ويحفظ لهم كرامتهم ..

لماذا لم يتحرك ذلك الجهاز المطالب بالحفاظ على الامن فى ان يضح حدا للجرائم التى تمارس كل يوم تجاه هذا الشعب الاعزل من الشرطه التى رفعت شعارا انتم الشعب فى خدمتنا ...

امن دوله هو جهاز قائم لمقاومة الاخوان ومراقبة المعلمين داخل فصول دراستهم والتدخل فى تعيين المعيدين فى الجامعات وغلق المساجد واعتقال المظلومين ومراقبة كل من له اثر فعال فى المجتمع ..

اللهم اهلك هذا الجهاز وكل القائمين عليه ... لك الله يا محمد يا خيرى ...

إعتقال المدون محمد خيري (جر شكل) فجر اليوم ... الخبر فى مدونة ميت

دعوه ...

إلى كل الإخوة المدونون ندعوكم لحضور حفل تأسيس رابطة
))مدونون بلا حدود ((
إلى كل الإخوة المدونون أيا كانت أوطانهم أيا كانت انتمائهم السياسي او الفكري والثقافي تجمعنا كلمة واحدة أننا جميعا مدونون ونشترك جميعا في أننا نحب بلادنا ونعمل جاهدين على ان تكون امتنا وبلادنا في أعلى المراتب بيد أبنائها
ندعوكم جميعا لمشاركتنا فى حفل تأسيس
(( مدونون بلا حدود))
يوم الخميس القادم الموافق 23/ 10/ 2008 م وذلك في تمام الرابعة عصرا بتوقيت مصر بنقابة أطباء الدقهلية بطلخا
مدونون بلا حدود
في عالم قالوا عنه عالم وهمى قلت لا بل عالم قادر بشبابه الجادين على التغيير
بتكنولوجيا قالوا جلبت لنا الكثير من المشاكل قلت لا بل نسخرها لطاعة ربنا وخدمة بلادنا
بكلمات نكتبها على مدوناتنا قالوا عنها محض كلام قلت رحم الله القائل
((ان كلماتنا تظل عرائس من الشمع، حتى إذا متنا في سبيلها دبت فيها الروح وكتبت لها الحياة ))
قالوا لا تعلمون عن ارض الواقع شيء قلت بل نحن على ارض الواقع بينكم وندعوكم لمشاركتنا والتفاعل معانا يوم الخميس القادم بنقابة أطباء الدقهلية الرابعة عصرا
( مدونون بلا حدود )

----

احد مؤسسين الرابطه ؛

عمرو سلامة

الجزيره .. قفلوها وضربوا طلابها

طالب مدرسه الجزيره بعد منعه من دخول مدرسته وذلك لاسباب لا يعلمها الا حكام امن الدوله

الجزيره .. هيا مدرسه وليست منطقه ... هيا مركز ومنارة للعلم والتعليم ... هيا مسمى لمبنى يجمع فصولا ومعامل واقلام وكراريس ومكتبه ومسجد وملعب وحب وود وتفاهم وفهم وتلقى للعلم والمعلومه واناره للعقل والذهن ... نعم انها مدرسة الجزيره الموجوده بمنطقه تسمى العجمى بالاسكندريه .. هذه المدرسة التى كان يرتادها طلاب ذات المرحلة الابتدائية والاعداديه اغلقت على يد الامن !!!

لا تتعجب من الجمله الاخيره نعم ان المدرسه اغلقت على يد الامن ... ولا تسال هل الامن بدوره يقوم بالحفاظ على استتاب الامن فى البلاد او غلق المدارس ومنارات العلم ... لا تفكر كثيرا فالتفكير قد يحيلك انك قد تصحوا من النوم وتجد باب شقتك مشمعا من قبل الامن ... نعم يا ساده انها الحقيقه اغلقوا منارة للعلم يرتادوها اطفال ليتعلموا ويصبحوا مستقبلا لهذا البلد العظيم الذى اساء له سلاطينه ... ظنا منهم انهم بذلك يكبحوا مغارة من مغارات الارهاب ... اى ارهاب تتحدثون عنه فى مدرسه ابتدائى يا بتوع امن الدوله ... اى ارهاب قد يتلقاه طالب مدرسة الجزيره غير مناهج (خرفانه )وضعتها وزراتنا (السيس) وزارة التربيه والتعليم ...

الحكاية بدات فى سنه 2005 عندما جاء قرار بازاله المدرسه بحجة انها مبينه فى مكان مخالف وبترخيص مزور ... واتوا بالجرافات ومع الضغط الاعلامى والقضائى تركوا المدرسه بعد نزاع طويل بين ادارة المدرسه وحكومة امن الدوله المفتريه ... وفى 2008 قرر حكماء امن الدوله بمدينةالعجمى محافظه الاسكندريه حسم الصراع على هذه المدرسه وغلقها حتى لو امر حسنى مبارك بفتحها (هكذا قال الظابط السيد محمد السيد لأحد اولياء الامور ) واتوا قبل الدراسه باسبوع واحد ... وشمعوها وشردوا الفى طالب كانو قد تاهبوا للذهاب الى مدرستهم ... ورفضوا اى محاوله للتفاهم بين اداره المدرسه وامن الدوله وقرر اولياء امور ان يتفادوا باولادهم ويعملوا وقفه (او صرخه يستنجدوا فيها الكلاب الشرسه بان تفتح مدرسه ابنائهم ولكن قوبلوا تلك الصرخه بعصاية امن مركزى اخذت تفرقهم وتضربهم ...وذهب اولياء الامول كل لحاله ... يحسبن على ما جرى ويدعى على ما حصل وشرد ابناء المدرسه ..وظل هناك نزاع قضائى وانتصر القضاء على حكام دوله امن الدوله ... وقال كلمته هيا فتح المدرسه واتصلت اداره المدرسه باولياء الامور ان ياتوا بابنائهم الى المدرسه بعد القرار القضائى وعندما ذهب اولياء الامور امام المدرسه وتجمعوا حولها ... قال لهم قائد الامن مافيش مدارس ... وهنا قال اولياء الامور نودى اولادنا فين دلوقتى .. الدراسه بدات ... وعلا الصوت ولم يحتمل القائد صرخات الابناء وابائهم وبدل ان يقابلهم باللين قابلهم بالعصايه وامر كلابه ان تجرى وتنهش لحم كل من يقابله ... وتعض كل من تلحق به ولم يتركوا النساء ولا الاطفال ... كل سواء .. كل يضرب واعتقلوا اولياء الامور ومدير المدرسه

حتى كشفت حالة التعذيب المواطن حمادة عبداللطيف ولى الامر الذى صدق ان دولتنا دولة حريه وديموقراطيه وانها تسمع كلام القضاء وتنفذه ولكن راح كل هذا هباءا عندما وجد فقرات ظهره مطحونه وحدث له شلل تام فى ظهره بعد ضرب مبرح وتعذيب لم يكن عاديا وووو ... كل هذا ولا اعرف اين السبب فى منع طلاب ابتدائى حضورهم مدرستهم ... لا اعرف اين السبب وراء اغلاق هذه المدرسه .. لا اعرف اين الارهاب انا ام هم ؟

شاهد فيديو الانتقام ... والله الانتقام ... انتقام الامن من اولياء امور غلابه

الجزيره لن تكون الاخيره .. فيديو وصور شاهدوا معى الملف الكامل لهذه المدرسه المشمعه والمحاصره

هكذا حمادة عبداللطيف ضحية الجزيره وولى امر جاء بابنته الى المدرسه وعندما وقف امام المدرسه ليدخل ابنته لاحقته العصا الكهربائيه والشلاليط والضرب من كل ناحيه فى جسده ... حتى جائتنا هذه الصورة امامكم ... جالس لا يستطيع الحراك .. فقد وظائفه .. شلل بجسمه

ابنته وزوجته ... من لهما الان من يرعاهم بعد ان شلل عائلهم ... لهم الله

حوار مع زوجة حمادة عبداللطيف بالفيديو بعد تعرض زوجها بالشلل حصلت عليه مدونة لسه عايش من موقع امل الامه

الجزء الاول ..

الجزء الثانى

---------

صور المدرسه والابناء امامها لا يقدرون ان يفعلوا اى شئ ...

عدت بالسلامه ...

عدنا اليكم بعد العمره بنفس صافيه .. وبقلب جديد وبعزم اكيد

صور العمره .. اضغط هنا

ملحوظه : ياريت اللى معاه رقم موبايلى يتصل بيا عشان اسجله لأن موبايلى اتسرق فى الحرم النبوى ... وسلامى الى الجميع