رحلة مدون الى المحاكمه العسكريه

كانت فكرة الذهاب الى المحكمة العسكريه بالنسبة لى حلما اتمنى ان احققه ... لكى اقف بجوار المظلومين واقول لهم بكل ما املك من صوت واحساس بداخلى ربنا معاكم ... ربنا على الظالم ... تمنيت وانا باحلم وزلكن حدث وذهبت ... وعندما ذهبت عزمت وبكل عزيمة انى لو عرفت ادخل المحكمه هابوس ايد المهندس خيرت الشاطر فهو بمثابه الوالد بالنسبه لى والقدوة التى اضعها فى نصب اعينى ... رجل عانى الكثير فى سبيل هذه الجماعه وفى سبيل قيام هذه الدعوه .. رجل آمن بأن الاسلام هو الحل لهذه المشكلات التى نحن نعانى منها الان ... انه المهندس خيرت الشاطر نائب المرشد العام للاخوان المسلمين ...
احاسيس كانت بداخلى وانا ذاهب فى السيارة البيجو وكنت اتمتم واقول ياربى ولو حكمو علي الناس المظلومين دول بحكم عالى ايه اللى هيجرى لولادهم واحفادهم .. ايه اللى هيجرى لزوجاتهم ... طيب سيبك من ده كله .. ياترى ربنا هيسيب الظالم اللى ظلم الناس دى ... الناس دى مظلومه ياربى ... الناس دى مش ممكن تدخل السجن .. الناس دى مكانها فوق رؤسنا .. حرااااااااااام ياربى انهم يتسجنوا كده .... حراااااام وقعدت اقول فى سرى حرام حتى لقيت نفسى باقول ... ربنا مش هيسيك يا حسنى ... ربنا عمره ما هيسيب الظالم .. هيييييييه يا بلد يللى ظلمتى اولادك ... المهم ونحن فى الطريق الزراعى ومش خدت الطريق الصحراوى لأنى لو خدته كنت زمانى رجعت .. فيه كمائن كتير وكده .. المهم سلكت الطريق الزراعى وكان فى الطريق عند مدخل القليوبيه كده وانت طالع من منيا القمح ... كمين الراجل المخبر وقفنا وكان حواليه عساكر سال اللى قدام انتو رايحين فين .. قالوه رايحين الشغل ياباشا قالهم الشغل فين قالوله فى احمد حلمى .. سابهم جه للمقعد اللى فى الوسط .. قالهم رايحين فين قالوله رايحين ياباشا نزور واحد قالهم فين قالوله فى مصر الجديده يا باشا ... جه باه انا فى الكرسى الاخير رايح فين يا استاذ انا اتربكت .. ووشى ضرب الوان .. ومش كنت محضر اجابه بصراحه كنت عمال افكر واقول ماحدش يتجرا ويقوله انت مال اهلك ... المهم قاللى انت رايح فين يا استاذ قولتله القاهره ياباشا .. ضحك كده وبسخريه ... ايوة انا عارف القاهرة فين يعنى ... قولتله رايح لأمى ... عايز اشوفها ... ههههههه اه والله قولتله بنفس اللفظ .. رايح لأمى ... قاللى بطاقتك .. قولتله بس كده اتفضل .. طلعت البطاقه وانا باطلع البطاقه الكاميرا كانت هتبان وربنا ستر ومش بانت ... المهم طلعتله البطاقه .. ويظهر انه لما شاف سنى استصغرنى وسابنى .. قاللى ماشى .. قولتله تحت امرك يا باشا وضحكت بسخريه كده ... المهم يعنى ذهبنا ووصلت الى القاهرة واضطررت الى ان اذهب الى رمسيس واخد من رمسيس موقف العاشر وكنت دائما على اتصال بالمدون العزيز الحبيب اللى دوشته دايما اخويا امام الجيل .. كل شويه اساله اركب ايه واعمل ايه ...والصراحه تعب معايا كتير ... ربنا يباركله يارب ... المهم بعد لما مش لقيت اتوبيسات من رمسيس او لقيت ولقيتها زحمه بطريقه فظيعه ركبت تاكسى .. واى نعم التاكسى خد شويه فلوس .. وانضحك عليا بس يهمنى انى وصلت وانا مرتاح ... وانا فى الطريق سواق التاكسى عرف انى رايح محكمة عسكريه .. ومن هنا قاللى ياعم انا والله ما اعرف حاجة ولا ليا فى الموضوع .. انا برئ .. وحسنى ياسيدى جزمته فوق رقبتى وهو احسن من غيره بس الحركة الاخيره اللى عملها وحشه قولتله ايه قاللى حركة الغلا دى مش عارفين نعيش الحياة غليت خالص .. والكل بياكل فى بعضه ومش عاد فى رحمه والتعليم باظ تصدق انا مودى ابنى مدرسه خاصه عشان لو وديته مدرسه عاديه ابنى مش هيتعلم ... كل حاجة باظت يا بيه ..الميه اتلوثت والواح دبأه خايف يشرب ميه ... انت تعرف ان الفلسطينين اللى بيعيطوا لحسنى دول عشان يفتحلهم المعبر .. معاهم فلوس بالهبل وعندهم اكل .. ومبسوطين جدا ... اما احنا شعب غلبان صحيح قولتله امال بتقول ان حسنى مبارك جزمته فوق راسك ليه .. قاللى دى سياسه دوله ولو مش عمل وحبس كده البلد مش هتمشى ... وانا لو خدونى فى اى قسم امن دوله هاقولهم ان الحياه غليت .. اما حسنى ده حبيبنا وريسنا ... هكذا قال لى ويمكن قاللى اكتر من كده لما استدرجته فى الكلام ولما زهق قاللى يابنى دول ربنا بس هو اللى هيقدر عليهم ولا اخوان ولا غيره ... دول عايزين كلهم يكونوا فى حته وربنا ينزل عليهم صاعقه ولا الارض تبلعهم ويروحوا ... لكن تقوللى باه اصل الاخوان بيحاولوا يغيروهم وكده .. فا ده انسى .. قاللى كلام كتير اوى الصراحه بس مش عايز اطول عليكم ونكمل رحلتنا الى الهايكستب فى المحكمة العسكريه ... ووصلت هناك ووجدت الجيوش تجيشت لملاقاة الد اعداء الوطن الا وهم الاخوان المسلمين ... والتحمت مع الناس .. وبدات مسيرة الهتافات وتوزيع اللافتات .. ورفعوا لافتات حسن البنا والاخوان امل الامه فى كل مكان والعداله و كرامة هيئة التدريس والله غايتنا والغريب انى وجدت من يرفع لافته للمهندس يوسف ندا ولكن لم ارى اى اولاده حينما سالت ... المهم بدات رحله الهتافات مصر يا ام ولادك اهم دول عشانك شالوا الهم .. وبدات الاصوات تعلوا والاعداد تتزايد والحشود تتوالى من الشرقيه والمنصورة والبحيرة والجامعات .. وبدا الصوت يرج فى المكان بكل حماسه .. عسكريه ليه هو احنا نهبنا ولا ايه ... عسكريه ليه ودينا فلوسنا سويسرا ولا ايه .. وبدا ابن احد المعتقلين لا اتذكر اسمه فى القاء شعر والهاب حماس الناس .. حتى ان احد المهتفين وهو يهتف صوته انقطع من كتر البكاء والظلم ... وفى هذه الاثناء بدا بطل المحاكمات العسكريه ابن رجل الاعمال حسن مالك فى الهتاف ضد حبس ابيه ... والناس وراه بكل حماسه والمصاحف تعلوا السماء كانها تقول ان الاسلام والمصحف فوق رؤوسكم يا ظلمه وهو الذى سوف نحتكم به باذن الله ... وبدا الاستاذ محى الزايط المعتقل عسكريا من قبل ... والقى شعرا كتبه فى سجنه عندما وبعثه لأمه عندما كانت تذهب وراؤه فى السجون والمعتقلات ... وايضا دعى على الظلمه على الطغاه واليهود والامريكان ( الدعاء موجود فيديو على المدونه ) ... وتحدث ايضا الدكتور محمود غزلان نائب المرشد العام ... وكلمته موجوده ايضا بالفيديوهات ... وايضا تحدث الاستاذ عبدالمنعم عبدالمقصود فى مؤتمر صحفى والقى فيه بيان الاخوان ...
وانا فى المحاكمة اول ما جيت خالص لقيت ناس بتتكلم عن التاجيل وتقول ان المحاكمة اتاجلت وكان الامر غير متوقع حتى اكده لنا الاستاذ عبدالمنعم وقال فى جلسه سريه عقدت بغير وجود المتهمين دليل على عدم صحه هذه المحكمه وانه تم تاجيل المحاكمة الى 25 مارس القادم ... وعندما اكد الخبر نزل عليا كالصاعقه ... لأنى لما اكن اتوقعه ... بل كنت اتوقع البراءه ... اجلوها لأنهم خافوا ويريدونها موائمه او مبادله سياسيه مع الاخوان الافراج مقابل المحليات ... ولكن هذا لم يحدث ... لأن الاخوان لهم هدف وهم ينفذونه ولهم خطه معينه ... وفى هذا الهدف تجد الصعاب ... اذن فلنتحمل للوصول الى الهدف ... هدفنا اصلاح المجتمع ... اصلاح الامه ... الحكم بالشريعة الاسلاميه ... وباذن الله سوف يفرج الله همه ويزيح الغمه ويفرج عن المعتقلين ... وبامرك يا طيار او لا هيفرج عنهم ...
نعتذر عن عدم التحدث اكثر من ذلك ولكن انا عندى الكثير والكثير ولكن تكلمت بما فيه الكفايه ... خاصه ان غيرى تكلم وقال ايضا ... ونترك الامر على الله ...
الصور تتكلم

اطالب بالعداله لرهائن الاصلاح
مصر يا ام .. اولادك اهم .. دول عشانك شالو الهم

حتى الاطفال جاؤا ليلعنوها امام القاضى العداله يا سيادة القاضى
شرارة الهتافات بدات من هنا ... الله اكبر ولله الحمد

من اجل الكرامة ... افرجوا عنهم





حشود غفيره من الاخوان جاءت لتعلنها نحن لن نستكين مهما فعلتم بنا










ابن المهندس حسن مالك هناك اهوه يهتف ضد الظلم الواقع على ابيه


زهراء خيرت الشاطر هنااااااك اهيه بتقرا قران .. فعلا القران الونيس الوحيد عندما يعتقل زوجها لثانى مرة بعد خروجه فى مده اقل من شهر ووالدها المهندس خيرت الشاطر الذى تعتبر له هذه المحاكمه الثانيه من نوعها ...

حسبنا الله ونعم الوكيل

حشود الامن تجمعت ..

ابن المهندس حسن مالك ... بطل المحاكمات
ظباط ولوائات جايين عشان يقولوا للظلم لا هما كمان .. هههه


لماذا اعتقلتم ابى
















شايفين حاله التاهب وصلة لدرجة ايه ...

الاستاذ عبد الجليل الشرنوبى رئيس تحرير موقع اخوان اون لاين
الدكتور محمود غزلان عضو مكتب الارشاد

الاستاذ عبد المقصود المحامى يلقى بيان هيئة الدفاع عند اعلان المحكمة تاجيل حكمها
كلمة الاستاذ عبدالمنعم موجوده فيديو بالمدونة ...



دائما المصحف حاضر فى اى فعاليه للاخوان ...
ابناء المعتقلين يتناقشان وبيقولوا انا هاهتف الاول .. لأ انا الاول عشان خاطرى انا يا معاذ .. ياعم انا ..وهذا كله فى سبيل وعلى امل ان يفرج عن والدهم

الاستاذ محى الزايط

المظلومة .. عائشه حسن مالك

الرسول قدوتنا

الصورة دى بأه للعربيه الشفر التانيه اللى كانت بتحمل طلبه جامعة الازهر اللى كانوا جايين كتير جدا ... وانا كنت راكب عربيه تانيه ... وكانوا واقفين على الطريق ومخلين بتاع المرور يوقفلهم العربيات النقل عشان يركبوا فيها .. دول ولا 5 عربيا وقفوا وكانوا كتير جدا اللى راكبين فيها ... وانا كنت راكب فى واحده منهم وربنا العالم انا طلعت ازاى على العربيه ... ربنا يسامحك يللى فى بالى ركبيتنى الشفر واتزحلقت

----

بعد قليل الفيديوهات باذن الله

ظلم فى كل مكان ...

ظلم ... ظلم .. ظلم ..

انه الظلم بعينه حينما ترى اربعين من اصلاحين هذا الشعب المطحون معتقلين خلف قضبان مبارك العسكريه بعد أن براتهم المحكمه المدنيه ثلاث مرات متتاليه ... ثلاث مرات افرجت عنهم المحكمة المدنيه بدون اى دليل او برهان... ويبدوا ان حسنى مبارك اراد ان ينتقم ويتوعد الاخوان بالمزيد فى المحليات فحولهم الى العسكريه عشان يحكم عليهم بمزاج امه ... ونسى ان هناك من سينتقم لهم ... نسى ان هناك من سيقضى عليه ويلقيه فى نار جهنم حتف لأنه ظلم اناس كانوا من اشرف شرفاء هذا البلد ... لأنه ظلم ناس اشرف منه هذاالطيار ... لأنك ظلمت علماء دكاتره فى جامعات .. رجال اعمال لم يسرقوا ولم يفسدوا ولم يهربوا ... مهنين وشيوخ ... وغدا باذن الله وهو قريب ايها العجوز ستلقى فى جهنم وسينتقم الله لأجل ابناء واحفاد هؤلاء .. غدا باذن الله سيستردوا هؤلاء اموالهم وسيبقوا على فكرتهم ودعوتهم .. وسيظلوا مؤمنين بان الاخوان المسلمين هما من سيحررون هذه البلد من الفساد والاستبداد وسيظلوا يدعون الى الله دعوه لاسعاد البشريه دعوه الخير والحب والسلام الذى اعتقلتهم من اجلها يا مبارك يا طيار ...

ايها الطيار ضع الكلمات فى اذنك جيدا ودعها تردد امامك ستحاسب امام ربك ولن تخلد ... ولن يرحم التاريخ جرائمك ... حسبنا الله ونعم الوكيل فيك ...


من هذه المدونه نطالب بالعداله من القاضى ... قاضى المحكمة العسكريه ... العداله يا قاضى ...


ولن نصمت ولن نلين ولن نخاف ولن نهاب وسنستمر وسندعوا وسنفضح وسنكشفك امام الراى العام كله ولن تهزمونا بمحاكماتكم الهزليه ...


من ناحيه اخرى :

تدعوا جماعه الاخوان المسلمين اخواننا المسلمين على مستوى العالم بصيام يوم غد الاثنين وقيام ليله الثلاثاء وتكثيف الدعاء على الظلمه والظالم ... وذللك لاخواننا المحالين الى المحكمة العسكريه ...وايضا المحاصرين فى غزه والمرابطين على الجبهه ... ونصر كلمة الله العليا فى الارض وان يعيينا على كل ما يعيقنا عن دعوة الاسلام ...

بكيت جدا لما شوفت هذا الفيديو ...عائشه حسن مالك تبكى وتقول انا باتاثر جدا لما مش بلاقى بابا جاى ياخدنى من المدرسه زى اصحابى ... بازعل جدا لما بالاقى احد المدرسين بيقولولى احنا عايزين بابا واقولهم حاضر ... بابا يا حبيبى ..

اين ستذهب هذه من رقبتك الدموع يا مبارك ؟ ستنتقم منك هذه الدموع اجلا ام عاجلا ؟

----

اعتقال رئيس تحرير موقع اخوان ويب الانجليزى ... بعد مطاردة فى شوراع القاهره ... وياتى هذا الاعتقال لأنه كان على راس المطالبين بالافراج عن المعتقلين فى المحاكمة العسكريه ... وكان على راس الحمله الدوليه التى اقيمت لتفضح هذا النظام امام العالم كله ...

اللهم فرج كربه .. وصبره على ابتلائه .. وثبته فى محنته ... وانتقم من ظالميه يارب العالمين ..

----

ياتى فى هذا الوقت من المحاكمات العسكريه والظلم الواقع اعتقالات انتخابات المحليات التى طالت 400 عضو من الاخوان المتوقعين لنزول الانتخابات .. ونحن نقول لسيادة الرئيس الذى منع مظاهرة غزه امس امام جامعه الدول العربيه اين الحريه والديموقراطيه اللى بتزن علينا بيها ليل ونهار انتى ايه يابابا مش بتحس ... ده كان غيرك زمانه حس ...

اللهم خليه يحس ويفوق يا جدع

---

غدا تغطيه كامله متكامله لاحداث المحاكمة العسكريه الاخيره وغدا جلسه النطق بالحكم على 40 قيادى من قيادات الجماعه ...

يا رسولى انت فى قلبى ...

رسولنا فى قلوبنا ...

كثيرون قالو لا للدانمارك .. وكثيرون قالوا قاطعوها .. وكثيرون قالوا الا محمد نبينا ... حتى شيخ الازهر نفسه طلع - حاجة غريبه انه يطلع بنفسه- وقال نستنكر حلو انه استنكر المرة دى احسن من نشجب ... وطلع الحقل احمد ابو الغيط واستدعاء سفير الدانمرك وقاله احنا بنحتج قام سفير الدانمارك قالوا والله احمد ابو الغيط قاله واقسم بالله بنحتج - من ورا قلبك با معالى الوزير ولا مضغوط عليك ياريس - وايضا قام وزير الاعلام انس الفقى - مش بتاع بلاد العجائب ده انس تانى - بمنع اصدار اى نسخ للجرائد الدانماركيه فى مصر فقط منع 13 صحيفه اجنبيه تنزل مصر ... اما الريس قعد ساكت فى قصر العروبه لا ندد ولا شجب ولا استنكر ولا قال كده غلط يا دودو - كنايه لتدليع الدانمارك - ... وايضا كثيرون من مواقع الانترنت المصريه اعلنوا احتجاجهم وفى موقع - شباب وبس - قال عايز تنتقم لنبيك قاطع الدانمارك ... وايضا الكثيرون من مدونين مصر والعالم العربى اعلنوا احتجاجهم عن طريق البانرات او البوست ... ولكن هل بعد ان تكلمنا وكتبنا وفعلنا ماذا حدث ؟ تفتكر هينشروا الرسوم دى تانى خاصة ان دى تانى مرة بعد لما طلعت مظاهرات بالعالم كله فى اول مرة .. المشكله فين هنا .. وليه نشروها تانى مرة بيستفزوا الشعوب ولا ايه ؟ ايه السبب يا ربى .... طب وايه الحل مع اولاد الصليبين دول هنسكتلهم كده .. يعنى ايه ياعم عمرو عايزنا نحتل الديار ونحرر الارض ونفتتح البلاد .. لأ ياريس الحل فينا احنا ايوة الحل فيا وفيك .. ما انت لو تمسكت بسنته انت وهو وعملت برسالته واهتديت بهديه ما كانوش استهونوا بيك وعملوها مرة تانيه يا ريس ... ما هما لو مش شايفينك اهبل وبتاع بنات وبرياله وسجاير ودخان مش كانوا عملوها لكن هما استهانوا بيك وقالوا بأه ده بيقول الا رسول الله مش لما يتمسك بعقيدته الاول يبقى يتكلم ... هكذا يقولون وهذا هو لسان حالهم ... تمسكوا بسنته وهديه اعرفوه اقراو عنه لا تنسوه فى دعائكم له فهو الذى سوف يسقيكم عند الحوض .. نبى الله محمد صلى الله عليه وسلم .... الا رسولى سامحنى يا رسولى انا اسف انا مقصر فى حقك ..

ما زالوا معتقلين ...

عاجل :

يتم الان نقل المعتقلين الى سجن وادى النطرونا (ليل الاحد) بعد ان قال القضاء كلمته فى حق 12 معتقل من المعتقلين الشرقاويين ... وهيا اخلاء سبيلهم من سرايا النيابه .. ويظهر ان امن الدوله اصبح ينتهك كل القوانين ويعلن انه فوق الكل القضاء والمجلس التشريعى (مجلس شعب ) وانه هيعتقل وهيعمل وهيسوى ومش هيهمه اى حد .. امن الدولة يا جبار ليك يوم فيه تنهار باذن الله .. الحريه للدكتور سيد عبدالحميد واخوه الاستاذ سمير والحريه للدكتور عبدالحميد كامل واخوانه الـ 12 ولا لاختراق القوانين من قبل امن الدوله ... وما زلنا نستمر فى حملتنا ضد انتهاك القوانين والافراج عن المعتقلين ... ونعلنها ان الشرقاويه لا يهابوا الموت ... ولسه عايش

---
استغرب الزوار من عدم نشرى لخبر الافراج عن المعتقلين يوم الجمعه 14\2\2008 وهم حوالى 13 معتقل من الشرقيه والذين اخذوا قرارت افراج واخلاء سبيل من سرايا النيابه ولكن امن الدوله ما زالت تعتقلهم .. ومش عارفين ايه السبب ؟ ... ولماذا تستمر على اعتقالهم طالما ان القضاء والنيابه اعطى لهم افراج ... امال فين الديموكراتيه بأه اللى بينادى بيها بابا حسنى كل يوم الصبح على الاخبار والاهرام والجمهوريه ... ان كنتم قد اعتقلتوهم وبطريقه غير قانونيه اصلا وافرجت عنهم النيابه اذن لماذا ما زلتم تعتقلهوهم ... لماذاااااا ؟

لماذا لم تطلقون سراحهم وتعتقلون غارق العباره ومحتكر الحديد ومهرب الاموال وبتاع الفساد والرشاوى وسارق البلد ووو ... لماذا لا تنفذوا كلام بابا مبارك اللى وجع دماغنا بيه كل يوم الصبح ... هل انتم يا من تسمون بأمن الدوله تخصصتم فى اعتقال الاخوان وامن الكرسى فقط ... لماذا لم تفرجوا عنهم .. لماذااااا يا اصحاب الديموكراتيه باباحسنى ... ديموكراتيه بالمحشى ...
اذن نحيط علم الجميع ان معتقلى الاخوان بالشرقيه لم يصلوا حتى هذه اللحظه الى بيوتهم ... وانهم ما زالوا رهن اعتقال فى سجون وزنازين الكلاب امن الدوله ...

الشرقيه اون لاين تنشر خبر الاخلاء السبيل ... اضغط هنا

اخوان اون لاين تنشر ايضا خبر اخلاء سبيل اخوان الشرقية ... اضغط هنا

----

وفى اطار حملة مدونين الاخوان بالشرقيه للافراج عن معتقلى الاخوان فى الشرقيه

كتبت اختنا سارة بندارى انا محظوره عن معتقلى ابو كبير الدكتور سيد عبد الحميد والاستاذ سمير عبد الحميد هابى فلانتين داى ... هكذا تحتفل امن الدوله على طريقتها .. اقراوا الباقى على انا محظورة ...

----

شرقيه اون لاين تنقل عن لسه عايش الحوار الذى اجريته مع زوجه الدكتور عبد الحميد كامل القيادى الاخوانى بمركز ديرب نجم والمعتقل ضمن مجموعه الـ 12 ... اضغط هنا

----

وانتظروا قريبا ... فيديو لمعتقلين الاخوان بالشرقيه ...

حوار ادمع عيناى .. مع زوجة القيادى الدكتور عبد الحميد كامل

حوار ادمع عيناى .. مع زوجة الدكتور عبد الحميد كامل (احد قيادى الاخوان المسلمين بمركز ديرب نجم شرقيه واحد المعتقلين ضمن مجموعه الـ 12 من الشرقيه والـ 36 من الجمهوريه فى يوم 14\2\2008 الخميس )

أجرى الحوار : عمرو سلامة

الدكتور عبد الحميد كامل .. كان هذا الاسم هو الهدف الذى دائما ما تتجه له الاجهزه الامنيه عند كل موسم (كما ذكرت زوجته ) انتخابات مظاهرات الى اخره من نشاطات الاخوان على الساحه ... ظنوا انه المدبر وظنوا انه بغيره سوف يعيق عمل هذه الدعوه ولن تسير الا به ولكن ظنهم خاطئ خاطئ ... هذه دعوه لن تتراجع عن مبادئ تواجهها الصعاب وهم يعرفون ذلك ولا يتراجعون عن مبدئهم .. انها دعوه الاخوان المسلمين دعوه للخير والحب والانتماء والسعادة والاسلام بين البشريه ... ولكن مهما قلت لن تقتنع الاجهزه الامنيه بذلك لأنها ظنت ان غاية هؤلاء(الجماعة) هو كرسى الحكم الجالس عليه مبارك وقريبا ابنه هذا الكرسى الذى ظنوا انه سوف يأمنو عليه باعتقال الاخوان المسلمين لكسر اراداتهم وعزيمتهم بمحاكمات عسكريه وهجمات على البيوت فى نص ليل وترويع الامنين وسرقة النقود وشتم باقذع الالفاظ ولكن اقول لكم ان هذه الجماعه لن تكسر ارادتها ولا اراة قيادتها مهما فعلوا وحتى لو وضعوهم كلهم فى السجون وكبلوهم بالحديد سينصرهم الله على الظالمين وسينصر الحق اينما كان وفى امد ليس بطويل ...
كانت هذه مقدمة جائت فى راسى عندما كنت ذاهب الى بيت الاستاذ الدكتور عبد الحميد كامل الاستاذ فى المدرسه الزراعيه والدارس لدكتوراه فلسفة العلوم الزراعيه سنة 1995 ولديه ولدان واربع بنات اكبرهم فى الصف الثانى الثانوى واصغرهم يملك من العمر سنتين فقطواحد قيادات جماعة الاخوان المسلمون بمركز ديرب نجم محبوه تعدوا الوصف حتى ان سكان العمارة التى يقطن بها كان يلجئون اليه لحل مشاكلهم فهم كانو يضعونه فى محل ثقه وكأخ كبير لهم ... هذا الرجل الذى كان عندما يقابل اى احد وجب ان يترك بداخله بصمه حتى انا فقد تعلمت منه الكثير والكثير تعلمت منه ادب الحوار مع الاخر عندما كنت اجادله .. رجل تعلم وعلم رجل وثق فيه الكثيرون وعندما علموا باعتقاله اسفوا لهذا الخبر بكل شده ...
دخلت بيت هذا الرجل القائد الدكتور عبد الحميد كامل واستقبلنى سيد اكبر ابناؤه الاولاد والذى يملك من العمر 12 عاما والذى فضلنى حتى نادى والدته وبينما هو ذاهب لنداء والدته كانت معى بناته الصغار منار وجهاد الاولى فى ثانيه حضانه والتانيه فى اولى ابتدائى سالت منار بابا فين يا منار قالتلى فى المعتقل ليه يا منار ؟ عشان الانتخابات يا عمو .. سالت جهاد بابا فين يا جهاد قالتلى فى المعتقل ليه يا جهاد ؟ عشان بيقول لا اله الا الله ... احسست بقشعريرة داخل جسمى عندما علمت ان من يقول لا اله الا الله يعتقل من اجلها وقولت فى سريرة نفسى حسبنا الله ونعم الوكيل .. وفى هذا الوقت دخل عليا سيد بأمه وسالت عن سيد واحواله وكان هذا الحوار المقتضب جدا واعذرونى انه مقتضب لأننى فقدت اعصابى وانا اسال زوجة الدكتور عبد الحميد كامل فقد كانت الدموع تنزل من على هذه الخدود الذى تحملت مشقة تربيه هؤلاء الاولاد واخذت على عاتقها هذا الجهد وشكرت ربها وامنت ان الطريق الذى يسير فيه زوجها هو طريق الصحابه هو الطريق الصحيح هو الطريق الذى لابد ان يسير فيه كل من يقول كلمه حق كل من يقول لا اله الا الله ...
الحوار :

لافته تهنئ اهالى المركز بعيد الاضحى الماضى وكان غائبا عنهم لأنه كان بيحج
كيف تم اعتقال زوجك وماذا حدث فى ليلة الاعتقال ؟
كانت الساعة الواحدة ليلاً كنا ما زلنا مستيقظين وفجاه ونحن جالسين فى امان الله قطع علينا امننا وهدؤنا اصوات خبط شديد وهمجيه على السلم وكان 4 ظباط ومخبرين طرقوا الباب بكل لين وكان من بينهم الظابط محمد حلمى ظابط المباحث وفتح لهم زوجى الباب ورحب بهم واستئذنوا عند دخولهم وفضلهم ودخلو اربع ظباط فقط وكانت هذه المرة الاولى الذى يحترموننا ويتكلمون معنا بادب جم وشديد ..وتفضلوا فى صالون البيت وقدم لهم زوجى الواجب وقال له احد الظباط وهو يقدم لهم الواجب احنا اسفين يا دكتور ومش تحرجنا بكرمك ..
استئذنوا وبكل احترام شديد ( لأول مرة فى المرات الثلاث الذى اعتقال فيها الدكتور ) فى تفتيش البيت وفضلهم الدكتور ودخلوا غرفة الاولاد والذى فتشوها بهدوء شديد ... ولم يبعثروا اى شئ وعندما ارادو دخول الغرفة الخاصه بالدكتور استئذنوه وفضلهم فى غرفة النوم وفتشوها بكل هدوء ايضا ولم ياخذوا اى شئ من الغرف التى فتشت ولكنهم اخذوا مجموعه كبيره جدا من الكتب الموجوده بالصالون وايضا اخذو جهاز المحمول الخاص بزوجته وتوجهوا والدكتور فى يديهم بعد ان ودع زوجته واولاده ومعه شنطة السفر الذى اخذها دائما عندما اراد السفر الى طره وابو زعبل ... وركب فى البوكس المخصص بدون اى ضوضاء وبدون اى استفزاز لأهله او اى واحد يحس من جيرانه كما يفعلون كل مرة ... وخرجوا من البيت فى الساعه الثالثه فجرا ...
ذكرتى أن هذه المرة لم تكن الاولى لاعتقال زوجك فمتى كانت السابقه وهل هذه المرة تختلف عن الاخرى وماذا كان يحدث فى المرات السابقه ؟
نعم ذكرت انهم ثلاث مرات وهذه المرة تختلف عن سابقيها بكثير جدا فهذه المرة هى الوحيدة من نوعها تكون هادئه وغير مروعه ... اما المرة الاخيره فكانت فى انتخابات الشورى الماضيه ( كل موسم انتخابات ) وكانوا يستعملون فيها القسوة والهمجيه والشتيمه بالفاظ قاسية جدا وتزعيق وسرقة لجهاز الكمبيوتر الخاص بالاولاد فى كل مرة ويشتموا الاولاد باقظع الالفاظ عندما يعترضون على اخذهم لجهاز الكمبيوتر وايضا كانوا بيسرقوا الفلوس وحتى لعب الاطفال لم تستسلم من ايديهم فكانوا ياخذونها وكانوا ياخذون تليفون الشقة وينزلوه من الشقه حافى من غير ما يلبس الشبشب حتى ... وكان الجيران كلها تصحى ...
فى هذه المرة والمرات السابقة هل كنتم مستعدين لهذا الامر ؟
نعم كنا مستعدين جيدا وكان حتى الدكتور بيجهز شنطته قبليها بفتره واحنا عرفنا خلاص كل موسم انتخابات بياخدوه ونحن تعودنا على ذلك ...
كيف كان رد فعل الاولاد ؟
فى هذه المرة الاولاد كانوا متطمئنين جداً ونازل عليهم السكينه من رحمة ربنا عليهم والغريبه ان من كثر معاملة الظباط لهم باحترام كان الاولاد يلبون طلباتهم بنعم وحاضر ولم يكونوا منفعلين فالظابط اخذ يسرح شعره ويظبط بدلته والاخر يفتش جوه من كتر الاطمئنان يعنى .. وكان البيت مسرحا لهم يلعبوا فيه كما يشاؤون ...
لكن كيف اثر الاعتقال على زوجك وعلى الابناء وسير حياتهم ؟
لم يتأثر بشئ وده الطبيعى انه يحصل لانه يعرف انه يسير على الطريق المستقيم على طريق الصحابه طريق الجنه باذن الله وهنا فى البيت كله مسير وكما انه موجود .. وربنا معانا
رسالة توجهيها الى من اعتقلوا زوجك ؟
حسبنا الله ونعم الوكيل .. حسبنا الله على الظالمين .
ماذا تقولين لزبانية النظام ؟
يا ظالم ليك يوم ..
كلمة لعامة الشعب ؟
اصحى باه وفوق يا شعب .. قوم وانتفض ...
كلمه توجهيها لزوجك ؟
فى هذا السؤال وبالذات لم تكن تقوى على الرد لأن دموعها كانت اقوى من شفتيها ... وظللت انا ساكت لفتره حتى تهدا وتمنيت ان افعل شئ لهذه الام المستكينه الطيبه لكى تهدا فردت عليا والدموع تذرف من عينيها ربنا معاك يا عبد الحميد وشد حيلك ... فاحضر سيد المناديل لوالدته واعطاها لها .وتوكلت على الله وانا فى حيرة من امرى ولسانى يتفوه بكلمه حسبنا الله ونعم الوكيل .. وربنا على الظالم ربنا على الظالم

مسيرة ديرب نجم .. فى حب مصر

وفى خطوة ليست بهينه .. فى فرحة لم تقتصر على فئة.. وفى كاس تمناه المصرى الصغير قبل الكبير … مباراة حاسمه انتظرها الكل بكل حسم لأنها كانت مباراة نهائية واللى هيكسب هياخد كاس افريقيا .. البدايه كانت دعوه من بعض الاصدقاء يوم السبت فى كافتريا نجلس عليها لنسمع الماتش وافقت على دعوتهم لى خاصه ان الماتش نهائى وله اهميه كبيرة لذوى محبى كورة القدم خاصه وللشعب المصرى والعربى عامة .. وافقت وجاء يوم الأحد فبدات يومى فجرا وذهبت الى المسجد لصلاة الفجر وها انا اصلى واسجد لله تعالى وادعوه ان يوفقنى فى حياتى ويشفى ابى ويهدى اخوتى الا ان انقطعت فجاه عن الدعاء فى السجود وذلك لأن المصلى الذى بجوارى كان يدعوا دعاءا غريبا جدا فوجدته يقول اللهم انصر منتخبنا يارب … اللهم وفقهم فى مباراتهم مع الكاميرون .. اقسم لكم انى سمعت هذا باذنى الى اى اهميه يكون هذا الماتش مسيطر على هذا الرجل … اين اطفال ونساء غزه من دعاءه .. اين الاقصى من دعاءه … اين الامه الاسلاميه من دعاءه اين واين واين ؟؟؟؟
هالنى صوته .. افزعنى كلامه .. فالماتش قد سيطر على كيانه … فعلا فقد نجحوا فى هزيمتنا ولهينا بالكورة … نجحوا فى ان يضحكوا علينا … ولا ايه بالظبط اللى حصل حد يفهمنى يا جدعان !!
المهم ذهبت للبيت بعد الصلاة وانا فى طريقى وجدت احد اصدقائى يحدثنى انت هتسمع الماتش فين ؟؟؟
وفى ذات هذا اليوم وانا راكب السيرفيس وجدت السائق يقول لى هو الماتش الساعه كام ؟
وايضا فى ذات اليوم وجدت رساله على الموبايل تقول اللهم انصر المنتخب المصرى على نظيره الكاميرونى …
وايضا غاب الاساتذه عن دروس اخوتى واعطوهم الاجازة بسبب الماتش …
وفى نفس اليوم وعلى ذات الموضوع وجدت الكل يتكلم عن الماتش … الماتش الماتش ..
الواحد كاد ان ينفعل وفى الساعه الخامسه والنصف تماما وجدت من يتصل على ويقولى انزل دلوقتى عشان نلحق لنا مكان فى القهوه …يابنى لسه بدرى … يقولى انزل … اقابلك فين … قابلنى على الاحلام .. رحت قهوة الاحلام وبالمناسبه دى اكبر كافتريا واشهرها عندنا فى البلد … وذهبت القهوه بعد صلاة المغرب ووجدتها مليئه على الاخر والاعلام مرفوعه فى القهوه والتلفزيون صوته عالى ووجدت المحلل يتوقع .. سننتصر بهدفين على الاقل ان شاء الله يا سادة … وسيكون صاحب الهدف ابتريكة وعمرو زكى وهذه هيا توقعاته … وانا انفعلت فى نفسى هو الراجل ده ايه عرفه … هو لا مؤاخذه علامة ولا دجال … وانا جالس والماتش لم يبتدا وجدت الكل يهتف وبحماسه مصر مصر مصر مصر .
والاعلام ترفرف فى سماء القهوة … والكل يقول يارب نجيب ايتو الارض ..
وبعد كلام هنا وهناك وبعد قرقره للشيشيه التى سئمت من سماع صوتها وبعد دخانه ليست بقليله … بدا الماتش فى الساعه السابعه .. وبدات الحماسه تاخذ المشجعين الجالسين .. وبدا الهجوم الكاميرونى والكل خائف ومترقب والانظار متوجسه والماتش بيسخن .. حتى انا كنت خايف مش عارف ليه … وفجاه وجدت المفرقعات بجانب القهوه وتعود الاغنيه مصر مصر .. ومع كل هجمه مصريه .. اجد الكل يقول يا يا ابو تريكه كسرهم يا تريكه دغدغهم يا تريكه … وانتهى الشوط الاول وذهبت لصلاة العشا بعد ان تأخرت عن ميعادها … وجيت ولقيت الماتش لسه هيبدا فى الشوط الثانى ووجدت المعلق فجأه يقول ابو تريكه تراجع دورة بالشكل الغير معتاد … ابو تريكه مش عاد زى الاول …وابو تريكه وابو تريكه .. وفجأه قال جون واحد بس يا منتخب جون واحد يا متعب .. جون واحد … هتفرح ملاين هتفرح العرب .. جون وهترفح ملايين .. الناس كلها مستنيه يا احمد يا احسن يا جمعه يا منتخب مصر … وقعد يهرتل … وفجاه جوووووووووون جوووووووووووون ووجدت الكل قام والكراسى اتقلبت والمفرقعات اشتغلت والهتيفه هتفت وتحيا مصر .. ومصر هيا امى .. حتى اننى فوجئت برجل يبلغ من العمر ارزلا ( 40 عاما ) وقفز قفزه حتى انه وقع الشيشه اللى قدامه ومن كتر الفرحة صوته خرم ودنى هييييييييييييييييييييييييه ... والله العظيم صوت فظيع ... ووجدت مالا يخطر على بال احد .. هتافات وشعارات وحتى حسنى مبارك هتفوا له وقالو حسنى مبارك يا ريسنا بفضلك نهز الشبكة ... وكانت الفرحة قد دامت على الصغير والكبير وخلت الافواه تتبلم امام شاشه التلفاز وهذا وانا كله فى حيرة من امرى اهذا كله من اجل كورة ... اين العقل من هذا يا سادة ؟
نعم نفرح .. لفوز منتخبنا ولكن ليس كل هذا ... امال بأه لو حسنى رخص الاسعار والعيشه باقت حلوة هنعمل ايه ...
الكورة تعمل فينا ده كله ...
المهم .. وبعد هذا الجون وجدت هذا الرجل الكهل ايضا يقول وفى سره يارب استر علينا .. يارب ما تفضحنا ... يارب ... ولقيت الهتيفه اشتغلوا من تانى .. لينا رب اسمه الستار ... لينا رب هينصرنا ... يارب استرها .. وياليالى ياليالى الحضرى السد العالى ... وفى احدى الهجمات المصريه على الشباك الكاميرونيه وجدت الكل قام جون ومش دخلت جون ولقيت واحد لطم وشه ليه كده لييييييه ؟؟
والكل قاعد وخايف ومترقب .. وانهى يا حكم الماتش بأه ... وعندم اطلق الحكم الصافره اطلقت الشعارات مصر مصر مصر .. ورميت الكراسى وجريت الناس الى الشوارع بالاعلام والموتوسيكلات وكانت البدايه من قهاوى البلد وتقابلوا فى وسط البلد ... وهاصت الدنيا وخلعوا عراينين وكتبوا على صدورهم مصر .. والاعلام المصريه تلوح وفجاه ظهر علم فلسطينى فى وسط كل هؤلاء يرفرف .. ولقيت الطلبه الاخوانجيه ( اللى هما فى اولى وتانيه وتالته ثانوى ) بيقولوا بالروح بالدم نفيدكى يافلسطين واستمر الهتاف حتى خمس دقائق وبعد الدقائق الخمس تحول الهتاف الى مصر مصر .. والناس طلعت من الشبابيك والمحلات اتقفلت من كتر زحمة الناس .. وبوكسات المركز طلعت لكن مش قدروا يعملوا حاجة لأن الشباب طلعوا عليها ورفعوا علم مصر عليها رغم ان المخبرين نزلوها لكن الشباب ضربوا المخبرين ورفعوا على مصر على البوكس وهو ماشى والناس واقفين قدامه .. والطريق وقف والناس اتشعبطت على العربيات والزمارات تدى والناس تقول مصر لدرجة انى وانا ماشى لقيت واحد بيعيط من كتر الفرحه بيقول مصر يا بلدى ... ولقينا النار طالعه فى وسط ده كله والاعلام موضوعه على السيارات والتفحيطات فى الشوارع ... والمسيرات لفت شوارع المركز كله ... انا سألت نفسى وقولت والله لو لفلسطين ما يعملوا كده ... ايه اللى جرى .. الكورة لحست دماغ الناس ما على كده لو الناس هتفرح نعملهم ماتش كل اسبوع مع بس عجبنى اوى الانتماء الشديد للبلد .. وعجبتنى اوى الناس وهما فرحانين .. لان كل يوم الناس تعبانه وشقاينه .. الناس عايزه اى حاجة تفرحها اى حاجة ... اللهم ادمها علينا فرحة طول العمر يارب العالمين ومن منطلق انه كاس البطوله وخدنا الكاس وجدت رسائل الاسم ام اس تنهال مبروك لمصر ... وفى هذا الصدد وفى هذه الفرحة العارمة كان الحشاشين مالين المسيرة ... حتى ان والدى لما كنت باكلمه قاللى ميسيرة الحشاشين .. باقولك وصل العدد الى الالاف الااف .. بس احسن ما فيها لقيت اصحابى اللى كانوا ماشين فى المسيرة وشافونى وانا باصور وخدونى فى حضن كبير اوى وقالولى مصر خدت الكاس يا عمرو .. خدنا الكاااااس ... ولفت المسيرة البلد وها انا اذ نرصد لكم وبالصور والفيديو مسيرة ديرب نجم وايضا صور العلم الفلسطينى الذى رفع فى المسيرة وصورة البوكس الذى رفع عليه علم مصر ... ونحيط علمكم ان الصور لم تكن بالجودة العاليه وذلك لأن الدنيا ليل والناس كانت بتجرى والصورة سريعه والى غيرها من العوامل التى ادت الى تصوير هذه الصورة ولكن انصحكم بسماع الفيديو من اول للاخر لأن هو فيه كل حاجة ......

----

الصور ..

اثناء رفع العلم الفلسطينى فى الدقائق الاولى من المسيرة

عندما رفع المشجعون والمحبون لمصر العلم على سيارات البوكس
لاحظوا معنا



اكثر من خمسين صورة للماتش النهائى وصور فرحة المنتخب بالفوز هنا ..

لحظة تسليم الكاس للمنتخب من قبل الرئيس مبارك .. وايضا لحظة تسليم ابو تريكه على الرئيس ولنعرف ماذا قال ابو الرئيس لابو تريكه اضغط هنا
---

والى هنا نكون قد انتهينا من تغطيتنا لمسيرة حب مصر

نهنئك ..

كنت حزينا .. وما زلت حزينا ... حتى عرفت أن اخى (عبدالرحمن) الاصغر منى حصل على94% فى الصف الثالث الاعدادى فى الترم الأول .. لم تسعنى الفرحة التى كانت بداخل قلبى الا وقمت اليه وهنأته وطالبت منه المزيد من الجهد لتحقيق اكثر من ذللك فى الترم الثانى ...

اخى وشقيقى عبدالرحمن الذى ادخل السرور على البيت كله والذى جاء بارقة امل ونور وفرحة وسعادة لنا بعد ان حدث ما زلزل كيان الاسرة الا وهو غرق سيارتنا فى بحر الصرف الصحى ... اللهم بارك فيه ووفقه دائما فى حياته واجعله خطوة من الخطوات التى تستند عليها لنصرة دين الله الاسلام واجعله نصر للامه يارب العالمين ... وكانت له كلمه ذكرها فى منتديات موقع شباب وبس عندما قدم له اعضاء المنتدى التهنئة واردت ان انقلها لكم ..

اقرأ تهنئة الاعضاء له من هنا

وهذا هو رده على تهنئتهم :

يا شباب شباب وبس اشكركم شكرا جزيلا من القلب على على مباركتى لى بهذه النتيجه واتمنى من الله ان يوفقنى المزيد لكى انصر الاسلام وارفع شأن هذه الامه واخطوا الخطوات لننتصر على اليهود ونحرر الاقصى ونواجه محور الشر امريكا ... اعدكم انى سابذل الجهد الذى يرضيكم ويرضى نفسى .. واشكركم شكر الجزيل على الهدايا والمباركات والتهنئه والله انتم سبب من اسباب فرحى الان .. فا انا فرح بشده ولا اعرف كيف اعبر لكم عن فرحتى هذه ... اللهم يارب العالمين فرحكم كما فرحتمونى ... اللهم وفقكم فى دروسكم ... واشكركم شكر الجزيل مرة اخرى