السبت، 30 أغسطس، 2008

بعد احداث ابو كبير .. نحاور اصغر معتقل فى السجون المصريه (خاص لسه عايش)

لسه عايش تحاور "اصغر معتقل فى السجون المصريه" بعد خروجه بساعات قليله كنا اول من ينفرد بالحوار
محمد سيد بندارى ذات الـ 12 عاما يحكى بعد احداث ابو كبير :

- شالونى من السرير وانا نايم وجرونى فى الشارع بالفانله الدخليه وسمعت امى بتصوت كله الا محمد
- وكيل النيابه بيسالنى ايه رايك فى النظام ؟ وانا مش عارف نظام ايه فا قالى اللى هو يعنى الحكومة .. قولتله الحكومة بايظه ومافيش نظام اصلا
- وكيل النيابه قعد يلف ويدور حواليا عشان يعرف منى مين اللى زقل طوب وانا احلفله انى كنتى بالعب كوره
- غرفة الاحداث كانت ضلمة اوى .. ورحت للعسكرى اقوله هات لمبه قالى روح يلا بكره نجيبلك كهربائى ..
- عيطت لما شوفت امى
- انا راجل فى تانيه اعدادى مش طفل زى ما انتوا قولتوا عليا فى مواقع النت والجرايد
- حسبنا الله ونعم الوكيل لكل واحد فى المركز


رفض ان يقال عليه طفل فى بداية الحديث معه وقال قولوا عليا بطل ... محمد السيد بندارى البطل الذى يملك من العمر 13 عاما والذى مكث فى غرفة مظلمه ذات شباك حديدى صغير داخل سجن ابو كبير قرابة الـ 28ساعه والذى قضى اغلبها نوم على البلاط او التحقيق فى النيابه او تجرع واحساس بالالم لانه يريد ابيه وامه معه ..
عندما ذهبت لمحمد توقعت انه سيبكى عندما ابدا فى الحديث معه ولكن معنوياته كانت مرتفعه جدا ومن الغريب انه كان يحدثنى بمبدا عادى لأنه توقع هذا الامر خاصة ان ابوه راجل " محترم والناس كلها بتحبه "
نحاور اصغر معتقل فى سجون مصر كلها الان واقرا معى ولا تستعجب ما يقال فانك اذا اردت تعرف سبب اعتقاله فا استعجب !!!

محمد .. انت فى سنه كام ؟
انا رايح تانيه اعدادى .. وراجل اهوه مش طفل زى ما بتقولوا عليا فى مواقع النت والجرايد
قولى بأه اعتقلوك ازاى ؟
جم قبل الفجر كده ولقيت واحد بيشلنى وبيقولى يلا.. شالونى وانا نايم ومش فايق وسمعت صوت لامى وهيا بتقول " مش ممكن يحصل ابنى لأ" لدرجة ان هما كسروا باب البيت كمان وانا مش سمعته وخلعوا باب الشقه بتاعتنا وباردوه مش سمعته كنت نايم بأه ... وبعد كده كملت نوم وهما شايلنى ومسكنى من الفانله زى الحراميه وقعدوا يجرونى فى الشارع لحد لما وصلنا للعربيات البوكس والميركوباصات اللى كانوا محاصرين الحته وركبت فى البوكس وانا مش فايق اصلا ودنيتنى نايم لحد لما وصلت المركز لقيت واحد بيقولى اسمك قولتله اسمى .. كنت لسه صاحى ساعتها بأه من النوم كده قولتله اسمى وبعدين قالى تاريخ ميلادك كام قولتله .. وبعدين فكونى من الكلابش الحديد ودخلونى غرفة الاحداث كانت ضلمة اوى ومافيهاش الا شباك صغير حديد وكان فيه واحد نايم كده فا صحى اول ما دخلت .. واول ما دخلت وقومت واتوضيت وقولتله يجى يتوضى معايا ونصلى الفجر مع بعض الراجل وافق وصليت الفجر معاه وكملت نومى على البلاط وكل شويه اصحى اساله انت صاحى يقولى اه وهو يسالنى انت صاحى اقوله اه كنا بنطمن بعض .. وعلى الظهر كده لقيت واحد بيقول محمد سيد فا المخبر قال انت محمد قولتله اه انا محمد .. رحت فى عربيه ترحيلات كده وشوفت بابا وقالى مش تخاف يا محمد ورحت النيابه و المحامين جابولى اكل وكلت وانا فى النيابه بايد واحده لأن الظابط مش راضى يفك الكلابش باقوله فكه يقولى انا جايلى اوامر .. وكلت بايد واحده ودخلت لوكيل النيابه تالت واحد والمخبر ودانى وكيل النيابه قاله هو ده محمد السيد قاله ياباشا ايوة قاله ده جاى فى ايه .. قاله ده معاهم بارضه ضحك وكيل النيابه ضحك باستخفاف لصغر سنى وفك الكلابش وقالى اقعد يا محمد ... وقعدت بدا باه يسالنى ويقولى
اسمك ايه ؟ .. جاوبته
كنت بتزقل طوب يا محمد على القوة اللى كانت موجوده ؟ لأ انا كنت بالعب كورة والله يا عمو .. وما شفتش قوه ولا بتاع انا سمعت من الناس
وفضل وكيل النيابه يزن ورا دماغى عشان اقوله مين اللى كان بيزقل وانا اصلا كنت بالعب كورة ومش شفت حد بيزقل ...
وسالنى وقالى ... ايه رايك فى النظام ؟
قولتله سعادتك النظام من ناحية ايه ( محمد لم يعرف معنى النظام اللى هو الحكومة واثارت هذه الجمله استغرابا عند محمد )
رد وكيل النيابه النظام اللى هو الحكومة يعنى ...
محمد قاله النظام بايظ ومافيش نظام والدليل على كده القرار بتاع العيش ده
ايه رايك يا محمد فى قانون المرور ؟
جاوبت : حلو عشان السواق يلتزم ..
سالنى ايه رايك فى سياسة التعليم فى البلد ؟
جاوبت : حلو .. اقوله وحش يعنى
قالى بتعرف تمضى ولا هتبصم قولتله امضى ...
وطلعت وفضلت قاعد فى النيابه لحد المغرب وروحت فى عربيه الترحيلات للمركز والاوضه الضلمة التانى ورحت للعسكرى قبل ما يحبسنى عايز لمبه راح جاب لمبه وطلعت اللمبه مسمار والدوايه قلاووظ .. ومش نفعت المهم زعقلى العسكرى وقالى نام يلا وبكره نجيبلك كهربائى ... ورحت نايم من الساعه عشره لحد تانى يوم الصبح وطلعت على الجمعه كده ...
عايز اقولك حاجة بس .. ان مامور المركز والعساكر كانوا متعاطفين معايا جدا وكانوا بيصبرونى لما بيلاقونى زعلان كانوا بيقولولى باذن الله تاخد براءه او اخلاء سبيل
محمد ... عيطت وانت جوا الحجز ؟
عيطت مرتين المرة الاولى وانا داخل فضلت اعيطت وقولت عايز بابا
والمرة التانيه لما شوفت امى وانا فى النيابه جريت عليها وخدتها بالحضن ومش كنت عايز اسيبها ...
اخبار محمود ايه اللى كان معاك ؟
محمود (بطل يملك من العمر 16 عاما ايضا محجوز ) كان صايم وهو اللى قالى مش تخاف بس هو جه بات معايا الليله الاخرانيه بس وربنا معاه الصراحه بعد لما اخد اربع ايام ... ده الدنيا هناك ضلمه اوى
بابا .. حسيت انه كان عايز يقولك حاجة فى اخر مره شوفته فيها ؟
بابا عارف انه سايب راجل فى البيت وانا دلوقتى شايل مسؤوليه امى واخواتى والبيت ..
ايها البطل .. الناس كانوا شايفينك ازاى بعد لما طلعت مجرم يعنى ولا ايه ؟
لأ الكل كان مستغرب والناس كانت تسالنى ايه اللى حصلك يا محمد فى ايه .. وكل لما واحد يقابلنى يقولى فى ايه خير .. لكن الكل هنا فى الشارع خدنى بالحضن وحبونى وحبيتهم اوى ..
تقول ايه لبابا وبابا فى المعتقل دلوقتى ؟
ربنا يصبرك – باذن الله تخرج – حسبنا الله ونعم الوكيل لكل واحد فى المركز

الثلاثاء، 26 أغسطس، 2008

لسه عايش..


لسة عايش

رغم الفساد والظلم والسجان

لسة عايش

رغم السرقة والتزوير والنهب

والقدر اللى اتكتب ع الشعب

لسة عايش

ربع قرن وفي البلاد الأمن طايش

ولسة عايش

لسة عايش وبكلم نفسى كل يوم

عقلى طار منى من كتر ما شال من الهموم

وعينى ماليها الدمع

ولا شافت في ليلة نوم

لسة عايش على قد حالى

بحارب عشان أجيب رغيف العيش

ولا عمره بيسد جوع

وبشرب من مية الحنفية

وجوايا كبدي مخلوع

وأتعالج في مستشفى الحكومة

ولا عمرها ريحت موجوع على قد حالى وعايز أعيش بالحلال

لكن حرام

كله عليه

تليفون وكهربا للنور ومية

هتجنن!!!

كله حرامية؟؟؟؟!!!

لكن

لسة عايش

الله يهديك يللى في بالي

ضيعت البلد فين

ولا قلت عادي

أهل البلد نايمين؟؟

هو صحيح نايميين؟؟

ولا صاحيين ؟

ولا صاحيين وعاملين نايميين ؟

مش عارف !؟

حكاية طالت وعقدت ولازم يتكتبلها نهاية

كانت غلطة كبيرة

يوم ما ابتدت م البداية

كتير غيري عاشوا الحكاية

لكن ماستحملوهاش

منهم ودعوها

واللى عاش عاش

ومكتوبلى إني أكون

لسة عايش

الجمعة، 22 أغسطس، 2008

وحصلت على اول شهادة لى فى الصحافه



مؤسسه "ديجيتال دريمز" الصحفيه .. تتقدم للاستاذ عمرو محمود سلامه بشهادة تميز وتقديراً لجهوده المميزه فى دوره صحفى المستقبل فنون واساليب "الخبر - التحقيق - الحوار "
كانت الفرحه تملانى من كل جوانبى عندما سمعت الاستاذ محمد مصطفى "رئيس قسم التحقيقات فى جريده اخبار اليوم " ينطق بهذه الكلمات امام المستمعين الكرام وينادى علي لاستلم شهادة التميز فى الصحافه ...
كانت هذه اول شهاده تقديريه لى فى الصحافه بعد ان عاهدت ربى ان اسير فى مشوار الصحافه والاعلام لاحقق مالا حققه غيرى فى هذا الطريق الذى احبه واشتاق اليه ...واتمنى ربى العزيز الكريم ان ييسر لى هذا الطريق ويجعله لى زخرا للاسلام والمسلمين ومن خلاله اكون قادرا على خدمة الاسلام والمسلمين ...
ربى وفقنى .. ومن عليا بالتوفيق واسال ان يرزقنى الاخلاص والنيه الخالصه لوجهه الكريم ...

الأربعاء، 20 أغسطس، 2008

واحترق المكان الذى يذل الشعب ؟؟


- ليست هذه مصر التى عرفناها وليست هذه مصر التى نتمناها ... غصة كبيرة نشعر بها ونحن نرى أهم مؤسسات الدولة تحترق مع إخفاق واضح فى السيطرة على النيران ... إذا كان هناك فشل فى منع أسباب الحريق فكيف نقبل بهذا الإخفاق فى إنقاذ ما يمكن إنقاذه من برلمان يحترق؟! ... والله شىء يدعو للخجل ... أين إجراءات الأمن والسلامة؟! ... وأين أنظمة الإنذار ومكافحة الحريق؟! ... وأين إحتياطات حالة الطوارىء ونحن نعيش دائماً فى ظل قانون الطوارىء؟! ... أطول فترة طوارىء فى التاريخ يجب أن تجعلنا دائماً على أتم إستعداد وجهوزية , ولكن يبدو أن الطوارىء لها عندنا معنى مختلف لا يكترث بهموم الناس ولا بالممتلكات العامة!!! ... وإذا كانت مبانى أهم مؤسسات الدولة بلا إجراءات أمن وسلامة فهل نتوقع أن نجدها فيما دونها من مؤسسات ؟! ... فى الحقيقة أن الفشل فى منع إندلاع الحريق فى مبنى مجلس الشورى والإخفاق فى السيطرة عليه بالسرعة المطلوبة يشير إلى مستوى التردى الذى وصلنا إليه فى ظل نظام يفتقد إلى "الشورى" ... فبعد اليوم لا يجب لهؤلاء "الممثلين" أن يستمروا فى إدعاء أى إنجاز بعدما إقتربت النيران من كراسيهم التى يجلسون عليها فى مؤسسة لها أهميتها الخاصة ... أتمنى أن لا نفقد وثائق ومستندات وملفات مهمة فى هذا الحريق ... ويجب أن يكون هناك تحقيق جاد لا يخفق فى تحديد الفاعل ... فهذا الحريق لا بد له من فاعل ... هذا حريق فى مبنى البرلمان وليس حريق غابات ... لا يجب التذرع بحجج ساذجة مثل "ماس كهربائى" أو "عقب سيجارة" ... ولا يجب أن يُعزى سبب الحريق الى الإهمال وكأن الإهمال لدينا عذراً مبرراً ... هناك فاعل وراء هذا الحريق ربما يكون جهة داخلية أو خارجية , وفى حالة التأكد من عدم تلف وثائق أصلية وملفات مهمة فإن هذا يمكن أن يقلل من إحتمال أن يكون الفاعل جهة داخلية ... لا نريد أن يكون لدينا فترة برلمانية طويلة بلا ملفات ونكتشف فى النهاية أننا كنا أمام ممثلين فى تمثيلية طويلة لا ينهزم الشر فى نهايتها ... نيران حريق البرلمان قد خمدت بعدما أتت على بعض محتوياته وملفاته وتسببت فى خسارة كبيرة ... لكن نيران الغضب فى صدور المصريين لم تخمد منذ زمن طويل غابت فيه الشورى الحقيقية وطغى فيه فساد الحكم والتهم الأخضر واليابس ولا يريد أن يترك البلاد إلا وهى خاوية على عروشها ... لكن لا يجب أن نفقد الأمل فأرضنا وإن بدت جرداء لكنها خصبة ودائما تنبت من جديد ... ليس هذا كل ما يمكن قوله ....

- صرح مصدر مسئول فى شئون الفلافل والفول ان المجرم ايمن نور واعضاء الجماعة المحظورة هم السبب فى الحريق وعلية فان الحكومة تطلب مد قانون الطوارىء لمدة 90 عاما اخرى نظرا للاوضاع واسناد عملية اعادة البناء لمبنى الشعب والشورى للمقاول رجل الاعمال هشام مصطفى بمبلغ 5 مليارات سوف يتم جمعها من الشعب من المخالفات والضرايب الجديدة

-جابوا الجيش وطيارات القوات الجوية والكهرباء ومرفق المياة ورجال الدفاع المدنى واللواءات وكان الاداء قريب من الصفر - النار فى الدور التالت وتنزل على الدور التانى ثم الاول - لا احد يهتم - هى كانت بلد ابوهم امال ايه عز يجى يتفرج على النار من بعيد ويهرب زى القطه ..بكرة النار تاكلك انت وصفوت وشرور يا عز - الدولة اكتر من 6 ساعات عربيات مطافى تخرج وتدخل والنار بتزيد براحتها لغاية ما لقتش حاجة تحرقها - وامنيات الناس ان تمتد الى مجلس الشعب المجاور وياريت يكون الاعضاء والحكومة داخلة يولعوا بجاز وسخ مع بعض

اداء الدولة منهار ورئيس دولة بيحشر اسمة فى كل حاجة كانة بيعمل دعاية لنفسة وسط المصيبة ومذيع قناة النيل يذيع كان الحرب العالمية التالتة هناك عند مجلس الشورى بطريقة دراماتيكية وطيارة جايبة كوزين مية بترميهم من بعيد بعدم احترافية ومن ارتفاع عالى وضغط المياة فى الخراطيم ضعيف جدا صورة مثالية لاداء دولة منهارة وكان ناقص يستعينوا بمستثمر رئيسى يطفى لهم الحريقة فهم قرفوا الناس بحكاية المستثمر الرئيسى وياريت وزير المالية او الاستثنمار يفكر يبيع جهاز الدفاع المدنى وبتوع المطافى لخواجة اسرائيلى لتحسين ادائة مهزلة يا بلد

- ليس لنا نحن الشعب المصري المسكين إلا أن نقول حسبنا الله ونعم الوكيل وليعلم أهل البرلمان المصري والحزب الحاكم أن الله يمهل ولا يهمل سبحانه وتعالى فهذه آية من آيات الله وتحذير فقد أتت النار على المبني بالكامل بما فيها من قوانين ظالمة للشعب المصري والحكومات التي لا يهمها إلا إذلال الشعب تحت وطئة العيش لينعموا هم في مارينا وما شابهها.

وأفوض أمري إلى الله إن الله بصير بالعباد

فيديو .. صورة وجوده عاليه .. وغير منقول من اى وكالات اعلاميه او حتى قنوات فضائيه ومصور من اعلى ابراج امام المجلس



صور من وكالات انباء للحريق











































الأحد، 17 أغسطس، 2008

انا بايعها ... بس بايعها لربنا

محمد بيه حلمى ... انا بايع مستقبلى .. ورسالتك وصلتلى ... وهذا هو تاريخك عندما مسكت رئيس مباحث مركز ديرب نجم بالشرقيه
----

الصقر الذى اراد ان يعرف من انارئيس مباحث مركز ديرب نجم - محافظة الشرقيه .. محمد حلمى
محمد حلمى ... رئيس مباحث مركز ديرب نجم محافظة الشرقيه ..
منذ زمن وانا اريد ان اكتب عن هذا الرجل .. سواء فى ايجابياته او سلبياته .. ولكنى كنت اتمهل فى الكتابه عنه خاصه ان هناك من قال ان الكتابه عن هؤلاء هو خط احمر لا يجب اختراقه ... ولكنى اردت ان اخترق الخطوط الحمر واكتب ما يجول بخاطرى تجاه هذا الرجل الاسد والمكشر عن انيابه دائما ضد كل من يقف فى عقبه طريق - امن هذا البلد - سواء اخوان او تجار البانجو والصراضير او لا مؤاخذه كل مجرم قاتل فاسد ناهب مرتشى ... اعذرونى ان كنت قد وضعت الاخوان مع مهددين لامن البلد .. لأن هذا ما يحدث بالفعل .. ويحدث فى اى مركز ايضا فى جمهوريه (ليست مملكه ) مصر العربيه ...
ولكن قد يكون هذا المركز فريد من نوعه بعض الشئ فى تعامل هذا الشخص مع الاخوان ... وتعامله مع المجرمين .. فقد جاء هذا الرجل وفرق بين الاثنين .. نعم حسب رؤيتى الخاصه له فانه فرق بينهم ...
تعالوا نتكلم مع تعامله مع المجرمين والقتله والمهربين والمرتشين وباقى الاوصاف التى تطلق على الخارجين عن القانون ...
هذا الرجل مزج بين الشده والعنف (هناك فرق بين الشده والعنف ) لعب لعبة التوازن وقدر على اقصاء بعض تجار المخدرات الصغار .. ولكن ما يحدث يا ساده ان هناك تجارا انتشروا كل الانتشار واصبح اقصائهم صعب جدا .. فا بدا هذا الرجل يتعامل معهم على انهم يبلغوا كل فتره على تاجر ولا حاجة ... يعنى عشان سيادة المقدم يمشى نفسه ... لن انكر ان هذا حدث ايجابى .. ولكن لماذا تخاف سيادة المقدم فى ان تخترق اوكار تجار البانجو والحشيش وانت اول من تعرف اين تباع .. ومن الذى يبيعها وتباع فى العلن .. لماذا فكرت فى ان تتعامل بتوازن القوه معهم وفضلت ان تكون بعيدا عن ما يحدث ما دام الامر مستتر ...
محمد حلمى يتعامل مع تقارير مخبريه ان الكل فوق التمام ولا ينزل ليرى بنفسه ما يحدث ...
واضرب لكم المثال البسيط لذلك .. فهناك صيدليه تبيع الصراصير فى البلده .. وعندما يقوم احد بتقديم اى بلاغ يبعت المخبر .. المخبر يظبط مع صاحب الصيدليه ... سيادة المقدم محمد حلمى يطمن ان الامر تمام وان مقدمين البلاغات دول اولاد ستين فى سبعين ...
تعامل مع كل المجرمين بمبدا .. الباب اللى يجيلك منه الريح سده واستريح ...
مبدا غريب لاحظته مع هذا الرجل خلال نزولى الى الشارع واحتكاكى مع الناس عندما سالتهم عن هذا الرجل ... قالوا لى انه يتعامل من باب سده واستريح ...
ايضا لن انكر ان هذا الرجل كان له دور كبير فى مقطع الفيديو الذى صورته عن تهريب الدقيق .. والذى جاء بقوته وواجهم بما هو مكتوب وبالتهريب الحاصل ...
---
اما مع الاخوان والمعارضين فهو محترم جدا جدا جدا ... مقارنه برؤساء مباحث المراكز الاخرى .. فهو يسمع كلام مخبر امن الدوله .. يصطحب القوه ويتعامل مع من يعتقله من الاخوان بكل احترام غيرا عن سابقيه فقد شهد له الكثير من اهالى المعتقلين اثناء اجراى حواراتى معهم انه كان يعاملهم باحترام شديد جدا .. وهذه نقطه تتحسب له فى تاريخه
ايضا يتعامل بمبدا الصفقات والاتفاقات مع الاخوان فى صلوات العيد وغيره من النشاطات ... فيحاول الاخوان ان يكونوا مرنين معه بكل السبل .. وايضا يتعامل مع قيادات وكوادر الاخوان فى المركز بكل احترام وتقدير ...
ولن ننكر له ذلك ...
---
محمد حلمى .. رجل له الكثير من العلاقات مع وجهاء البلد والقيادات الشعبيه ... وايضا شهد له صحفى من صحف المعاضه - عادل الشاعر - بكل احترام وتقدير وانه متفاهم جدا ... اذن ليس له اى مشكله مع اى من اهل البلد ...
ولكن كما قولنا ان مشكلته كلها تكمن فى كيفيه مقاومه الخارجين عن القانون
---
والان جئت للسؤال الاخير .. لماذا كتبت هذا الموضوع ؟
كتبت هذا الموضوع بعد ان عرفت انه سال عليا احد كوادر الحزب الوطنى - والذى انا على علاقة قويه به - وهو يعتبر صاحب البيت الذى اسكن فيه ... وقال له هل لديكم احد يسمى بعمرو سلامة .. قال اه وبدا فى ان ياخذ ويدى معاه .. مين اللى بيجيله كتير .. مين اللى بيقعد معاه .. وواخد نت من مين ... وهل له علاقة بالاخوان ... وماذا تعرف عن والده ...؟
وبعدها بيومين اتصل احمد عابدين مرشد امن الدوله أو عصفور امن الدوله بالمركز بصاحب البيت مره اخرى وساله عليا وكرر نفس الاسئله
وبلغ له رساله يبلغهالى ولكن بطريقه غير مباشرة .. اعذرونى عن عدم ذكرها ...
ولكن ساذكرها فى وقت لاحق
انا اكتب هذا الموضوع وانا متيقن يقين اليقين انه من متابعى هذه المدونة ... وانه وضعنى فى دماغه ...لكن انا مين يعنى عشان يحطنى فى دماغى انا بشر عادى جدا لى راى وفكرى ولى ضميرا يقول لأ لكل من هو ظالم ..
محمد بيه .. مش تزعل ان قلت لك اننى لن اتبع ما قلته فى رسالتك لصاحب البيت .. ولكنى ساسير على ما انا اسير عليه ... طريق الحق
ومش خايف على مستقبلى (بالفم المليان .. انا بايعه )
سلامو عليكم

الاثنين، 11 أغسطس، 2008

بالصور .. تخاذل مصر حكومة وشعب .. تجاه مليون ونصف المليون فلسطينى

أين العرب ... طب بصوا عشان العرب دى كبيره اوى هأختزلها فى الشعب اللى انا بانتمى اليه ... اين شعب مصر ... ولا باقول كتير اوى شعب مصر ده .. خليها اين شباب مصر .... لا لا لا كبيره اوى الشباب ... هنخلي الحمل على الريس والحكومة طالما انت مش عايز تشتغل يبقى فيه حاجة بتمثلك قدام العالم ... اين افاااكوا مصر العظماء ... اين منافقى مصر فى مجلس الشعب .. اين بغبغانات مصر الذين يتحدثون عن افضالهم تجاه شعب اعزل - اختار الاسلام حكومة - ... اين الحقل احمد ابو الغيط الذى قابل الوفود الاوروبيه والاجنبيه صبيحه يوم الاحد لمناقشه فتح المعبر ... اين صوتكم يا شعب مصر ... يظهر ان صوتكم اتنبح طب بلاش الصوت .. طب اين ؟ ... انا زهقت من كلمة اين وفين ومشتقاتها ...
اين الحمار عندما ينطق ابنه عايز اكل

لن الوم الشعب المصرى لأنه لم يتحرك على لنصرة اخوانه فى غزه فى مثل هذه الوقفه وذلك لاسباب عده منها :
1- الدعوه لم تكن بالشكل المناسب
2- الشعب المصرى اغلبه عايز ياكل عيش
3- دلوقتى الغلا طحن الناس .. فا لازم يشقوا ويتعبوا ويبعدوا عن السياسه
4- دماغك وفكك ...
5- الخوف والجبن
بس خلاص
---
وقفة احتجاجيه كانت امام وزارة الخارجيه كانت حوالى 20 فرد من تجمعات عده استطيع ان اعدهم لك على يدى وافنطهم واحد واحد
- عمل
- كفايه
- يسار
- اخوان وكانوا خمس انفار ..
المهم انها كانت وقفه مش هنقول كانت وحشه لكن كنا نتمنى ان ننتصر لاخوانا الفلسطينين باكثر من هذا العدد ... كنا نتمنى ان نرفع راس مصر عندما تطالب بالدواء للفلسطنين .. كنا نتمنى ان نعاملهم حتى معاملة السجناء نعطيهم الطعام والدواء .. كنا نتمنى ان نقدم الكثير لهؤلاء ولكن كان السور هو الفيصل ... كان الاسمنت والطوب والسلك الشائك هو الحد الذى وضع بيننا وبينهم .. كانت اللواءات وعساكر الامن المركز والقوات الخاصه تمنعنا من ذلك ... كلبشوا كل من فكر فى اخوانه هناك ... وضعوه فى الاقفاص كالكلاب ذلونا ... حتى لا نتخلى عن فكرة تحرير الاقصى ...
ولكننا رغم كل هذه القيود ... وقفنا هذه الوقفه لنعلن بلافتتنا الورقيه امام دخول الوفود الاوروبيه الى وزارة الخارجيه اننا ضد حصار الانسان ... اننا ضد حصار السجناء ... اننا نريد ان نعاملهم معامة اليهود
ناتي لصور الوقفه ونعتذر للاخوه الفلسطينين اننا لم نكون نمثلكم بالعدد المطلوب انتم وقفتم عشرة الاف ونحن وقفنا 20 ... اقدم اسفى الى كل من اعرفهم من فلسطين .. محمد - حمزه - عزه - مجاهد - اسلام - ابو عتيبه .... كل من اعرفه ولم اذكر اسمه سامحونا لظروفنا ... سامحونا ... اننا نريد ان نساعدكم وبنية صادقه ولكن هناك المتسلط الذى يسلط على هذا الشعب الجبار (المصرى ) .


عمرو سلامة ..













----

التغطيه على مواقع اخرى ..

وقفة احتجاجية أمام "الخارجية" المصرية لفك الحصار عن غزة .. على اخوان اون لاين

وقفة احتجاجية أمام وزارة الخارجية المصرية للمطالبة بفتح معبر رفح يشارك بها عشرين مصريا فقط من أصل 80مليون مصرى !! ... مدونة نيوز فلسطين

على الشبكة الفلسطينيه للحوار .. اليس من العيب ياشعب مصر ان يشارك 20فرد فقط فى وقفة للتضامن مع غزة:لم يكون هذا الأمل

على موقع حزب العمل ..
وقفة أمام وزارة الخارجية للمطالبة بفتح معبر رفح
مجدى حسين يلتقى مساعد وزير الخارجية فماذا دار فى اللقاء ؟

فى جريدة البديل ... مظاهرة أمام «الخارجية» للمطالبة بفتح معبر رفح.. و «حماس» تنهي اعتصامها أمام المعبر

فى جريدة المصرى اليوم .. وقفة احتجاجية أمام وزارة الخارجية في «اليوم العالمي لفتح معبر رفح وفك الحصار عن غزة»