الأحد، 29 يونيو 2008

من انفاق رفح الى غزه .. ننشر لكم صور حصريه

عندما اعدت العده من قبل العدوالصهيونى لحث الرئيس المصرى على اغلاق الانفاق الموجوده بين رفح وغزه ... واعدت العدة بتجهيز كاميرات على حدود معبر رفح ... حتى انهم اقاموا بتدريب فرقه من الجيش المصرى على اكتشاف الانفاق فى ولايه امريكيه تسمى بتكساس ... والعجب العجاب ان المصرين يوافقون ويقبلون التنازل ويريدون حصار غزه ويطيعون ويسمعون الكلام حتى لا يعيش الغزيون بل يموتو جوعا وموتا بسبب اخوانهم العرب الذين يمنعون عنهم الاكل بتحريض من ابناء القرده والخنازير ..
ان الرئيس مبارك صاحب مقوله " سيب الفلسطينين يالكوا مادام مش ليهم ضرر على البلد " هو ايضا صاحب قرار هدم كل الانفاق التى تبعث بالماكل والمشرب الى غزه هو صاحب قرار بيع الغاز لاسرائيل وبيعه عن غزه .. هو صاحب قرار التكبيع " الكويز " مع اسرائيل هو صاحب اتفاقيات الجزر والسلام والخيار مع اسرائيل .. هو المساعد الاول لليهود فى حصارهم على غزه ... نعم مبارك هو المسؤل امام ربه عن مليون ونصف المليون يعيشون فى غزه زائد انه مسؤل عن 77 مليون من الشعب المصرى يعنى لو اتحاسب على نفر نفر كده بالصلاة على النبى فيها جهنم وبئس السعير " لا احكم على احد جهنم ام جنه بل هو من الممكن ان يكون افضل منى ومنك عند ربه وربى " ولكن هذا الموجود امام اعيننا قتل مباشر لاطفال غزه لدرجه ان لبن نيدوا انتهى من اسواق غزه واخذوا يهربوا عن طريق الانفاق التى هدمها مبارك ... انهم اطفال يا سيادة الرئيس ... لماذا تمنع اللبن عنهم .. لماذا تمنع االاكل والغاز عن اخوانك العرب فى غزه ...
لم اجد تفسير لهذه المؤامرات العربيه تجاه شعب اختار الاتجاه الاسلامى ليكون قائده فى حربه الشرسه ضد اليهود ... مخى مهبول مش قادر يفهم ان مبارك العربى بيحارب الفلسطينى العربى ... طيب يا جماعه تيجى ازاى دى اه يهودى يحارب عربى اه لكن عربى يحارب عربى ... حاجة اخر ذل وانكسار وضعف وهوان وشده
طبعا هوه مش إنفراد ولا حاجة بس يمكن صور تنشر لأول مره عن تهريب أخطر سلاح علي وجه الأرض إلي قطاع غزة
سلاح فتاك يهدد أمن مصر القومي
وأنا إذ أنشر تلك الصور اليوم لأدلل علي مدي الخطر الذي يهدد مصر في حاله فتح معبر رفح العنصري
وطبعا هنشر مواصفات السلاح الأول والجهه المهربه
نوع السلاح : لبن نيدو للأطفال من سن 6 شهور حتي 3 سنوات
الجهه المهربه : أهل غزة
الجهه المستعملة للسلاح : أطفال غزة
الماده المفجرة المستعملة في السلاح : نووي
الجهه الوارده المصنعه للسلاح : إيران
شحنه السلاح الخطير ( نيدو لبن الاطفال تنزل الى النفق )
يطمئن المجاهد انها نيدو لاطفال غزه
يخلوها النفق
يحملوها سوا طوال هذا الطريق الطويل
هيلا هوبا
اللهم صبرنا على حصارنا
فيه خطوط تليفون فى السكه .. احنا وصلنا غزه اهوه استنونا

وها هم قد وصل المجاهدين غزه

انها لبن نيدو لاطفال غزه وليس السلاح كما تدعون يا عرب ... يللى شاركتم العدو فى الحصار علينا .. لعنه الله عليكم

الأربعاء، 25 يونيو 2008

الحرامى الكبير والصغير .. فى مصر


من النتائج المترتبه على الحرامى الكبير فى مصر ظهور حرامى اصغر ... هكذا استنتجت المعادله التى تكاد صعبه فى الفهم والمعنى ايضا ..

نعم فالحرامى الكبير يتمثل فى وزراء مصر ومحتكريها ورؤساء اداراتها .. كلنا يعرف من هو الحرامى الذى نهب البلد واخفى الاموال المنهوبه فى سويسرا وفى بنوك الغرب ... وكلنا يعرف من الذى يقوم باخذ الرشوة سواء فى ادارات المرور او فى مصالح او مؤسسات مصر .. وكلنا يعرف من هو الذى يبيع اراضى مصر بابخس الاثمان لكى يعمل بيزنس من وراه ... كلنا يعرف من الذى يذل الشعب المصرى ويضعه تحت طائلة جزمه النظام .... نعم كلنا يعرف عز وعباس ومتراس وابو قرعه وبشعر ودلدول امه وغيره كتير ... كلنا يعرف ان نائب بلدته فى مجلس الشعب حرامى درجه اولى ... كل بقى حرامى فى حرامى ...

ولكن المعادلة التى اتحدث عنها حدثت لى من قبل ايام قلائل صغيره جدا ...

وهيا انى قابلت صاحب المخبز الذى صورت له تهريب الدقيق وجه لوجه وكان هذا اول لقاء بينى وبينه (غضا عن ما حدث فى اللقاء ) فانه قال لى جمله لم اكن اتوقعها قالى تعالى اقعد معايا يوم واحد فى المخبز بس وانت تشوف بتوع التموين ... لازم ياخدوا فلوس عشان مش يكتبوا عليا غرامه ويقفلولى المخبز .. اديهم انا منين ... اللى باكسبه بالحلال بياخدوه زائد انى عندى 30 عامل شغالين ياكلوا منين لو انا وزعت الفلوس على بتوع التموين .. لازم اعمل كده ... لازم ابيع دقيق .. رئيس التموين بياخد ومساعديه والحاشيه والله حاشيه ... اصرف عليهم منين وادى فلوس الخبازين واكسب انا منين ... اذن فرئيس التموين ( الكبير ) يأخذ امولا لكى لا يهدده باغلاق مخبزه ...

اذن المشكله التى ادت الى الحرامى الصغير ان يفعل ذلك هو رؤساؤه فى العمل خلوه يعمل كده واحوجوه على كده ...
واذا نظرنا بمنظار عام على منظر البلد سنجد ان مصالح مصر كلها بتسرق وبتتسرق ... سنجد ان كل الكبير يسرق والصغير واللى اصغر من الصغير ...
وبعد سنوات نجد انفسنا محاطين بنهب فى ثروات البلد ومقدراتها .. نجد انفسنا غير قادرين على امساك الزمام لا بالصغير والكبير ...
اريد ان اضعكم فى الصوره .. واسال بعض الاسئله ..
اذا لم يسرق الصغير من اين ياكل والكبير عايز رشوه ..
لماذا يسرق الكبير هل هيا قلة تربيه وقلة اصل .. ام قله فى المرتب ..
غش فى الامتحانات .. وفساد فى الوزارات .. وحتى المراقبه على مقدرات الشعب اصبحت ضائعه وبتاخد فلوس على اللى بتراقب عليه ...
ايها الناس افيقوا من غفلتكم واعلنوها ثورة .. افيقوا ما بداخلكم من ضمير استيقظوا وكونوا مرصادا ضد الغش والسرق والنهب ..
لن نجد مصر بعد قليل ... اذا استمررنا على هذا الحال .. من نعم وحاضر وموافق وطيب وخد ومش تجيب ... قولوا مرة لأ ... لازم الفساد يقف .. لازم النهب يقف .. لازم فلوس البلد ترجع لشعبها .. لازم ولازم وضرورى ... افيقوا يا شباب مصر ( مش شباب الحزب الوطنى ) .. باقول شباب مصر
* ملحوظه : هذا لا يعد تراجعا منى على ما صورته فى قضيه سرقه الدقيق وتهريبه .. ولكنى اضرب لكم مثلا وهذا هو اقرب مثال لى ولكم ... ونحيطكم علما انا لا بتخوفنى اى حركة ارهاب ولا اى حركة سلم وتفاوض معايا .. انا لما باسلك طريق باسلكه صح وباخلصه للنهايه ...
والى كل واحد مفكر نفسه انى خفت وتراجعت عشان شلت الصور اللى فوق فا ده ابدا لأ ولن يكون انا شلتها عشان مساحه الموقع وزودت المواضيع تحت ...
وايضا انبه ان مثال الغش فى االامتحانات ايضا ينطبق عليه هذا الموضوع ... فا هذا سبب فى ضياع مصر من غش للمعلومه وتسريب الامتحان وبيطلع ناس فشله تسرق وتنهب ..

الأحد، 15 يونيو 2008

وحذفنا موضوع الغش .. وهذه هيا الاسباب؟

غش فى الازهر .. وتسريب للاسئله
بعد نشرنا لموضوع الغش ... وايضا كان بالصور وفضحنا ما يجرى فى المعهد الازهرى بديرب نجم من تسريب للاسئله ودخول الاجابات وغيرها من وسائل قذره لا ترتق بأن تكون فى معهد ازهرى وصرح من صروح الاسلام والمسلمين ....

وايضا لموضوع الهرج والمرج الذى ساد لجان الثانويه العامه بالتربيه والتعليم من خروج لعلب السجائر وانتقالهم من مقاعدهم والغش الجماعى الذى حدث .. فى وجود المراقبين ونشرنا لذلك صورا تدل على ذلك .. وكانت ان المفاجاه ان ملتقط هذه الصور اخرج الموبايل فى وسط اللجنه وصورها ... مما يدل على مخالفه صريحه لقوانين الامتحانات والتشديد على عدم وجود اى موبايل داخل اللجنه .

حذفنا الموضوع ... لماذا ؟

ياتى حذفنا للموضوع بناء على ما جرى خلف الكواليس ... مما كان قد يترتب على الموضوع من فصل سنتين لكل من شارك فى عمليه الغش خارج اللجان ... وايضا من تصحبح الورق فى لجان خاصه داخل غرف التصحيح بالازهر الشريف ... وكان المستهدف الذى اود ان اوصل اليه رسالتى للناس قد وصل فعلا ...

ومن هنا اتقدم بخالص التمنى من الغشاشين عدم الغش حتى لا يكونوا منعدمى الضمير و مزورين للحقائق خانعين فاشلين فى حياتهم ...

واتقدم ايضا لزملائى الاعزاء اللى زعلتهم بخالص التحيه .. وعشان العشم يا زيييييييكو حذفت الموضوع ...

نأتى لتداعيات موضوع الغش

حدث ان هناك نفرا من القوم ويدعى احمد او محمد عبدالباسط .. هكذا قال لى اسمه فى مكالمه هتافيه حدثت بينى وبينه فى الساعه التاسعه مساءا يوم الاربعاء بتاريخ 18\6\2008 بانه اتصل بيا وقالى انا باهنيك على موضوع الغش قولتله الله يبارك فيك .. قالى انت مين بأه عشان تكتب عن الموضوع ده قولتله انا اللى بتتصل بيه لا مؤاخذه ... قالى انا ولى امر طالب وابنى فى الصور قولتله يافندم ابنك مش فى الصور ... قولتله قاصدك تقول ان ابنك غشاش وخايف عليه لا يسقط .. ما الغشاشين كتير ... قالى انت مين يلا عشان تعمل كده انا هاموتك قولتله استخبالى تحت السلم ... قالى انا عايز اقابلك قولتله ورايا الديوان مش فاضى ... قالى مش تنرفزنى قولتله انت اللى مضايق نفسك عشان ابنك مش هيعرف يغش ... قالى انا عايز اقابلك قولتله ماشى .. قولتله كمان عشر دقايق واكون مستنيك فى المكان الفلانى .. قالى تمام .. جه المكان الفلانى ورن عليا قولتله مش فاضى اجيلك .. قالى انا جبت صورتك وهاربيك وهادبحك ومستخبيلك فى الدرا .. وكلام كده وسبته يهرتل .. وقفلت السكه اتصل تانى مش رديت اتصل تالت فتحت عليه وقفلت .. حرم يتصل تانى ...

اعتقد ان هو من متابعى المدونة ده الا ما كانش عرفنى ... ومن هذا الموضوع باوجه له رساله واقوله المكالمه متسجله يا سيد عبدالباسط ... وبايدى دلوقتى اروح اقدم بلاغ فى المركز بتهديد وشروع فى القتل وسب وقذف وبلاغات مش تنتهى منها لا اول ولا اخر ... فا خاف على نفسك لأن انت اللى فى موقف ضعيف مش انا ... وممكن اخد عليك تعهد قدام رئيس المباحث ولا تقدر تمس شعره منى ...

وانا شلت الموضوع اهوه وغش انت وابنك براحتك ... يا غشاشين

2 - من تداعيات الموضوع ... اقبلت الصحفيه ايمان عبدالسلام صحفيه بالدستور برساله الى عبر الايميل تخبرنى فيها انها عايزه الموضوع ... وخدته بالصور وهنا احيط علمكم ان الموضوع ممكن يوصل الصحافه فى اى وقت ... وسلامى الى كل من يظن انى بخاف او باتهدد

3 - كان هناك زملاء اعزاء من ظننتهم انهم سوف يكونوا لهذا الموضوع بالمرصاد بل وجدته يتحايل ويقول اخويا جوا واللى عبدالحميد جوه .. واللى بتاع جوه وعشان خاطرى والعيال هيسقطوا ... بس رسالتى وصلت ليهم وعرفتهم على الحقيقه

4 - ان امين الشرطه الجالس على البوابه ولم نلحظه فى الصور ... التزم الحضور من ثانى يوم نشرت فيه هذا الموضوع حتى انه قال لبعض الشباب المشارك فى حل الاجابات المسربه "امشوا من هنا يا خونه"

5- الموضوع له اثر كبير جدا داخل المركز ... واصبح كل من هب ودب يتكلم عن الغش بالطرق القذرة والمتحايله من تسريب للاسئله فى معهد الازهر بنين ... وعرفت ان المسؤلين متابعين المدونة وبدورى اشكرهم على ردودهم الايجابيه لمثل هذا الموضوع

-----

كلمه اخيره ... باوجهها لكل اللى قالى ان انسحبت .. لأ ده كان كارت ارهاب ومش عندى مانع ابدا انشر اى فيديو من عندى ولكم منى كل احترام وتقدير لكل زوارى الاعزاء...

الخميس، 12 يونيو 2008

حاليا .. انا باذاكر


اعذرونى يا زوار مدونتى الاعزاء ... نعتذر ولمدة تمتد لاسبوع والنصف عن عدم كتابه اى موضوع فى المدونه الا لو كان تحديث لهذا البوست لتضامن مع حملات كثيره طلعت الاسبوعين دول ....واعتذر ايضا عن عدم الرد على اى تعليق فى الموضوعات الماضيه ومتابعه المدونات اللى باعلق عندها واللى ليهم عندى تعليقات ومش علقت

فا انا ارجو منكم حاجة واحده بس تقولولى *ربنا يوفقك *.. بس مش اكتر وربنا يكرمكم يارب ... واعتذر مرة اخرى لعدم تحديثى المدونة بانتظام ولكن هنحدث البوست ده اه .. لكن المدونه لأ ...

ولكم من الكثير من الشكر والاعتراف لكم بالعرفان وتقدير الجميل يا زوار المدونة الاعزاء

حد عايزنى انا بافتح الميل ممكن يكلمنى عليه او يبعتلى اى حاجة

amr_4online@yahoo.com

ومن اراد الاطلاع على ارشيف المدونه فليطلع عن طريق الارشيف الموجود بتاريخ الموضوع فى الشهر والسنه فى الجمب الايمن فى اسفل المدونه .. وربنا يكرمكم ويجزيكم كل خير ...


الخميس، 5 يونيو 2008

ابى يدعو امام قبر رسول الله .. ماذا قال ؟



ابى كان فى عمرة عن قريب ... قال هذه الكلمات امام قبر رسول الله صلى الله عليه وسلم فى المدينه ... ونحن اذ ننشر نص ما قاله .. ونسال الله ان يبارك له فى عمرته ويغفر له ذنوبه ويخرجه من بيت الله كالثوب الابيض النقى ... وبمناسبة انى ابنه دعونى اسمع لكم ما قاله ...

وقفت أمام قبر الرسول الكريم منكس الراس جياء وقد هربت منى الكلمات .
كلى حياء منك يارسول الله ..
أحسنت التبليغ عن ربك وما احسنا .. واحسنت النصح لأمتك وما نصحنا .. وحملت كتابك وبقوه وما حملنا .. وانتصرت للحق وما انتصرنا .. واكتفى بعضنا بلحيته وقال هى سنتك .. وقصر البعض جلبابه وقال هو امرك .. واستسهلوا السهل وخانوا الاهل ؛ واكتفوا من الدين بقشرته ومن الجهاد بسيرته .. وقعدوا وقعدنا معهم .. وركب اكتافنا الدون والسوقه ورعاع الناس وشذاذ الافاق وسفحوا دماءنا واستباحوا ارضنا وشتتوا شملنا .

يا شفيع العالمين وجاه الضعفاء والمنكسرين اشفع لنا عند ربك لعله يتوب علينا ويرضى فقد وعدنا ووعده الحق أننا سندخل المسجد كما دخلناه أول مره ، وسندمر كل ما رفعت اسرائيل من بناء ، وكل ما شيدت من هياكل .. فلا توبة لنا الا بتوبته ، ولا رضا الا برضاه .. ولا مدخل شفاعته الا من بابك ، ولا قربى الا من رحابك .

ادع لنا الا يطول علينا الليل والا يدركنا الويل . والا نموت فقراء مذلولين لحكامنا الذين نكسوا رؤوسنا فى الارض واعتقلوا كل من ينادى برسالتك واوقفوا الطريق امام دعوتك ... اللهم يا الله انصرنا على قوم مننا قد تجبروا علينا وسلكوا كل السبل للوقوف امام دينك ..

والسلام عليك يا محمد وصلوات الله عليك يوم ولدت ويوم مت ويوم تبعث حيا ..

والسلام على الكرام البرره ؛ سادة البشر وائمة الدنيا .. أبى بكر وعمر وعثمان وعلى .. والنجوم الزواهر من صحابتك الذين عاشوا تحت ظلال السيوف ، وادع لنا نحن جندك فى مصر الذين قلت عنا اننا خير اجناد الارض واننا فى رباط الى ان تقوم الساعه .. أن نكون عند حسن ظنك .. وان نكون مصداقا لنبوءتك واية لرسالتك

والسلام عليك الى يوم يقوم الاشهاد ..

الثلاثاء، 3 يونيو 2008

حتتى الستات منعوهم من دخول المساجد


بناء على تعليمات ( امن الدوله ) ممنوع القاء دروس للسيدات داخل المسجد ...
نعم هذه حقيقه فا أمن المدوله والمكلف بحمايه امن بلادنا يمنع السيدات من القاء الدروس الدينيه داخل المساخد .. هكذا قرات على هذه الورقه فى اكبر مساجد الزقازيق المسمى بمسجد القدس الموجود بجوار موقف المنصورة فى الزقازيق ...
امن الدوله هذا الجهاز الذى تخصص فى منع والتضييق على الاسلام حتى داخل دور العباده .. لماذا لم نجد لافته من امن الدوله داخل كنيسه تطالبهم بعدم القاء الدروس داخلها ... امال لازمة المسجد ايه يا ناس يا مسلمين ... لازمته نصلى ونمشى وبس ...ده المسجد ايام الرسول كان مسجد ومدرسه وتخطيط لحرب واجتماعات وكل حاجة ... نيجى على اخر الزمن ونلاقى امن الدوله واللى بيحمى ولا بينيل بدليل الجرائم اللى حصلت الاسبوع اللى فات بمنع المسلمين من تاديه مشاعرهم وبامر من الرئيس ...
حتى دروس الستات خافوا منها .. اصلهم هيطلعوا يعملوا عمليات ارهابيه لما يخلصوا درس .. الستاااااااااااااات بيمنعوهم يا ناااااااس حد يعقلنى ويفهمنى نظام مين الىل يمنع مسلم من دخول المسجد ويلقى درس دينى بحت ... نظام ابو جهل ولا ابو لهب ...
اترك لكم التعليق على الصورة ؟