الأربعاء، 22 أغسطس، 2007

حرااااااام اللى بيحصل ...


انا مجهز ملف عن ذكرى حريق المسجد الاقصى ومجهزه بفيديوهات وصور وكمان ازاى اتحرق والقصه كلها وواجبنا تجاهه وكمان اناشيد عن الاقصى ... لكن اضطريت أجله ... لأن فيه حاجات عايز اقولها فى البوست مش ينفع اجلها .. مش معنى كده ان الحاجات دى اهم من المسجد الاقصى ... ابدا ... الاقصى هو اهم من كل حاجة ... بس انا لو اجلت الحاجات بتاعه انهارده هتبقى بايته وبايخه اوى ... فا اعذرونى شباب عن تأخير الملف... وايضا اعذرونى عن عدم الجواب على التاجات حاليا .. لأن الاخبار او المواضيع اللى عايز اتكلم عنها بتتوافد بسرعه البرق ولا يجوز تأخيرها ... المهم يا شباب هذه الامه ... يا مدونين يا محترمين ... يا متابعين للمدونة ... شباب وبنات ... ادعوكم لمتابعه بوست انهارده واللى هنتتكلم انهارده عن ثلاث اشياء ... الا وهى المحاكمه العسكريه الاخيره وتلخيص وافى لما حدث فى المحكمه ... تانى موضوع ... عن استاذى وليد شلبى صحفى اخوان اون لاين وايضا المعتقل مؤخرا من ضمن مجموعة 18 المعتقلين من الاسكندريه والشرقيه ... هو من معتقلى الشرقيه ... توافدت الينا اخبار عنه وكما وعدتكم انى هتابع اخبار معتقلى الاخوان فى الشرقيه .. وثالث حاجة .. قصه حكتها لى أخت مدونة هنا معانا اسمها نور صاحة مدونه ظل القلم ...
---------
المهم دلوقتى هنبدا بخبر التى توافد الينا عن المعتقل الاستاذ المحترم الصحفى وليد شلبى ... والذى اعتقل ضمن هجمه شرسه من أمن الدولة مؤخرا من أبو حماد شرقيه .. تابعنا الخبر الذى توافد الينا لحد لما عرفناه ...
الاستاذ وليد شلبى
الحكايه من البدايه : أمن الدولة وهى رايحه لاعتقال الاستاذ الفاضل وليد شلبى كسرت بوابه المنزل الرئيسيه .. وبعدين راحوا لأخوه خالد شلبى ... وهما رايحين للاستاذ خالد حتى ما خبطوش ومش كفايه انهم كسروا بوابه البيت الرئيسيه .. لأ مش كفاهم ده كله .... كسروا باب شقه الاستاذ خالد من غير ما يخبطوا ... كسروه ودخلوا عليه البيت هو واولاده شوفت الافترا ... انتهكوا الحرمات .... تقول على نظام زى ده ايه ... المهم يا شباب .. خدوا الاستاذ خالد شلبى معاهم وقالوله تعالى اطلع معانا عشان عايزين اخوك ... المهم الراجل طلع محترم وقالهم حاضر هاطلع معاكم لأخويا ... طلع معاهم لاستاذنا وليد شلبى .. ودخلوا بيته ... وقعدوا بأه يفتشوا البيت ... وانت عارف طريقتهم فى التفتيش ويمكن ابناء الاخوان كلهم جربوا ... فتشوا ياباشا ... عارفين كتاب الظلال للاستاذ سيد قطب ... اه ... خدوووه ... مسكوا المخدرات ... هما كده مسكوا التهمه ... ههههه ... الظلال بأه تهمه .... وهما ماشيين فى البيت بأه كده ويقلبوا فيه ... لقوا قدامهم ايه يا باشا .. لقوا الكمبيوتر ... الاستاذ وليد شلبى قال هياخدوا الهارد ... ماشى مافيش مشكله ... لكن هما ماكتافوش بالهارد ... اصروا انهم ياخدوا الشاشه والسماعات والماوس والكيسه كمان ... زائد المشترك ... ههه ... اه المشترك خدوه .... طب اللى محيرنى واللى مجننى ... انهم خدوا المواس والسماعات ... طب هيعملوا بيهم ايه .... مش عندكم كمبيوترات تشغلوا عليه الهارد ... حاجة غريبه ولا كأنهم جايين يسرقوا .... بيبلطجوا ياباشا ... داخلين بيوت الناس يسرقوا .... وتقوللى ديموقراطيه وتنميه يا صفوت يا شريف .... يخرب بيت اليهود يا شيخ .... المهم اخدوا كمان هارد خارجى من النوع اكسترنل ... ولم يكتفوا بالهارد وجهاز الكمبيوتر ... مش مكفيهم عايزين كمان ... عارفين اخدوا ايه كمان اخدوا جهازين موبايل من النوع N73... وكان الاستاذ وليد جايبهم من شهر ...يعنى مش قعدوا معاه شهر واحد .. شوفوا الظلم ... الموبيلات سرقوها كمان ... نشوف سرقوا ايه كمان.. سرقوا بأه مصاحف ... اه والله خدوا مصاحف ... خدوا كرتونتين فيهم مصاحف جديده ... الكرتونتين دول كانوا جايين من السعوديه عشان يوزعهم صدقه جاريه للمرحوم والدة الحاج شلبى ... ربنا يرحمه يارب ... خدوا المصاحف ... هى المصاحف جريمه يا ناااااااس ... اسمع باه الجايه دى ... خدوا كمان مصاحف جيب ... سألوه ليه ياباشا خدت المصاحف ... جاوب الظابط وقال ... عشان هناك نيه لتوزيعها فى حفل المتفوقين كجوائز لهم .... انا مش هاعلق على النقطه هاسيبك تستغرب وتقول حسبنا الله ونعم الوكيل ...
انتهى الخبر ... ومش بايدينا حاجة غير الدعاء على الظلمة الحراميه اللى سرقوا اموالنا وحاكمونا وسجنونا .. حسبنا الله ونعم الوكيل ...
ان شاء الله "لسه عايش" هتبقى معاكم فى اخر تطورات المعتقلين من الشرقيه ... وربنا يعينا
-------------

نأتى لحكايه المحاكمات المفبركه والمسماه بالمحاكمات العسكريه .... عارفين ان يوم الاثنين اللى فات كانت المحاكمة السادسه لقيادات جماعه الاخوان المسلمين الـ 40 ... لكن ايه اللى حصل فيها وكده ...
اقرأوا التقرير ده نقلا عن اخوان اون لاين لأنى مش فضيت اكتب تقرير عن المحاكمه .. ونحيط علمكم أن التقرير مختصر :
- الدفاع يتهم المصادر السرية للحسيني بالتزوير والقاضي ينقذ الشاهد
- المعلومات سرية والمصادر سرية ولا يوجد أي دليلٍ على القضية
- تدريب الطلبة على الجهاد بأكل الخبز الجاف المدفون في الرمال!!
- الحسيني: حيازة الكتب الدينية ليست جريمةً والمشكلة في وجودها مع الإخوان
- الشاطر: القضية "مضروبة" واستجواب الشاهد كشف تخبطه
- مالك: أتحدى أن يثبت أحدٌ أن قرشًا من أموالي نتيجة غسيل الأموال
- أبو زيد والنحاس ومعروف: ضابط أمن الدولة أصبح "سوبر مان"
استأنفت المحكمة العسكرية العليا اليوم الثلاثاء 21/8/2007م نظر القضية المحال فيها المهندس خيرت الشاطر و39 آخرون، وواصل الدفاع للمرة الثانية مناقشة شاهد الإثبات الوحيد في القضية، وهو الرائد عاطف الحسيني، وهو الضابط الذي قام بعمل محاضر التحري للـ40 معتقلاً جميعًا.

واستطاع الحسيني أن يستغنى هذه الجلسة عن (أجندته) الخاصة وأوراقه التي كان يُجيب منها في الجلسة الماضية، إلا أنه استعاض عنها بإجاباتٍ واضحةٍ ومحددة أثارت أعصاب المحامين والمعتقلين والحاضرين على السواء، فقد التزم الحسيني وعلى مدى سبع ساعات تخللتها استراحتان مدة كل منهما نصف ساعة، التزم بكلمات دقيقة للغاية وهي: "لا أعلم"، "لا أذكر"، "لا أدري"، "معلومات سرية"، "مصادر سرية"، "تحريات سرية"، "أُفضِّل الاحتفاظ بالإجابة"، "أشرت لهذا في محضر التحريات"، "أرجو الرجوع إلى محضر التحريات"، "أحتفظ بهذه المعلومة للحفاظ على سرية المتابعة"، "هذه معلومة تخص جهة العمل".
ومع استمرار مناقشة الدفاع للشاهد أعلن الحسيني أنه لا يوجد أي أدلة مُسجَّلة أو مصورة ضد المتهمين، وإنما حصل على معلوماته من مصادره السرية، ونفى أن يكون قد ذكر أي معلومةٍ تتعلق بغسيل الأموال في محاضر التحري التي أجراها، كما أنه نفى أن يكون هناك أي من المتهمين قد اعترف أو شهد على متهمٍ آخر بالتهم المنسوبة إليهم، واكتفى بالتأكيد على معلوماته السرية ومصادره السرية؛ مما جعل أحد الحاضرين يُعلِّق مستنكرًا "ده إيه القضية اللي كل حاجة فيها سرية دي؟!!".

وعند سؤاله عن علاقة المتهمين بطلبة الأزهر، أجاب أنَّ منهم قيادات لهؤلاء الطلبة يوجهونهم ويمولونهم؛ بل إنهم يدربونهم على الجهاد، فسأله الدفاع: "هل رصدت معسكرًا تدريبيًّا واحدًا يؤكد ما تقول؟" فأكد أن هناك طلبةً خرجوا في معسكر عام 2002م في طريق القاهرة الإسكندرية الصحراوي، وتمَّ تدريبهم فيه على مفاهيم جهادية وعسكرية مثل أكل الخبز الجاف المدفون في الرمال!!
ثم سأله الدفاع: "هل لديك دليل مادي واحد ملموس على تدريب أو تمويل الطلبة؟"
فأجاب: "مصادري ومعلوماتي سرية".
الدفاع: "هل شاهدت بعينك اجتماعًا تنظيميًّا بين أيٍّ من المتهمين؟".
الحسيني: نعم شاهدتُ بعيني اجتماعًا تنظيميًّا بينهم.
فأحرجه الدفاع بسؤاله: "ولماذا لم تقبض عليهم متلبسين؟"
الحسيني: "كنا في انتظار التوقيت المناسب".
ثم فاجأ الحسيني الحاضرين بأن هتف بصوتٍ عالٍ قائلاً: "نحن مع الشعب، ومن الشعب، وإلى الشعب"، فوبَّخه القاضي وقال له:" إحنا مش جايين نخطب"، فاعترض الحسيني قائلاً: "إن هؤلاء الإخوان يسعون للسيطرة على مقاليد الحكم داخل الدولة من خلال الشعب".

فردَّ عليه المحامي فتحي تميم قائلاً: "وهل الوصول إلى الحكم عن طريق الشعب وبموافقة الشعب يعتبر جريمةً تستحق الضبط؟".

فأجاب: "الوصول إلى الحكم حق دستوري ولكن بطريقةٍ شرعيةٍ، ومن خلال مؤسسة شرعية، ولا يكون من خلال منظمة سرية".

الدفاع: "قدمت مع محضر التحريات 9 أشرطة فيديو، 8 منها عبارة عن لقاءاتٍ تليفزيونية لقيادات الجماعة.. فكيف تزعم أنها جماعة سرية؟ وهل فاتك فوز 88 من أعضاء الجماعة في انتخابات مجلس الشعب؟ ولماذا لم تقبض عليهم وقد أعلنوا انتماءهم إلى جماعة الإخوان وقبضت على هؤلاء الأساتذة والتي ينفي معظمهم الانتماء إلى جماعة الإخوان المسلمين؟".

الحسيني: "لقد ألقيتُ القبض على الأشخاص الذين توافرت لديَّ معلومات وأدلة ضدهم".الدفاع: "ما هذه الأدلة؟".

الحسيني: "ورد في محضر التحريات إشارة إلى المتحري عنهم أنهم منتمون إلى جماعة الإخوان المسلمين المحظورة قانونًا".
الدفاع: "هل لك أن تذكر لنا رقم القانون الذي ينصُّ على أن جماعة الإخوان محظورة".
الحسيني: "لقد تمَّ حلها عام 1949م".
الدفاع: "القانون رقمه إيه؟".
الحسيني: "معرفش".
الدفاع: "كيف إذن حددت أنها جماعة محظورة قانونًا إذا كنتَ لا تعرف القانون الذي يحظرها؟".
وهنا يتدخل القاضي ويطالب الدفاع بالتوقف عن سؤال الشاهد هذه الأسئلة.
الدفاع: "منذ متى وأنت مكلف بمراقبة نشاط جماعة الإخوان المسلمين؟"
الحسيني: "منذ عام 96".
الدفاع: "إذا كنتَ ظللت تراقب وتتابع المتهمين لمدة 7 أشهر كما تزعم.. فلماذا لم تذكر أي معلوماتٍ عن لجنةٍ ماليةٍ أو تمويل في المحضر الأول بتاريخ 13/12/2006م؟".
الحسيني: "كنا لا زلنا نجمع معلومات".
الدفاع: "ولم تظهر هذه المعلومات إلا بعد 29 يومًا وهو تاريخ المحضر الثالث 12/1/2007م؟
الحسيني: "استكملنا المعلومات وأثبتناها".
الدفاع: "ما أدلتك أن المتهمين كانوا يمولون الجماعة؟"
الحسيني: "فيه أدلة في المضبوطات".
فيقاطعه الدفاع: "المفروض أنك تتحرى.. يعني أدلتك من التحريات وليست من المضبوطات التي وُجدت بعض القبض عليهم".

وهنا يرفع القاضي الجلسة في استراحةٍ لمدة نصف ساعة، أقام خلالها الإخوان صلاة الظهر والعصر.

الجلسة الثانية
ثم بدأت الجلسة الثانية للمحاكمة بعد الاستراحة؛ حيث واصل الدفاع مواجهة الرائد عاطف الحسيني وكان الحوار كالآتي:
الدفاع: "هل قمت بنفسك بالتفتيش وضبط المتهمين؟"
الحسيني: "لا، زملاء لي قاموا بذلك".
الدفاع: "وهل أخبرك زملاؤك عما ضبطوه وحرزوه؟"
الحسيني: "نعم، أخبروني".
الدفاع: "ماذا أخبروك عن محتويات خزينة حسن مالك؟"
الحسيني: "كان بها مصوغات ذهبية ومبالغ نقدية".
الدفاع: "ومَن الذي استلمها؟"
الحسيني: "النيابة، لكن مش متذكر مين بالضبط".
الدفاع: "مَن الذي اختلسها إذن؟"
وهنا اعترض القاضي مؤكدًا أن التحقيق جارٍ لمعرفة من وراء هذه السرقة، إلا أن الدفاع أكد أن هذا الضابط هو الذي قام بالتحري عن أموال وممتلكات وأعمال وفكر 40 شخصًا في ثلاث قارات واستطاع وحده أن يأتي بالمعلومات من آسيا وأفريقيا وأوروبا وهو ما لم يفعله جند سليمان فليخبرنا إذن مَن الذي سرق خزينة حسن مالك".

ثم عاد الدفاع واستكمل أسئلته لضابط أمن الدولة حيث سألوه: "قسمت المتهمين إلى 6 مجموعات فأذكر مكانًا واحدًا تجمعت فيه مجموعة واحدة منهم".

الحسيني: "أشرت إلى هذا في محضر التحريات".
الدفاع: "أين مباحث الأموال العامة أو إدارة الكسب غير المشروع من شركات المتهمين؟ هل أصدرت أيٌّ من الجهتين تقارير ضدهم؟"

الحسيني: "لأ، مفيش".
الدفاع: "لماذا توقفت عند النائب الثاني للجماعة ولم تضم النائب الأول إلى هذه التهم؟".
الحسيني: "لو لديك أدلة ضد المرشد مهدي عاكف، هاتها عشان أقبض عليه".
الدفاع: "هل لديك مكتبة بها كتب دينية في بيتك؟".
الحسيني: "نعم".
الدفاع: "إذن لماذا تصادرون الكتب الدينية من منازل الإخوان؟"
الحسيني: "اقتناء الكتب الدينية ليس تهمةً في حد ذاتها، ولكن الرابطة الفكرية والتنظيمية هي التهمة".
الدفاع: "هل قمت بعمل التحريات حول الشركات المرتبطة باسم الدكتور خالد عودة بنفسك؟الحسيني: "نعم".
الدفاع: "هل تعلم أنه لا يملك أيًّا منها؟"
الحسيني: "أغلب الإخوان يكتبون ممتلكاتهم بأسماء أقاربهم مع الاحتفاظ بورق ضدهم تضمن سحبها منهم في حالة إذا ما حدث خلاف".
الدفاع: "هل وجدتم أيًّا من هذه الأوراق أثناء التفتيش؟"
الحسيني: "لا".
الدفاع: "شركة التكنولوجيا التي كتبتم عنها في محضر التحري لم تبدأ نشاطها بعد".
الحسيني: "لكن معلومات مصادرنا تقول غير هذا".
الدفاع: "إذا كانت معلومات مصادركم السرية خاطئة ومغلوطة، وبالتالي فإنها مصادر لا يُوثق بها".وهنا فاجأ رئيس المحكمة الجميع بقراره رفع الجلسة على أن تُعقد يوم الإثنين القادم الموافق 27/8/2007.
وقد أكدت هيئة الدفاع أنهم ذكروا الشاهد بالله وطالبوه أن يشهد بالحق وبما يرضي الله، فكان رده عليهم "أنا بأعمل الواجب اللي عليّ"، ووصف المحامي سيد السبكي الشاهد بأنه اعتاد على هذا النوع من القضايا، وأكد أن الأسلوب الأفضل للتعامل معه يجب أن يكون من خلال الأسئلة المفاجأة وفي غير ما جاء في المحاضر، مشيرًا إلى أن مهمته الأساسية في التهرب من الأسئلة وهو يؤدي دوره المرسوم له.

بينما أكد أحد المحامين أن الشاهد اتجه إليه وقال له: "مش كفاية عليّ كده بقى؟" فأجابه المحامي:" قول الحقيقة وأخلص"، وأثنى المحامون على قول الشاهد أن حيازة الكتب الدينية غير مجرمة، مؤكدين أنها المرة الأولى التي يتم الاعتراف فيها بهذا الأمر في محاكمات الإخوان.
بعد التقرير ده لا تعليق .... اترك لحضراتكم التعليق

------------------------

ابدأ بأه انثر لكم قصه حكتها اختنا نور صابحه مدونة ظل القلم فى تعليقها على موضوع لا لبنى السجان .... القصه حقيقه واثرت فيا اوى ... احكيلكم القصه واعلق عليها ...
كنت تطرقت لموضوع التفتيش فى بوستى السابق ... فا علقت اختنا على موضوع التفتيش بأن حكت القصه التاليه :
موضوع بقى التفتيش دا .. انا شوفته ع الطبيعة بأم عيني لأن احدى اخواتي الحبيبات والدها من المعتقلين .. روحتلها البيت وشوفت المناظر دي .. قمة الاهانة .. ولا ايه وهما بيفتشوا ..بيفتح دولاب فالاخت قالتله دي ملابس خاصة ومافيش حاجة هنا ممكن تكونوا بتدوروا عليها راح قالها انا ممشيها بالادب معاكي لحددلوقتي .. بس بعد كدا ممكن ارميكم كلكم برده واعمل اللي انا عايزه!!!
وتكمل قائله : واختنا اللي والدها معتقل بتتكلم والله العظيم خلتنا كلنا نعيط وكلامها بجد هزني جدا من جوه بتتكلم بكمية ثبات عجيبة جدا عارفين الواحد لما بيسمع عن المعتقلين بيحاول يتخيل نفسه وبيقول انه هيعمل وهيعمل وهيكون ثابت وكدا لكن لما بيتحط في الموقف بيكون فعلا محتاج ثبات قوي جدا ... الاخت دي بتقولي انها نفسها تقلق على والدها بس مش قادرة!! قالت ان ربنا سبحانه وتعالى منزل عليهم سكون وطمأنينة ... بتقولي حتى لما والدهم كلمهم على التليفون .. كان صوته في قمة الاطمئنان .. دا حتى قالها النهاردة يوم ميلادك وكل سنة وانتي طيبة بجد ربنا يثبتهم ويخرجهم على خير ، يعني سبحان الله قالت خاطرة جميلة جدا بتقول ان ذروة سنام الاسلام الجهاد في سبيل الله فيعني بنتمنى من الله انهم يكونوا في المنزلة دي أو حتى قريب منها وفي الاخر يعني دي منح مش محن ووسام على الصدر .. ربنا يجعله في ميزان الحسنات
الى هنا وانتهت اختنا نور من القصه ... قصه ولا كل القصص ... عندما يأتى اليك أمن الدولة فى بيتك ويفتش دولابك الخاص بك وتقول له دى حاجات خاصه ... يقولك هارميكم فى البيت كفايه انى معاملكم حلو .. تقوله ايه ... الظابط عنده حق ... انه يقول كده عارفين ليه ؟؟ ... لأن فيه قانون بيسنده الا وهو قانون الارهاب ... قالوله اعمل اللى نفسك فيه وما يهمكش يا سيادة الظابط ... تواجهه بنت بكل رقتها وادبها واحترامها واخلاقها ... وفوق ده كله تلاقى عندها ثبات عندما قالت نفسى اقلق على بابا ومش قادرة !! ... تقول ايه فى ظل دولة بوليسيه يحكمها شله من الحراميه ... اتوا لأعتقال الشرفاء والصالحين من أبناء هذا الوطن ... لن نلين ... شباب وبنات ... سنسير على ما تربينا عليه مهما فعلتم بنا ... مهمها سويتم ... وادى يا عادلى قصه من القصص الكثيرة لأبناء الاخوان بتقولك احنا مش هنلين ولا تفتكر ان احنا هنحيد عن الطريق اللى احنا ماشين عليه ... لو فكرت تسجن الاخوان كلهم ... ماشين ماشين والدعوة هتسير ولا قوه فى الارض هتوقفها ...
مش عارف اقول ايه ... الجمله المعتادة " حسبنا الله ونعم الوكيل "
-----

حاجة اخيره


حاجة اخيره جت على غفله ... انى وانا باكتب المقال ده ... جائنى الخبر المؤلم والمبكى .. اعتقال النائبين ابو زيد وصبرى عامر .. عضوَي الكتلة البرلمانية للإخوان المسلمين بمجلس الشعب المصري- من منزليهما، وجارٍ تفتيش مكاتبهما في دوائرهما بحجة أن لديهم قرارَ ضبط وإحضار من النيابة للنائبين في القضية التي وافق مجلس الشعب في مايو الماضي على رفع الحصانة عنهما، وحتى الآن لم يُعرَف مكان النائبين ولا النيابة التي سيتم التحقيق فيها.
كانت الجهات الأمنية قد قامت بإرسال مجموعتين إلى منزل النائبين في نفس التوقيت لاعتقالهما، وكان مجلس الشعب قد اتخذ قرارًا في 8 مايو الماضي برفع الحصانة عن النائبين بعد اعتقالهما مع مجموعة أخرى.
ومن المؤكد أن عملية القبض هذه تمت على خلفية قضية قيادات إخوان المنوفية التى قد انتهت النيابة من التحقيقات معهم .
الخبر اثار حفظيتى وكادت ان تخرج من لسانى عبارات خارجه عن ارادتى ... تعبر عن استيائى من هذا النظام الفاجر الذى لا يهاب ولا يعمل حساب لـ 77 مليون مصرى ... بل انه قد اعتقل نواب الشعب ليؤكد للجميع ان النواب الذين يمثلوكم فى قبضتى .. ساترك تعليقى للمرة القادمه على هذا الموضوع ... لأنى طولت عليكم .... والسلام مسك الختام ...

الاثنين، 20 أغسطس، 2007

لا لبنى السجان


ظلم فى كل مكان .. صمت ساد الاوطان ... حمحم فى دمنا البركان .. قولوا لا لبنى السجان .. لا لبنى السجان .. لا لبنى السجان ( العادلى وامثاله ) ...
هذه الكلمات التى جائت فى اذنى عندما كنت أقرا خبر اعتقال الاخوان فى الشرقيه والاسكندريه الساعه الثامنه صباحا ... لم اكن اصدق الخبرعندها ... ولكن صدقته عندما وجدت النشيد يقول ... صمت ساد الاوطان ... صمت ساد هذا الوطن ... كله خايف ... كله مرعوب ... كله خايف يقول لأ ... فعلا صدقت حينها اعتقال الشرفاء فى الشرقيه والاسكندريه ... صدقت أن الشرفاء واحرار هذا البلد مكانهم ليس هنا ... بل مكانهم فى السجون طالما هذا الشعب صامت وساكت وقائل نحن عبادك يا حسنى مبارك .... هذا هو الحاصل ... وهذا ما يحدث الان ... عندما يعتقل رجل شريف مثل الدكتور عصام العريان ولم يتحرك احد من هذا الشعب فماذا تقول ؟؟ ... اقول حينها انه من حق هذا الحزب الحاكم أن يتمادى فيما يفعله تجاه هذا الشعب الصامت ... من حقه ان يورث بابا حسنى البلد لأبنه البابا القادم جمال مبارك ... اليس من حقه ؟؟ ... عندما لم يتحدث أحد من هذا الشعب الثورى طول عمره عايز ايه تانى ؟؟؟ ...
-------------
قيادى من الشرقيه والاسكندريه وقبلهم 18 وعصام العريان على رأسهم 18
مش هاقول جديد ... والله ما انا قايل جديد .. هى حسبنا الله ونعم الوكيل اللى دايما باقولها لما اسمع اى خبر وحش فى مصر ...
قريتوا الخبر طبعا على وكالات الانباء والفضائيات والجرايد ومواقع المعارضه والاخوان ... وحفظتوا الخبر خلاص ... لكن ما الجديد ... الجديد ان لسه عايش هيتابع خبر اعتقال اخوان الشرقيه ... لأن المدونة شرقاويه ... اذن فسيتم متابعه اوضاع معتقلى الشرقيه على مدونتها باذن الله فتابعونا ...
بمناسبه معتقلين اسكندريه ننشر لكم بعض صور مداهمات المنازل لمعتقلى الاسكندريه ..






---------------

ما الهدف من اعتقال 18 من الاخوان و18 قبلهم وعصام العريان على راسهم ؟
وانا قاعد فكرت كده مع نفسى ولقيت ان فيه خمس اهداف من وراء الاعتقالات اللى تمت واللى هاتم لسه (الله أعلم ) ... وكمان المحاكمة العسكريه اللى بتتعمل دلوقتى لشرفاء هذا الوطن :
الهدف الاول : هو محاوله من الحزب الوطنى لأسكات صوت الاخوان وتعطيل اعلان برنامج الحزب الذى تعده الاخوان لنشره ... لأنه لو نشر الان هيعمل بلبله فى الشارع فى حين ان جمال مبارك داخل انتخابات الرئاسه .... فا طبعا المواطن هيختار برنامج الاخوان ... فا هما عايزين يعطلوا مشروع حزب الاخوان بأى شكل ... ولكن قائدنا ودكتورنا وحبيبنا الدكتور حبيب قال على اسلام اون لاين انه لو تم اعتقال الجماعه كلها ووضعوها فى السجون سنعلن الحزب مهما حصل لنا ومهما فعلوا بنا ...سنعلن البرنامج سنعلن البرنامج ...
الهدف الثانى : تأتى هذه الاعتقالات فى الوقت الذى دعا او اقترح فيه البرلمان البريطانى للتحاور مع الاخوان ... فا الاعتقالات دى بتدى انطباع او بيقول للمجتمع الاوروبى لا تتعاملوا مع الاخوان ... لأنهم ارهابيين ....
الهدف الثالث : فى مخيلتهم أن الاخوان ممكن يعملوا حاجة فى انتخابات الرئاسه القادمه او كده .... فا بيحاولوا يكتموا صوتهم ويسكتوهم وفاكرين انهم بيحاولوا يكتفوها بالاعتقالات دى ... او يحاولوا يسيطروا عليها
الهدف الرابع وده الاهم : الضغط على حماس فى فلسطين .. بعدما فشلت مصر فى التعامل معهم ... وايضا فشلت اسرائيل عسكريا فى التعامل معهم .... فاكرين ان ده هيقدر ياثر على اخوننا فى حماس ولكن ده عمره ما هيحصل ...
الهدف الخامس : تخويف الناس من الاخوان ... وعلى راى المثل اضرب المربوط يخاف السايب ... فا هو عايز يوجه رساله للشعب ان اللى هيتعامل مع الاخوان هيحصله كده ... هيتخطف ويتعذب ويموت ... فاحذرووووا ايها الشعب المصرى المحترم ...
----------------


عشان ما اطولش عليكم ... اعذرونى ... هاكتب خطه التوريث القادمه والتى تخيلتها ... وأظن دى هى اللى هتمشى
خطة التوريث الان تتم على قدم وساق ... كده حلو الكلام ... ازاى بأه .... دلوقتى فيه انتخابات للحزب الوطنى وهتخلص يوم 10 سبتمبر ... ماشى كده ... وبعدين هيجوا باه لانتخابات رئاسه الحزب ... ويترشح مين للرئاسه جمال مبارك ... وقدامه كومبارس طبعا ... مين اللى هيكسب جمال .... كده بأه بابا حسنى مش هيبقى له لازمة فى منصبه ... عارفين ليه ... لأن القانون قال ان اللى يبقى رئيس .. لازم يبقى رئيس حزب .... فا قانونا حسنى مبارك مش هيبقى رئيس حزب .... فا هيتنحى حسنى مبارك عن رئاسه الحزب ... وستتم انتخابات رئاسه الجمهوريه .... وهيترشح جمال .. وهيكسبها جمال .. وهياخدها جمال ... والتوريث قادم ... وجمال جاى جاى ..
هذا تصور من تخيلى انا للتوريث فى مصر .... وليس معلومات او مصادر ... ولكن على ما اظن ان هذا ما سوف يحدث ....
--------


طولت عليكم ها .. كنت عايز اتكلم على المحاكمة العسكريه عشان مش انساهم ...
المحاكمه اتأجلت وده اللى كان متوقع ... لكن ايه اللى حصل بالظبط فى المحاكمه ... اللى حصل يا سيدى ..
المحاكمة بدات وكل شئ تمام ... الشاطر واخوانه فى القفص وهيئه الدفاع موجوده والاهالى قاعده وبتسمع اللى بيحصل .. ايه اللى حصل ؟ ...
طبعا عشان المحاكمة دى تتم لازم يكون هناك شهود على قضيه غسل الاموال صح ولا ايه ؟... والا ازاى بأه تبقى تهمه ... لازم شهود .... فا كان مين الشاهد يا عمنا ... الرائد عاطف الحسينى ... الرائد عاطف ده دخل القاعه وهو مش عايز يدخل اصلا لأنه كداب وشاهد زور ... هيخش يقول ايه ... ده حتى الظباط بتوع الامن جابوه من بره ( هذا ما قالته اخوان اون لاين فى كواليس الجلسه)
المهم دخل سى الرائد ...وكان داخل ومعاه اجنده كده وورق موووت ... ودخل قعد يقرا !!! ... ههههههه ... اه والله قعد يقرا ... طب ازاى كان قاعد بيقرأ ... وهو اصلا شاهد ...يعنى المفروض القاضى يساله وكده ... والمحامين كمان يسالوه .. يعنى ده المفروض الشاهد انه يتعامل معاه كده ... مش صح ولا ايه ... صح يا عمرو .... مش يعنى يدخل يقرأ من ورق عمو عاطف مجهزه ... المهم ... هيئه الدفاع وقفت وقالت نعترض على الاسلوب ده .... والقاضى رفض انه يتعامل بالاسلوب اللى عايزاه هيئه الدفاع ... ماشى ياعم القاضى ... ولا تزعل يا قاضينا ... ولا تزعل يا منصف العدل بين الناس .... هنمشى كلامك ... وسيبه يقرا ... والاخوان وهيئه الدفاع سامعينله ... وكان يعنى الرائد عمال يهرتل .... عارفين بيقول ايه ... بيقول ..احياء جماعه محظورة ... اقامه دولة اسلاميه (اصلها باقيت تهمه ) وازاحة النظام القائم ... اه هى دى التهم .... ملاحظ ان مافيهاش غسل اموال ولا بتاع ... لكن دى التهم قولنا ماشى ... مشيها تهم .... نيجى للقاضى اللى سأل الشاهد سؤالين لا غير .. يعنى عشان يبان انه راجل ديموقراطى ... سأل قال ايه ... السؤال الاول بيقول : متى بدأت فى القيام بتحرياتك عن المتهمين ؟ قال الشاهد عاطف الحسينى : 6 أو سبع شهور من القاء القبض عليهم ... قولنا ماشى ...سؤال عبيط ... لكن عديها ...
السؤال التانى : هل قمت بهذه التحريات بمفردك ؟ عارفين الحسينى رد قال ايه ... قال .. ببجاحه منقطعه النظير .. آه ... ههههههه.. طب ازاى آه والاخوان الـ 32 دول كلهم من محافظات تانيه وبعيده ... انت لوحدك مشيت وراهم خطوة بخطوه وتابعتهم يا معلم فى 6 شهور ... ده انت ظابط سوبر مان بأه .... ههههههه زى ما قال عليك الاهالى (انا ما جبتش حاجة من عندى ) هههههه .... ظابط يابنى مشى ورا كل متهم وعرف انه بيغسل اموال ... ولف وراهم فى المحافظات كمان .... شايفين ... ادى رجالتنا اللى بيسهروا على امن بلدنا ولا مافيش ... ونعم الرجاله ....
عشان يعنى القاضى بأه انه يبان ديموقراطى أكتر واكتر ... قال للدفاع .... اسألوه يا دفاع سؤال ولا بتاع .... وهو سؤال يا محامى انت وهو ما تزودش .... قالوله ماشى يا قاضينا يا محترم يا اللى كلك طيبه وكرم ... وسأل واحد من المحامين وهيئه الدفاع سؤال واحد مافيش غيره والسؤال ده كان السبب فى تأجيل القضيه .. السؤال هو : حددلى مصادر التمويل الخارجى التى وردت للمتهمين ؟ .... سؤال صعب ... مش صح .... هههههه ... اتربك عمنا عاطف . خلاه واقف زى البتاع .... لكن لحقهم بالاجابه ... عارفين الاجابه كانت ايه ... هههههه ... كانت تضحك اوى ... الاجابه كانت .. تنظيم سري.. تحركاته محلّ متابعة من الأجهزة الرسمية المعنية.. تنظيم ينشط ويكمن.. عبارة عن خلايا عنقودية.. مصادرنا الموثوق بها في الخارج . .... اجابه تتضحك مش صح ..... هههه ... ياعم بيقوللك حددلى المصادر اللى كانوا بيغسوا فيها الفلوس ... فا قامت هيئه الدفاع قالوا بصوت واحد ...هاتلنا اجابه محدده وهادفه ... فقال عمو عاطف : ان فيه معلومات مؤكده تأتى من الخارج للانفاق على انشطة الجماعه الدعويه عن طريق يوسف ندا ومن خلال مبعوث خاص من يوسف ندا ، وان المبعوث ده اجتمع اجتماع تنظيميا مع المهندس خيرت الشاطر ... وقع بلسانه .. قام المهندس خيرت انتفض فجأه وقاله ...طب اسم المبعوث ايه يا عاطف ؟ عاطف الحسينى رد عليه وقاله اسمه زكريا محرز ... هههههههههههههههههههه ...شايفين اسمه زكريا محرز ... هههههه ....ده ظابط ايه عرف اسم المبعوث كمان ... قشطه عليك يا حسينى ... المهندس شاطر بأه هنا قام وقال للقاضى ..سجل الاسم ده يا سيادة القاضى ...خاصة انى عمرى ماسمعت عن الاسم ده قبل كده ... حتى الاسم لم يرد فى التحريات او المحاضر.... يابنى الحسينى ده بتاع مفاجات ...
- عمو خيرت الشاطر الراجل المحترم قال بما ان الاسم ده غريب ومجهول ولم يذكر فى محاضر الشرطة من قبل فا الشاهد ده مش عارف حاجة ... وهنا ارتبك عاطف الحسينى واحمر وجهه وكاد أن يدخل الحمام ولكن لحقه القاضى وقال تم تأجيل المحاكمه الى بعد غد يوم الثلاثاء القادم .. وده اللى عاطف الحسينى كان عايزه .. وهنا بأه بدا الاهالى يعترضوا والمحامين وكده والمعتقلين نفسهم ... بسبب المشقه اللى بيلاقوها عشان يروحوا المحاكمه .... وهما بيجوا من محافظات مصر المختلفه .... وعندما قاموا القضاه واقفين للخروج ... هب الاهالى كا النيران ... يقولون فى صوت واحد .. حسبنا الله ونعم الوكيل ... حسبنا الله على الظالمين ...
انتهت المحامكمة ... وفيه شويه صور ... عايزينكم تشوفوها ..




















مستنين يا شباب ردودكم وتعليقاتكم على المواضيع التى ذكرت فى التدوينه دى ...

السبت، 18 أغسطس، 2007

الحريه للدكتور عصام العريان واللى معاه


اعتقاال الدكتور عصام العريان ومعاه 15 عضو من قيادات الاخوان المسلمين بالقاهرة والجيزه .... الا وهم ... المهندس نبيل مقبل بمحافظة الجيزة منهم الدكتور محمود حسين ـ عضو مكتب الإرشاد في جماعة الإخوان المسلمين ـ والدكتور أحمد عمر والسيد نزيلي والمهندس نبيل مقبل، ود. سناء أبو زيد ود. محمد كمال والشيخ حمدي إبراهيم ود. محيي الزايط ود. هشام عيسي والمهندس حسام أبو بكر والمهندس خالد البلتاجي، وآخرون لم تعرف أسمائهم حتي الآن.
وقد اقتحمت أجهزة الأمن منزل المهندس نبيل مقبل بعد عصر اليوم حيث كانت هذه المجموعة في ضيافته، وقاموا باعتقالهم وتفتيش منازلهم في غيابهم، والإستيلاء علي أجهزة الكمبيوتر الموجودة في منازلهم إضافة إلي عشرات الكتب والمتعلقات والأوراق الشخصية، وقد تحويل المعتقلين إلي قسم مدينة نصر تمهيدا لعرضهم علي النيابة.

الخبر كما ذكرته وكالات الانباء ..
الدكتور عبد المنعم ابو الفتوح يعلق على خبر الاعتقال على قناة الجزيرة




-------------
فتحت مدونة اسماء العريان .... بنت استاذنا وابونا الكبير وقائدنا وقدوتنا الدكتور عصام العريان ...
لقيت اختنا بنته كاتبه يوم الاعتقال ... وازاى عرفت انه اعتقل وكده ... انا اتأثرت بكلامها بجد والحقيقه عنيا نزلت دموع حسيت ان اللى اتاخد ده والدى ... بجد .... ربنا يصبر اختنا اسماء وان شاء الله يا اختنا يطلع ويعقد بينكم يا ستى ويقضى معاكم الصيف ... مش تزعلى ربنا هيعوضكم كتير اوى ... ربنا مش هيسيب حق الدكتور عصام اللى وهياخده ... اللهم اجعل اعتقال قيادتنا من ميزان حسناتهم يارب العالمين ...
انا هاقتبس من مدونة اختنا اسماء ..المقال اللى كتبته فى ليله اعتقال والدها
الخبر نزل عليا انا كالصاعقة .. لانى بصراحة مكنتش متوقعه خالص المهم انا هاحكيلكم على اليوم من اوله من ساعة ما بابا اتمنع من السفرانا كنت هدخل انام على غير عادتى على الساعه 12 .. بس لقيت بابا بيقولى بما انه عارف انى بسهر للفجر ,اسماء صحينى الساعه 2لان الطيارة كانت الساعة 6 المهم سهرت عشان اصحى بابا .. وبعدين سلم عليا وقالى عايزة ايه من تركيا وكده ( كان نفسه اوى انه يسافر )وقالى كمان ... ابقى ابعتيلى ماسجات وانا فى تركيا ومتنسنيش المهم كملنا السهرة انا وماما لبعد الفجر عشان نطمن على بابا وواقفين فى البلكونة لقيناه رجع اول لما دخل البيت قعد يهزر معايا ويقولى شفتى جبتلك ايه من تركيا .. تعالو اتفرجو جبتلكو ايه ..وانا والله حاسه ان كان من جواه مضايق قوى المهم بعديها المفروض اننا بنتمشى بعد الفجر ... فانا اعتذرتلهم لانى كنت خرمانه نوم ..المهم بعديها انا كان عندى خطوبة واحدة صحبتى فى اكتوبر ..فقلنا بالمرة نروح نغير جو يومين فى شقتنا الى فى اكتوبرواتفقنا مع بابا ان هو بعد ما يخلص الاجتماع بتاعه هيجيلنا على اكتوبر وانا وماما سبقناه لاكتوبر ..وهو قعد يجهز مع ماما الحاجات الى هناخدها معانا وكانت الحاجات معاه فى العربية رحت انا وماما اكتوبر .. هى راحت لاختى عقبال ما اخلص انا الخطوبة وبعدين لقيت التليفون بيرن .. لقيته ابراهيم .. خير يا ابراهيم اسماء امن الدوله عند عمو سناء واحتمال يجو عندنا المهم انا كنت مطمنه شويه على اساس ان بابا مش فى البيت عقبال ما قفلت مع ابراهيم لقيت سميه بتكلمنى .. بتقلى امن الدوله عندنا .. وكسرو الباب ..انا ساعتها وشى اصفر وقلتلها طيب وبابا فين .. قالتلى معرفش ( مكنتش تعرف لسه ان بابا اتاخد ) المهم انا قاعدة كل ده اتصل ببابا يدينى مشغول ...اتصلت بمحمد صقر زوج سميه اختى ... قالى انهم اخدو بابا وعمو سناء ساعتها بقى قلبتلهم الخطوبه الى شىء تانى .. وانا عايزة اروح وحاجات من هذا القبيل روحت انا وماما للهرم جينا لقيناهم مشيو من البيت خلاص هما ملقوش حد غير زوجه اخويا .. بس هيا مكنش معاها مفتاح البيت .. فكسرو الباب .. وفتشو كل الغرف ... بس مسرقوش حاجه .. ومضو زوج خالتى على ورقة انهم مسرقوش حاجة .... اخدو شوية مقالات لابى بخط اليد .. وبعض اوراق تخصه
هنقضى رمضان لتالت سنه متتالية من غير بابا ملحقش يغير جو فى اكتوبر .... ملحقناش نحجز فى مصيف ونصيف تالت صيف على التوالى بابا ميقضيهوش معانا منعوه من السفر لتركيا ... ومنعونا من المصيف مع بابا بجد مش عارفة اقول اية .. يمكن انا اكتر واحدة مضايقة لغيابة .. لانه كان هو الى معايا فى البيت هو وماما بجد بجد .. البيت ملهوش اى طعم .. بجد بجد يا بابا وحشتونى .. غير اى مرة تانية
مستنيــــــــــاك يا بابا.

وانتهى مقالها عند هذا الحد ونأمل أن تكون اثرت فيكم
---------------------

بركان الغضب ... من مدونى الاخوان

بركان الغضب ... هذا هو المسمى الذى أطلقته على الغضب الجامح لدى المدونين الاخوان ( ومنهم انا طبعا ) عندما علموا بنبأ القبض على الدكتور عصام ومعه 15 قيادى من قيادات الاخوان بالقاهرة والجيزة والصعيد ... فأحببت أن اقول للداخليه ولوزيرها تحاشوا غضب المدونين ... تحاشوا غضب المدونين الاخوان ... ومن هذا المنطلق .. هنحاول نعمل حاجة تكون هى بدايه الغضب للافراج عن الدكتور عصام واللى معاه فى اقل وقت ممكن وقبل الـ 15 يوم كمان ... طب نعمل ايه ؟؟
انا فكرت فى حبه اقتراحات كده ياريت الناس اللى موافقانا عليهم تقول والناس اللى عايزه تضيف حاجة تقول والناس اللى مش موافقه على الاقتراحات كلها تقول ... بس لازم نعمل حاجة .. مش هنفضل قاعدين كده ... ده حتى يا سيدى لو مش كان عشان القيادى ... بنته مدونة زينا وابوها معتقل فلازم نقف جمبيها .... ولا ايه رايكم ... الاقتراحات :
1 – هنعلق عند أسماء العريان فى مدونتها وكل واحد يقولها احنا واقفين جمبك واحنا معااااااااكى ...
2 – حد يتبرع ويسارع بتصميم بنارات نحطها فى المدونات بأسرع وقت ..
3 – كل واحد يكتب بوست عنده عن الاعتقال ويندد فيه بكده ... ويحذر الداخليه من سوء عاقبه مدونى الاخوان اذا استمروا فى اعتقال الدكتور عصام ومن معه ...
4- ننزل الشارع ... اه ننزل الشارع ... ونندد فى وسط الشارع بالاعتقالات المستمرة ضد الاخوان ... وده مش مستبعد بس دى حطوها فى اخر مرحلة بالنسبالكم ..
5 –تصميم مدونه للافراج عن الدكتور عصام ومن معه وتبقى خاصه بيهم وبأخبارهم ...
هذه هى المقترحات الخمس اللى جت فى دماغى ... منتظرين اراؤكم ومنتظرين اقتراحتكم ونقضكم على الاقتراحات دى .... بس بسرعه يا شباب ... بسررررررررعه ..
ملحوظه صغيره : عندما قلت مدونى الاخوان هناك من عارضنى ... لكن هاقولها بصيغه تانيه وياريت الكل يحطها بدل مدونى الاخوان الا وهى ... كل مدون ينتمى الى جماعه الاخوان ... او كل اخوانى يدون .... دى مش الاساس ... انا بس مش عايز اخلى الناس تختلف انا عايز اوحد الجهود تجاه تلك المصيبه ... الا وهى الاعتقال قيادتنا ورموز الجماعه ... سلام

الخميس، 16 أغسطس، 2007

كنت فى العين السخنه ....

فى البدايه نأسف عن تأخرنا عن وضع تدوينه جديده ... وان شاء الله هنكون معاكم ونتابع مع بعض اخر تطورات الحياه السياسيه والاجتماعيه وايضا التدوينيه .... يعنى هنبقى معاكم فى الاسبوع مرتين ان شاء رب العالمين ...

-----
سافرت فى رحلة من اسبوع كده العين السخنه بعيد عنكم يعنى روحت اصيف هناك يوم وجيت .... طيب يا عمرو وايه الحكايه يعنى ...
واحنا رايحين العين السخنه بالمينى باص .... قابلنا كمين كده وانت داخل مدينه السويس .... المهم كانت الساعه ساعتها 6 الصبح الظابط وقف المينى باص وقاله رخصك ...الراجل طلع الرخص... قام اتحججله وقاله اركن العربيه وانزل ... فا السواق قاله حاضر ياباشا .... ركن العربيه ونزله .... الظابط قاله عايزين نفطر يلا... قاله حاضر ياباشا ..السواق راح جالنا وقالنا ماحدش معاه فكه يا شباب ... قولناله عايز كام قال عشره جنيه ... واحد رد مننا قاله هو الظابط الشحات لسه ما افطرش قام السواق رد عليه وقاله اه ... نزل اداله العشره جنيه ...وخد الرخص وجه .... المهم كملنا الرحلة وروحنا وهيصت .. والصراحة كانت رحلة قشطه ... حلوة اوى ... المهم يعنى خلصنا كده الرحلة وركبنا المينى باص واحنا راجعين قابلنا كمين ... بس مش كان فى نفس المنطقه بتاعه الصبح .... يعنى كان فى حته غير الحته اللى احنا جايين منها اصلا ... تمام كده ... المهم ... احنا راجعيين كله كان نايم ... وكده ... مرة واحده لقينا المينى باص وقف .... لقينا كمين ... قولنا استرها يارب وعديها بخير .... احنا لا كنا بنعمل معسكر ولابتاع ... ده هو يوم بيوحد ربنا ورجعنا عالاطول ... المهم كان ظابط برتبه عقيد .. وقف العربيه .... رخصك ... الراجل السواق طلعله الرخص ... قاله امال فين التانيه ... انا مش كنت سامع الحوار كويس .... المهم قاله اركن اركن .... الراجل ركن ... المهم نزل الراجل السواق للظابط العقيد ... وركنا احنا فى الاتوبيس .... واحنا فى الاتوبيس ... شوفنا الناحيه التانيه من الطريق الرايح ... كان موقف هناك امين شرطه باردوه بيشوف الرخص .... فا انا كنت قاعد وشايف الراجل الامين الشرطه ده ... فا فجأه لقيت الناس السواقين اللى بيدوا امين الشرطة الرخصه ....بيحطوا ورا الرخصه عشرين جنيه .... امين الشرطة يشوف الرخصه والعشرين جنيه فى جيبه ... واقسم بالله ده حصل .... لأ وكل عربيه بتعدى ... لازم ياخد منها فلوس وفيه عربيات مش معاهم رخص بيطلعوا فلوس بس ... والله العظيم ده اللى بيحصل واى عربيه بتعدى ياخد منها ولو العربيه مش طلعت فلوس وده شوفته بعينى .... يعقد يتلكع معاه ويركنه ولا ياخد بطاقته ولا ولا .... المهم انا مش عارف الظابط عارف ولا لأ ... عارف ان امين الشرطة بياخد فلوس ولا لأ ... ؟؟ على فكرة انا مسجل الحدث ده فيديو ... بس هو مش واضع قوى .. المهم السواق بتاعنا الظابط اتسحب منه الرخصه ومشينا .... سحب الرخصه عشان مش اديناله فلوس الله يخرب بيت اليهود ويلعن الامريكان ..... هو ربنا مش قال لعن الله الراشى والمرتشى .... ايه الناس دول مش مسلمين .... يلا ربنا ما يباركلهم فى رزقهم ولا يوفقهم فى عملهم ... امين يارب ...


الفيديو اهوه ... شوفوه وقولولى رايكم




------------------
تعذيب وسحل ورمى من الشباك .... الله يخربيت دى وزارة ... وزارة الداخليه .... اللهم ارنا فى هذا الوزير موته لا يهنئ بعدها ابدا ... الوزبر اللى عمال يسحل ويعذب ويزور ويموت ولا حد همه ولا فيه كبير واقف قدامه ولا عامل حساب لسبعين مليون مواطن .... ايه يا عادلى ... انت شايط فى الناس كده ولا فى رب كبير ... ياخى اتقى الله ... اتقى الله .... اتقى الله .... ربنا مش بيسيب الظالم ..... هاقول كلمتين استاذى هيثم خليل قالهم فى مدونته ... قال : ماذا ستفعل أمام الجبار أمام القهار ... وأنت عاري كيوم ولدتك أمك ..بدون سيفين ولا نسر ولانجمه ... دم ...محمد في رقبة مين ... هذا التعذيب المذهل في رقبة مين ... سيادة اللواء ... ألم تعلم أن حرمة المسلم أعظم وأكبر عند الله من حرمة الكعبه ...!!! صبراً شعب مصر ..... فإن يوم القيامة عظيم ... وستقتصون ممن ظلموكم وعذبوكم وسرطنوكم وعطشوكم وجوعوكم ... يوم يشفي الله صدور قوم مؤمنين....
بعد كده ... هاديلكم الفيديو ده .... وربنا يعلم هتسمعوه ازاى .... ربنا وحده العالم ازاى انا مخنوقم ن ساعه لما شوفت الفيديو ده .... مش عارف اعمل حاجة ... حاسس ان بلدى بيحرمونى منها ومش عارف اعمل حاجة..... لا عارف افتح بقى ولا عارف اشرب ميه نضيفه ولا عارف اعيش مرتاح فى بلدى حتى ... اعتقالات وتعذيب وتزوير .... وموووت ...
اتفرج على الفيديو وقول للعادلى ... ربنا ياخدك يارب ....




------------
نعتذر لقصر التدوين ... ونعتذر ايضا عن عدم متابعتنا ... وان شاء الله سنكون معكم أول بأول ...