الخميس، 31 مايو، 2007

عاجل من الشرقيه ..


زى ما قلتلكم تغطيتنا هتبقى فى انتخابات الشورى هتبقى من الشرقيه لأن الشرقيه بلدى وهو ده المكان اللى اقدر اعملكم تغطيه منه ... على العموم هناك خبر عاجل وانباء عن اعتقالات فى بلبيس والزقازيق وانباء عن تقطيع الملصقات واليفط وغيره عملنالكم تغطيه سريعه لما حدث ....
ألقت السلطات المصرية القبض على 3 من انصار مرشحي الإخوان المسلمين بالشرقية، الخطاط سمير سعيد فهمي – قرية بني عليم ببلبيس والتابعة للدائرة الثانية بالشرقية أثناء كتابته لافتات جيرية للمرشح عزت غريب بعد إبلاغ أحد خفراء القرية عنه، كما تم إعتقال الخطاط عبد الله هيكل – قرية المناصرة كفر ابراش – مشتول السوق وتم عرضه على نيابة منيا القمح التي قررت حبسه 15 يوما على ذمة التحقيق.
وفي الزقازيق ألقي القبض على عادل مصطفى – حي الحسينية بالزقازيق .
كما لوحظ تقطيع لافتات وبوسترات د. ناجي صقر – مرشح الإخوان بالدائرة الأولى بالشرقية – بشكل مستفز والصور تظهر حجم الحقد في تقطيعها او تشويهها .

قطعوا الملصق ....

وقطعوا الاسلام هو الحل ... ليه مش عارف
قارنوا بين الصورة دى والصورة اللى بعديها ....

---------------
فى هناك خبر فرحنى وزعلنى فى نفس الوقت .... فاكرين لما اعتقلوا الدكتور ناجى .... افرجو عنه ... لخبر ده فرحنى وخلانى اقول الله اكبر ولله الحمد بصوت عالى اوى ...ربنا ينصرك يا دكتور ... على كل ظالم متكبر جبار
خبر زعلنى ... فكرنى الــ 14 واحد اللى كانوا معاه اتحبسوا .... حسبنا الله ونعم الوكيل ....

الأربعاء، 30 مايو، 2007

فى الشرقية ... الحكاية زادت عن حدها اوى

الحكايه كبرت ويظهر ان الموضوع هيبقى فيه دم وهتبقى معركة بمعنى الكلمه ... اللهم قنا شر المعارك .. معركة الانتخابات ... سمتها معركة لأنها بالفعل معركة بين الاخوان المسلمين والحزن الواطى .... معركة على 19 مقعد .... من اول ما الانتخابات بدات وبدا معاها الاعتقالات والبلطجه وزوار الليل واعتقال المرشحين و طعون .... الخ ... مش عارف ليه الدولة هتموت ومش عايزين الاخوان ياخدوا انتخابات الشورى .... ليه مش عارف ... هى الـ 19 مقعد دول هيعملوا حاجة يا عادلى يا بلطجى امن الدولة انت وهو .... مش عارف ليه ؟؟؟

---------

الدكتور ناجى صقر

وانا باكتب الموضوع ده عرفت ان الدكتور ناجى صقر مرشح الاخوان بالزقازيق اعتقلوه هو و12 معاه ... حد يعتقل مرشح.... لأ ومش كده وبس ياريتها كانت على كده ... ده لفقوا للدكتور ناجى واللى معاه تهم ايه باه .. متجهزه كويس .. عارفين ايه التهم ... اولها الانتماء لجماعة محظورة ... محظورة ايه يا امن الدولة وهما ليهم 88 مقعد فى البرلمان .... وتانى تهمه يا هندسه ضرب 55 من عناصر الامن هههههههههههههههههههههههههههههههههه بأه الدكتور ناجى استاذ الجراحة والمناظير الراجل المحترم المشهور فى الزقازيق ... هيضرب وهيطحن 55 من عناصر الامن ليييييييييه ؟؟؟؟؟ .... ده مرشح مش بيبلطج يا كلاب امن الدولة ... ومش معنى الــ 55 نفسى اعرف يا محمود ياجمال يا رئيس المباحث بالزقازيق ؟؟؟ ... الراجل المحترم ده هيضرب 55 من عناصر الامن ليه .... ربنا يخرب بيتك وما يعمره ابدا... تانى اتهام يا هندسه بأه ... لأ اسمع اللى جايه دى بأه .... اتلاف سيارة شرطة .... هههههههههه ... ونعم الاتهامات ... اترك لك التعليق يا قارئ هذا البوست .. التهمه اللى بعد كده ... التجمهر بدون تصريح ... هههههههههه ... يعنى ايه يعنى بلاش الراجل يعمل دعايه انتخابيه ويلف فى البلد .... مش معنى عاطف اباظة ولا احمد جزر اللى مترشحين قدام الدكتور ناجى يعملوا جولات انتخابيه وده لأ .... عليه كخه يا امن الدولة ... مش من حقه ولا ايه يا بتوع المباحث .... مش من حقه كمرشح ينزل ويلف ويسلم على الناس ... التهمه اللى بعد كده ... استخدام دعايه محظورة ... طب احلف على مصحف .. ان احنا فى الزقازيق بالذات ما نزلنا بالشعار ( الاسلام هو الحل ) ونزلنا بنعم للاصلاح .... انتو بتخترعوا وعايزين تتهموه وخلاص ..... ربنا ما يهنيكم فى عيشتكم ابدا حسبنا الله ونعم الوكيل حسبنا الله ونعم الوكيل ....
----------

كيف اعتقل الدكتور ناجى

نسيت احكيلكم ازاى اعتقلوا الدكتور ناجى ... على فكرة انا اعجبت اوى بوقوف المواطنين معاه اثناء اعتقاله من الشارع .... تعالا نحكيلكم كيف اعتقل ....
بدأت جولة الدكتور ناجي و نحو 100 من أنصاره في شارع الحمام وحسن صالح و وادي النيل وكانت ترافقها قوات الأمن منذ بداية الجولة عن بعد ، ولكن فوجئ الإخوان عندما وصلوا مدرسة الأمة بشارع وادي النيل بهجوم شرس من قبل قوة كبيرة من عناصر الأمن والمخبرين بزي مدني بقيادة محمود جمال – رئيس مباحث قسم ثاني بالزقازيق ، استهدف بالدرجة الأولى اختطاف الدكتور ناجي صقر، الأمر الذي دفع الإخوان والأهالي للدفاع عنه ببسالة وحدثت اشتباكات بالأيدي والعصي حتى تمكنت القوات من تفرقة الإخوان الإ القليل الذين بقوا حول الدكتور ناجي وبدأوا بإعتقالهم في سيارة أمن مركزي زرقاء كبيرة واقتيد د. ناجي وحده في سيارة أخرى.
وأكد شهود عيان من المواطنين أن الإخوان كانوا ثابتين لم يتحركوا خوفا من تهديدات الامن مما أثارهم للدفاع عنهم وحمايتهم ، وذكرت مصادر أن عدد من الأهالي ساعدوا الإخوان وحالوا دون اعتقالهم وأخبروهم أنهم على حق ويجب أن نقف معكم .
-------------

عارفين مين هو الدكتور ناجى .... اقرا السيره الذاتيه للدكتور ناجى .... من هنـــــــــا

-------------

وبمناسبه التغطيه الشامله على الانتخابات فى الشرقيه تتوالى الاخبار بعد اعتقال الدكتور ناجى .. ان كتله الاخوان بالشرقيه قدمت طلب احاطة واتصلت بالمسؤلين وبرئيس المجلس عشان يحلوا المشكله ... اتانا التقرير التالى


توجة د. فريد إسماعيل – عضو مجلس الشعب عن دائرة فاقوس وعضو الكتلة البرلمانية للإخوان المسلمين بالشرقية – ببيان عاجل لرئيس الوزراء ووزير الداخلية حول قيام سلطات الامن بالقاء القبص على الدكتور ناجى صقر المرشح لمجلس الشورى بالدائرة الاولى بالزقازيق بمحافظة الشرقية و التى تضم مركز و مدينة الزقازيق و القنايات اثناء جولة انتخابية بشارع وادى النيل قسم حسن صالح الزقازيق مساء الثلاثاء 29/5/2007م .
واستنكر د. فريد الاعتداء على المرشح و انصاره دون مبرر و القاء القبض عليه و على 14 من مؤيديه مما يعد انتهاكا جديدا و ردة للوراء و حرمان المرشح من ابسط حقوقه و هو الاتصال بناخبيه ، و ارهابهم للحيلوله دون مساندته و التصويت له فى حين يترك مرشح الحزب الوطنى و المحسوبين عليه يتحركوا بحرية و يستخدموا كافة انواع الدعاية وهذا الامر لا يصب فى مصلحة الوطن بل يزيد الامر تعقيدا و الشارع احتقانا.
كما قام بالاتصال بجهات تنفيذية لحل الأزمة .
في حين قام الشيخ ماهر عقل بالاتصال بكل من رئيس مجلس الشعب الدكتور أحمد فتحي سرور ود. مفيد شهاب – وزير الدولة للشؤون القانونية لاطلاعهما على تفاصيل ما حدث ومحاولة حل المشكلة سريعاً.
-----------------

نذكر ان الاخوان فى الشرقيه مرشحين اتنين بس واحدفى الدائرة الاولى فى الزقازيق ... الا وهو الدكتور ناجى صقر ... والتانى فى الدائرة التانيه اللى هى بلبيس ومنيا القمح والعاشر من رمضان والتليين ... الا وهو الاستاذ عزت غريب ..
------------
وتتوالى الاخبار بالدائرة الثانيه بأن هناك محاولات اعتقالات بين انصار المرشح ولم تنجح احداها .... ونعرض عليكم الخبر كما جاءنا ...


الاستاذعزت غريب

نقل مرشح الإخوان بالدائرة الثانية تعسفيا .. ومطاردات لأنصاره صباح اليوم !!
شهدت قريتي التلين وأبو طوالة مركز منيا القمح صباح اليوم الأربعاء 30/5/2007 م حملة مداهمة وتفتيش لأنصار مرشح الإخوان الأستاذ عزت غريب في الدائرة الثانية ومقرها مركز منيا القمح وتشمل منيا القمح وبلبيس ومشتول والعاشرمن رمضان .
حيث فوجئ الأهالي بقوة كبيرة من الأمن تداهم منازلهم للقبض على الإخوان أنصار الأستاذ غريب ولم يقبض على أحد فالجميع في أعمالهم منذ الصباح !! كما قاموا بطمس اللافتات الجيرية وتقطيع البوسترات الورقية والقماشية بشكل كامل.
وإمعانا في التضييق والظلم قامت الإدارة الأزهرية بالزقازيق وبإيعاز من أمن الدولة الثلاثاء الماضي بنقل المرشح تعسفياً من إدارة مشتول إلى إدارة أبو كبير ، ولم يمر على نقله من أبو كبير إلى مشتول سوى شهر واحد !!
جدير بالذكر أن هذا النقل يعتبر النقل الرابع خلال عامين فقط !!!
----------------
انتخابات دائرتى ...قريبا
هذه هى الاخبار التى جائتنا من الشرقيه .... اه نسيت اقولكم علشان انا من الشرقيه فا عملت التغطيه دى .... لكن انا لسه مش عملت التغطيه فى دائرتى ...الا وهى مركز ديرب نجم ... استنونى البوست الجاى اكتب لكم تقرير محترم على اللى بيحصل فى ديرب ... من اول ما المرشحين اتقدموا بالترشيح لحد انهارده .... فا انتظرونا شباب
-------------
دلوقتى هنتفرج على صور للامن والمخبرين وهما بيقطعوا يفط مرشح الاخوان فى كفر الزيات وبسيون بالغربيه ...

-------------------
الاساليب الخبيثة لأمن الدولة لاعتقال الاخوان
وانا قاعد باكتب البوست...جائنى الخبر التالى استخدام ظباط امن الدولة اساليب جديدة فى القبض على الاخوان .. عارفين هى ايه الاساليب دى ... ظابط امن الدولة يجى يعتقل الاخ وبعدين ياخد المحمول بتاعه ويقلب فى ارقام الاخوان او الارقام المتسجله على الموبيل ويقوم الظابط متصل باى رقم من اللى متسجلين على الموبيل ... ويقوم الظابط بتقليد صوت الاخ صاحب الموبيل ويقول للراجل المتصل بيه ايوة انت فين دلوقتى ... الراجل بأه مش ياخد باله يقوله انا فى الحته الفلانيه ... الظابط بأه يقوله انا جايلك دلوقتى .... وبعدين الظابط بأه يجيله بقوة خارقه يعتقلوه ... ها ايه رايكم فى الخطه الامن دوليه دى يا معلم ... امن الدولة عدت المخابرات الاستخباراتيه الامريكيه يا معلم .... شوفت الخطط والافكار .... ولا بيمسكوا مجرمين .... بس خطه جامده اوى ... يا بلطجى امن الدولة .... ههههههه احييكم عليها ... وعلى الافكار الجهنميه .....
---------------
اخوان اون لان انفرد بخطة الداخليه للتضييق على الاخوان فى الانتخابات عارفين ايه هى الخطة الخطة مكونة من عشر بنود .. ننشرها من اخوان ان لاين .. اليكم البنود العشر للتضييق على الاخوان فى انتخابات الشورى :
اعتقال الناشطين حتى يتم شل حركة الجماعة وتكثيف متابعة الباقين.
- رصد تحركات الإخوان خارج بيوتهم حتى يصلوا إلى الأماكن التي يبيتون فيها ويطمئنون بها فيتم الاقتحام واعتقالهم.
- الاستيلاء على الأجهزة الكهربائية الحديثة من بيوت الإخوان.
- في حالة عدم وجود فرد الإخوان مكان المداهمة يُؤخذ أخوه أو أبوه كرهينة.
- جمع البطاقات الشخصية من أكبر عددٍ من الإخوان والمناصرين لهم في البيوت وفي الشوارع؛ وذلك لحرمانهم من التصويت.
- استخدام وحدة تنفيذ الأحكام ضد مناصري الإخوان إن كان على أحدهم قضية.
- إصدار تعليمات للقومسيون الطبي أن يحتسب الإجازات المرضية للإخوان من أعمالهم خلال هذه الفترة تمارضًا.
- اعتقال مندوبي الإخوان ومنع الباقين من دخول اللجان يوم الانتخاب.
- تجنيد الخفراء وأعضاء من الحزب الوطني للتجسس على الإخوان وإرشاد الأمن إليهم وإلى أماكنهم
------------------

اه .. نسيت اقول لأخويا الكبير وحبيبى الذى لم اره بعد ... الى عبد المنعم محمود المدون الاخوانى بمناسبه قرار الافراج الذى جاء من امن الدولة مباشرة .. لكن لسه منعم ما روحش بيتهم .. لكن خد قرار افراج ... الهم ارجعه الى بيته واهله غانما سالما يارب العالمين . .ومبرووووووووووووووووك يا منعم على قرار الافراج ...
---------------
استنونى المرة الجايه ومع القصه الكامله لانتخابات الشورى فى مركز ديرب نجم محافظة الشرقيه ....
----------------





الاثنين، 28 مايو، 2007

كلاب أمن الدولة ...بيهينوا كتاب ربنا

الصراحة مالقيتش غير العنوان ده ... اه مالقيتش غير العنوان ده اقوله باللى بيحصل دلوقتى ... ايه اللى بيحصل ياعم عمرو .... اللى بيحصل يا سيدى انت وهو مش ممكن يتسكت عليه .... مش ممكن يتسكت عليه ابدا ... ايه اللى جرى فهمنى بس بالراحة ... كلاب العادلى وامن الدولة اهانت المصحف .... ده يرضيك يا مسلم ... ده يرضيك يا اخويا ... ده يرضيك يا مبارك .... اايه هو المصحف مش عاد له حرمه ياعادلى ... ولا ايه ...المصحف يا كلاب ياملاعين امن الدولة تدوسوا عليه .... مش عاد فيه احترام للدين اللى بتؤمنوا بيه .... طب انتهكتوا حرمة بيوت الاخوان ... وقولنا ماشى ...ربنا هيعوضنا .... لكن تدخلوا البيت وتدوسوا على المصحف وترموه .... لأ لأ لألألألأ ... مش هنسكت عليكوا ... خلاص فاض بينا ...زهقنا ..الا المصحف يا عادلى الا كتاب ربنا ....
بالصور شاهدوا الان ما فعلت ايدى الصاغيه والزبانيه مبار والعادلى ورجالته ..ماذا فعلوا بالمصحف ...













اقرا نص الخبر كما جاء على مواقع الاخوان
قامت قوة من مباحث أمن الدولة الليلة بحملة همجية على أنصار مرشح الإخوان المسلمين بدائرة طلخا – عبد المحسن قمحاوى فى مركز بلقاس حيث هاجمت العديد من القرى واعتقلت بعض أفراد الإخوان بطريقة همجية قاموا خلالها برمى المصاحف على الأرض وبعثرة أثاث المنازل
ففى قرية بحر العش قامت الحملة المكونة من خمسة ضباط وعشرة أفراد آخرين ما بين أمناء شرطة وعساكر باعتقال رمضان أبو شعشيع ، حيث هاجموا المنزل فى الساعة الثالثة والنصف وقاموا ببعثرة محتويات الشقة وقلبها رأساً على عقب .
وفى إجراء وقح ومستفز وهمجى قام أفراد أمن الدولة الذين قتشوا المنزل برمى المصاحف الموجود على الأرض بلا أدنى اكتراث ولا مبالاة لحرمة كتاب الله المقدس ، وتقطيع صورة لفلسطين كانت معلقة على الحائط.
و قاموا بأخذ كل عقود الأراضى التى يمتلكها رمضان ، وكذلك الكمبيوتر الخاص بأولاده.والأستاذ رمضان أبو شعشيع يعمل فنى وسائل تعليمية بمدرسة عصفور الإعدادية التابعة لمركز بلقاس ، ويعمل أيضاَ فى مجال زراعة الصوب الزراعية وله باع كبير فى هذا المجال .
ولديه أربعة أبنـاء: خالد 22 سنة (حاصل على بكالوريوس تربية رياضية ) ، وأسماء 20 سنة (طالبة بكلية الآداب – جامعة ألمنيا) ، إسراء 10 سنوات (الصف الرابع الابتدائى) ، عمر 8 سنوات (الصف الثانى الابتدائى) .وبعد ذلك قامت قوة رمى المصاحف أيضاً بمهاجمة قرية بلقاس خامس (جميانة) واعتقلت حسام الصياد عبد القوى ، الذى يعمل مدرساً بالمعهد الأزهرى بالقرية.
حيث قامت القوة باقتحام المنزل وكسر الباب ، وقاموا ببعثرة محتويات الشقة وترويع الأطفال ووالده المريض . و حسام الصياد له من الأبناء اثنان: (ندى) وعمرها 4 سنوات و(زياد) وعمره 5 شهور ، وهو العائل الوحيد لأسرته ويقوم على رعاية والده الكبير فى السن والمريض مرضاً شديداً .

----------------------------------
بعد الموضوع اللى والله عيطتنى كتير ده .. وحسسنى ان احنا فى بلد بتهين المصحف ... مش عارف اقول ايه ... والله ما عارف .... يلا ان شاء الله هيجى اليوم اللى عادلى ومبارك والزبانيه بتوعه دول هيشوفوا اشد يوم ... ان شاء اله ..
نسبنا بأه من الموضوع ..مع انى المفروض مش اسيبى منه ... لكن هاعمل ايه ...هاقول حسبنا الله ونعم الوكيل فيكى يا حكومة ...
-------------
حصل حاجات كتير الاسبوع ده وانا لا اتكلمت عنها ولا حاجة ... لكن اعذرنى يا حبيبى ... المذاكرة ... والله المذاكرة واخده منى حبايبى ومدونتى وواخده منى كل حاجة ... كل حاجة ...يارب بس يجى بفائده يارب ... بالله عليكم ادعولى ادعولى يا شباب ...
-----------------
ياريت تستنونى فى الاجازة.... استنونى يا شباااااااااااااااب


الجمعة، 25 مايو، 2007

اتمنى.......

اتمني ان اري لمصر حكومة جديدة راقية......... عندها الخبرة الكافية لادارة شئون البلاد...... محنكة سياسيا وخبيرة اقتصاديا وقوية عسكريا ....اتمني ان اري مصر كلها شوارعها نظيفة ومرتبة وتدل انها بلد سياحي راقي من الدرجة الاولي..... مازال المواطن المصري حتي الان يتقهقر الي الخلف وهو ما يجعل مصر الان صورتها حزينة........ اتمني اني اري شعب مصر تخلص من مشاكلة الاقتصادية والبطالة ويحظي علي اعلي معدل دخل يحفظ لة الكرامة داخل بلدة بلد من الغربة والسفر .........اتمني ان اري حقوق الانسان في اجهزة الامن والمتعقلات وحرية الراي ........اتمني ان يتوقف شعب مصر عن النفاق والمجاملة اكثر من اللزوم...... ويعرف ان الزمن تغير ...اعتقد ان الجميع في حاجة للتغير والاصلاح سواء من الشعب او الحكومة .....رغم كل الصعوبات والتحديات مازالت مصر صامدة لكن يوم بعد يوم يقوي الحمل ويكسر الظهر فلا داعي للانتظار هذا اليوم..... حلم عمري ان تعود مصر كما سبق راقية ...ولا اقبل اقل من ذلك لانها ام الدنيا بناسها الطييبين........ حتي لو شوة البعض صورتها وخصوصا بعد سنة 52 حتي كتابة هذا التعليق...
هكذا وجدت هذا التعليق مكتوب تعليقا على خبر قرأته فى موقع قناه العربية .... وهو خبر خيالى ... انا لما سمعته ما صدقتش نفسى حتى ... عارفين ايه الخبر .... الخبر هو موافقه لجنة شئون الاحزاب على حزب معارض .. الا وهو حزب الجبهه الديموقراطيه .. عارفين مين مؤسس الحزب ده ... الدكتور الغزالى حرب .. والفقيه الدستورى يحى الجمل ... اللى اثار استغرابى اكتر بأه انه ازاى اللجنه دى وافقت على الحزب ده خاصه ان الدكتور غزالى حرب ده كان احد اعضاء لجنة سياسيات الحزب الواطى .... الحقيقة هى لعبكة كده ومش راضيه تدخل دماغى خالص ..... طب وازاى وافق على الحزب ده خاصه ام فيه 14 حزب رفضتهم اللجنه دى من عدة اشهر .... ازاى وازاى وازى ..... مش هاقول غير كلمتين واوجهم للمؤسسين هذا الحزب ..اتمنى ان يكون هذا الحزب له دور فعال فى المجتمع ... وان يكون من الاحزاب المؤثرة ... والرافضه لهذا النظام الطاغى والمستبد .... .. وتحيه كبيييييييرة للغزالى وحرب ...
------------------------------

الثلاثاء، 22 مايو، 2007

من هنا لحد الاجازة ..

لحد لما تبدا الاجازة .. هبطل كتابه مواضيع ... او هاكتب بس هيبقى قليل ... اعذرونى .. على فكرة انا هاخلص امتحانات يوم 28\6 ... استنونى بأه
-----------

وموضوعنا انهارده هيكون الصورة دى

الأحد، 20 مايو، 2007

لخبطه ...

مش عارف ابدا منين ولا منين ... الاحداث كتيرة اوى ... انتخابات الشورى فى مصر ... واللى بيحصل فى فلسطين ... ونجاح الاخوان فى الجزائر بحصولهم على 52 مقعد ... حاااااااااااااااجات كتير اوى شاغله دماغى لما جيت اكتب التدوينه دى ...
-----
انا مش هاعرف اتكلم عن حاجة دلوقتى لأنى عندى دور برد شديد اوى ... وكمان عندى امتحانات ... انا اسف يا شباب اعذرونى ....
-----------
فى بعض الاخبار كده هاحط روابطها وياريت تشوفها

الأربعاء، 16 مايو، 2007

بالصور والفيديو .. ننقل لكم الحدث من قاعة المحكمة ... فى محاكمة الشاطر واخوانه

هيئة الدفاع قبل بدء المحكامة

ابن احد المعتقلين بعد سماع الخبر





زوجه احد المعتقلين وهى تشعر بالاسى ومرارة الحزن بعد سماع الخبر

المحامى وعضو هيئة الدفاع وعضو مجلس الشعب الاستاذ صبحى صالح وهو يستمع الى عائشة حسن مالك

ظباط امن الدولة وهما بيحاولوا يخرجوا الاهالى من المحكمة
يارب استجب دعاء هؤلاء


القاضى الظالم

وكمان شوفوا الفيدوهات
تقرير قناة الجزيرة فى حصاد اليوم فى المحاكمة







وانطلقت شرارة الاهالى (لحظات النطق بالحكم ) شاهد الان


وننقل لكم ايضا تقرير قناة الحرة عن الحكم ...


ومرافعه الاستاذ ناصر عضو هيئة الدفاع عن الاخوان ... مرافعه الهبت المشاعر


العاشرة مساءاً تنقل لكم الخبر ...


الى هنا وننتهى عند هذا الحد .... اذكركم بقراءة مقالى فى البوست اللى قبل ده.....

ولا زالت المعركة مستمرة ...

عارف انكم زعلانين منى .. عشان اتأخرت فى الكتابه ... اعذرونى ... ونبدا تدوينتنا الجديدة بعنوان .. ولازالت معركتنا امام نظام طاغى ظالم فاشى مستبد لا يعرف معنى الحريه مستمرة ... نعم مستمرة وبكل قوة .. ومستمرة وباعلى صوت .... مستمرة حتى لو اعتقلونا فى السجون ووضعوا لنا الف محاكمة عسكرية ... مستمرة رغم انفهم ... سننتزع حريتنا من ايديهم ..سننتزع حق التعبر رغم انوفهم ... سنرفع لواء الاسلام مهما حدث لنا .. حتى لو نصبوا لنا مليون محاكمة عسكريه .... حتى لو وضعونا فى السجون .... لن نتنازل عن مبدا الا وهو رفع رايه الاسلام والتعبير بكل حريه .... يوم الاثنين اللى فات اولاد الــ ... حكموا على ناس من اشرف شرفاء مصر بيحبوا بلدهم وبيخافوا عليها وعايزينها فوق فوق خالص .... اربعين واحد من قيادات جماعه الاخوان المسلمين ... حكموا عليهم بالغاء الحكم بتاع مجلس الدولة لاحالتهم للمحكمة العسكرية .... انتوا عارفين مين اللى قدم الطعن علشان يلغى الحكم بتاع مجلس الدولة ... مين .. حسنى مبارك بذاته شخصيا هو اللى قدم الطعن لمحكمة مالهاش دعوة بالحكم .. الاوهى محكمة عابدين ...شوفتوا نظام غبى بالشكل ده شوفتوا الظلم اد ايه واقع علينا ..... حسنى مبارك بنفسه يقدم الطعن .... (بلاش اتكلم كتير فى النقطة دى بالذات لأنى لو اتكلمت هلخبط ولما بالخبط بالخبط) خلينا كده .... المهم .... شوفتوا بأه اد ايه حسنى بيه متغاظ من الاخوان ... عايز يوديهم ورا الشمس باى طريقه وباى شكل وباى وسيله .... وبيدعى ان دولته بتحافظ على حقوق الانسان ... قال حقوق الانسان قال .... يوم الاثنين بأه حصل ايه ... شوية مستشارين يا معلم متنقين على الفرازة اه والله متنقيين على الفرازة الحكومة منقياهم ... عشان يحكموا ببطلان حكم مجلس الدولة باحالة المدنيين للمحاكمة العسكرية .... طب ازاى يكون تكون الجهه اللى بتفصل فى المنازعه هى الجهه اللى متخاصمه مع الاخوان ...ازااااااااى يا ناااااااس .. ازاى ياهووووووووووو انا مش مصدق ..... لكن كل حاجة بتحصل فى البلد دى لازم تصدق لازم تصدق ... المهم بدات المحاكمة ياعم ..بدا الفشر والضحك على الدقون .... محكمة ... الكل وقف ... والناس والاهالى تدعى يارب يارب يارب يارب افرج عنهم .... قعدوا الاهالى ... بدا القاضى المتعين من قبل الحكومة يتكلم ... محامى الرئيس بدا يتكلم زى الاهبل ... والله ما اعرف بيدافع عن ايه ..بيدافع عن الظلم ... بيدافع عن الاستبداد ... والاخوان مذهولين ... جم بأه مجموعه الدفاع بتاع الاخوان يتكلموا زى الاسود (هتشوفوا كل حاجة فى الفيدهات اللى هتتعرض ) .. وبيطالبوا القاضى بندب المستشارين ... ليه ياعم .. قاللك علشان دول بتوع الحكومة ... وكمان توقفوا سير الدعوى ... ده طلب الدفاع ... القضاه رفعوا الجلسه ساعة ... بعد الساعة ... محكمة ... جه عمك القاضى المتعين ... قعد يسمع شوية فى المرافعات وكده ... وبعدين االاهالى حسوا بحاجة غريبه بتحصل فى القاعة ... حسوا ان الامن بيطلعهم علشان ينطق القاضى بالحكم ... الاهالى رفضوا يطلعوا وثاروا ... وماطلعوش الرجاله (اهالى المعتقلين ) ... البودى جارادت يا معلم حاصرت القاضى وامن الدولة وقفت ورا القاضى .. عشان لو حصل حاجة .... ونطق الحكم ورفض حكم محكمة مجلس الدولة بالغاء الحالة المدنين للمحاكمة العسكرية .... ومن هنا انطلقت الشرارة ... انطلق الهتاف ... انطلق الهتاف من الالسنه بجملة حسبنا الله ونعم الوكيل ... حسبنا الله ونعم المصير ... حسبنا الله فيكوا يا ظلمة يا ....... وخلصت المحاكمة ومش عارف هنفضل على الظلم ده لحد امتى .... خير ... ربنا يصبر اهالى المعتقلين يارب يارب يارب .... المهم بعد لما خلصت المحاكمة ... طلعت تانى يوم عالاطول مؤتمر فى نقابه الصحفيين وكمان طلعت مظاهرة قدام النقابه ... تعالوا معانا ونشوف ده كله بالصور والفيديو كمان .. تابعونا يا شباب .... فى البوست الجاى ... على فكرة انا كنت عايز اتكلم فى حاجة مهمة اوى عن انتخابات الشورى والاخوان ... وان شاء الله اكلمكم عنها بعدين بأه

الاثنين، 14 مايو، 2007

رسالة .. الى عزيزى الحرامى الفاسد المرتشى

هذه الرسالة ارسلها الى عزيزى وابن بلدى وحبيبى الفاسد الحرامى المرتشى القاتل .... اليكم نص الرسالة احبائى ....
عزيزي / الحرامي الفاسد المرتشي المفسد في الأرض لا تحيه طيبه وبعد...
إسرق إنهب خرب في البلد زود رصيدك في البنوك علي حساب الغلابه اللي مش لاقيين ياكلوا ,إشرب خمره وسيجار وكل استاكوزا وكافيار إنضم للحزب ورشح نفسك لمجلس الشعب وهتكسب بفلوسك مش إنت الباشا؟ وكل حاجه بالفلوس!وتاخد الحصانه وتبرطع بيها في البلد زي ما أنت عاوزوتعمل بيها البدع - دي حصانه يا جدع - وحتي لو حصل إيه.. الحزب موجود يا بيه هو ممدوح إسماعيل أجدع منك ولا أيه؟ .... إتبرع للحزب بالملايين هترجعلك مليارات , مش هتدفع ضرايب .هتدفع عمولات ورشاوي وفلوسك تكتر وتزيد وكله بحسابه تخلص للحزب تحتكرلك حته من البلد ياإما حديد ياإما اسمنت أو سماد أو حتي أدوات صحيه! وآهي إسرائيل فاتحه لك دراعتها بالسلام والخير والكويزفرصه يا جدع تعبي وتغرف..( قشطة عليك مش تنسى تسبلى حبه وحياتك ) ومش مهم تارنا .. آه يا معيز! صدر لها الغاز والبترول برخص التراب.. علشان تعرف تشغل مصانع السلاح والدبابات والطايرات علشان تحارب الإرهابيين!! صدر لها الأسمنت والحديد .. علشان تبني الجدار العازل وتغتصب أرضنا للأبد ....وما تنساش رضا الكبير عليك .. يعني شوية صور كده ملونه للكبير من أيام ما كان عنده 40 سنه كده.. علشان تجاعيد وشه ما تبانش وتبقي مصيبه! ... وما تنساش ترش رشه كده علي فرقة حسب الله رؤساء تحرير جرايد رابسو- يذيل البقع من جدرها-علشان يطبلولك ويزمرولك شويه وبالذات الأخ بتاع الملوخيه والتقليه بيزمر كويس قوي! ... وفي النهايه أوعي تكون فاكر إن إحنا هنفضل ساكتين كده علطول يا حرامي إلحق نفسك وجهز بيتك اللي في لندن وعلي فكره هنجيبك من قفاك برضه علشان تتحاكم وترجع فلوسنا.ولا بارك الله لك في حياتك........

السبت، 12 مايو، 2007

فى سابقة لم تحدث لى من قبل .. جامعتنا اون لاين تنقل من لسه عايش


انهارده تدوينه فريدة من نوعها الصراحة ... اه والله فريده ... اول ما بدات التدوين فى المدونة ما كنتش اتخيل ان حد هينقل منى ... ومين اللى هينقل الموقع الرسمى لطلاب جامعة الاخوان المسلمين بالمنيا (جامعتنا اون لاين ) ... والله فرحت جدا جدا جدا .... يلا خير .. ربنا وضع سره فى اضعف خلقه بأه ... واحد لسه ماكملش الالف زائر والمواقع بتنقل منه ... انا والله قاعد مستغرب وعمال اقول ... هما عرفوا منين المدونة بتاعتى ... انا بأه اشكر القائمين على موقع جامعتنا اون لاين لأنها عملتنى حاجتين .. اول حاجة نقلت التدوينه منى وتانى حاجة انها بنقلها ده .. اديتنى دفعه قويه جامده اوى للاستمرار والتقدم بمجال التدوين والتعبير عن الراى .. ايه ياعم عمرو انت هبلتنا ..ايه الحكايه .. الحكايه يا سيدى ان موقع جامعتنا اون لاين نقل منى تدوينة -(تهنئة من عمرو سلامة الى اشهر عزاب مصر بمناسبه جوازه )- وقام الموقع بوضعها عنده فى باب فى الممنوع وادى ياعم رابط التدوينه فى الموقع اضغط هنا ... وعشان كده باه باقول لجمهور المدونة كلهم ... انتظروا منى تدوينات جامده اوى اوى ... ان شاء الله ...

الأربعاء، 9 مايو، 2007

الافرج عن الاخوان ... ورفع الحصانه عن نائبى الاخوان .. وفى يومها


الصورة من مدونة انسى
انا فرحت جدا اول ما عرفت ان محكمة مجلس الدولة رفضت قرار الاحالة للمحكمة العسكرية .. وكبرت وهللت كتير .. حتى ان ماما قالتلى بتقول الله اكبر على ايه ياعمرو ... قولتلها مش عرفتى قالتلى خير .. قولتلها مجلس الدولة رفض قرار الاحالة .. بابا سمع الخبر من هنا ومش صدقنى قاللى انت يتصطعبط ده قرار رئي الجمهوريه قولتله والله العظيم .. وعشان يصدق طبعتله الورقه من على نافذة مصر واديتهاله - اصله تعبان فا مش قادر يشوفها على الكمبيوتر - المهم شافها والله والله بكى وعيونة كانت تذرف الدموع وفمه كان ينطق بكلمة واحده الا وهى الله اكبر ولله الحمد ... فرح جدا جدا ............. بس فى حاجة مش مصدقها بس يارب تتنفذ قريت على اخوان اون لاين ان الحكم واجب النفاذ ..يعنى براءة يعنى افراج ... يعنى المهندس خيرت والاخوان اللى معاه هيطلعوا ... بس امتى هيطلعو وياترى ايه اللى هيجرى الايام الجاية ... يارب لا تخذلنا وافرج عنهم ... والله انا بادعيلهم ان ربنا يخلص اجرائات افراجهم ويطلعوا بأه .... ياااااااارب
سؤال :بعد قرار مجلس الدولة بالغاء قرار الرئيس ورفض احالة الاخوان للمحاكمة العسكرية..تفتكروا الدولة هاتعتقل مجلس الدولة امتى...؟
-------------------

قعدت الساعة تسعة ونص كده على النت امبارح يوم الثلاثاء يعنى ..فتحت نافذه مصر .. لقيت بيقولك رفع الحصانه عن النائبين عامر وابو زيد ... زعلت جدا جدا جدا .. واضايقت ... طب ليه هما عملوا ايه ... ده كله علشان قبضوا عليهم فى شقه مع خمستاشر واحد كانوا بيناقشوا مين اللى هيترشح فى الشورى ... امال بأه لو مسكوهم ومعاهم كلشنكوف ولا قنابل حارقه ولا بيخططوا لحاجة رهيبه ولا لتفجير مبنى الرئيس ايه اللى هيجرى ... وايه قبضوا عليهم والنيابه افرجت عنهم ومن غير ما يحققوا معاهم كمان معنى كده ان هما بريئين .. من التهم المنسوبة والموجهه اليهم .. ولما راحوا المجلس امال عثمان رئيسة اللجنة التشريعيه ونائبة مجلس الشعب (بالتزوير ) قالتلهم مبرووووك على الخروج يا باش مهندس عامر ... مش صح ولا ايه ... معنى كده كمان انهم بريئين .... دلوقتى بأه انا عايز افهم ... ليه اترفع عنهم الحصانه ... علشان عايزين يردوا على قرار مجلس الدولة اللى رفضت قرار احالة الرئيس الاخوان للمحاكمة العسكرية ... ولا ايه ... يبدوا وانا اتوقع ان الامر هيولع فى المجلس ... خاصة ان هما رفعوا الحصانه عن النواب فى خمس دقايق وفى وجود سته من اعضاء المعارضة ... اللى ربنا يعملوا بأه هو الخير .. ان شاء الله هيجى اليوم اللى هننتصر عليهم ... بس فيه حاجة محيرانى قبل ما اقفل على الموضوع وسؤال محيرنى ... ليه مبارك ما شالش لحد دلوقتى الحصانه من على النائب المعين ممدوح اسماعيل فى مجلس الشورى ؟ ... ليه مش ادرجوه من ضمن قوائم الممنوعين من السفر ؟ شوفوا بأه الظلم علينا اد ايه واحد قتل الف مواطن فى عبارة ومش اتحاسب على كده ولا اترفع عنه الحصانه ... عايز ايه من بلدك اكتر من كده .... معلش سؤال قد يثير اهتمامى واهتمام الكثيرين من بعدى وارجوا من الرئيس انه يجاوبلى عليه لأن دماغى لفه ... ماشى يا ريس .. ومش هاقول غير جملة واحده .. حسبنا الله ونعم الوكيل ...
--------------

الاثنين، 7 مايو، 2007

نقضى لما جاء فى العربيه نت ... وموافقتى على رابطة للاخوان

صورة للتقرير كما جاء فى موقع العربية نت
الفتره الاخيرة نشر موقع العربيه نت تحقيق صحفى عن ظاهرة المدونين او بلوجرز الاخوان ... هابدا انقض التحقيق وبعدين ابدا اتكلم فى راى الشخصى عن الرابطة واهدافها وعملها وغيره ...
--------
جاء فى التقرير الذى بثه موقع العربيه نت مغالاطات ومخالفات كثيرة جدا حتى ان اخويا محمود سعيد صاحب مدونة ابن اخ سمى التحقيق تقرير امنى ضد مدونى الاخوان ... شوفوا بأه قد ايه وصلت التسميه ... يظهر ان الموضوع خطير تعالوا نتكلم عن التحقيق كده واحده واحده.... الراجل اللى اسمه السيد زايد ده اللى عامل التحقيق .. بيقول فيه ان مدونين الاخوان بيعملوا حملة كبيرة اوى اوى اوى اوى علشان يعملوا رابطة لمدونى الاخوان المسلمين ... ايه الخرف ده يا سيد بيه ... مين اللى قالك ان فيه حملة وحاجات هبلة من اللى انت بتتخيلها دى ما كانت الحملة دى وصلتلى حتى ولا شوفتها ...باعتبارى مدون من الاخوان زى ما انت بتقول كده ... يا سيد يا حبيبى اتاكد والنبى من المعلومات دى .. ده ماكانش اخويا صاحب مدونة الغريب اقترح حاجة زى دى ... قمت انت عملتها حملة مره واحده ... ياااااااااااه اد اكده ... ناتى للفقره الثانيه من الموضع حين قال الاخ سيد زايد ان الامن وجه عده ضربات لمدونى الاخوان والذين يوصفون بالجناح الاعلامى ....ههههههههههههههههههههه وعليا النعمة انت ضحكتنى ياعم سيد ... جناح اعلامى ايه يابن الناس الطيبين دى ماكنتش شوية مدونات بنعرض فيها ارائنا وافكارنا .... وتقوللى جناح اعلامى للجماعة ... وبعدين االجماعة عندها جناح اعلامى ضخم .. ايه اللى هيخليها تروح لمدونات الاخوان اللى على النت واللى بيعرضوا فيها رايهم وكده ... ويروحوا يقولوهم عايزنكم معانا فى الجناح الاعلامى ... ههههههههههههه .... من غير ما الاخوان يعرفوا مين اللى صاحب المدونة دى ولا كده ... ولا تكونش فاكر ان الاخوان مديين اوامر لشباب الاخوان انهم يعملوا فيها مدونات من غصب عنهم ... امرك غريب يا مستر سيد ... ياعم الحاج ابقى اتحقق من اللى انت بتكتبه الاول مش تكتبلى كلام من دماغك وتهلس ... نيجى للنقطة تانيه من الموضوع يا شباب .. حين استضاف اخونا سيد المدون الاخوانى الفاضل ابراهيم الشرقاوى صاحب مدونة بتنفس بصعوبة ... انا ماعنديش مانع فى اى كلمه من اللى قالها اخونا ابراهيم .. وكله كلام مظبوط ... وكله كلام فى السليم ... ولا كلام اختنا الصحافيه ايمان عبد المنعم وبعد كده انتقل لنقطه مهمه ... اوى والنقطة دى هى التى اضطرت اخويا محمود سعيد صاحب مدونة ابن اخ انه يسمى التحقيق ده تقرير امنى ... الا وهى نقطه نشر بعض المدونات حين جاء فى التقرير :
جدير بالذكر إن أهم المدونات الإخوانية النشطة هي مدونة "أنا إخوان" لعبد المنعم محمود، والقصاص للجميع لمحمد القصاص المعتقلين، وبتنفس بصعوبة لإبراهيم الشرقاوي، و"إنسي" المتحدثة بصوت المعتقلين، ومش هنبطل لإبراهيم الهضيبي، وخربشة غريب، وطلاب الأزهر، ويلا طلبة، والكواكبي، ومش معاهم لمحمد عبد العاطي ..الخ.
-----------
انتهى نقضى للتقرير عند هذا الحد ... وابدا الان اتحدث عن حكايه الرابطة وكده .. علشان ماحدش يجى يقوللى اقترح او غيره بخصوص الرابط ه دى ....
انا غير موافق على الرابطة فى انها مش تكون حجر على المدونين فيما ينشرعلى مدوناتهم .. يعنى مش تيجى تشترك فى الرابطة يقوللك لابد ان تنشر كذا وكذا ولا تشتم ولا تنيل .... فهمتم قصدى ايه
اكون بأه موافق على الرابطة امتى ... لما تكون مهتمة بشؤن مدونى الاخوان وايدينا فى ايد بعض يعنى مثلا لو حبينا نعمل حملة نكون العنصر الفعال فى الدونات المصريه والعربيه والكل يبدا ينشر بانر للحملة والكل يكلم عنها ويشرح وجهه نظره عن الحملة المعموله ... ولو حد اعتقل مننا نبقى كلنا جاهزيين للرد من خلال مدوناتنا وكيانا الفعال على الانترنت ... اتمنى تكونوا فهمتونى ... اما بالنسبة لاقتراحاتى للرابطة هاقولها بعدين لما نيجى ساعه التنفيذ ....

الخميس، 3 مايو، 2007

من مستشفى دار الفؤاد ... مراسلكم عمرو سلامة

واجهة المستشفى ..تصوير عمرو سلامة
نظيف (رئيس الحكومة ) مودى ابنه مستشفى بيدفعله فيها فى الليلة 2000 جنيه علشان ابنه عنده شوية برد

فاكرين يوم ما انا قولتلكم انى رايح المستشفى علشان ازور بابا .. وفاكرين يوم ما انا قولتلكم انى عايز ايميل اى حد من جريدة الدستور عشان ابعتله الخبر ده .. اكيد لو متابعين هتفتكروا ... المهم... غلبت علشان وصل لأى حد من الدستور ... انا هاضطر انشر التحقيق- او ما تسمونه - للى انا عملته فى المستشفى .. ياريت تابعوا معايا وتقروا التحقيق باهتمام مش هقولكم مبالغ فيه ....
مستشفى دار الفؤاد اكيد سمعتوا عنها ... فى سته اكتوبر المستشفى دى ... كنت رايح هناك ازور والدى علشان اطمن عليه وكده وانا راكب الميكروباص من المؤسسه ورايح هناك سته اكتوبر لقيت يافطة بتقول ... مستشفى دار الفؤاد المستشفى الحاصله على شهادة الجودة والرعاية الطبيه على مستوى مصر وقارة افريقيا كلها ... لاحظوا معايا افريقيا ...المستشفى دى بتاعه وزير الصحة الحالى الدكتور حاتم الجبلى ... دخلت المستشفى وطلعت الدور التانى غرفة 2109 المهم وانا هناك كانت معايا والدتى قالتلى اصبر ياعمرو هادخل انا بالكارت وانت تدخل بعدى اصل هناك بالكارت واكتر من واحد ما ينفعش يدخل للمريض ..
صاله الاستقبال اللى كنت قاعد فيها .. تصوير عمرو سلامة
ماما دخلت وانا قعدت بره فى صاله الريسبشن فى الاستقبال اتأمل الوضع ... مستشفى على مستوى راقى صحيح مستشفى فيها امكانيات
عاليه جدا جدا جدا ...وغاليه كمان .. وبيتعمل فيها اكبر العمليات .. المهم ماما طلعت ودخلت لبابا اطمنت عليه وطلعت تانى وقولت لماما ادخلى لبابا وانا هاروح اصلى العصر فى الجامع واشوفلى حاجة اكلها واجى .. المهم صليت العصر فى جامع فخم فى المستشفى ... وبعد لما صليت قولت اقعد فى الجو المنعش شوية بره فى الحديقة بتاعه المستشفى .. وانا قاعد اقلب فى الموبيل بتعى .. واجيب فيه يمين وشمال ... والهوا يشرح القلب ... لقيت واحد من اللى شغالين فى المستشفى قاعد جمبى وبيدخن .... قاللى معلش يا استتاذ هاقعد الساعة دى جمبك ... قولتله ولا يهمك يا فندم اتفضل عادى .. قولت فى نفسى ليه يا واد يا عمرو ما اتعرفش معاه واضرب معاه صحوبيه ... المهم ... سالته اسمك ايه قاللى (س .م) وشغال هنا قاللى اه قولتله وقدرت تطلع من المستشفى ازاى ... قللى ما هو فى ساعة راحة كل ست ساعات ... المهم قعدت ارغى معاه شوية وكده وقلتله انت معاك ايه قاللى معايا بكالوريوس تجارة ... استغربت ازاى يا اخويا بكالوريس تجارة ايه اللى جايبك هنا ... فى المستشفى قاللى مش لاقى شغل .. مش لاقى .. قولتله طب وانت مرتاح هنا .. (انا كنت معتقد انه مرتاح واخر انتكه وتلاقيه كمان بيقبض الف جنيه ولا حاجة ) سالته انت بتقبض كام .. عارفين قاللى كام 400 جنيه .. قعدت اجيبها لبره واجيبها لجوه ازاى 400 جنيه فى مستشفى بتاخد فى الليله 2000 جنيه ... مستشفى بتاخد شئ وشويات ... قاللى انت عارف يا استاذ عمرو احنا هنا متعذبين اخر تعذيب كل شوية شتيمة وتهزيق فينا ... واقل غلطه تجيبنا بره المستشفى دى .. ده احنا بنتهزق فى اليوم يجى عشرتاشر مرة ... وشتايم بالالفاظ النابيه .. وبنقبض 400 جنيه فى وقت احنا بنخدم فيه المريض بخدمة عاليه ومتميزه .. (ودى الصراحة اناا معاه فيها ) المهم .. وجرجرته فى الكلام وسألته فى مسؤل من المسؤلين بيجوا هنا .. قاللى اخرهم كان من اسبوعين فاتلهفت على السؤال يا ترى مين .. انتو عارفين قاللى مين .. قاللى ابن رئيس الوزرا ابن نظيف .. قولتله خير كان عنده ايه الواد ده .. انتوا عارفين قاللى ايه .. ولله ما هتصدقوا ... قاللى شوية برد ... قاللى كان عنده شوية برد انفلونز يعنى ... قولتله انت ايه اللى عرفك قاللى ما انا اللى كنت الممرض بتاعه ... قولتله وحد جه زاره ... قاللى ايوة جمال مبارك جه وسوزان مبارك جت .. وكمان وزير التعليم جه ... ووزير الصحه جه وزاره كمان .. قولت فى نفسى يا ولاد انا لما يكون عندى حبه برد ابويا بيجيبلى مجموعة برد من الصيدليه بنص جنيه والله ... والله بنص جنيه ... وبابقى عال العال ... وزير التعليم يزوره مخصوص ليه ... هو الراجل ده فاضى اوى كده .... مش وراه وزاره فيها سبعه مليون طالب ... مش راجل مسؤل .... ايه اللى جرى يا ناس ابن نظيف قاعد فى مستشفى اليوم فيه بـ 2000 جنيه ... عشان عنده شوية برد امال بأه الناس ياعينى اللى تعبانه ومش لاقيه تغسل كلى فين من فلوس الدولة ... الناس اللى بتموت ومش لاقيه حد ييعالجها فينك يا نظيف منه حسبنا الله ونعم الوكيل ... انا مش باعاتبك علشان انت بتعالج ابنك لألألأ .. انا باعاتبك على التبذير والفلوس اللى بتنصرف وانت مش عارف ان فيه ناس تانيه اولى بيها والله اولى بيها ... المهم وانا قاعد بافكر كده ... وفى وسط الاسئلة المحيطة بيا .. لقيت الراجل بيقوللى اوعى تكون صحفى يا استاذ وانا مش واخد بالى ... قولتله ماتخافش يا اخويا .. قام من جمبى ومشى ... لقيت بتاع الامن بتاع المستشفى روحتله ... ضربت معاه صحوبيه اسمك ايه ... قاللى كذا كذا ... ومن الغربيه على فكرة .... المهم سلمت عليه وقولتله حضرتك شغال ايه ... قاللى زى ما انت شايف < امن> المستشفى وساعات بادخل جوه عند مكتب مرات الوزير الصحة (المستشفى بتاعه وزير الصحه ) ... قولتله حضرتك معاك ايه ... ليسانس اداب انجليزى ... وايه اللى جابك هنا ( كان هذا هو ردى الطبيعى عندما جاوبنى ) قاللى رزقى هو اللى رمانى هنا ... بقالك كام سنه هنا قاللى سنه واحده وبتقبض كام قاللى 450 ... قولتله بالله عليك 450 جنيه قاللى والله 450 جيه ... قولتله ربنا معاك .. قولتله هو ابن نظيف كان هنا من اسبوعين قاللى اه يا عم وكان عنده شوية برد وقعد عليهم عشر ايام ... قولتله وبتلقائية مين للى قاللك انه كان عنده برد ... قاللى احنا بنشتغل عسس هنا .. الخبر بيوصل لكله ... قاللى يابن الناس دول ناس فوووووووووووق خالص لما يجى ويدفع لأبنه هنا شئ وشويات وانا مش لاقى اودى ابنى الحضانه ... يبقى انت عايز ايه اكتر من كده .... قولتله ربنا يعينك ويرزقك من حيث لا تحتسب .... سالته لما نظيف جه الموكب بتاعه كان عامل ازاى .. قاللى يا سيدى كان نظيف سايق العربية ... وابنه قاعد جمبه وموتسيكلات وراه وقدامه .. وعربيته نوعهاا بى ام دبليو اللى هى الحوت دى .... قولتله كمان ... قاللى اه ... قاللى ده رئيس الحكومة عايزه يركب ايه يعنى .... قاللى انا كان كتفى فى كتفه ... كنت عايز اقوله يابيه انا شغال هنا من سنه وباقبض 450 جنيه ومعايا ليسانس اداب انجليزى مش عندك شغلانه .... الحقيقة الراجل كان بيتكلم معايا بصعوبه بالغه كان ناوى يعيط ... حاولت اهدى الموضوع .. قولتله فى حد من المسؤلين جه هنا تانى قاللى اه قولتله مين ... قاللى حسنى مبارك بس كان متكتم على الخبر ده .. ومن سنتين كده ... قولتله مين اللى قاللك قاللى الواد اللى كان شغال معايا هنا ومشى .... قولتله هى مرات الوزير هنا ... قاللى اه جوه ماسكة قسم الممرضات والعاملين بالمستشفى .. وهى لا دكتورة ولاحاجة ولو عايز تتدخلها عادى ادخلها ... بتستقيل اى حد .... انا كنت عايز امشى والوقت دخل على المغرب وانا محتاج امشى اشوف بابا تانى قبل ما امشى ... سلمت عليه وخدت نمرة موبايله .. ومشيت روحت لبابا سلمت ومشيت .. وانا راجع بافكر ناس عايش عيشه عاملة ازاى ... وسايبه الشعب بتاعها ياكل من التراب ... سايبه الغنى ياكل فى الفقير ... ونهبوا الدولة .. وخدوا فلوسنا ... حسبنا الله ونعم الوكيل فيك يا نظيف انت وحكومتك ... يارب نشوف فيك يوم ... سلام عليكم ... ياريت لو الموضوع ده اتنقل يتيكتب اسم المدونة ....

الأربعاء، 2 مايو، 2007

لما نواب الاخوان يعتقلوا.. عايزين بعد كده ايه

خلاص يا عالم ... امن الدولة عدت الخط الاسود مش الاحمر ..ايه يا اخوان .. عايزين بعد اعتقال نواب اخوان ايه ... لما يحاصروهم فى البيت اللى كانوا فيه لمده اربع ساعات واهم نواب شعب ... وكمان ياخدوهم 26 ساعة فى المعتقل ... ويباتوا فى التخشيبه ... عايز ايه يا استاذ محمد مهدى عاكف اكتر من كده ... كفااااااااااااااااااااايه بيانات ... كفااااااااااايه ادانات يا استاذ محمد حبيب ... كفايه تهديدات يا دكتور سعد يا كتاتنى ... كفايه كلام ... عايزين مظاهرات تنزل البلد دى ... عايزين نقولهم يا ولاد (..) انتوا عديتو الاخط الاسود .. مش استنى والاقى الدكتور سعد طالع ببيان يقول ... نهدد باعتصام ... هنقول للبرلمانات الدوليه والعربية والافريقيه .. طب وبعدين يا دكتور سعد ... هما هيعملولنا حاجة ... هيعملوا ايه ..هيعملوا ايه ... هما كان ليهم سلطه على مصر .... انا اطالب .. بمظاهرة تنزل الشارع .... علشان يعرفوا ان اعتقال اى شريف من البلد دى مش بالامر الهين ... احنا زهقنا يا اخوان ... مش هتصدق يا استاذ مهدى عاكف لوقلتلك ان شباب الاخوان بيفكروا يعملوا حاجة كبيرة اوى اوى اوى ... احنا يافندم .. عايزين خير للبلد دى مش اكتر والله ... وهاقول كلمة اخيرة للدكتور حشمت الراجل الجدع -ا نا باحب تصريحاته جدا - وحشتنا يادكتور
علي وعلي وعلي الصوت .. النواب في الزنازين ..... اتوحدوا يا مصريين ضد نظام بلطجى ظالم بلطجى ... مش هنخاف مش هنخاف حتى لو حطونا كلنا فى الزنازين .... ويبقى الاسلام هو الحل
--------
احب اقولكم ... انى متضامن مع اخويا محمد عادل (مدونة ميت ) فى مقاله الاخير

الثلاثاء، 1 مايو، 2007

تهنئة من عمرو سلامة .. لأشهر عزاب مصر بمناسبه جوازه


ضحكات عاليه ... كانت هى رد فعلى عندما علمت ان جمال مبارك عنده 44 سنه ولسه ما اتجوزش وانا استغرب طب ليه ما اتجوزش لحد دلوقتى اتابى ابوه كان مستنى لما يسلمله البلد ويبقى ادها .. كده انا فهمت التيته واللى فيها ... جمال مبارك متجوز واحده عندها 24 سنه بنت اشهر اثرياء مصر ... امال ايه يا هندسه لازم الاتنين يبقوا لايقين على بعض ... المهم بأه وبلاش نرغى كتير لأن كتر الرغى مش هيجيب ولا هيودى .. حبيت بس اكتب تهنئة للسيد جمال مبارك رئيس مصر القدم فى حفلة زواجه .. وبابعتله الشعر ده .. واللى مغنى الشعر ده هو الشاعر الفاجومى العظيم أحمد فؤاد نجم امد الله فى عمره واليكم الشعر .....

مبروك يا عريسنا
يا ابو شنه ورنه
يا واخدها وراثه
اطلب واتمنا
واخرج من جنه

ادخل على جنه
مش فارقه معانا
ولا هاريه بدنا
ولا تاعبه قلوبنا
ولا فاقعه مرارنا

ياعريس الدوله
افرح واتهنى
مااحناش كارهينك
لكن هارشينك
حتكمل دينك
وتطلع دينا